عبير نستناكي:)


شفتي كيف بالله مايحق لي انقهر انا اقوله زي كذا اني تعبانة مع العفش واني واني وهوساكت
وبعدين يقول انا لسى ماجبت شيء للبيت بس استاجر الشقة راح ابدا أثثت!! جنني ياشيخة
مشكلته ماعنده سيارة الحين لسى دوبوا متوظف ومامداه يشتري سيارة وهو متشرط يبغى سيارة ماادري كيف ياشيخ مشي حالك مايرضى
وكل شي يقول ماعندي سيارة ماعندي سيارة شوي ببكي عليه

شكلها موضة الشباب البروووووووووووووود ياشيخة تحسي نفسك تفكري في كل شيءوهما نايمين
وانا ادور ارقام واعطيها له وهو يتصل ويسال وامس راح فرح ورجع يقولي شفت قاعة وماادري ايه يعني احسه يدور بس يالله ياربي لك الحمد

تصدقي اكثر شي خايفة منه انه يكون اتكالي ويعتمد عليا ويجلس يتفرج ياسلام ساعتها مادري ايش بسوي!
ماهو حلو كذا هو يتكي وانا اتعب

بالله ايش اسوي معاه انا اول شي قلت له مالي بالاثاث نقي انت
وبعدين كان يبغى شقة عند اهلي ومارضيت علشان يروح يدور بدل الدلع حقه
والحين سايبته قلت اشوف ايش يصير معاه؟ الله يعين خوفتيني زيادة على ماانا خايفة وقلقانة

بس خليني اشوفوه الحين يقول الشهر الجاي راح يدور على الشقة تخيلي لسى مالقى الشقة
راح اقوم اضربه في النهاية ههههههههههههههههه

بس ماابغى الح عليه في التدوير حق الشقة علشان لايقول مستعجلة تعرفي الرجال عقولهم لحالها

دليني على محل يبيع اطقم شنط وجزم لاني رحت مرة الحجاز واخذت طقم ب170 وفرحانة فيه واخرته لقيت في الخيمة الطقم ب60 ريال كنت ببكي بكاء من جد قهر والله

ومابقي احد من اهلي ماحشني

عاد تعرفي نحن حريم اخواني مرة طيبات ومااخرج السوق إلا معاهم علشان كذا اخذ رايهم وماشاء الله صراحة مايقصروا
لاني لو رحت لحالي اشتري بس شموع وعطور وبخور
والملابس مااقربها:)

الطقم حق واحة الجلابية هو اللي قلتي عليه شكلي ارجع اشوفه يمكن لما يصير عندهم تخفيض اخذه:)
ليه انت ايش مقاسك ؟؟؟ واتوقع في كل المقاسات لكن مارضي يرويني هو يقول ارويك واحد شبهه؟


اللي قالت عليه اميرة سعودية المحل تحسي ملابسه حلوة بس ماادري ليه حسيتها مغبرة؟؟ يمكن لاني ماشفت عدل ماادري بس والله اسعاره على 200 و 300 والحاجة تحسي نفسك ماتبغي تمسكيها؟؟ علشان كذا ترددت كثير صراحة
وترى الكراتين مهمممممممممممممة لانه عفش عروسة ياحلوة لازم كل شيء بكراتينه افتكر مرة اخويا نزلوا اكياس من الكراتين كل شي تجيبه بكرتونه العطور والملابس وكل شي لو له كرتون يفضل به
تعرفي علشان تبان جديدة وبنورها على قولتهم
انتبهي ترمي الكراتين خلي كل حاجة في كرتونتها والله لو تشوفي كراتيني تموتي ضحك ماعاد في وسع لشي كل الدواليب استهلكتها ماشاء الله

انااخذت صندل اسود حلو بالمرة من ستي ماكس

ان شاء الله اليوم انزل طقم التسريحة واصوره وانزل لك لو قدرت الصندل حق ستي ماكس والعلبة حق الملكة
خليك تشوفيها يمكن تعجبك شي

