جداويه


طمنينا عليكي و الله قلقنا مره :(

السلام عليكم و رحمة الله و بركاته ..

يا مية هلا بأحلى بنات و حريمات :) ..
معليش أتأخرت عليكم ..
بس والله العظيم كتبت لكم رد طويل ( مرتين ) وجلست
فيه أكتر من ساعة و كنت بأحكيلكم فيه كل إللي سار معايا
ومع زوجي في السفرة إللي سافرها :( ..
بس المنتدى مدري أيشبو :30: ..
كل شوية يعلق و يقول لي Network Error و راحت
الردود :( ..

أستنوني أرجع أكتبلكم مختصر القصة و أرسله تاني :) ..

معليش أستحملوني :) ..


تحياتي ..
جــــــــداويــــــــــــة

السلام عليكم و رحمة الله و بركاته ..

شوفو يا طويلات العمر :) ..

أنا أساس نكبتي مع زوجي في شخصين ..
صاحبه .. و عمه ..
حسبي الله و نعم الوكيل فيهم ..
و تخيلو .. صاحبه في الأربعين ..
متزوج أندونيسية ( الله أعلم يمكن شغالتهم !! ) ..
و عمه في الخمسين ..
و عياله قدنا .. و هو و مرته مرة وقحين و قليلين أدب ..
أستغفر الله من ذنبهم كلهم ..

و هو( زوجي ) في العشرين !!
أيت صحوبية هادي ؟؟
و كيف لهم عين يقولو إحنا أصحاب !!

المهم يا حبيباتي .. سافر مع صاحبه عند عمه !!
( عمه في بلد تاني مو في جدة ) ..
و سافر فجأة .. و بدون ما يكلمني ولا يجيب لي سيرة ..
تخيلو كلمني في الليل عاااااادي .. و صحي الصبح عالمطار !!
شوفو القوة ( طبعا إللي بيقووه عليا هما صاحبه و عمه !! ) ..
و دايما يحرضوه عليا و يسلطوه عليا ..
( و شكلهم هما ماكلين بالجزم من حريمهم !!
و جايين يسوو عليه رجال !! و هو يصدقهم و يسوي زي ما يقولوله ) ..

( و الوقت ماهو وقت سفر بالمرة .. لأنه المفروض يكون
جالس بيفرش البيت حقنا .. و هو ما سوى فيه ولا شي ..
و الزواج أتحدد .. و البيت عالبلاط !! ) ..

المهم أنا قلبي حاسس بالخيانة و الندالة و الشر ..
و إحساسي ما يخيب ..
راح يا حبيباتي بيروت و البحرين !!
( و إنتو عارفين أيش فيه هناك !! ) ..
حسبي الله و نعم الوكيل فيهم ..
و جواله السعودي معاه ..
لكن ما فكر يتصل عليا و لا يعبرني ..
( و أنا ما أتصلت لأني زعلانة ) ..

و لمن رجع من السفر رجع زي الجني :30: ..

( ملحوظة : دايما لمن يروح مع عمه أو صاحبه ينقلب
عليا قلبة مو طبيعية لدرجة تخوف و يسير شرير بشكل مو طبيعي !! ) ..

( ملحوظة تانية : يوم ملكتي عمه أخده مني لسة قبل
ما نسوي أي شي دوبه جاي يسلم عليا ..
و قبل الزفة و التصوير و قال له تعال و ديني مشوار !!
و زوجي راح وداه مع إنه فيه أكتر من
50 شاب من عيلتهم في الملكة .. و طلع مشواره للطايف !! ) ..
تـــــــخــــــــيـــــــــــلــــــــــــــو الــوقـــــــاحــــــــــــــة !!

و صاحبه نفس الوضع ..
لدرجة المحل إللي نكون فيه أنا و زوجي .. يجينا فيه !!
والله العظيم !!
يعني لو جالسين في مطعم .. يسأله يقول له إنت فين ؟؟
و شوية نلاقيه يتصل و يقول له أنا برة عند المطعم أطلع لي !!
:30: ..

