اللي تفكر في مستقبل شعرها وتبغاه جميل على طول حتى مع تقدم العمر تتفضل

اسمعو يااخوات
انا زيكم اعاني بين كل فتره وفتره من مشاكل في الشعر والبشره وغيرها
لكن والله ماعمري جربت نظام غذائي صحي بعيد عن المواد السيئه الا ولاحظت النتيجه على كل جسمي بما فيهم شعري
والنظام هذا غير متعب بالعكس اغذيه لذيذه ممتعه سريعة التحضير ومشبعه وصحيه
نبدأ بالشعر مع ان اي شي اذكر له علاقه بالبشره ايضا
اصلا البشره هي الجلد عموما ولو جلد فروة الرأس كان صحي وقوي ومافيه متاعب حيكون شعرك قوي وصحي وانتي حتكوني سعيده دايما بالنتائج
اولا لازم يكون في بيتك مواد زي اللي حذكرها الآن وهي رخيصه ولذيذه وممتعه ومغذيه زي ماذكرت ودايما حاولي تكون في بيتك زي ما الرز والعيش والاندومي والببسي مايخلو منه بيتك --- اعتقد تقدري انه تستبدليها بهذي الاشياء -- ولو تبغي تكون موجوده الى جانب غذائك عادي بس بعدي عن الاشياء الضاره -- ووالله في دراسه نشرت وتلاقيها على النت اكتشفو انه السكريات والمشروبات الغازيه والدهون الزايده من اكبر المصايب على صحة الانسان والجلد بشكل خاص
واذا جلدك ماكان صحي وقوي لاحتشوفي بشره مثاليه ولا شعر قوي وحتشوفي التساقط والهم
نبدأ ببعض هذي الاغذيه
1-الحبوب والمكسرات الخاليه من الملح والسكريات مثل
اللوز
الفستق
الزبيب
الجوز
جوز الهند بانواعه واشكاله المختلفه
فول الصويا الحيوي
القمح الحيوي -او العادي-- او اي نوع من القمح متوفر
الرز الحيوي -- او العادي -- او اي نوع من الرز متوفر
الشعير لو تحبي وانتي حره كيف تستخدميه وباي طريقه
وبعض التوابل الاخرى المفيده مثل القرفه والينسون والقرنفل واشياء ثانيه انتي عارفتها اكيد متواجده في كل بيت
نجي للمواد الغنيه بالكالسيوم
2-الحليب والافضل قليل الدسم وترى طعمه يجنن ولازم لازم يكون طازج مثلا المراعي اللي قارورته شفافه وطويله او الصافي او اي نوع تحبيه بس ضروري مايكون مبستر او متعبي في علب ورق
والطازج تستخدميه خلال يومين ثلاث
اذا مافيه استخدمي نيدو
بس مااعتقد ابدا ان المتعبي في ورق فيه فوايد ابدا لأني مغلي فوق درجة حراره عاليه جدا ومنزوج منه كل الفوايد
ايضا الزبادي وماادارك مافوايد الزبادي ياسلام
والافضل كمان يكون قليل الدسم ويستهلك خلال ايام وهي مدة الصلاحيه
الاجبان بانواعها البعيده عن الملح والدهون والزبده
مثلا الحلوم او جبنة الطيب او الجبن الابيض وانتي وخياراتك عاد واذا تحبي الشيدر كويس والله ولذيذ وقليل الدهن وفيه اجبان معلبه مكتوب عليها قليلة الدسم برضو تفرق في الطعم ولذيذ ومافيها دهن كثير وملح
الحلوم مفيد وتقدري تسويه باشكال كثيره واذا ملحه زايد انقعيه شويه في مويه او اشويه على صاج او مقلاه او شويه واتمتعي بالطعم الرائع
3-الخضار والفواكه بانواعها ومااقيدك فيها ابدا ولكن اكثري من هذي الخضار
الجرجير -- البقدونس-- الجزر-- النعناع--- السبانخ-- البروكلي--- الملفوف -- الفجل--- الطماطم-- الليمون ---الفلفل بانواعه---

