السلام عليكم و رحمة الله و بركاته ..

أختي سلافة2120 .. رجعتلك :) ..

أنا قلت لك البجايم الفخمة الساتان و الحرير ..
يعني تنفع للأيام الأولى عشان الكسوف و الإحراج ..
ما قلت لك عيشي طول عمرك ببجايم :23: !!

أنا عن نفسي عجبتني بجايم تجي أطقم بلوزة و بنطلون و روب ..
أحس شكلها مرة مرتب ..
عشان كمان لا ننزنق و نضطر نلبس القصير :30: ..
خليه بعدين الله يعطينا عمر و عافية و نلبسه ..
إن شاء الله ..

و أنا عموما للآن حق الأيام الأولى ماخدته طويل ..
أو بجايم زي ما قلت لك ..
أو إللي يجي كدة لنص الساق .. برضو فيه منه أشكال حلوة ..

و إنتي أيشبك بتشتري من السوبرماركتات ؟؟
يا بنتي ترى المحلات مالية البلد ..
روحي أشتري حاجات كويسة و مرتبة ..
أغلب إللي في السوبرماركتات تكون حاجات
تمشي الحال و خاماتها مو قد كدة ..
أنا عجبني تيشيرت من الصواري أظن ..
ماني فاكرة من فين .. المهم من سوبرماركت ..
ومافي غسلتين قيده أتخرق !!
و سار زي حق الشحاتين !!

حتى لو خطيبك منكم و فيكم ..
برضو لازم تبيضي وجهك و وجه أهلك قدامه ..
بالعكس هادا الشي لمصلحتك ..
عشان لا يقول أهلها جابولها حاجات مو قد كدة !!
خصوصا إذا كان من الشباب المفتحين و الفاهمين !!
ترى الشباب سار ينخاف منهم الأيام هادي ..
يفهمو في الماركات أحسن من الحريم !!


و بالنسبة لواحة الجلابية ..
شكله أبو 700 ريال هو إللي قلت لك عليه ..
ترى والله مرتب .. و فيه قطع كتيرة ..
أنا قلت لك ماني فاكرة بالزبط أيش مكوناته ..
بس فاكرة إنه طقم كامل مليان قطع و كله أبيض ..
و فيه منه أبيض و مطرز بألوان و خيوط ملونة ..
و سعره غالي عشان قطعه كتيرة ..
مو عشان كرتونه فخم !!
لأنه شوفي القطعة لحالها برة بكم ..
و أنا قلت لك عجبتني فكرته و حسيتها إقتصادية ..
يعني تغيري كذا شكل و موديل .. الطويل و القصير
و البيجاما و الشورت .. فيه قطع كتيرة ..
و ترى تنفعك على المدى الطويل إن شاء الله ..
بس إذا ما عجبتك بكيفك ..

و هو صح عنده البجايم القطنية العادية غالية ..
كلها بـ 80 – 100 و إنتي طالعة !!
و أغلبها ما تستاهل دا المبلغ ..
لأنك بتلاقي برة أحسن منها و من ماركة معروفة ..
و أرخص !!

أنا عجبتني عنده كم بيجاما .. فيه برمودا و فيه شورت ..
بس حسيتها غالية .. بطلت منه و مشيت ..
قلت أروح أشتري من مكان تاني أحسن و أرخص ..


و أنا حكايتي حكاية في ملابس البيت و الخرجات العادية ..
شارية بديات و تيشيرتات و بلايز مختلفة ..
أغلبها من سيتي ماكس و سيتي بلازا ..
و شارية تنانير بين قصير و طويل و بنطلونات
و برمودات ..
و لا في شي منها يليق مع التاني :23: !!
و هادا الإكتشاف أكتشفته من يومين بس !!
هيا دحين بالله أيش أسوي ؟؟
ههههههههههههههه والله شر البلية ما يضحك !!
ماني عارفة أيش أسوي !!

و ملابس الخروج .. لسة ما أشتريت ولا شي !!
وماني عارفة أيش أشتري ..
فكرت أشتري تايير فخم بنطلون أو تنورة ..
و بدلتين من السبور شيك ..
حلوة .. و تنفع تتلبس في أي مكان ..

