حبة اللؤلؤ كثير قاعات اسعار الفرد زي كذا حتى الشيرتون اقل من كذا 120 للشخص
ماراح تتعبي مادامك حاطة السعر هذا:)

تربية بدنية ممكن اشوف الصور وعندك رغبة تاجري ولا بس تبيعيه؟

عبير ايش رايك تروحي للهنداوية او الخاسكية بالذات الخاسكية عندهم اشياء تجنن للتوزيعات والله راح تستغربي من الاشكال اللي تشوفيها
الخاسكية عند مؤسسة النقد في البلد

أنثى A&A في شارع الامير سلطان وعندك في شارع صاري عند بنك البلاد

العفو ام الوسيم ياليتك تعطيني اسم الحبوب الله يخليك
وترى كريولان عندهم تخفيض الحقي عليه

انا هنا جيتك اراكض علشانك والله:) ياجداوية
ترى تاخرت علشان انزل لك الصور بس ايش اسوي مالقيت موقع يحملها راح ادور وانزلها لك:)
جداوية حلو انك تغيري استايلك في الفرح عن الملكة علشان تطلع لك طلعة غير:)
وليش ماتجربي المكوة حق الشعر بدل الاستشوار؟؟ يقولوا احسن
مادام ام زوجك تغار من عطورك لو انا مكانك لا اقلب على العطور حق العجايز هذيك القوية والله يعييني استحمل بس علشان اقهرها
والله زوجك قهرني ليش كذا يعني نحن اخواني يقولوا على وين راحوا وين جو بس مايفصلوا تفصيل يعني خبر عادي بس والله غلط مرة اللي يسويه زوجك
ياشيخة حتى الاكل والله لو انا مكانك كان صقعته بالصحن في راسه عاد والله مااصبر لو ايه
شوفي نصيحة لك وصدقيني ماراح تندمي لو نفذتيها لا تجاملي على حساب نفسك ليش قاعدة ونفسك مسدودة وهو يتفلسف
ترى في رجال مايفهموا بالتلميح لو تلمحي من اليوم لعشر سنين مايدري عنك عاد انت على طول قوليها في وجهه تراك طفشتني او والله زعلتني بكلامك ايش هو مابقي غير تعزمهم لو قلك والله فكرة بعزمهم قولي له وايش اللي اخرك كان عزمتهم
والله خطيبك هذا فلقني عاد مقهورة من خطيبي بس لما شفت خطيبك حمدت ربي على اللي عندي عاد سااااااااااااااااااااكت احسن من انه يتكلم
ترى انا هنا بس للحين ماستوعبت انه احد يسالني انا شايلة هم نفسي عاد يجي احد يسالني ياسلام سلم
الحين ايش صار عليك تحدد وقت الفرح ولا ايه؟
انا غبت قلت ماراح اجي لين انزل الصور ماصارت
صراحة احسك مرة معطيتهم وجه يعني بالعربي لا تاخذي رايه في العطر ولا في شي ولو سالك عن الكروت ردك حلو خليه يتفاهم مع ابوك
ولا تروحي عندهم احسن لك عاد الله يعينك لو فضلتي كذا راح تتعبي معاهم لازم تكون ي قوية شوية ياشيخة
ترى القوة افضل مليون من الضعف ايش بك كذا
انا من رايي تجيبي بوديقار في الفرح حقك وحدة تحرس الكيكة ووحدة تحرس الكوشة ووحدة توقف جنبك ووحدة جنب زوجك والله كذا تضمني انك تنزفي لحالك:)
ومن رايي انك ماعاد تكلمي زوجك بما ان الفرح تحدد وقته علشان يهدئ توترك وتهدئ نفسيتك ولا عاد يجيب لك كلام امه
انا فهمت خطيبي انه قبل الفرح بشهر ان شاء الله خلاص ماعاد يكلمني وقبله بشهرين مافي شوفه:) بس راح اكلمه لين يحجز القصر وبعدين خلاص
ونصيحة لك يوم العفش لا تسالي ايش صار علشان لا تنقهري
لان مادام في فريق راح يجوا فابشرك بالخير>>>>>>>> بس لاتخافي
ام زوجك هذي اللي راح اقتلها والله ايش هذي الحرمة الهبلة تبغي تعمل عشاء في بيت العروسة؟؟ عن جدك ياشيخة قلت لك اعزميها انا اطيح فيها بكوس وانت عضي في رجولها
نحن يجوا تقريبا وبالكثير 10 حريم واهل العروسة يحطوا عفشها والباقيين يجلسوا برى وبعدين يدخلوا كذا يتفرجوا ماينكشوا
وانا سمعت انه في اهل العريس ينكشوا في العفش لانه يقولوا بفلوس المهر فلازم يشوفوا ايش اشترت بفلوسهم؟؟
بس نحن الحمد الله مااحد ينكش بس ندخل كذا من عند الباب ونخرج وبعدين يتقفل الغرفة ويعطوا ام العروسة المفتاح
وطبع العريس عنده نسخة فيجي ويجلس هو يتفرج على كيفة بس ماقد سمعت عريس حط عفش عروسته؟؟
واذا عندك اخت اكبر منك خليها تنتبه للبيت وماتخلي احد ينكش اغراضك اجل ايش فايدتها اختك؟؟
ترى السجادات خلاص استقريت على 3 يكفي بالمرة اصلا مااحد راح يجي عندي مااعرف احد غير بنات خالي وبنات خالتي وخلصنا:)
اخذت السجادات من الدانوب الهايبر تركية والشراشف امي جابتها لي من حرمة تبيع قماشها رووووووعة
على فكرة كان في معرض في الحارثي حق مستلزمات الاسرة رحت يوم الجمعة كان عندهم اشياء صينية اخذت اللبس الصيني من باب التغيير كذا

