السلام عليكم و رحمة الله و بركاته ..

أختي ام الوسيم ..

معليش أتأخرت في الرد عليكي ..
بس لا تحسبيني مطنشتك .. لا والله !!
بالعكس أنا مرة مبسوطة من ردك عليا مخصوص ..
كبرتي راسي :) ..

أول شي حمستيني أروح المحل و أشوفه ..
شكله شي مرة حلو .. و يجي على مزاجي ..

بالنسبة لطقم السرير أنا عارفة إنه لازم يكون غالي :06: ..
وشوفت محلات كتيرة كل إللي عندهم من فوق الألفين
و ألين العشرة آلاف !!
و 14 ألف !!
أنا أتجننت من الأسعار :23: !!
ليش قد كدة الأسعار حريقة !!

بس أنا سؤالي هو :
دحين المفرش حق السرير إللي توديه العروسة
لازم يكون فخم ( و غالبا بيكون مجرد منظر )
يعني ما راح يـُستعمل بعد كدة !!
صح ولا لا ؟؟
فليش نتكلف فيه قد كدة ؟؟

لأنه حتى البياع قال لي هادا مجرد ديكور و منظر ..
ينفرش للعروسة يوم الدبش ..
و بعدين إذا زاروها ضيوف في بيتها تفرشه ..
و غير كدة ما يصلح للإستعمال والنوم !!

فما ينفع نشتري لحاف منظر + قابل للإستعمال ؟؟
و فين يتلاقى زي كدة ؟؟

و بالنسبة للسجاجيد أشتري كم سجادة ؟؟
لأني في البداية قلت أشتري درزن !!
بعدين قالولي إنتي مجنونة :23: ..
>>>> تحسب بيتها مسجد !!

و بعدين قلت أشتري نص درزن ..
و برضو قالولي كتير !!
و قالو يا دوب 3 - 4 تكفي !!
بس أنا أظن إنه 6 سجاجيد كويسة !!
فالمفروض أشتري كم سجادة ؟؟
يعني عالأقل الواحد يحسب حساب إذا مثلا
صدفت و جووه ضيوف حريم و رجال ..
ما يسير تخلي الحريم يصلو والرجال لا !!
أو الرجال يصلو و الحريم لا !!
يعني أصلا حيكون الموقف مرة محرج و بايخ !!


و بالنسبة لطقم المناشف ..
أنا أصلا أشتريت روبين طقم ..
نفس الشكل و النقشة بس لونين مختلفة ..
بس أرواب لحالها من غير مناشف ..
و دحين ندمانة إني أستعجلت و أشتريته ..
شكلي لو أشتريت زي ما بتقولي طقم كامل كان أحسن لي !!
و أفخم و أرتب !!
يا خسارة :( ..

بس دحين كمان لو أبغا أشتري مناشف لحالها ..
أشتري كم منشفة ؟؟
يعني من كل حجم كم منشفة ؟؟


و دحين كلكم شككتوني في عطور الكورنيش !!
شكلي حأبطل أشتري من عندهم خلاص !!
مع إني ما كنت أشتري من عندهم كتير قبل كدة ..
بس دحين عشان الشغلة فيها حاجات كتيرة قلت آخد من عندهم ..
و الله يا جماعة الفرق في السعر فظيييييع !!
:(
و دحين شككتوني في العطور و المكياج ..
و كله طلع ما ينفع !!
الله المستعان ..
شكلي حأروح أشتري من نفس محلات الماركات ..
و الله يعين !!

و أنا شخصيا قلت لك أحب العودة ..
لأنها بصراحة أحسها كدة ريحة فخامة و ملكية ..
خصوصا إذا كانت العودة أصلية من إللي يحبها قلبك :) ..

و يمكن أنا ماني متعودة عالمخلطات .. عشان أصلا أهلي
ما يستعملوها ولا أتعودت عليها ..
حتى لمن أشم ريحتها أحسها غريبة ..

بس المسك سبحان الله أنا ما أحبه !!
ريحته تفكرني بحاجات مو طيبة ..
و تذكرني بذكريات الله لا يعيدها :06: ..
و سرت أول ما أشمه على طول أدوخ ..
حتى كتير مدحولي هو من صاحباتي ..
بس ما قدرت له :( ..
يتعبني نفسيا !!


و بالنسبة للدعاء .. أنا والله دايما بأتحسبن عليهم ..
بس إنتي ما تتخيلي أنا قد أيش سار فيا بسببهم ..
و قد أيش آذوني ..
و لو تعرفي 1 % من إللي سووه فيا ..
إنتي حترفعي يدك و تدعي عليهم بدالي !!

حسبي الله و نعم الوكيل فيهم !!


