السلام عليكم و رحمة الله و بركاته
جداويه حبيبتي الله يفرج همك و يسهل زواجك و يصلح بين أبوكي و أمك, ترى تابعت كذا رد ليكي في كذا موضوع و الشهاده لله أنك عجبتيني بأخلاقك و عقلك و تواضعك

حبيبتي عارفه مشاعرك و قد ايش البلكونه تدي شعور حلو أنك عروسه و أميره و حاجه كدا مره كول
بس برضه ممكن تعوضي عن البلكونه بحاجات و حركات غيرها
يعني ترمي ورد و أنتي نازلة من الدرج أو أنتي ماشيه عالجسر
يعني حبيبتي لا تخلي البلكونه عقدتك ممكن أي شي ثاني يحل مكانها

حبيبتي شوفي قاعة رهام بحي الصفا
هي فيها بلكونه :) و عاليه
و القاعه مرتبه و بسيطه وللأمانه مو مره فخمه لكن نظيفه جدًا و خدمتها كويسه
بس مشكلتها تقريبًا في الطاولات مره مو مرتبه و الكراسي تدخل في بعض لأني حضرت فيها فرح و الناس كانو مره كثير فيا دوب الوحده كنت تعدي بين الطاولات عشان تسلم عالناس
بس بما أن فرحكم صغير ممكن تحطي الطاولات على قد معازيمكم بالضبط عشان تخلي فيها مساحه للمرور ، و تغيري شويه من ديكور الطاولات بالمفارش و الورد و يعني كم حاجه بسيطه كذا
بس سمعت (ماني متأكده) أنها بـ 30 الف ريال
أنتي روحي و شوفي و تأكدي يمكن تطلع بأقل ، لأن السعر هذا كان في الصيف و أكيد في الصيف أغلى ، بس برضه زي ما قلتلك مو مره متأكده أنها بـ 30 يمكن تكون أقل ، بس أكيد مو أكثر


و كمان عندك القاعات هذي شوفي يمكن تلقي شي يناسبك

شوفي مركز أبو زيد يقولو فيها قاعه اسمها السلطانه ،
و برضه شوفي جزيرة الشراع اللي في الكورنيش أعتقد أن فيها قاعه ،
و شوفي نادي الخطوط السعوديه اسمع كثير أفراح تتعمل فيه بس مدري ممكن لأي أحد و لا لمنسوبيها بس ،
و برضه شوفي فيه فندق جديد اسمه روتانا في الحمرا فيه قاعه
، و شوفي الراديسون ساس ( حياة ريجنسي سابقًا) فيه قاعه حلوه
، و الشيراتون قاعته صغيره و حلوه ، و فندق البلاد برضه ،
و حاولي تمري على فندق الحارثي بما أنك تقولي من زمان عنهم
لأنهم عملو فيها تجديدات مؤخرًا و ترى اسمع كثير انه حلو

برضه عندك فندق الواحه ،
أنتي أكثر شي ركزي عالفنادق الـ 4 نجوم لأن هي قاعاتهم اللي تكون صغيره و نظيفه و سعرها حلو بس طبعًا مشكلة جداويه الأزلية هي البلكونه :)
بس من جد مره مره شوقتيني اسألك و سوري عاللقافه هو أنتي ملكتك كانت فين ؟


و عالعموم حبيبتي أنتي حاولي تمري على القاعات اللي قلتلك عليها يمكن تلقي طلبك ، و إذا ما عجبك قوليلي عشان ادورلك أكثر ،و أنا بأسألك صحباتي و معارفي و بحاول اساعدك في الموضوع هذا و لا يهمك أحنا زي اخواتك لازم نوقف معاكي :)

بس جداويه بعد أذنك حبيبتي حبيت اسألك بما أنك مريتي عالأوركيد و الكازار، ما تعرفي كم سعرهم؟ لأن حابه اعمل مناسبه فيه ومره عاجباني القاعتين هذي

أستناكي .. أشوف ردك على خير :)

السلام عليكم و رحمة الله و بركاته ..

amera_saudia ..
يا حبيبتي أنا أقدر أسويها في الهواء الطلق ..
و على مسبح و حديقة وكل شي يتزبط ..
و أقدر أسويها عالبحر كمان ..
و فكرت فيها .. و مرة عاجبتني ..
و أنا أحب الستايل دا ..
بس أنا أمي و أبويا مطلقين :06: ..
و طول ما هو بيت أبويا .. أمي ما راح تحضر :06: ..
و أنا ماني ناقصة نحس و مشاكل و دعاء وتسخيط
من أمي :06: .. و نهش في لحمي من القرايب
والأهل !!
يكفيني إللي فيا وماني ناقصة :06: ..
فهمتي ؟؟

و قلت لك أهلي رافضين شي إسمه إستراحة ..
بــــالــــــــــــمـــــــــــــــــــــــــرة ..
و حتى إذا سويته في إستراحة ..
محد حيجيني ولا حتى صاحباتي !!!!