و فساتين السهرة لسة ما سويت شي !!
>>>> أشطر وحدة في العالم :23: ..

و الجلابية حقت دنيا القوي ما شوفتها !!
هي تجي دحين في التلفزيون ؟؟
إذا بتجي قوليلي أشوف الحلقة ..

بس برضو ما تحسي إنها شي كتييييييير
إني ألبس شي يبرق و يلمع في البيت و في الصباح أو الظهر !!


و بالنسبة للسيشوار و المكر و دي الحاجات
والله إذا نظيفة و جديدة خديها مو مشكلة ..
لأني أنا بنفسي حأسوي كدة إن شاء الله ..

و الحاجات حقت المانيكير و الباديكير قلت لك
إذا لقيتها في المحلات إللي زي قزاز و غيره و تكون طقم ..
و سعرها ناسبني .. حأشتريها ..

بس إذا أشتريتها من الصيدلية أو السوبرماركت
حتكون كدة مثبتة في كرتونة و مغطاية بغلاف بلاستيك شفاف ..
يعني شكلها مرة مو حلو إنك تاخديها زي ماهي ..
و إذا ما فهمتي قصدي روحي شوفيها في الصيدلية أو السوبرماركت ..
عشان كدة قلت لك أفكها كلها و أحطها في شنطة أو علبة صغيرة ..
عالأقل يبان شكلها كأنها طقم ..
فهمتي قصدي ؟؟


و يبغالي أروح سيتي بلازا و أشوف اللحف ..
بس أنا ما أبغا ألوان غامقة ..
و كمان إن شاء الله أبغا أروح الكورنيش و أشوف المحل
إللي قالت لي عليه أم الوسيم ..


و أنا ترى عندي هوس أكواب :23: ..
أحب أجمع أكواب معينة و بأشكال معينة ..
حتى دايما يتتريقو عليا ..
و يقولولي البنات يشترو مكياج و ملابس و إكسسوارات
و إنتي تشتري أكواب و كاسات !!
و مين قال لك إني أبغا أرمي أكوابي ؟؟
لا يختي ما أرميها لا عشانه ولا عشان أهله ..
و أنا زيك ماني كييفة شاهي و قهوة ..
بس أحيانا تهف كدة و أسوي لي كوب نسكافيه بالحليب
أو شاهي بنعناع >> عشان أجرب الكوب :23: ..
تعرفي أحيانا كدة تتحمسي و تشربيه خصوصا إذا كان فيه
أحد عندك و تضطري تشربي معاهم ..


و بالنسبة للذهب ..
الله يعينك .. إذا هادي عوايدكم ..
بس أنا شخصيا قلت لك ماني حاطته في بالي !!
ألين ما أخلص أشيائي الأساسية ..
و بعدين إذا زادت معايا فلوس ..
هديك الساعة أفكر أشتري ذهب ..

و إذا عالمساعدة .. أنا لا مادية ولا كلامية !!
و حتى الكلامية ما يجي منهم إلا الإنتقاد و التحطيم
و تكسير المجاديف :06: !!
و أنا زي ما قلت لك ماني مستنية شي من أحد !!
و حتى لو جابو لي .. حأرده لهم !!
بس زي ما قلت لك يحز في نفسي إني أسمع من الناس إنه
أخوانهم و أهلهم بيساعدوهم و يوقفو معاهم خطوة بخطوة ..
عالأقل معنويا ..
و أنا كدة ماشية زي اليتيمة أتخبط يمين و يسار ماني عارفة
أيش أشتري و أيش أسوي !!
و بس أسأل صاحباتي و أسألكم و أسأل الأغراب
و أهلي جالسين و ما تجيني منهم حتى كلمة طيبة !!
الحمدلله على كل حال ..


و يابنت شنط المكياج غالية !!
تبغي تفلقيني إنتي !!
أنا رحت أشتري شنطة مكياج لقيتها بـ 800 – 1000 و إنتي طالعة !!
لا يختي .. أشتري سبتات أو علب مرتبة و أرصها فيها و خلصنا !!


و بالنسبة للعلاقات أنا قلت لك أخدت من الباشاوات ..
و أخدت من أيكيا .. بس ما تكفيني ..
لأنها ما تجي 10 على بعض ..
فلازم أروح أشتري تاني ..

