ولدي لما كان عمر خمس شهور كان صحته حلوه بس الناس ما تخلي حد في حاله
ومن عيونهم صار نحيف ونفسي ترجع صحته واعرف وصفات الامهات اللي عيالهم مربربين

مشكوووووووووورة

اهم شي الرااحه والنوووم الكافي للبيبي..وطبعا الاكل الصحي واحسن شي الخضار المسلوقه تعطينه اياها عالعشا..

وحده من اهلنا تسوي جذه لبنتها وماشاء الله تبارك اللله..صحه وتختوخه ولوونها احممممر مع انها سماريه شويه ..بس تجنن ماشالله وربي عاطنها ملامح ماشالله جميييله جدا وجذابه ..

انا ولدي يوم ربيت كان وزنه 2 كيلو و 700 جرام و بما انه جسمي مليان كل اللي ايشوفه ايقول بس هذا اللي طلع منج؟؟! و الكل ايعلق على انه ضعيفوووون.. !

طبعاً اي أم لازم تتظايق مع كثرة التعليقات..

لكني اعرف انه مب مهم وزنه اول ما ينولد.. المهم عقب.. على الرضاعه و الاهتمام بيتعدل..
و كانت امي اتقوللي رضعي الياهل و رقديه.. كل ما رضع و نام كل ما تحسن و زنه. .

المشكله انه ولدي كان نحس لا يرضع زين و لا ينام زين...! وااايد عصبي.. طول الوقت صياح..

قلت مب مشكله يوم بياكل بيتعدل وزنه..

بديت اعطيه من يوم عمره 3 شهور عصير (يح) و تفاح مهروس او بطاطس مهروسه.. بكميات بسيطه

4 شهور : عيش مسلوق مع الخضروات ، عصير (اسلق تفاح على مشمش على موز على الفواكه الموجوده مع شوية سكر عقب اضربه ف الخلاط ) والعصير كنت اسوي له كميه لمدة يومين احطه له ف الثلاجه ، و اسوي له شوربه ( الخضروات الموجوده عندج اسلقيها و ممكن اضيفين لها شوية عدس و عقب اضربيها ف الخلاط ) اتقدرين اتسويله كميه لمدة يومين و اتحطينها ف الثلاجه..


6 شهور : ضفت له الدجاج و السمك مع العيش..
و هذي مقادير الوصفه السحريه :) ( ييبي قدر و حطي فيه شوية عدس ، شوية عيش ، بطاطس مبشور ، جزر مبشور ، طماطم مبشوره بدون القشر..ممكن اضيفين له شوية بقدونس.. و حطي معاه سمك او دجاج و اسلقيه لحد ما ينهرس) هذي كانت الوجبه الرئيسيه لولدي وماشالله عليه كان كله صحه الله يحفظه..

و الشي الثاني كنت اعطيه عصير الافوكادو والله انه ايسمّن ، حطي ف الخلاط شوية افوكادو مع حليب الاطفال مه شوية سكر .. بس لا اتكثرين له عطيه منه على اليومين ..

8 شهور : كنت اعطيه من كل شي تقريباً + بين الوجبات لازم اعطيه بسكوت او سمّون او اي شي يمسكه ف إيده و ياكله..


من 10 شهور و فوق :ايلسه فالكرسي الخاص بالاكل .. و أأكله انا اول و يوم اشوفه كل كميه مناسبه اخلي له شوية اكل قدامه و اخليه بروحه يلعب و ياكل عقب اييب له صحن فيه فواكه و اخليه ياكل بروحه.. طبعاً ما ااكله وايد اول شي.. عشان يقدر ياكل بروحه لين يشبع..

الحين ماشالله عمره سنه و شهر.. والحمدلله صحته وايد زينه و وزنه مثالي.. و اي حرمه اتشوفه و عندها ياهل تسألني شو اتأكلينه.. الله يحفظه و يخليه..

سوري على الاطاله و اتمنى تستفيدن من تجربتي..