اهلين سلافه

ابشري ياعيوني هي علبه مدوره وكبيره وفيها حوالي 30 حبه

اسمهاdaily formula

على فكره سلافه بما انك تحبي العطورات الشرقيه والبخور فيه عربيه مره فخمه

وكلها كريستال تلقيها في العربيه للعود ب700 ريال فيها مبخره كريستال وعلب

كريستال للعود والبخور بالاضافه الى تول كبار كريستال وفيه كذا قطعه للعود انا

ماني متذكره اللي فيها بس مره فخمه تصلح تحطي فيها العود والبخور ولما يجيك

ضيوف تبخريهم فيها او تحطيها في مجلس النساء........هي تشبه عربيه الاكل او

الحلى اللي لها عجلات بس هذي فخمه كلها كريستال وسلاسل مذهبه

عيوني جداويه انا تذكرت شغله .........انتم تتكلمون عن الصباحيه

انا اعتقد ان الصباحيه لها ظروفها الخاصه يعني كل بنت على حسب الوضع اللي راح يصير في

ذاك اليوم

يعني انا كنت مجهزه جلابيه فخمه ومجهزه معاها اكسسوار ........بس انا مانمت الا بعد الفجر

وماقمت الا بعد الظهر فما لبستها لبست تنوره ميدي وبلوزه لكن اللبس كان فخم وبعدين تغديت

وبالليل غيرت ملابسي عشان كنت طالعه اتمشى فلبست بنطلون وتي شيرت .....يعني على

حسب الوضع اللي انتي فيه

لانو احنا عندنا المفروض على العصر يجوا اهله واهلها ويسوون حفله بسيطه ويرقصون

شوي ........لكن انا ماصار هالشئ وخلونا على راحتنا

وحتى عندنا انو ماتطلع للناس الا بعد اسبوع واحس كذا احسن عشان الوحده تتعود على

الوضع الجديد وترتاح في بيتها لانو بعد ليله الفرح والتعب اللي فيها واكيد ماراح تنامين الليله

اللي قبلها ودك بعد هالتعب تنامين اسبوع كامل .... اما اهلها واهله عادي بس انا مارحت

الا بعد يومين واهلي بعد 5 ايام ........يعني كل وحده والوضع اللي يريحها يعني مالها طقوس

معينه ولبس معين

اما سالفه ابوك الله يهديه ياشيخه........والله حراااااااام وعيب كمان وبعدين المفروض يفهم

من نفسه انو لو بنته فيها شئ كان ردها زوجها من حاله وقال عفوا البضاعه

مستعمله.....خخخخ

انا تصدقين حتى امي ماسألتني عن هالموضوع وحتى اختي التوأم ماسألتني ....احسه عييييييب

انا اشوف لو زوجك يسوي زي ماقالت صاحبتك فكره حلوه او اختك لو تكلمه وتفهمه

تسلمي ام الوسيم:) بس القاها في كل الصيدليات في جدة؟؟ ولا في صيدلية معينة؟

والعطور الحمد الله الحمد الله خلصت منها بالقوة والله لاني عند حب شديد للعطورات فصرت اقاوم علشان اقدر اخلص..