جاتوه لذيذ اعتقد لو تشوفي سعد الدين ماادري عندهم ولا لا؟ بس تعرفي حلوياتهم روعة

النافورة حق الشوكولاتة اعتقد يغمسوا فيها الفراولة بس كيف تتقدم والله ماعندي فكرة يمكن تتحط في البوفيه ولو تسالي احسن

ياشيخة موضوع اول يوم هذا ترى ماعندي فكرة والله ابد اذا كان احد يسال او لا؟ ماادري والله
بجد ماادري ولا اقدر اسال احد يافشلتي كسفة صراحة
والله ماادري ايش هرجة اليوم هذا؟ ليلة الرعبب هههههههههه

السلام عليكم و رحمة الله و بركاته ..

يا ســـــــــلافــــــــــــــــــــة ..
ترى الموضوع سار حقنا أنا و إنتي :23: ..

أول شي إنتي سار لك قد أيش مملوكة ؟؟


و يا بنتي ترى السيارة ماهي شي مهم ..
ممكن يشتري سيارة مستعملة !!
مو شرط يجلس يستني ألين ما يشتري لكزس ولا مرسيدس !!
>>>> تفكير كل الشباب كدة ..
و إنتي حسسيه إنه هادا الشي ما يهمك ..
و لا يهمك أيش نوع سيارته ..

و يلاقي سيارات مستعملة و بسعر طيب ..
يمشي حاله بيها ألين ربي يسهل له ..
أو خلي أبوه يطلع له سيارة ..
أو إذا أبوه أو أحد من أخوانه عندهم سيارة زايدة
ممكن يستعيرها ألين يقضي مشاويره و تخلصو ..
أو حتى يستعير من أخوانك !!

لكن ما يجلس يربط أموركم كلها بالسيارة !!
حتى خلي أهلك يكلموه .. لا يسكتو له ..
و إنتي إذا ما رضي يسوي معاكي شي ..
أرفعي يدك من الموضوع و دخلي أهلك ..
عشان يحس إنه فيه أحد واقف معاكي ..
و يستحي على دمه و يتحرك ..

حتى لو علاقتك بأختك طيبة ..
كلميها .. خليها تكلم أبوه ..
و خلي أبوه يعطيه على راسه ..

يا شيخة أنا إللي عندي لوح تلج ..
بس قبل فترة لمن سارت المشكلة بيننا ..
فرطت كل شي لأبوه .. و فضحته عنده ..
و قلت له هو إللي ما بيسوي ..
و هو إللي مو راضي يعمل ..
و طلعو أهله يحسبوني أنا إللي بأتدلع
و مو عاجبني شي !!
و أنا مسكينة يا غافل لك الله !!
و من يومها أتحرك شوية و أستحى على دمه
لمن أبوه هزأه و سمعه كلام ما يعجبه !!

و من جد تلاقيني أنا إللي أجري و أدور و أسوي كل شي
و هو جالس زي الأهبل ياكل و ينام و يروح لأصحابه
و يروح البحر و خلاص ..

يختي الله يبعد عنه هدولا الأصحاب إللي ما جانا من وراهم
غير القرف و المشاكل و حرق الدم ..
حسبي الله و نعم الوكيل ..


و لأنه زوجك شكله إتكالي أنا بأقول لك لا تعطيه وجه ..
معليش صحيح هو زوجك و له حق عليكي ..
بس إنتي كمان لكي حق عليه !!
و الشي هادا شغله هو .. مو شغلك إنتي !!

باقي بكرة يجي يقولك يلا يا سلافة بالله روحي
شوفيلنا شقة تنفع لنا نسكن فيها !!

و شوية تلاقيه هو جلس في البيت
و إنتي إللي بتشتغلي و تصرفي ..