و عجبني مهجة .. مادام إنه الملبسة بريال ..
يا بلالالالالالاش .. أروح أشتري منها قد ما أبغا ..
و حتى لقيت برضو في الدانوب علاقات ملبسة ..
بس ماني فاكرة سعرها كم ..

و العلاقات حقت أيكيا بلاستيك عادية سادة و فيه منها ملونة ..
و لقيت كمان في سيتي بلازا .. بس أغلبها حديد و غالية ..
مع إنها عجبتني عشان فيها المشابك زي حقت المعارض ..
بس سعرها ما ناسبني ..

و إنتي دحين قصدك العلاقات هادي لأيش بالزبط ؟؟
لكل الملابس ؟؟ ولا بس للانجري ؟؟

لأني أنا فكرت أشتري العلاقات الملبسة للقمصان و البجايم بس ..
و العلاقات العادية البلاستيك للبلايز و القمصان و الفساتين
و الحاجات التانية إللي تتعلق ..

و اللانجري تتطبق و تنحط في الأدراج ..
مو لازم تتعلق .. أيش هو عرض أزياء :23: !!


و فين شبرا القديم دا ؟؟
حدديلي إسم الشارع .. الحي .. المنطقة ..
عشان أعرف أوصل له !!

و أم العريس حقت قريبتك أيشلها تزعل و تسوي فيلم ؟؟
و الله ناس ماهم عارفين أيش يسوو !!


و بالنسبة للشموع ..
أشوف إذا لقيت شموع معطرة و حلوة و سعرها كويس ..
إن شاء الله أشتريها ..
بس ما كنت حاطتها في بالي أول ..
كنت أحسب عيب !!

و الورود برضو من الإكسسوارات ..
خليها بعدين وقت الفضاوة ..


تحياتي ..
جــــــــداويــــــــــــة

السلام عليكم و رحمة الله و بركاته ..


أختي *Fantastic* ..

بالنسبة للسيشوار هو دا إللي معقدني ..
لأني كل ما أسشور شعري ينفش !!
و أسمع كل الناس يقولو لازم تسشوري شعرك !!
طيب ما ينفع أحط جل أو ألفه بالمكر و خلاص !!
ولا حيطلع شكلي زي المجانين :23: !!

و إن شاء الله أجرب و أشوف أدور لي فستان ناعم
أو جلابية زي ما بتقولي بس أهم شي ما تكون شي مبالغ فيه ..
لأني ما أحب التطريز التقيل .. خصوصا يعني في البيت !!
أحسه مرة كتييييييير !!

و بالنسبة للمكياج أنا عادة مكياجي خفيف ..
زي ما بتقولي ..
و أحب أعمل حكاية الكونتراست دي بس بألوان رايقة ..
و دي ترى كلمتي دايما :) ..
و أستغربتها منك .. لا تكوني أختي ولا تعرفيني !!

و أنا ترى قد روحت لأهله و عارفتهم و عارفينني ..
يعني ماهي أول مرة أروح لهم !!
و أيش قصدك إني أقول له إنه إنطباعي عنهم حلو ؟؟
من أي ناحية ؟؟

و بعدين ليش لازم أروح لهم ؟؟
يا ناس والله إحراج :( !!
و غير كدة حأكون تعبانة .. و يبغالي كم يوم ألين
أرتاح من تعب الفرح !!
لأنه كل شي على راسي ..
و أنا إللي قلقانة وشايلة هم كل شي ‍‍!!
:( ..


و أنا عارفة إنه الوالد مو من حقه يسأل !!
ولا حتى أمه ولا أبوه مو من حقهم يسألو ( أهل زوجي ) !!
لكن أنا أبويا دقة قديمة .. و تفكيره قديم ..
و لازال متمسك بالحاجات القديمة ..

و بالنسبة لزوجي ماخد موقف من أبويا
و يقولك أنا أبدا ما أتفاهم معاه في كلام زي كدة !!
و إذا سألني حأسيب له المحل و أخرج !!
( معتبرها لقافة و تدخل في خصوصياته !! ) ..

