نصيحه من اخت مجربه خليك بعيد حبك يزيد

انا اهل زوجي عسل انا وياهم مثل اهلي وسكنت جنبهم الجدار بالجدار وندمت ندامه بس مااقدر اتكلم والحمدلله بعد ثلاث سنين فرجت اهل زوجي باعو بيتهم وانتقلو لبيت اكبر وحي ارقى وانا انتقلت لحي بعيد عن حيهم

السلبيات
انا من الناس الي مااحب احد يدخل علي فجئه بدون موعد اقله لو خمس دقايق
وياكثر ماتعرضت لمواقف وخاصه من ابو زوجي يوقفون عند الباب جميع هو وزوجي ويدخل ابوه معه الظهر واتفاجى انا باصواتهم بالصاله يسولفون واكون لابس لبس مشخلع وانحشر بالمطبخ لحد مازوجي يجيبلي جلابيه من الدولاب
او اخوات زوجي يجوني يبون اي شي ويكون مرات شكلي مبهذل جالسه اشتغل ومرات اكون مزيته شعري او بيتي محيوس جالسه ارتبه ولازم يشوفون كل شي لاني مااقدر اخليهم بالباب وانا داخله اجيب الحاجه لازم اضيفهم بالصاله

غير انهم يعرفون من وين رحنا وين جينا ويدقون علي يقولون اذا بتروحين شي اليوم ترا فلانه تبي السوق او المكان الفلاني وصلوها على دربكم وهذا طبعا شبه يومي مع انهم عندهم ولد ماتزوج بس زوجي خدوم ولا يرفض لهم طلب يرحم خواته وانا افرح اذا خدمهم احسهم مثل خواتي بس دايم يصير فيه مواقف محرجه مثل بنطلع تمشيه ويعرفون استحي اني ماقلت لام زوجي او خواته الصغيرات

ولو بنسافر لمكان قريب لمده ثلاث ايام لازم يعرفون لانهم بيفقدوننا واغلب المرات اجامل واخذهم معي

واذ كان عندهم ضيوف او وحده من اخوات زوجي والده اجي اساعد من الظهر

واخواني لو الموت مايدخلون عندي يستحون من اهل زوجي يشوفونهم جايين معقدين الله يهديهم كانهم اختهم


ومع ذا كله اهل زوجي عسلللل ومره طيبين معي ودايم يدعون لي جزاهم الله خير بس انا طبعي مااحب حياتي تكون كتاب مكشوف اهلي وهم اهلي مو كل شي يعرفونه عني وسكنت بجنب اهل زوجي لو اعطس شمتوني صوتي وقرشعه مواعيني كله عندهم

بس يالله تجربه حلوه لازالو اهل زوجي يمونون علي اكثر من غيري وتمسك مع اخوات زوجي يجون يزوروني بدون موعد مسبق بس قبل يوصلون بخمس دقايق بس اذا صرت كسلانه او معفوسه انا والبيت تعذرت اني معزومه او ماني بالبيت

ادري كثرت القرق بس حبيت انقل لك تجربتي


اختي ادرسي الوضع قبل وشوفي الايجابيات والسلبيات حتى ماتندمين انا على كثر تفهمي لاهل زوجي ومحبتي لهم بس ماحبيت السكن جنبهم

م انصحك تسكنين مع اهل الزوج وبس مابكثر كﻻم

نوعيه العلاقه مع الاخرين احنا اللي نحددها مو البعد والقرب من المسكن
والزوج اللي مالزوجتوا اي اعتبار ولا كرامه عندوا ويفرض عليها واجبات الولاء الطاعه لاهلوا
ماراح تفرق معاه بعيد ولا قريب منهم
وام الزوج النكديه ماتسلمي منها او كلامها سواء كنت بعيده او قريبه منها
الباين من خلال كلامك ان اهل زوجك ناس مسالمين وفي حالهم ومحترمين
ولوكانوا غير كذا كنتي ذكرتي عيوبهم من بدايه الموضوع
اذا زوجك محترمك وعارف حقوقك فلا تخافي اطلاقا من السكن تحتهم
وخذي الموضوع من زاويه ايجابيه بيتك اوسع وزوجك يصل اهلوا اكثر
والرك عليك وعلى حدودك اللي تحطيها والتنازلات اللي تقدميها
واهم حاجه حطي هالكم كلمه حلقققققققه في اذنك ترتااااااااحي
اهل زوجك ماهم اهلك فلاتتوقعي منهم الحفاوه بزياده لانوا مو مطلوب منهم هالشي
اهل زوجك وامه وابوه كبار زي امك وابوك لهم كل الاحترام والتقدير والتوجيب
لكن لاتضغطي على نفسك كل شي بحدود المعقول
لاتحاولي تتميلحي لاهل زوجك وتكثري الزيارات والحاجات اللي ماهي واجبه عليك
لان الشي اذا زاد عن الحد ينقلب للضد والميانه الزايده ماهي حلوه نهايتها مشاكل
عاملي الناس بالحسنى والكلمه الطيبه والذوق لله اعيد واكرر لله وللاجر
مو لاجلهم لان الناس ممكن تخذلك او ماتعاملك بالمثل
يعني لاتتوقعي رد المعروف لانك راح تتعبي
لاتدققي لانك انتي اللي راح تتعبي بالنهايه وتشغلي تفكيرك بالتوافه
واترفعي عن صغار الامور
يعني لو جاك منهم شي يضايق بسيط معليش حتى الاهل يجي منهم
واستخيري وتوكلي على الله واسكني جنبهم
وان شاء الله يكون البيت الجديد من النواصي المباركه عليكم
الله يسعدك

لو أنا ما أوافق
و الله مش قصدي احرضك او اتهم اهل زوجك بشيء بس عندي قناعة ان أهل الزوج و الزوجة أفضل شيء يكونو بعاد و محترمين بعض و كل واحد له خصوصياته و راحته في بيته
ما قصد مشاكل كبيرة و كذا بس شوفي مثلا الأمثلة اللي خطتها لك الأخت ديالا مثلا و غيرها كثييييييير

ما اشجعك توافقي لأن كثر الإحتكاك يولد المشاكل
مهما كانت علاقتكم حلوة الحين لازم مع القرب يصير فيه حساسيات بينكم وتشيلو في قلوبكم على بعض ....خلي علاقتكم رسمية وحافظي على احترامهم وواصليه....افضل من تنقلين عندهم وبعد فترة لا قدر الله تصير مشاكل وتتقاطعون