عشان كدة أبغا أسويها محدودة و صغيرة و برة البيت ..
في قاعة صغيرة و حلوة و فخمة و مرتبة ..
بس عشان أسكت أهلي و خلالالالالالالالالالالالالالاص
يسيبوني في حالي ..
تعببببببببببببببببببتتتتتتتتتتت :06: والله تعبت !!


و بالنسبة للمطربات إللي قلتي عليهم ..
ما أعرفهم :23: ..

بس أظن أشواق السامر قد حضرت لها
فرح وحدة من البنات ..
هي كدة سمراء و نحيفة و أظنها قصيرة شوية ؟؟
أعتقد هي !!
ومع الدق و الطرب قامت وحدة فيها زار ..
بسم الله الرحمن الرحيم علينا :icon33: ..
أعوذ بالله من الشيطان الرجيم ..
و أنا أنفجعت .. و على طول شردت و سبت الفرح ..
>>>> أول مرة تشوف زار !!
و خرجت من الفرح أتنافض و ماني قادرة أوقف
على رجولي ..
لأن كمان وحدة قالت لي .. إذا عندك الدورة أطلعي بسرعة !!
عشان لا تمسك فيكي !!
و للآن ما فهمت الموضوع .. بس الحمدلله ربنا نجاني
هداك اليوم .. الحمدلله ألف مليون مرة ..
خخخخخخخخخخخخخخ دخلة مال أمها داعي صح ؟؟
:23:

بس والله من جد ما أعرفهم كان نفسي أخدمك فيهم :) ..


و أي شي تاني أنا حاضرة :) ..



تحياتي ..
جــــــــداويــــــــــــة

السلام عليكم يابنات ..
حبيت أشارككم في الموضوع ..
واحاول اساعد جداوية وان شاء الله اقدر اريحها..

أخت جداوية على حسب مواصفاتك في كثير قاعات تكون فيها بلكونة وسعرها رخييييص بس يمكن ماتكون مرررررة فخمة ..
عنك التوفيق والمنصور والفردوس ورهام ..
يعني كثييير تلاقي وسعرهم معقووول لو الزواج في الحج
والله يتمم لك على خير ..

وممكن اطلب طلب يابنات انا ملكتي ان شاء الله في محرم وماني لاقيه فستان عاجبني وما يمديني افصل عندي اختبارات ماتخلص وتعرفوا شغل الخياطات بروفاتهم ماتخلص ..
فاللي عندها فستان ملكة حلوو وتبغى تأجره ياليت تقولي عليه بس مايكون التأجير غالي .. والله اللي تساعدني تفك لي أززززمة ولها دعوة خاصة..
استناكم يابنات لاتطنشوني ..

السلام عليكم و رحمة الله و بركاته ..

the_queen ..

آميييييييييييييييين .. آميييييييييييييييييين ..
آمييييييييييييييييييييييييييييييين على دعواتك ..
و تسلمي يا قمر .. خجلتيني بذوقك :) ..
و إن شاء الله أكون عند حسن ظنكم بيا ..

بس المشكة أنا عندي حسرة بلكونة :( ..
وما تتخيلي قد أيش نفسي فيها ..
( عالأقل مادام الواحد كل شي متنحس معاه
يسوي في مكان عاجبه !! صح ولا لا ؟؟ )

و إللي مخليني أزيد في إصراري عليها ..
كذا وحدة من صاحباتي كانو زيي ..
و بعدين أتنازلو و سوو في قاعات ما فيها بلكونة ..
أو يكون فيها بلكونة صغيرة و قريبة من الأرض ..
و شوفيهم أتجوزو و جابو بزورة .. و ألين دحين
جالسين يقولو أنا في قلبي حسرة بلكونة و زفة طويلة !!