و وحدة قالت لي إذا تبغي تسكتي أبوكي ..
بدون إحراج ولا مواقف بايخة ..
و بدون ما تنحوجي إنه يسألكم و يحرجكم ..
خلي زوجك يروح له .. و يقول له أبغا أشرب معاك
فنجان شاي .. و يجيه ..
و يسلم على راسه و يقول له : بيـّـض الله وجهك يا عمي !!
( هادي عادات القدامى ) !!
و يسير خلاص الأب يفهم .. و ينبسط ..
و يسكت ..
و قالت لي إنه كل عائلتهم يسوو كدة ..


و كيف أعود زوجي عاللي أبغاه ؟؟
ترى إللي عندي عنيد و مخه ناشف بشكل مو طبيعي !!
علموني تكسبو فيا ثواب :06: ..

و آميييييييين ..
آميييييييييييييييين ..
آميييييييييييييييييييييين ..
يااااااااااااارب العالمين يا أرحم الراحمين ..

الله يبرد قلبك يا شيخة زي ما بردتي قلبي
بدعوتك ..
الله يجعلها من نصيبي و يرزقك مثلها إن شاء الله ..

تسلمي يا قمر :) ..


تحياتي ..
جــــــــداويــــــــــــة

السلام عليكم و رحمة الله و بركاته ..

سلافة2120 :30: ..

إنتي دحين جالسة تتفلسفي لي و تعلميني
و الصباحية والصباحية و ألبسي لا تلبسي
و إنتي بنفسك منتي دارية عن الهرجة ولا
عن شي فيها :30: !!

أيش أسوي فيكي ؟؟
أجي أعضك :22: !!

و بالنسبة للموضوع التاني على قولك ..
لا تحسبي محد حيسألك !!
لأنه أنا إللي أعرفه الأم تفضل ورا البنت
ألين تجيب لها الدليل ..
و توريه لأبوكي كمان !!
( معليش أعذرو صراحتي !! ) ..
هادا إللي أنا أعرفه .. حتى عند الناس المثقفين
و المتحضرين !!
يعني لا تقولي عادات قديمة .. و حقت ناس قدام !!
و حتى روحي و أسألي أمك !!
و إذا عندك أخت كبيرة أسأليها أيش سوو
معاها بعد ما أتزوجت ..
و أسألي قريباتك ( إللي ماخدة وجه عليهم ) ..


و بالنسبة لحفلة الصباحية ( الصبحة) ..
إللي عندي أصلا ما يبغو يسوو شي :30: ..

بس أعتقد إنه عيب إنك تلبسي فستان الملكة !!
لازم فستان حق الصبحة غير حق الملكة و الزواج !!
هادا إللي أنا أعرفه !!

و بالنسبة لي .. في الملكة جوو و جابو جيوش
من أهاليهم وكلهم شافوني و شافو فستاني ..
وإللي ما حضرو .. شافو الصور حقت الملكة ..
يعني حتى لو سوو لي صبحة .. ما راح أقدر ألبسه ..

بس إنتي خيطي فستان فخم و مرتب ..
تقريبا زي حق الملكة ..
عشان حتكون أول دخلة لكي بينهم من بعد زواجك ..
فلازم تكوني عروسة من جد :27: ..


تحياتي ..
جــــــــداويــــــــــــة

السلام عليكم و رحمة الله و بركاته ..

أختي رهـــــــــا>>> ..
إنتي شكلك كرهتيني من يوم ما قلت لك عالقاعة :( ..
معليش والله ما كان قصدي أزعلك :06: ..

و بالنسبة للينا .. أنا إلى آخر مرة سمعت من كذا
وحدة إنهم راحو أتصلحو عندها في ريما زي ماهي ..

ما أدري عاد إذا نقلت ..
يمكن البنات يفيدوكي ..

و إذا تبغي روحي للمقينة ..
أو روحي لجاك ديسانج ..
صاحباتي دايما يمدحوهم ..
بس أنا شخصيا ما روحت لهم ..
و بأفكر أروح لهم و أشوف كيف وضعهم ..
و أنا زيك للآن حايسة وما لقيت صالون على كيفي ..

الله يعيننا و يساعدنا ..


تحياتي ..
جــــــــداويـــــــــــة

السلام عليكم و رحمة الله و بركاته ..

يا بنت يا سلافة2120 ..
كيفك ؟؟ و فينك غطستي ؟؟
يعني أنا لو ما أجي و أهرج ما ألاقي أحد منكم !!

