الله يخليها الست ابرة

السلام عليكم و رحمة الله و بركاته

هحكيلكم حكاية .. لا مش حكاية شعب ... حكايتى مع التخن و الريجيم
طول عمري و انا تخينة يعنى اتولدت كده
و عشان اتولدت كده قدرت اتعايش مع الوضع من غير ما احاول تغييره
خصوصا ان تخني مش باين عليا اوي و مش بيأخرني عن اى حاجة
بس عارفة اني بتصنف عند الناس على انى مليانه
كنت بتقهر لما اشوف ماما تشترى لاختى الاكبر مني ترنجات و بجامات
و انا ؟؟؟ جلاليب و عبايات زيي زى ماما
و عشان ماما عارفة اني مليش ذنب في انى مليانه كانت بتمنعنى اعمل ريجيم
عشان المذاكرة و التركيز و صحتي
و لما خلصت الجامعة كان لازم اخف شوية عشان اقدر الاقي شغل في القطاع الخاص
اول ما اتخرجت يعني من 4 سنين رحت لدكتور علاج طبيعي
الدكتور قاللي انا شايف انك كده مناسبة و مش محتاجة .. اطلعي كده على الميزان ؟؟
طلعت على الميزان و كانت المفاجأة ليه الراجل سحب كلامه في ثانية :icon33:
كنت وقتها 97 كيلو و طولي 168 حقيقي مش باين عليا من الامام
لان مصيبتي كلها في اردافي
المهم قاللي انتى محتاجة تنزلي بس 10 كيلو
و كتبلي نظام غذائي اقل حاجة اقدر اقولها عنه انه بشع و يقطع الكبد من الجوع
مشيت على النظام يوم و نص و كنت وقتها مقدمة في وظايف
ربنا انقذني و قبلت في واحدة منها
و في اجتماع من الاجتماعات المديرة جمعت البنات بس عشان تدي ملاحظاتها
قالت لواحدة انتى لبسك ضيق وسعي يا ماما و للتانية انتى كسلانة و مش شيك ابدا
و طبعا كان من نصيبي تعليق من الواقع طلع من راسي .. قالتلي انتى يا .... محتاجة تنزلي من ورا شوية اتحركي هو انتي مبتشتغليش و لا ايه :icon33:

طبعا انا خدتها بهزار و من غير حساسية لانى متخيلتش نفسي اقوم امسك فى رقبتها و اضيع على نفسي الوظيفة
و مرت الايام و الشهور و انا بشتغل و شغلتي كانت فترتين ليل و نهار
خسيت كتير جدا جدا بس مكنتش بوزن نفسي و كنت فرحانة اوى
لحد ما حصلت ظروف ما يعلم بيها الا الخالق سبحانه و تعالى
و سيبت الشغل بخناقة كبيرة مش عشان كرامتى المرة دى لكن عشان كرامة زميل لينا اتوفي في الشغل
و المديرة الله لا يسامحها عملت معاه دقات نقص كتيرة اوى و مع عروسته الارملة من ناحية مستحقاته الماليه و غيره ( الله يرحمه يا رب كان انسان غير عادى فى اخلاقه و ذكاءه )
المهم سيبت الشغل بعد سنة من تعيينى فيه و قعدت في البيت و من ساعتها و انا قاعدة زى ما انا
سافرت شوية بره مع اسرتي و رجعت من كام شهر
شهادة ميلادى بتقوللي انا 26 سنة يعنى في مرحلة الخطر عشان لسه متخطبتش
طيب و انا ذنبي ايه من ساعة ما اتخرجت و انا مسافرة بره و السنه اللى اشتغلتها اتقدملي واحد بابا موافقش عليه
واحدة صحبتي ( هى كمان مليانة شوية :42: بس مش اوى ) قالتلي يا هبلة انتى شايفة احنا عاملين ازاى
كل واحد عايز يتجوز هيكل عظمى زى اليسا و مثيلاتها تقوليش هيشغلوهم فى الفن :icon28:
و اتفقنا نروح لدكتور تاني .. رحنا انا مشيت على الريجيم يومين و نص بس و قلت حقي برقبتى
مقدرتش ابدا ابدا مبحبش الجوع خالص و مبقدرش عليه و كمان انا اكلي عادى جدا مش مفجوعة يعنى و لا بحب الحلويات و لا السمين ... افتكروا يا جماعة ان انا اللى مولودة بالجسم ده يعنى مش انا اللى عملته
صحبتى نزلت من 85 كيلو ل 72 و وقفت و رجعت طبعا زادتهم تانى بعدها بفترة
اما انا ........................
حبيت استغل فرصة انا ماما و بابا مش هنا انا بس و اتنين اخواتى شباب اكلهم مش كتير
و قررت اعمل ريجيم و انزل شوية
رحت المرة دي لدكتورة مش دكتور عشان تفهمنى اكتر
و و زنت نفسي طلعت 95 كيلو و شرحتلى نظام ريجيم انا شايفة انه سهل لان ماما مش هنا يعنى لا طبيخ و لا محاشي كل يوم :)
و بعد الشرح كتبتلي على اربع زيوت عطرية اخلطهم على بعض بمقادير معينة و اعمل بيهم مساج لمنطقة الارداف و اى منطقة مليانه عايزة انزلها
لحد كده و الامور كانت ماشية تمام اوي و فجأة قالت الدكتورة : و مع الابر :09: مش هتحسي ابدا بإكتئاب الريجيم و لا بالجوع و مش هتوقفي و تستمري فيه عادى جدا و انتى مبسوطة
و طلعت من الدرج 5 ابر صغيرة خالص حطيتهم في ودني الشمال
الكلام ده من 3 ايام فاتو و الحمد لله انا مرتاحة اوى و مش بجوع ابدا و الاهم من كده ان احلام اليقظة اللى كانت بتجينى زمان و انا عاملة ريجيم على هيئة مكرونات و صوانى فرن و بطاطس محمرة و رز و مخبوزات
الحمد لله اختفت كل الهواجس دى و مش بفكر في الاكل خالص
ربنا يعدى الشهرين دول على خير و اقدر انزل شوية قبل ماما ما ترجع بالسلامة بأكلها اللذيذ

____________________________

انا كتبت الموضوع عشان ادخل كل يوم و اشجع نفسي و اسجل اد ايه نزلت كل عشر ايام
و بالمناسبة الطيبة دى هكتبلكم على خلطة الزيوت .. لسه مش جربتها ناقص نوع زيت العطار قال هيكون موجود يوم السبت ان شاء الله

الخلطة : زيت عرعر 5سم / زيت زعتر 5سم / زيت ليمون 2 سم / زيت برافين 20سم

__________________________

و ربنا يوفقنى و يوفق كل واحدة بتعمل ريجيم