أي نعم هو مو موضوع جوهري ولا شي أساسي ..
بس ترجع لكل وحدة و طبيعتها .. و رغبتها ..
صح ولا لا ؟؟

أنا أعرف ناس سوو في أفخم قاعات البلد ..
ولا طلعو بلكونة .. و لانزلو درج ..
سوو طريقة تانية و أتزفو من تحت من وسط القاعة !!
رغبتهم .. و حرية شخصية !!
يعني هي المسألة حسب رغبة العروسة ..

و بالنسبة لقاعة ريهام أنا صاحبتي سوت فيها
ملكتها .. بس أنا ما رحت يومتها ..
عشان كدة ما أعرف شكلها ..
بس يبغالي أروح أشوفها ..
و إذا تعرفي توصفيلي هي مزبوط ..
أكون شاكرة و ممتنة ..

و فيه كمان قالولي قاعة جديدة إسمها ريفان ..
يقولو مرة حلوة .. بس برضو ما شوفتها ..
لأنو موقعها شوية ملخبط .. وما عرفت أوصل له ..

أبو زيد رحته ..
كله عواميد ..
و فيه قاعتين ..
وحدة صغيرة مرة ( يقولو يسوو فيها مناسبات
50 شخص ) !!
بس كلها عواميد تجيبلك الصقعة !!
و التانية فيها درج عالجنب ..
ومافيها بلكونة .. و كلها عواميد ..
بس أنا ما عرفت أشوفها مزبوط عشان يوم ما رحت للفندق
لقيت فيها مناسبة .. و كنت مرة مستحية لمن دخلت أتفرج !!
حسيت كل الناس يطالعو فيا و مستنكرين !!
أنكسفت و طالعت بسرعة و خرجت ..

جزيرة الشراع فيها قاعة ؟؟
غــــريـــــــبــــــــــــــــــــــــة !!
أول مرة أسمع بيها ..
أنا شوفت مطعم سن رايز كاتب عند المدخل
إنه عنده قاعة إحتفالات !!
بس ما دخلتها ولا شوفتها ..

نادي الخطوط .. حق رجال ..
يعني زي الحوش كبييييييييير ..
إنتي تاخديه منهم ( لازم موظف خطوط ) ..
و تفرشيه و تجيبي لوازمك ..
يعني حق رجال فقط .. ما عمري سمعت إنهم سوو
فيه حريم !!

فندق روتانا ما قد دخلته ..
( مو هو في الناحية إللي مقابل البنك الأمريكي ) ؟؟
طيب كيف قاعته ؟؟ دخلتيها ؟؟

الراديسون ساس .. غالي على غير فايدة !!
وما يتنازلو في السعر أبدا ..
زي الميريديان .. القاعة صغيرة .. والنفر حوالي 400 ريال !!
ليش ليلتي هو ؟؟
و مرررررررة مافي تخفيض في السعر أبدا ..

الشيراتون بصراحة لمن دخلته أختنقت !!
مو قصدك القاعة إللي تحت الأرض ..
و البوفيه حقها عالمسبح ؟؟
ما أظن عنده غيرها ..
ما عجبتني ولا عجبت أهلي ..

قاعة البلاد ..
حلوة و تجنن .. و غالية ..
ومايفتحوها لأقل من 200 أو 250 نفر ..
ماني فاكرة بالزبط كم !!
و حاولت معاهم على 100 نفر ماهم راضيين !!

الحارثي .. رحته قبل يومين ..
فيه قاعة العروسة .. القديمة ..
إللي كلها أعمدة ..
ماهي حلوة بالمرة ..

و فيه القاعة الجديدة إللي إسمها أصالة ..
برضو مليانة أعمدة .. و أعمدة عرييييييييضة ..
يعني إللي يجلس في ناحية .. ما يشوف إللي في
الناحية التانية !!
بس حلوة و مرتبة و رايقة مرة .. وحلاوتها
إنها لسة جديدة وما أندهكت ..
و برضو مافيها بلكونة .. عندهم شي مسوينه
زي البلكونة .. بس مرة واطية .. أعلى من الأرض
بشوية .. و قالت لي نحطلك هو محل ما تبغي ..
يعني مو شرط يكون مكانه ثابت ..
و حطيتها في بالي .. و أخدت السعر و المنيو وكل شي ..
و جالسة بأشاور نفسي فيها :) ..

الواحة يا بنتي الله يهديكي من العصر الحجري !!
من أيام ماكانت كوافيرة الواحة شي وااااااااااااااو
وكان محد يروح هناك إلا الناس الهاي هاي :23: ..