و بالنسبة للزواج ..
أحمدي ربك إنه ماشاء الله تبارك الله بيسوي لك فرح ..
حتى لو على قد إمكانياته !!
إسمه عبرك و بيسوي لك شي !!

و مادام الفرح عليه .. ليش إنتي إللي رايحة و جاية و بتدوري
له قاعات و أماكن ؟؟
ليش ما يتلحلح هو و يروح يدور لحاله أو معاكي عالأقل ؟؟

و مادام ماهو دافع حق الصور ..
لا تصوريه صور كتيرة !!
أو سوي زي ما قلتي و أتصوري معاه كم صورة وخلاص ..
و أهم شي صورك إنتي و إنتي عروسة ..
و خليه هو يطلع في تصوير الفيديو وقت الزفة زي مايبغا ..


أنا لو تشوفي أيش سوى فيا زوجي في الملكة ..
و إحنا بنتصور فوق .. ما ألاقي غير أهله كلهم في وجهي !!
جوو بحجة إنهم يسلمو علينا ..
و أحرجوني و قالو نبغا نتصور معاكم ..
و قلت نتصور صورة جماعية !!
قالو لالالالالالالالالالالالا ..
و كل وحدة أتصورت معانا لحالها !!
>>>> تقولي هم إللي جايبين المصورة !!
و شوفي كم طلعت حسبة صورهم !!

و تخيلي أنحرجت منهم ..
لأني أصلا كنت هبلة و مكسوفة ..
و أتصورت معاهم .. لأني خفت أزعلهم !!
و أنا أصلا ما أحب أعطي صوري لأحد ..
وزادت عليا في صورهم 1000 ريال !!
و حتى كنت أبغا آخد تمنها منه !!
و بعدين جاني في يوم و أخد صورهم كلها
مني و حرقها !!
و هددني و قال لي أصحك تفكري تعطي لأحد
منهم صورتك !!
صحيح أنا أنبسطت من دي الحركة
لأني أصلا ما كنت أبغا أعطيهم الصور ..
لكن هم أهلك !!
كنت أتفاهمت معاهم أساسا و قلت لهم لا تتصورو
ما أبغا أعطيكم الصور !!
و تخيلي فوق خسارتي للفلوس ..
أحرجني أحرجني أحرجني فووووووق ما تتصوري ..
و ليومك دا أهله حاقدين عليا و يحسبوني
ماخدة صورهم ومخليتها عندي و ما أبغا أعطيهم هي !!
و لو تشوفي خالته كيف تشمق لي كل ما شافتني !!
و كل ما شافت وجهي تقول لي فين صوري ؟؟
أديني صوري !!
أبغا صوري !!
فين صوري ؟؟
و أحسها شوية و تمسكني و تخنقني عشان بس أعطيها الصور !!

و دحين فهمته .. و قلت له في الزواج إن شاء الله ..
لو جاء أحد من أهلك و قال لي أبغا أتصور معاكي ..
راح أكسفهم كسفة بااااااااااايخة
و أقول لهم ترى ولدكم ما يبغاكم تاخدو صوره ..
روحو أستأذنو مني بعدين تعالو نتصور !!
خلالالالالالاص الذوق ما ينفع معاهم !!
:30:


و يختي ماشاء الله تبارك الله الله يزيد دخلك
و يبارك لك فيه ..
بس أهم شي منتي حرامية :23: !!


و أنا فاهمة إنه صحن الشيكولاتة كبير ..
بس ترى والله الحركة مو حلوة ..
معليش أنا صريحة بزيادة ..
إلا إذا تبغي تسوي صحن كبير ينحط عالكوشة
و تاخديه بيتك .. و كم صحن صغير يلفو بيه
عالناس و يباشروهم عشان لا يمغصو بطنك !!
أو تسوي صحنين كبار شبه بعض ..
واحد تاخديه .. و واحد يتباشرو منه الناس ..
عشان لا تطلع عيونهم على صحنك ..
كدة يسير الوضع معقول ..