معليش لا تزعلي من كلامي ..
بس ترى الرجال ما ينعطو وجه ..
شوفي أختي .. موظفة ..
و مصروفها و مصروف بيتها وعيالها من جيبها !!
و زوجها مروق راسه ما في غير سفر من بلد لبلد
و تماشي و صرمحة مع أصحابه !!
و شوفيه دحين سايبها هي و عيالها في حرق الدم حق
المدارس و شال شنطته و سافر ولا فكر في أحد فيهم !!
و هو موظف وظيفة محترمة و في وزارة و له وضعه و منصبه ..
يعني ماهو منتف ولا شحات ولا ماعنده فلوس !!
و لــــيـــــــش دا كله ؟؟
لأنها عودته إنها تصرف و تشتري الشي إللي هو ما بيرضى يشتريه !!
و شوية شوية جات الشغالة و السيارة والسواق ..
ألين سار ماله دور غير إسمه راجل و زوج !!
حتى في المواقف إللي يبغالها رجولة ماتلاقيه !!

خلاص رفع يده من مسؤوليتها و من عياله ..
و شوفيها دحين مكروفة كرف الحمير
عشان تحافظ على مستواها و وضعها !!
و كمان يبغاها تخصص له قسم من راتبها !!
( و أظنه طلب النص !! ) ..
شوفي الوقاحة !!

و هادا كله عشانها أساسا أعطته وجه
و سمحت له إنه يرفع يده و يتخلى عن
مسؤولياته تجاهها هي و عياله !!

و شوفيها دحين تبكي دم ..
و ندمانة إنها أساسا فكرت في الوظيفة و التعيين ..
و كل أهلنا بينتقدوها على وضعها !!
و فيه ناس حاسدينها يحسبو زوجها مدلعها و جايب لها
كل إللي عندها !!
لكن خلاص إللي سار سار ..
و لا فات الفوت .. ما ينفع الصوت ..


معليش أنا ما أبغا أخوفك ..
بس قلت لك أنتبهي ..
خصوصا إنك حاسة بدا الشي من أول ..
يعني مو أنا إللي نبهتك عليه !!

و الله يجعله لكي نعم الزوج و نعم الرجل ..
:)
إنتي دايما أدعيله ..


و إذا أهلك عندهم عمارة و فيها شقة فاضية ..
أحسلك أسكني معاهم ..
عالأقل تكوني تحت عينهم ..
و هو يكون برضو تحت المراقبة :30: !!

و يمكن يتصلح و يتلحلح إذا دخل بين أهلك و أخوانك و عاشرهم ..
و طبعا ما يسكن ببلاش ..
يدفع إيجار سنوي ..
حتى لو 10 آلاف ( مبدئيا مراعاة لظروفه ) ..
عشان كمان لا ياخد وجه بالمرة ..

و كمان وجودك جنب أهلك في بداية حياتك
ممكن يساعدك .. مادام زوجك بنفسه لسة شخصيته
بتتشكل و ماهو عارف أيش يبغا !!

و مادام مافي أحد من أهله سائل فيه ..
خليه معاكي و مع أهلك و أكسبوه ..
و خلوه في صفكم و خلي أهلك يعتبروه زي أخوانك ..
و أخوانك يعتبروه أخوهم ..
و هادا الشي حيكون في مصلحتك إنتي ..
لأنه حيشوفها كبيرة لكي إنتي ..


و أنا عشاني عارفة عقول الرجال المعفنة ..
قلت لك أخرجي من الموضوع و دخلي أهلك ..
عشان لا يحس إنك مستعجلة ..
و عشان كمان يحس إنه وراكي أهل ..
و الشغلة مو لعب عيال !!


و الجزم والشنط أنا لسة مالقيت ..
بس بأشوف في حراء و سلطان مول ..
فيها محلات صاحباتي يمدحوها و يقولو تلاقي
أشكال مرة حلوة ..

بس الشباشب حقت البيت ..
و الشباشب الواطية العادية حقت الخروج أخدتها من خطوات ..
فيه أشكال و ألوان .. و أسعاره مرة طيبة ..