الفواكه اكثري من هذي الفواكه --- البرتقال -- القريب فروت--- التفاح-- التوت-- الحبحب-- الموز وهذا اكثر شي متوفر طول السنه
والباقي على كيفك وبرضو لها فوايد زي المانجو والشمام والعنب والفراوله والبخاره وغيرها كثير -- سبحان الله انا اشوف اجمل حلويات الدنيا هي انواع الفواكه وهي من صنع الخالق سبحانه

الزيوت -- زيت الزيتون البكر الممتاز من اي ماركه تحبيها --- زيت جوز الهند الاصلي --- زيت الصويا --- زيت دوار الشمس للطبخ والافضل هو نور وعن تجربه

اللحوم -- اللحم الاحمر بدون دهن والافضل لحم العجل او البقر او اللي تحبي --- لحم الدجاج بدون جلد --- الاسماك بانواعها

الخبز --- الخبز الحيوي او الاسمر او المليء بالنخاله

طبعا فيه اشياء كثير ومواد غذائيه كثير بس انا ماابغى اعقدك عشان تستفيدي وتشوفي النتايج في اسرع وقت
اعطيك مثال على وجبة الفطور وراح تدعيلي والله
حطي في زبدية شوية قمح او شوفان وحطي كمشة من حبات اللوز البجلي او اي مكسرات تحبيها مع كمشه من جوز الهند مع كاس حليب ساخن او بارد واستمتعي باجمل فطور لذيذ وشهي ومشبع وبامكانك تضيفي سكر تروبيكانا الاصفر المعروف بدون سعرات حراريه وانا استخدمه من سنين حتى مع الحلويات وواحد يكفي

على الغدا جربي هذي الوجبه --- حلوم مشوي ااو عادي او اي نوع جبنه --- ويقطع مربعات -- يوضع مع نعناع مفروم وجرجير مفروم وطماطم وعصير ليمونه -- واي خضار تحبي تضيفيها وزيت زيتون فقط بدون ملح او اذا حبيتي اضيفي الملح ولكن بكميات قليله
اذا حبيتي ضيفي دجاج مشوي ومقطع قطع للسلطه او كليه لوحده مع السلطه على راحتك


العشا حاولي يكون زبادي مع فاكهه القدر اللي تحبيه

وحاولي تنوعي في الوجبات لكن لاتطلعي عن الخيارات الموضحه هنا -- اقصد لا تحطي شي فيه دهون عاليه او سكريات او حلويات
والحلويات تقدري تاكليها مره بالاسبوع وبالقدر اللي تحبي بس الافضل انك تستغني عنها بطبق قمح او كورن فليكس قليل السعرات مع حليب وسكر وجوز هند ومكسرات واستمتعي بالطعم والله كأنك تاكلي أم علي وعلى ضمانتي

ايضا اخر وأهم وافضل نصيحه اكررها دايما هي : الشاي الاخضر -- تشربيه مره او مرتين باليوم وبشكل مستمر طوال حياتك فهو يقيك من امراض سيئه كثيره وصعبه --- ويحمي جلدك واعضائك بعد الله ويساعد على بقائها شابه


هو الافضل شربه بدون سكر طبعا ويكون بعد الوجبات مو قبلها ولا على معده خاويه
داومي على شربه يوميا حتى لو كاسه وحده نص اليوم
ايضا الاستغفار باستمرار والصدقه بنية اصلاح اي امر في حياتك ماتصدقي قيمة هذا العمل والنتايج الفوريه له
حتى لو كان مجرد تساقط في شعرك
اتمنى تستفيدو من تجربتي الشخصيه واتمنالكم حياه سعيده مليانه خير
وربي حسيت اني في الحلقه الاخيره يالله مع السلامه