الـــمـــهــــــــــــم ..
أجتمعو الشياطين في هادي السفرة ..

و في ناس قالولي إنه عمه و مرته حاطين عينهم منه ..
و يبغوه ياخد بنتهم و يسيبني ( بس هو ماهو راضي يعترف
بهادا الشي !! ) .. مع إني شوفت تصرفاتهم معاه كيف ..
و قدامي .. منتهى الوقاحة .. بس أنا طنشتهم لأني ما بدي
أحسسهم إني غيرانة أو أحط لهم إعتبار ..

و صاحبه بيقول له تعال معايا أندونيسيا و أنا ( أزبطك !! ) ..

حسبي الله و نعم الوكيل فيهم كلهم ..
الله لا يبلغهم مرادهم فيا و في زوجي في الشر :( ..
الله يرد كيدهم في نحورهم و يشغلهم بأنفسهم ..

و زوجي مصر إصرار مو طبيعي عالسفر لأندونيسيا ..
و دحين أهله ما سمحو له ( لأنهم سافرو في الإجازة
و هو رفض يسافر معاهم عشان يبغا يسافر لحاله !! ) ..
لكن هددني و قال لي لمن أتزوج حأروح مع صاحبي و إنتي ما تمنعيني !!
( و إنتو عارفين أندونيسيا أيش فيها !! ) ..
حسبي الله و نعم الوكيل فيهم !!

المهم .. جاني من السفر إبليس راكبه ..
و يقول يا طلالالالاق :30: ..
و أنا كان حيجيني إنهيار عصبي :06: ..
و حاولت أكلمه مو راضي يتفاهم !!
و مصر عالإنفصال !!

ما لقيت قدامي حل غير إني أكلم بابا ..
و قلت له أيش إللي حصل بالزبط ..

راح بابا أتصل عليه .. و سوى نفسه ما يعرف شي
عن سفره .. و سأله ( خلصت الشقة ؟؟ ) .. قال له
لا ما سويت فيها شي !!
قام بابا قال له طيب و أيش كنت بتسوي الكم أسبوع إللي فاتو ؟؟
قال له : أنا كنت مسافر و دوبي رجعت و بصراحة أبغا أنفصل !!

بابا طلعت له قرون !!
راح كلم أبوه ..
و قال له شوف يا أبو فلان ..
إحنا سوينا و سوينا و سوينا و سوينا وسوينا ..
( الفرح علينا و لا هو ولا أهله مو دافعين ولا ريال !!!! )
و ولدك أيش بيقول ؟؟
روح أتفاهم معاه .. و تعالو أعطوني كلام رجال !!
بدال المسخرة و لعب العيال هادا !!
( بابا حط أبوه في الصورة .. لأنه أهله ما يدرو ولا شي
عن عمايله و دايما يكدب عليهم و يسوي نفسه ملاك قدامهم !! ) ..
راح أبوه كلمني .. و سألني ..
و حكيته كل شي سار بيننا ..
( و حلفت له بالله و عالمصحف عاللي سار بيننا ) ..
و أبوه أنصدم من عمايل ولده و تصرفاته ..
و راح واجه ولده ..
الولد وجهه سار يتلون و يضرب و يقلب وماعرف يرد
على أبوه رد مقنع عالسبب إللي يبغا ينفصل عشانه !!
و جابه و واجهه بيا و بأبويا ..
ماعرف يتكلم ..
و كل ما أبوه يقول له ليش ؟؟
يقول له ما أدري .. بس كدة !!
و ساعتها أنا أتكلمت بصراحة إنه في ناس بيلعبو
في راسه و يحرضوه عليا .. ( بس قلت أصحابه ..
ما قدرت أقول عمه عشان أبوه لا يزعل .. بس لمحت
له و قلت له ماشي مع ناس في الـ 40 و الـ 50 و يقول
عنهم أصحابه !! ) ..
يعني بالعربي مافي أي مبرر غير إنه بيسمع تحريض
إللي بيحرضوه حسبي الله و نعم الوكيل فيهم ..