و ممكن تسوي زي حركتي ..
أنا في الملكة ما حطيت عالطاولات شيكولاتة ..
حطيت معجنات و موالح و بيتي فور و بقلاوة و معمول
و دي الحاجات يعني تشكيلة ماني فاكرة أيش كانت بالزبط ..
و بعدين كنت جايبة تباسي كبييييرة
مليانة شيكولاتة و مشرعة و مزينة من شوكولاين ..
و زي كدة مسكوها و سارو يدورو و يباشرو بيها الناس ..
( بعد ما جوو أهل العريس ) ..
و ترى طلعت حلوة و أوفر من إني أحط على كل طاولة
نص كيلو أو أكتر شيكولاتة !!
لأنه الصحن الواحد يشيل أكتر من نص كيلو ..
تقريبا كيلو أو كيلو إلا ربع شيكولاتة !!
و أحسبيها ..
و التباسي أساسا حقتنا حقت الضيوف الفخمة ..
وديناها لشوكولاين و أخترنا الأنواع إللي نبغاها
و هما غلفوها و زينوها و حطو لها شرايط و ورود
( ببلاش فوق البيعة ) !!

و بالنسبة لشيكولاتة النقلي أنا شخصيا ما عجبتني ..

و ترى شوكولاين أنواعه كتيرة ..
فيه أنواع لذيذة و أنواع طعمها الله يكرم النعمة ..
فيها نكهات غريبة و مكسرات و حاجات أنا شخصيا ما عجبتني ..

عشان كدة لمن تروحي تشتري أختاري إللي تبغيه
( إحنا نسوي كدة ) و إذا شوفت شي شكله جديد أو غريب
تلاقيني زي الهبل أقول له هادا أيش جوته ؟؟ هادا بأيش ؟؟
عادي والله مافيها شي !!


و بالنسبة للعلب حقت الملكة و العربية ..
غريبة !!
طيب مو عيب كدة ؟!؟!
كيف إنتي تروحي تشتريها بنفسك ؟؟
و كمان تسويها بنفسك ؟؟
أجل هما أيش سوو ؟؟
وما أتكلمو عليكي أهله ؟؟
و كيف أهلك وافقو لك تسوي كدة ؟؟
معليش يعني أنا حسيتها مرة غريبة ..
يمكن أنا تفكيري شوية متخلف من دي الناحية !!
لأني أنا إللي أعرفه إنه العريس و أهله هما إللي
يسوو كل دي الحاجات !!

و أنا عن نفسي كانت حلاوة الملكة حقتي مصاحف ..
أنا طلبت كدة ..
و حتى أخويا لمن ملك .. جاب مصاحف ..
لأنه أنا في نظري حلاوة الملكة خسارة فلوس عالفاضي ..
و أغلب الناس بيرموها في الزبالة ..
و أنا منهم !!
لأني ما أحب أحتفظ بأي علب و أي شي ..
و فيه ناس كتير يجيبو علبهم فخمة وغالية بس
أشكالها مرة مو حلوة ..
عشان كدة قلت لهم بلاش منها ..
و خلوها مصاحف ..
عشان ربي يبارك لنا ..
و كمان محد من الناس يقدر يرمي المصحف :) !!
يسير ما راحت الفلوس في الفاضي !!
و من بعد ما سويتها .. كل الناس قلدونا !!
و سارو يجيبو مصاحف..
و طبعا إللي يبغا يتكلف مرة و يسوي شي فخم ..
يجيب مصاحف فخمة و غالية ..


و بالنسبة للفرح أنا ما قلت خلي كل واحد في يوم !!
قلت لك خليه في نفس اليوم ..
الحريم في الفندق .. و الرجال في إستراحة ..
و لمن يجي وقت الزفة نادوه و يجيكم ..

و مادام إنه قريبكم و معطيكي حريتك ..
أتفاهمي معاه بالطيب و أقنعيه ..
و قوليله الصور هي إللي بتبقى ذكرى لنا و لعيالنا إن شاء الله ..
و خليه يجيب لك المصورة إللي تبغيها ..
بس طبعا لا تضربي في السعر عشان لا
يصنقر عليكي و يقول غالي ..
أو عالأقل خليها نص بالنص !!


