الله يخليكم ساعدوني شسوي مع هالساحر

السلام عليكم ورحمة الله وبركاته

راح اختصر قصتي قدر المستطاع لان قصتي طويلة ومعاناتي لها سنتين ونصف ياربي فرجك القريب

اولا احنا عائلة مستواها المادي متوسط ولله الحمد مافي يوم من الايام حسينا انو ابوي الله يحفظه مقصر علينا ابد
الله يازين هذيك الايام ياربي لك الحمد على كل حال

كان ابوي يعطيني مصروف البيت والباقي يخليه معاه وماكان علينا ديون
فجأة انقلبت الاحوال صار ابوي مايقعد في جيبه ولاريال واذا خلصت فلوسه يجي ياخذ من مصروف البيت واذا خلص المصروف يروح يتسلف من الناس قمت شكيت في الموضوع قلت لايكون ابوي مدمن

رحت فاتحته بالموضوع فين تودي فلوسك قال فيه شغلة بيني وبين واحد بيجينا من وراها خير كثير قلت كيف اشرحلي
قال مااقدر اقولك اذا تم كل شي قلتلك

المهم استمرينا على هالحال واستمر ابوي في سحب الفلوس وتراكمت علينا الديون وصارت اللقمة علينا بالحسرة قلت لابوي لين هنا وقف حرام عليك تاخذ فلوس عيالك وتخليهم بالجوع وتروح تعطيها هالحرامي الكذاب لاحظوا كنت اتوقعه حرامي بس وكنت اقول ايش يخلي ابوي يصدقه طول هالمدة مامل منه ومن كذبه ويبديه على نفسه وعياله ولا المصيبة يروح يتسلف له

سمعته دق عليه ويقول الحين تدبر الفلوس ضروري وانا ماقدرت اسكت صارت مشادة كلامية بيني وبين ابوي صار بعدها يكلمه في الخفاء

بعدها دخل ابوي السجن بسبب تراكم الديون عليه سلمت امري لله وحاولت اوفر الريال عشان مصاريف اخواني كان الراتب ماشي ينزل كل شهر لكن الخبيث كان يكلم ابوي في السجن ويقله لازم تدبر فلوس من عند عيالك ماتبغى شغلنا يمشي واجيبلك الملايين واخرجك من السجن وصار يسحب ابوي مصروفنا ويعطيه اياه

اتذكر ذاك اليوم كنا نستني الراتب وناشفين من الجوع واحد من اخواني يقول اذا استلمنا بكرة بشتري جبنة افطر عليها اذا رحت المدرسة مسكين كان محروم منها :( دق ابوي كلم اخوي قله تاخذ الفلوس تروح توديها بيت الرجال هذا انا انفجرت وقتها وقلت ماعندنا اكل وتبغى تعطيه جلس يبكي في التلفون ويقول ماتبغوني اخرج من السجن المهم اصر يعطيه والشهر كله يبغانا نعيش على خمس مية ريال وكان ايامها موجة غلاء الاسعار

مرت علينا ايام قاسية كنا ناكل وجبة وحدة باليوم واخر الليل كنا نتلوى من الجوع غير ايجار البيت حل موعده ومو راضي يصبر علينا راعيه وشفنا الذل ياربي لك الحمد

بعدها سبحان الله بالصدفة اخوي وصاحبه كانوا يتكلمون مع بعض عن هالرجال وذكر اسمه قله موهذا اللي ساكن في الحي الفلاني قله اخوي الا قال هذا ساحر معروف

طبعا ابوي خرج من السجن قبل رمضان العام وتوقعت انتهى الموضوع وارتحنامنه ولكن لازال مستمر ورجع ابوي لعادته القديمة وقبل كم يوم واحد بيشتكي على ابوي متدين منه قلت امرنا لله بكرة بيجينا مبلغ ونعطيه جاء بكرة راح ابوي اخذ الفلوس واعطاها الساحر والرجال صاحب الدين تركه وصار مايخرج من البيت عشان ماينمسك ويدخل السجن مرة ثانية ويخليني لين اروح المطبخ ويدق على الساحر يقله ايش صار بموضوعنا عجل الديانة يلاحقوني
مسكين مصدق انه بيعطيه فلوس:(الحين افكر ابلغ الهيئة بس اخاف مايلقون دليل اذا فتشوا بيته لانه حويط
وهذا الرجال كان ابوي يعرف اهله من زمان بعدين اهله يقولون سافر وفقدوا الرجاء من رجوعه حسبوه مات بعدين رجع من السودان شكله تعلم السحر هناك

لي كم يوم اشغل الرقية على الكمبيوتر واجلس مع ابوي واتصفح المنتدى لانه مستحيل يعترف انه مسحور ويتعالج
وانتظر نصر الله القريب لاتنسوني من صالح دعاءكم