والحمد الله اني انتهيت خلاص بس ترى انا مااحب العود الثقيل احب اللي يكون زي عطور اجمل على خفيف كذا

وترى زي ماقالت لك كريولان عندهم تخفيضات واليوم رحت واخذت ثلاث الوان من الظل المائي بلمعة "أخضر وفيروزي واحمر" والحمد الله حاسه انه كانت حلوة واخذت كمان لمعة تحت الحاجب الرجال قلي انه لها فوق ال3شهور مافي منها واليوم اللي جاتهم واخذت ذهبية
صراحة كانت حلوة بالمرة
واخذت الاساس وماسكرا وكنت ابغى الكيك اي لاينر بس مالقيته عندهم للاسف

اما موضوع جداوية هذا هرجته ثانية ماادري من فين طلعت لي به جابت لي وسواس:) الله يستر من الحكاية هذي

السلام عليكم و رحمة الله و بركاته ..

هلا ام الوسيم ..
كيف حالك يا قمر :) ؟؟

أنا زوجي ما كان كدة ..
و كان لا يودي و لا يجيب غير بمزاجه ..
بس أنا حاستهم دحين بيتعمدو يتصرفو معاه تصرفات زي كدة !!
و سارو يضغطو عليه مرة كتير ..

و هو من دحين قيده مو حاسس إني أنا أولى :( !!
مخلي أهله و أصحابه فوق كل شي ..
ما أدري هو خوف من أهله .. أو إحترام ..
بس هو غالبا بيسوي لهم حاجاتهم و هو معصب و متنرفز ..
يعني حتى لمن أنا أتصل عليه و هو في مشوار لهم ..
تلاقيه يتنفخ فيا و يصرفني و ما يبغا يتكلم معايا !!
حتى لمن أحيانا أقول له أيشبك ؟؟ أيش فيه ؟؟
إنت فين رايح ؟؟ إنت فينك ؟؟
أحيانا يقول رايح أجيب لأمي .. رايح أودي أمي ..
طفشان .. زهقان .. تعبان .. أووف .. حرر .. قرف ..
زحمة ...... إلخ ..
و أحيانا مرة ما يهرج و أسمع صوت أمه جنبه ..
و أنا خلاص أفهمها و أقفل ..

و أنا زوجي عصبي و من النوع إللي ينفعل بسرعة ..
و إذا أنفعل ما يتناقش .. على طول يقل الموضوع و يقلب وجهه ..
و على قولك أحيانا إذا أتكلم .. يغلط !!
بس أنا كتير كلمته .. و قلت له ليش أخوك ما يسوي ؟؟
ليش أخوك ما يجيب ؟؟ ليش أخوك ما يروح بنفسه ؟؟
ألاقيه هو بنفسه يتنرفز و ما يلاقي رد ..
لأنه هو بينجبر يسوي لأخوه حاجاته !!
و الله أنا لو أحكيكي على حكاوي ..
ما تصدقي إنه في ناس يسوو زي كدة ؟؟
يعني ماهي بس على حد أمه و أبوه و أخوانه !!
حتى خالاته و عمه و قرايبهم التانيين ..
إللي هو ماهو مكلف بيهم .. ولا لهم رضا ولا سخط !!
و طبعا عشان أمه بيسوي لهم حاجاتهم !!

و أنا أحسهم يسوو فيه كدة .. عشان يقهروني أنا !!
مع إني ماني مضايقتهم .. و لاني مخليته جنبي 24 ساعة
و مستفيدة منه أنا أو أهلي !!
بالعكس هما بيعرفو متى بيجيني و أيت يوم ..
و ياريت بيخلوه أو يخلوني أتهنى !!
طول ماهو عندي أو معايا بيقلقوه بالإتصالات !!