حتى بابا قال له أنا لاحظت تصرفاته معاها ..
و باين إنه راسه بيتعبى من إللي حواليه !!
لأنه يجلس فترة طيب ( لمن يكونو عمه و صاحبه مسافرين ) ..
و فجأة ينقلب و يسير زي الشياطين !!

المهم سارت جلسات صلح و كلام طويييييييييييييييييل ..
و قلت و قالت و قال و قلنا و كلالالالالالالالالالام ..

و أخدنا تهزيء إحنا الإتنين من أهالينا ..
و تخيلو أبوه يقول لي ( إنتي ماعرفتي تلميه !! ) ..
و إنه ولده يبغا ينحرف بسببي عشان أنا ما عرفت أسيطر عليه !!
و إني أنا إللي مطفشته !!

بس برضو هو أتهزأ أكتر :icon28: عشان هو يخاف من أبوه ..
و بابا جلس يقول له بنات الناس مو لعبة ..
و إنت ما تخاف بكرة على بناتك يجي إللي يسوي فيهم كدة ..
و كلالالالالالالالالالالالالالام كتييييييييييييير !!

و قررو يعقدو هدنة بيننا ..
و سوو صلح ..
و أجلنا الفرح ألين بعد إجازة الحج ..
عشان يفرش البيت و يخلص ..
و دحين ما نتكلم كتير ولا نتقابل كتير ..
عشان بابا قال له البنت بتجهز نفسها ..
ومحنا فاضيين ..
( عشان لا نتقابل أو نتكلم و نتضارب تاني !! ) ..

و دحين همي الأكبر .. كيف أقطع علاقاته بأصحابه ..
و عمه راس المصايب ؟؟
و أهلي يقولولي إنتي تقدري تقطعيه ..
بس والله مو باين .. زوجي مخه نااااااشف و عنيد ..
قولولي أيش أسوي مع الناس إللي زي كدة ما يخافو
الله ؟؟ و كيف أقدر أقطع علاقته بيهم ؟؟


وأنا عارفة إنه الرد هادا مكانه مو هنا :) ..
بس كتبته عشانكم والله .. و حاولت أختصر قد ما أقدر..
و أوصل لكم الصورة بالإجمال ..
و إذا مو محله .. خلو المشرفات يمسحوه ..


سبحانك اللهم و بحمدك لا إله إلا أنت ..
أستغفرك و أتوب إليك ..


تحياتي ..
جــــــــداويــــــــــــة

جـــدوايه
والله العظيم لي اسبوع افكر ارسلك رساله اتطمن عليك وادعيلك بكل وقت..
حسبي الله ونعم الوكيل فيهم شرانين ذولا الله يكفيكم شرهم بس زين انه اخذتم موقف منه وباذن الله راح يكون درس له ويعرف انه بنات الناس مو لعبه...
وبقولك شئ بكره ان جيتي في بيته ومقابلته اربعه وعشرين ساعه راح تعرفين عنه اكثر واكثر وراح تسيطرين عليه وتفهمين منه كلل اللي بباله..
.........
تدرين قبل اسبوع يمكن جابو حلقه امن وامان في التلفزيون السعودي وزواج السعودين من الاندونسيات حسبي الله عليهم بلااااااااااااااااااااااااااااااوي عارفه يعني ايش بلاووووووووووي
........
وعندي سؤال بس منحرجه منك بس لازم اسألك فيني فضول
"عمه اصله بخاري" والا سعودي
اذا سعوودي هذا هو القهر
ماقول الا الله يسعدك ياجدوايه ويتمم لك على خير ويسخر لك زوجك ويجعلك قررررررررررره عينه" وانا بعد يااارب احفظ لي زوجي واجعلني قره عينه"
ويبعد عنا وعنكم شر الحاسدين
ولو تطرحين الموضوع بقسم المشاكل الاجتماعيه يكون افضلك ان شالله لانو انتي عارفه ماشالله فيه بنات عندهم راي وحكمه راح ينفعونك ان شالله
ولاااااااااا تنسين الدعاااااء وقيام الليل

السلام عليكم و رحمة الله و بركاته ..