و أي شي تاني تعرفيه يا قمر لا تبخلي عليا و على البنات بيه ..
ترى يمكن تذكرينا بحاجات إحنا ناسيينها ..

و بليز رديلي بالنسبة لعدد السجاجيد و المناشف ..
ضروري ..

و معليش مرة تانية إني أتأخرت عليكي في الرد ..
لا تزعلي مني :) ..


تحياتي ..
جــــــــداويــــــــــــة

ياهلا والله وين الناس؟؟

شوفي ياطويلة العمر الفرح عندنا عليه بس هو يبغى نص بالنص بس خليه على مين يلعبها
راح اخليه يدفع كل قرش:)

الصور عادتنا مايدفع العريس إلا لو كان راضي لو مايبغى العروسة تدفعها لانها اغلبها صور العروسة
ولو مادفع تعرفي ايش بسوي ماراح اصوره غير صورتين ولا ثلاث بس وراح اتفق مع المصورة على كذا
اجل ادفع وهو يكشخ:)

انا عندي دخل بس مش موظفة >>>>>>>>>> شكلي حرامية ههههههههههههه
لا عن جد عندي دخل بس مااشتغل

انت على بالك صحن واحد وفيه عشر حبات شوكولاتة يابنتي هذا صحن ياكبره والحركة هذي شفتها في اكثر من فرح يزفوا الصحون صح هما يوزعوا بس انا عندي بخل مابوزع:)
انا خايفة يمغصوا بطني ولا ابغاهم ينقهروا يكفيهم إلا على الطاولات:)
النقلي مرة لذيذ يمكن اخذتي نوع ماهو حلو غريب ماعجبك
تصدقي انا مرة جاتني من شكولاين هدية كان طعمها رووووووووعة وبعدين رحت مرة ثانية واخذت ببسكوت كان طعمها ماهو حلو:(

العلب حق الملكة على العريس صح بس انا اشتريت صندوق وفيه هدية واخذت 100 حبة وحطيت عليها شريطة وورود بس لان العريس مايعرف شي
واهله قالوا ماراح يجيبوا وبما انهم من قرايبين فما تفرق قلت خلاص انا اجيبها
والعربية اشتريت الاشياء وهما دفعو ثمنها ماراحوا جابوا شي مكسلين:)

يابختك اروح واشوف تعتقدي اخواني راح يودوني على طول والله بيطلعو روحي
علشان كذا اقلك مادام مواصفاتها ماهي شي بلاش

اقلك انسي الفندق ماراح يرضى العريس وصراحة حسيت في الملكة انه لما كان الرجال يوم والحريم يوم ماكانت ملكة مرتبة علشان كذا خليها على الفرح

ياشيخة لو انا مكانك كان ذبحت امه عاد الا ماتبغى تدفع وكمان تبغى تعزم معليش كثري منها
انا اقلك عريسي من اهلنا يعني مرة قريب يصير ولد ولد عمتي وابوه مااخذ اختي يعني مرة قررررررررررررريب فما منه فكه وكل شيء يقول بكيفك
لكن قلت لك على الصور لو سواها ومادفع لاخليه يتحلم يتصور:)
يحسب زي الملكة دفع اخويا وهو تصور بلاش:) حتى صورته ماطلعت حلوة زعل مسكين:)
شوفي لو كلمتك امه قلي لها ماهو الفرح ماهو من عوايدكم كمان كثر المعازيم ببلاش ماهو من عوايدنا
بلا شغل تطفل والله قهرتني سيبيني عليها والا ازهميها كذا يوم في البحر واجي وارويكي فيها لاابكسها لين تقول بس


انا قصدي زي طرحة صاحبتك زي كذا لان التل والشيفون يعطي حجم عكس الكم الماسك
في وحدة من جماعتنا سوت الكم ماسك طلع مرة بايخ ومرررررررررة ولا شيء باين لين الكفوف ماكان حلو مع ان فستانها تفصيلته مرة حلوة

رحت لواحة الجلابية اللي في شارع حراء عجبتني كثير قمصانهم واجلت القميص للشهر الجاي ان شاء الله
ورحت للي في الصورايخ صح تحسي اشيائه حلوة بس علبهم مبهدلة كانها كانت في الشارع!! وتعرفي اشياء عروسة لازم تكون العلب فخمة؟
فقلت ارجع اشوفه ثاني ولا اصرف نظر لان عجبني طقم اول يوم برضو لكن ماشفت مفتوح عندهم ومادققت صراحة قلت راح ارجع ثاني واشوف

اذا تلبسي القطن احسن لك من الشلحة بس انا مرة متعودة على الشلحة
تصدقي تبلشت كل قمصاني حق النوم فوق الركبة والله فشلة؟؟ ابغى شيء طويل للشهرالاول على الاقل