و بالنسبة لأم زوجي مين قلك إني سكتت لها !!
في وجهها قلت لها طيب أبشري و ما يسير خاطرك إلا طيب !!
حسبتها بس بتتكلم كدة من باب العشم و المجاملة !!
و لمن شوفتها مسختها و سارت تعيدها كم مرة ..
و كنت أسكت و ما أهرج ولا أفتح فمي ..
بس أجلس أبربر بيني وبين نفسي !!
و بعدها أتضاربنا أنا و زوجي و سار بيننا خلافات ..
فضحتها عنده و قلت له كل شي ..
و قلت له إنتو ما تستحو على وجهكم ؟؟
يكفي إللي إحنا سويناه و إللي بنسويه
و كمان أمك تبغا تتفشخر من فلوس أبويا !!
و كمان تجبرني أسوي لها إللي تبغاه !!
وكمان تجبرني أعطيها كروت لنص جدة !!
و تجبرني أدفع فلوس و أفقر أبويا عشان هي
تروح و تتمنظر قدام الناس و تقول زواج ولدي و زواج ولدي !!
هو حقد عليا و زعل من كلامي لأني أتكلمت بعصبية ..
بس بعدين فهمته الكلام برواقة ..
و فهمته كيف العرف و نظام أهل البلد ..
و فهمته إنه أمه مالها حق تغصبني ولا تطلب مني ..
زي برضو مالها حق إنها تمنعه يسوي لي زواج !!
أو حتى يدخل شراكة ولو بالربع مو بالنص !!

و حتى إذا سويت زواج كبير .. مو من حقها تطلب مني
كروت و تجبرني أتحمل تمن الكراسي حقت ضيوفها !!
و قد ما أعطيها كروت تدبر نفسها و تجي و هي ساكتة ..
حتى لو أعطيتها كرت واحد أو كرتين ..
تجي ضيفة و تروح ضيفة !!

بعدين هو بنفسه قال أمي مالها شغل تغصبك
زي كدة !!
و لمن قال كدة .. بغيت أقوم أغطرف :icon28: !!
و قلت له خلالالالاص ..
إذا سواء سويت الفرح في سويسرا أو فوق السطوح :23: ..
محد فيكم يفتح فمه ولا يتكلم !!
طول ما إنتو ما تبغو تدفعو ولا ريال !!
ولا أشوف أمك تجي يوم و تقول لي أحجزي قاعة
و أبغا أعزم و أبغا أسوي !!
و الله حالة !!

و من يومها أنا ما عاد فتحت الموضوع معاه تاني مرة ..
ولا أتكلمت معاه فيه ..
و هو عارف إنه الزواج حيكون عائلي و محدود ..
و أكيد أمه عارفة ..
و بكيفها عجبها ولا ما عجبها !!
و لو مو عاجبها تدخل شراكة نص بالنص و نسوي زواج
كبير !!


و عجبتني حكاية إنك تبكسيها :23: ..
ترى زي المصارية طول × عرض
تطبقك و تطبقني تحت باطها :23: ..
هههههههههههههههههههه


و يابنت طرحة الفستان لازم تكون تل !!
ما يسير تسوي شيفون ..
يطلع مرة مو حلو !!
و لا قد شوفت عروسة طرحتها شيفون !!
حتى لو تبغي تسوي حركة الكم إللي في الطرحة سويها
برضو بالتل ..

و الفستان إللي قلت لك عليه في التلفزيون ..
الكم حقه جاي من فوق ماسك .. و من تحت الكوع يوسع ..
ألين الكف ..
و كله مطرز و مشتغل شغل فخم بس ناعم ..
والله قد ما أقولك يجنن ما تتخيليه !!


و واحة الجلابية إللي في حراء لسة كنت أبغا أقول لك عليه ..
لأني أتذكرت إنه جنبه خطوات و إنتي تبغي تروحيه ..


و أيش إللي في الصواريخ ؟؟
واحة الجلابية فاتح في الصواريخ يعني ؟؟

و إنتي أيش تبغي بالعلب ؟؟
مادام الملابس كويسة و ممتازة !!
مو أصلا حترميها و تحطي الملابس في الشنط ؟؟


و قلت لك عالقمصان فووووق تلاقي ردودي ..
بالذات حق الشهر الأول على قولك ..
و ترى حتى إللي يجي لنص الساق حلو ..
و مع الروب تحسيه كشخة ..