أختي $دمـــــوع الشوق$ ..

تسلمي يا قمر الله يجبر بخاطرك ..
و يستجيب لدعواتك ليا .. و يجعلها من نصيبي ..
ولكي مثلها إن شاء الله ..
آمــــيـــــــــن يااارب العاااالمييييين ..

و المشكلة أنا ليا 5 سنين مخطوبة !!
يعني ماحنا جديدين على بعض !!
بس من يوم ما عرف صاحبه هادا ..
ومن يوم ما قويت علاقته مع عمه ..
خلالالالالالالالالاص سار زي بني إسرائيل !!

و المشكلة التانية إنه زوجي من النوع إللي ما يجلس في البيت ..
يخترع لنفسه مشاوير من تحت الأرض ..
و يعطي وجه للي يسوى و إللي ما يسوى ..
و يخدم أصحابه على حساب نفسه و حسابي !!
غير إنه سواق أهله !!
عنده 3 أخوان رجال أطول منه و شحوط ..
ومافي أحد يودي و يجيب غيره هو ..
في كل وقت حتى لو هو عندي ما تلاقي غير جواله يرن يرن !!
حتى أخوانه الرجال لمن يكون عندي و يبغو شي ..
يتصلو عليه و يقولوله جيب لنا الشي الفلاني دحين !!
و هم جالسين في البيت !!
ولو قال لهم إنه عندي وما يمديه دحين يجيب الشي !!
تلاقي مافي ثواني و يدق رقم أمه !!
و تخليه غصبا عن عينه يروح يسوي لها و لهم إللي يبغوه !!
( بالذات لمن يكون عندي !! ) ..

و غير كدة هو من النوع الكتوم إللي ما يتكلم !!
و لو تعصريه عصر ما يطلع إلا إللي يبغاه ..
و فوق كدة كل حكاويكي و كلامك عند أهله :30: !!

و هو ماهو بخاري ..
سعودي من أشراف مكة ( مكاااااوي درجة أولى ) ..
( العقلية القفل والمخ إللي زي التنكة !! ) ..
و بالعكس محد يدلع مرته زي البخاري !!
و إللي تبغى تتهنى تتزوج بخاري !!

و أنا دايما أفكر أكتب مواضيع ..
بس مشكلتي أنسى وأقول بعدين و مايجي البعدين :) ..
و لمن تجي مناسبة زي كدة أفرط كل إللي عندي
من القهر :23: .. بس أبشري راح أكتب موضوع ..
و آخد الردود من هنا و أحطها هناك ..
:) ..

و تسلمي يا قمر على دعواتك ..
و يعلم الله إني قد أيش محتاجتها ..

و ياريتني كنت أدري عن البرنامج حق أمن و أمان ..
كان سجلته و وريته هو ..
و والله العظيم أنا شاكة إنه صاحبه متزوج شغالتهم !!
و كم مرة لمحت له بكدة !!
بس هو يقول لي لالالالالالالالالا هادي قريبته راح جابها
من هناك و أتزوجها !!
>>>> من قلة بنات البلد !!
( و الراجل من عيلة كبيرة و معروفة في البلد وولد ناس !! ) ..
يعني ألف مين تتمناه من قريباته ومن بنات البلد !!
ليش يروح يتزوج جاوية !!
و حتى كلامها مكسر زي الشغالات !!
أستغفر الله العظيم من ذنبهم !!
والله أنا شااااااكة فيه من يوم ما قال لي مرته جاوية !!

و أيش يقصد لمن يقول له تعال معايا أندونيسيا و أنا
( أزبطك !! ) ..!! ؟؟
حسبي الله و نعم الوكيل فيهم و في عمه إللي خارب بيني
و بينه ..


سبحانك اللهم و بحمدك .. لا إله إلا أنت ..
أستغفرك و أتوب إليك ..

تحياتي ..
جــــــــداويــــــــــــة