بس حضرت فيها مناسبة لأهل صاحبتي ..
متواضعة .. و تمشي الحال .. و سوو فيها بلكونة أرضية ..
بس أنا صراحة ما عجبتني ..
و يقولو فيها قاعتين أظن ..

وزي ما قلتي المشكلة الأزلية هي البلكونة :06: ..

تبغي تعرفي فين كانت ملكتي ؟؟
ماهي لقافة ولا شي .. بالعكس ..
بس عشان لو قلت لكم فين كانت الملكة ..
أخاف تهزأوني عالفرح :( ..
لأني أبغا الفرح يكون عكس الملكة تماما ..
لأني والله ما جاني خير من وراء الملكة الكبيرة
إللي سويتها :06: ..
حسبي الله و نعم الوكيل في الناس إللي نفوسهم
بطـّـالة و عيونهم ضيقة ..

بس أقرب لك هي :) ..
أعطيني قائمة بأكبر و أفخم 10 قاعات في البلد ..
و أنا أقولك أيت واحدة فيهم ..
>>>> أخليكي تحزري و تعصري مخك اليوم ..

وبالنسبة لأوركيد ..
سعر الشخص قريب 300 ريال ..
لأنه والله ضاعت الورقة حقتهم ..
بس مسوين عرض مخفض ..
النفر يطلع له بـ 190 ريال ..
وطبعا عندهم خدمات تانية ..
بس كل شي بحسابه ..
زي المعجنات والشيكولاتة و الحاجات التانية ..
و زي ما قلت لك تقول ما يفتحوه لأقل من 170 شخص ..

الكازار .. رحته قبل سنتين .. قبل ملكتي ..
بس أفتكر إنه سعره كان طيب ..
يعني ماهو غالي ..
يعني النفر ماهو أكتر من 200 ريال !!
و نظيف و مرتب ..
بس مافيه بلكونة !!!!
بس يبغالي أروحه مرة تانية أطل عالقاعة ..
يمكن غيروها ..


حأجننكم بالبلكونة ألين تلاقولي قاعة :23: ..

أبــــغــــــــــا بــــلـــــكـــــــــونــــــــــــــــــــــــة :06: ..



تحياتي ..
جــــــــداويــــــــــــة

السلام عليكم و رحمة الله و بركاته ..

musk1.. ..

تسلمي يا قمر على مساعدتك :) ..

بس لو أقولك شي ما تصدقيني ..

والله أنا ما أعرف ولا قاعة من إللي قلتي
عليها !!
وإللي بس سمعت بيها هي الريهام ..

طيب تعرفي مواقعهم ؟؟
مواصفاتهم ؟؟

ولازم تكون شي فخم و مرتب ..
لأن المعازيم قليل ..
و كلهم أهل .. و أهل العريس حيجو ضيوف !!
يعني كمان أبغا أبيض وجهي قدامهم :( ..
و أنا أهلي و صاحباتي ما يروحو أي مكان !!
>>>> ناس مفقعنين :23: ..
للأسف يعني هادا شي أنا ما أفتخر بيه بس الشكوى
لله .. أيش أسوي :( ؟؟


و بالنسبة لملكتك ..
لسة يا بنتي عندك وقت طوييييييييييييييل ..
إن شاء الله تلحقي تسوي كل شي و إنتي مرتاحة
و رايقة !! ليش معقدتها !!
إللي يسمعك يقول ملكتك بعد بكرة :) ..
روقي يابنتي روقي :) ..

والفستان حسب ميزانيتك ..
و إذا مانتي متشرطة في الموديل ولا في بالك شي معين ..
تقدري تلاقي أشياء جاهزة كتيرة و تعجبك ..

و إذا عالخياطة ..
يا إما تشتري قماش و تخيطيه ..
بس يبغالك موديل من قبل ما تشتري القماش ..
أو عالأقل فكرة في بالك ..

أو تروحي لمصمم يسوي لك الموديل و يختار لك
القماش و اللون و يزبط لك كل شي ..
( أو مصممة طبعا !! )..
و إذا عالبروفات كلها بروفتين تلاتة و يخلص الموضوع !!
لا تكبريها يا قمر و مشيها بسهالة تمشي :) ..

و قوليلي إذا فيه شي معين في بالك ..
و إن شاء الله أساعدك زي ما بتساعديني :) ..


تحياتي ..
جــــــــداويــــــــــــة