و الله يسلمك يارب ..
أنا و جيوبي الأنفية في زحمة ..
عشان كمان قبل رمضان بفترة خشمي أنكسر :06:
فشوفيني دحين أي شي يهيج لي جيوبي الأنفية
و على طوووول الحساسية تثور ..
و يسير عندي إحتقان و كتمة و ما أقدر أتنفس و أفلام ..
الحمدلله ياربي الحمدلله ..


و بالنسبة للعطور ..
عطور الفواكه و الحاجات الخفيفة هادي خليها للبيت ..
مو لازم طول مانتي جالسة في البيت تتبخري و تتعطري بعطور قوية !!
أصلا حسب علمي الرجال ما يحبو العطور القوية !!
خلي العطور القوية و العودة للخروج و العزايم و المناسبات ..

و من جد لمن أشم عطر قوي كأني أتوحم !!
و أصدع و يجيني غثيان و أسير ما أشوف قدامي !!
كويس إنها مو بس حالتي لحالي .. طلع في ناس زيي !!
كنت أحسب إنها حالة غريبة !!


و بالنسبة لموضوعك ..
أول شي تقريبا متى الفرح ؟؟
بعد شهر ؟؟ شهرين ؟؟
شوفي كم باقي له ..
لو باقي قليل .. روحي خلصي حاجاتك و أرتاحي ..
و لو باقي كتير ..
أشتري الأساسيات و سوي الفستان حق الفرح
و خلصي من الحاجات الكبيرة ..
و خلي الإكسسوارات والكماليات لبعدين قبل الفرح بشوية ..


و بالنسبة للعفش .. روحي و أختاري ..
و روحي رجلك على رجله ..
مو تدوري لوحدك و هو جالس في بيتهم !!
و بالعكس أحسن لك أشتري كل إللي تبغيه و بذوقك ..
عشان لا يجيبو لك شي ما يعجبك و بعدين يفضل جالس في خلقتك
وما تقدري تتصرفي ولا تغيريه !!
عالأقل الأساسيات .. زي غرفة النوم والمعيشة و الصالون ..
و بعدين .. في الفرش و الموكيت و الإكسسوارات و الأجهزة الكهربائية ..
أكتبي له لستة بكل الحاجات إللي تبغيها ..
و خليه هو يروح يشتريها لحاله !!
أو حتى أهله يساعدوه فيها و يختاروها معاه ..
مو تقولي أختك متزوجة أبوه ؟؟
يعني أختك ما راح تختار لك شي مو طيب !!

عشان كمان تلحقي تعطي نفسك فرصة إنه يتلهي عنك
و ما يجيكي قبل الفرح بفترة ( عشان تطلع لك طلعة ) !!

بس مادام هو و أهله موافقين لك تروحي تختاري بذوقك ..
أستغلي الوضع !!

لأنه بيتك إنتي وياه ..
و إللي حيجي فيه ما راح يتغير ألين 5 – 10 سنين عالأقل
إن شاء الله ..
فأحسلك أختاري بذوقك ..
عالأقل ما تلاقي شي جالي قارفك في وجهك ومانتي قادرة تغيريه !!


و لا تنحفي ولا شي ..
بالعكس خلي معاكي على طول شيكولاتات و حلويات ..
و على طول حتى و إنتي في السوق كلي منها ..
و حتى و إنتي ماشية في السوق حتلاقي دونات و كيكات
و حلويات و سينيبون و كريسبي و حاجات كتيرة ..
و كلها حاجات تتخن ..
و إنتي ماشية أشتري منها و كلي ..
أو خليكي شوية 5 - 10 دقايق أرتاحي من المشي و الدوران ..
و عبالها كلي لك شي ..

بس لا تنحفي زيادة ..
لا يجو يوم الفرح يدورو عليكي و ما يلاقوكي ..
>>>> تختفي من النحف :23: ..


وتعالي عالنت أول بأول و ردي حبة حبة ..
بدال ما نجلس في كل رد نحكي قصة حياتنا :23: ..
أيش يقولو علينا الناس !!


سبحانك اللهم و بحمدك .. لا إله إلا أنت ..
أستغفرك و أتوب إليك ..

تحياتي ..
جــــــــداويــــــــــــة