و أبغا أشتري جزمة أو 2 كاوتش ..
أو جزمة واحدة ..
و واحدة من إللي تجي زي الصندل تتربط في الرجول ..
برضها حلوة و مريحة ..
لأني دايما ألبسها بالذات في الأسواق و المشاوير و زي كدة ..


أنا عاد حريم أخواني ( زفوت ) :23: ..
وحدة بعيدة و شريرة و شيطانة و خرابة بيوت ..
و وحدة قريبتنا و صغيرة و قوية و إبليسة ..
و كلهم أهاليهم عقااااااااااااااارب الله يكافيهم ..
و هم بنفسهم عقااااااارب و حنشااااااااااان ..
حسبي الله و نعم الوكيل فيهم ..
و الإتنين مخلين أخواني زي الخواتم في أصابيعهم ..
حسبي الله و نعم الوكيل فيهم ..
بالذات في الكبيرة مرت الكبير ..
هي إللي خاربة بيتنا و مفرقة بيننا ..
و مخربة كل العلاقات في كل العائلة ..
حسبي الله و نعم الوكيل فيها !!
الله يكافيها و ينتقم لنا منها ..
و ياخد لي و ياخد لأمي و أختي حقنا منها !!
حسبي الله و نعم الوكيل فيها و في أهلها !!

ولا أفكر إني في يوم آخد وحدة منهم معايا السوق ..
أو أوريها أنا أيش أشتريت !!
أصلا هو دا إللي ناقصني !!

أصلا حتى يوم دبشي ما راح أخليهم يروحو !!


و أنا يا طويلة العمر مقاسي ملخبط !!
كل شوية ألاقيني مقاس غير :23: !!

يعني مثلا أشتريت قميص M جا قدي ..
و أشتريت بيجاما M طلعت ضيقة ما تدخل !!
و أشتريت بدي L جا قدي ..
و أشتريت بلوزة L ما قدرت ألبسها !!

ماني عارفة أيش الحكاية ؟؟
و المشكلة فيا و لا في الملابس ؟؟

و دحين سرت أبعد تماما عن الـ M ..
و طبعا أنسي إنه الـ S يخش فيا :23: !!

و إللي أثبت لي إني مو لوحدي كدة ..
أنا أختي نحيفة .. وزنها شي و أربعين ..
هداك اليوم أشترت طقم يا دووب جاي قدها ..
و طلع مقاسه XL !!
يعني لو بدي أشتري نفس الطقم
حآخد XXXXXXXXXXL و يمكن ما يجي قدي !!

و صاحبتي دبة .. أمتن مني ..
و تلبس مقاسات أصغر من مقاسي !!

والله أتعقدت !!

و سرت كل ما أشوف ملابس تعجبني ..
أدير وجهي وأحطها على وسطي أشوف يجي و لا لا ..
سرت خلاص ما أطالع في المقاسات !!

إنتي قد سار معاكي كدة ؟!؟!


بس غريبة ليش ما رضي يوريكي الطقم ؟؟
طيب كيف يبغاكي تشتريه ؟؟

و المحل حق الصواريخ ..
يمكن مغبر عشان أصلا المحل مكشوف ..
و مادام بـ 200-300 أيش حاوجني
أروح ألين هناك عشان أشتري منه !!
ما أشتري من هنا من الأسواق العادية
نظيف و جديد ومافيه غبار ولا شي !!
و بكراتينه ( أهم شي الكراتين :23: ) ..


و بالنسبة للكراتين ..
أنا يابنتي رميت الكراتين أول بأول !!
و كل شي ينحط في الشنطة و يتطبق وخلاص !!
لو بدي أحطها بالكراتين يبغالي كم شنطة أشيل فيها الحاجات !!
لو تشوفيها بالكراتين كانت قد نص الغرفة ..
و لمن رميت الكراتين .. و حطيتها في الشنطة ..
لسة حتى الشنطة ما أتملت !!