نكمل>>>>>>

العطور ياختي خلصتها الحمد الله اخذت 4 عطور وبخاخ الفراش من سيد جنيد اللي هو عطور البحرين تلقيه في عزيز مول وفي حراء الدولي
محمود سعيد خلاص صرفت نظر خلصت العطور خلاص الحمد الله

ههههههههه سلامت جيوبك الانفية:) تصدقي ولا عطر عندي صغير والله ماادري ايش اسوي بس الحمد الله طالعة موضة الشنطة الكبيرة

فواكه ماتصلح لعروسة انا كنت ابغى من عطور البودي شوب بس قالوا لي ماينفع لعروسة اخذت من عندهم بس مجموعة الانانيا طقم كامل
العروسة قالوا احلى على عودة وترى هذا الكلام البنات والحريم هنا في المنتدى كثير يمدحو العطور الشرقية للعروسة؟
وترى زيك اكررررررررررره العطرالثقيل وتلقيني زي الحامل اتوحم على اللي قدامي:)

الله يحرق نانسي واختها هيفاء ترى لقيتها في ماك اب فور ايفر ب77 علبة قد راس الاصبع:) بس تستاهل اللمعة تحسيها مرة ناعمة احسن مليون مرة من الاكليل القرف على قولتك
بس ترى الاكليل حلو لو تحطي مناكير وبعدين تحطي منه فوق المناكير يصلح للسهرات

والله الحين احس نفسي نحفت مرة لاني الحين بديت اخرج السوق كثير وابغى اخلص ان شاء الله
علشان ماعاد ابغى اخرج انا من يوم مااروح السوق مرتين تلقيني صرت عظمة وماعاد اكل
مالي نفس للاكل ابدا ايش اسوي؟
هل اني لما فكرت اني اقضي الحين وارتح بعدين لين مايقرر وقت الفرح احسن؟ ولا ايش رايك
وتصدقي يقولي العريس يبغاني انزل اقضي للبيت معاه يابخته والله مارضيت صراحة مع ان كلهم قالوا لي احسن روحي علشان لا يجيب لك شيء ماهو حلو بس انا مارضيت بالمرة
قلت غرفة النوم معليش اما البيت كله ليه ان شاء الله هو مرتاح وانا الف معاه ماهو كافيني اللف علشان الدبش كمان علشان العفش؟؟


رها والله انا شوفت عروسة عند كارمن اللي جنب نواره تجننننننننننننن و1500 مع التنظيف
وصاحبة بنت خالي تصلحت عند الالياذة كل من شاف صورها ماصدق انها نفسه اللي قاعدة قدامهم يقولوا قلبتها 180 درجة وانا زيك حايسة في المشغل:(

يابنات ترى يمدحوا فاطمة العمودي اللي تعرف رقمها ترسلة لية ابغااااااااااااه ضروري.

يابنات انا من جده ومتابعة مشاركاتكم لقافة مني لاني مو عروس...
وحابه اساعدكم باللي اعرفة بالنسبة لجداوية في قاعات صغيرة وحلوة مثلا قاعة شهد وقاعة مذهلة وفي قاعة جديدة عند دوار النجمة اسمها الالماسة وسعرها مو غالي لان شكلها صغير وبالنسبة للمصورة اعرف وحدة تصور فيديو صراحة تصويرها جنااان والصور ثابتة وفيها حركات صراحة حلو والاحلى سعرها تصور فوتوغرافي 45 صورة مع صورة خشب مع شاشة عرض وفيديو كله الاجمالي ب3000 واسمها نورا اخاف احط رقمها هنا يطير الموضوع وبالنسبة للسجادات على حسب اذا قرايبكم كثير وزوارك كثير اعتقد عشرة كافية واذا زوارك قليل ستة او سبعة كفاية وبالنسبة لعطور الكورنيش بالعكس تراها مركزة ومافيها اختلاف اختي اشترت من هناك ما تغيرت ابد مثل ماهي وترى في محل في الجامعة مول اسمه امبراطور الكوش يسوي نافورة التورتة الل طالعين فيها واعرف طقاقة ب3500 صوتها ودقها حلو بس تغني وهي مكانها ماتتحرك...
عالعموم لي رجعة ان شاء الله وياريت تقبولوني ضيفة معاكم وترى اسمي عبير كتبته abaaar عشان اقدر اسجل كل الاسماء راحت...
المهم عندي طلب ابغى رقم فاطمة العمودي الله يخليكم عندي مناسبة يوم الجمعة ان شاءالله وبروح لها ولاتنسون تدعون لي ....سلام.