يعني الكراتين مجرد بتعطي حجم و تكتر الشي ..
و تسوي زحمة .. لكن لمن تجي للواقع تلاقي
الحاجات مرة قليلة و أقول لك ما عبت الشنطة !!


و خلينا نشوف الصور :) ..


و سعد الدين طول عمري أسمع دعاياته ..
و من يوم ما فتح في جدة و أنا أقول أروح له ..
و لا جات فرصة !!
و لا قد أشتريت من عنده شي !!


و النافورة دي إللي ببأقولك عليها ترى ماهي كبيرة ..
يعني تقريبا طولها نص متر أو شي في دي الحدود !!
و إذا تعرفي كيف طريقتها بالزبط قوليلي ..

و على قولك أنا سمعت بيها زي طريقة الحلا
تكون محطوطة في ركن من البوفيه ..
و سمعت إنها تكون كبيرة مرة كأنها نافورة حقيقية ..


و الكاسات حقت العصير كيف ؟؟


و بالنسبة لليلة الرعب ..
زي ما فهمتك .. ترى حيسألوكي ..
( موس يمشي على كل الرؤوس :23: ) !!

و روحي أسألي أختك الكبيرة ..
أو أمك .. أو صاحباتك .. أو أحد ثقة
من قريباتك .. أو حتى حريم أخوانك ..

و إذا تبغي أي شي .. تعاليلي عالخاص :) ..


تحياتي ..
جــــــــداويــــــــــــة

:27:

تعبت وانا اقراء خليني اقولكم تجربتي في الملكة بس على فكرة فرحي بعد 3 شهور وحااااااااايسة وياليت اللي تعرف قاعة فخمة تسع ل 300 شخص تدلني عليها وسعر الشخص مو اكتر من ا80 ريال

شوفي عيوني انا فستان ملكتي كان جدااااااااااا ناعم وراقي طلعت زي ساندريلا من بوتيك A&a
معروف طبعا وناوية فستان الفرح اشتريه من عندها بس ماما رافضة بدها تفصيل..

مكياجي كمان كان كووووووووووووووووووول وناعم عملتو في محل لادونا خلف مركز شامل في شارع الحمرا..

هلا والله بجداوية وسلافة ..
معليش تاخرت عندنا الكمبيوتر بالدور ودوري اخر الليلّّ!!!
المهم بالنسبة للقاعات ترى مااعرف مكانها ممكن تاخذو الرقم من 905 وتعرفوا بس قاعة الالماسة قبال دوار النجمة روحوا هناك تشوفو القاعة وشكلها جديد...
وبالنسبة للعطور ياجداوية انصحك بالكورنيش توكلي على الله وروحي الى الحين وعطور اختي مثل ماهي وهي ماخذتها من قبل الصيف
وبالنسبة لسجاجيد اعتقد 6 او 7 كافية اذا زوارك قليل...
وقمصان النوم في محل في سوق الحجاز اسمه الفخامة اختي شرت منه صراحه عجيب وخذت منه حق اول ليلة ب650 وبس وكان جدا فخم بعدين الرجال مايدري قميصك بالف ولا بريال!!!
اهم شي طويل ومرتب...
وياجداوية ترى مااعرف مكان المصورة اللي قلت لك عليها...
وبغيت اسالك عن المصاحف اللي وزعتيها من وين اخذتيها وكم مصحف وكم كلفك؟؟؟
وياحبة اللؤلؤ كثيرة القاعات شوفي الفيصل فخمة وصغنونة ويارا ونوف...
وياسلافة الدقاقة كانت جالسة كانها فنانة العرب بس صوتها حلوو ودقها بعد بس كسولة ماتحرك!!
وترى لقيت رقم فاطمة العمودي احد شاف شغلها طايحين فيه مدح...
لنــــــا لقـــــــــــــــــــــــــــــــــــــــــــــــــــاء ان شاءلله..