و قد أيش فهمته و قلت له ..
و مرات بعصبية لأني أكون مرة متضايقة ..
بالذات لمن نكون برة أو يكون عندي ..
و يفضلو ترن ترن ترن ترن ترن ترن ( كناية عن رنة الجوال :23: ) ..
و مرات على قولك أحسسه إنه مسكين و مضطهد و مستغلينه ..
بس هو يزعل لمن أنا أتكلم كدة ..
يحسبني ما أحب أهله .. أو ما أبغاه ياخد رضاهم ..
أو ما أبغاه يخدمهم .. و تجي في باله أفكار غلط ..
ما يفهم إنه قهري عليه .. و حزني عليه ..
و إني حاسة إنه تعبان و متضايق و قرفان ..
عرفتي ؟؟
عشان كدة سرت بس أسكت و أقلب وجهي :( ..

طيب علميني يختي الكلام إللي زي السحر :) ..
يمكن ينفع معاه .. و يجيب نتيجة ..

و أنا يختي صح عندي أهل ..
بس زي قلتهم !!
لا خيرهم و لا كفاية شرهم !!

و الله يجبر بخاطرك و يسعدك يارب و يخليلك ولدك و زوجك
و يرزقك توأم قادر يا كريم ..
و أنا أهوه في كل شي بأجيكم هنا و أطفشكم بهرجي :) ..
يعني لا تخافي من دي الناحية ..
>>>> ما صدقت على الله لقيت أحد يساعدها !!

و أنا الفرق بيني و بين أخواني كبير ..
بالـ 10 و 15 سنة !!
عشان كدة تلاقيهم هما يستهبلوني !!
و يحسبوني هبلة و صغيرة ( بالنسبة لهم ) و ما أفهم شي ..
و يبغو يمشو كلامهم عليا ..
و إذا ما مشيت لهم رأيهم .. و قلت رأيي ..
خلاص يطنشوني و يقولو دقي راسك في الجدر !!


و بالنسبة للساعات ..
أنا عندي 3 - 4 ساعات .. و كلها ماركات .. و غالية ..
فإن شاء الله حآخدها معايا ..
بس برضو كنت أبغا أشتري كم ساعة من الكاجوال ..
تعرفي .. الملونة و إللي على قولك فيها حركات حقت بنات ..
لأني شوفت ساعة حمراء و ساعة موف جننوني ..
و فيه كتير ساعات ملونة و حلوة ..
أظن عند الدهام إللي في سلطان مول .. أظن إسمه الدهام ..
هو محل كدة تلاقيه عالشارع ديكوره بالأسود ..
و برضو شوفت في محلات تانية ساعات DKNY ..
ففكرت أشتري زي كدة ساعات ملونة .. حتى لو إتنين ..
تنفع مع الجينزات و السبورات ..
لأنها مرة دخلت مزاجي ..
بس قلت خليها بعدين لمن أخلص من الحاجات الكبيرة أول ..
و أنا أخاف أشتري من الساعات إللي ماهي أصلية
لأنها تسود و لونها ينعدم و خسارة الفلوس فيها !!
عشان كدة تلاقيني بين فترة و فترة طويلة .. أشتري لي
ساعة من ماركة محترمة و أجلس ألبسها ألين تشتكي :) ..

و ترى خوفتيني من الفيتامين حق الدايلي فورميلا ..
لأنه عندي و كتبتلي هو الدكتورة لأنه عندي أنيميا !!
لا يكون هو إللي بينفخني و أنا ماني دارية ليش بأتنفخ !!
مع إني ما بآكل مزبوط و لا كتير ..
بس أحس نفسي بأتنفخ !!
يبغالي أبطل منه أو أرجع للدكتورة عشان أسألها !!
طيب ما تعرفي عن السينتروم إذا يتخن كمان ولا لا ؟؟
لأنه برضو قالولي السينتروم ينفخ !!

يبغالك تجربيهم يا سلافة !!

و بالنسبة للصباحية ..
هو شي أكيد إنه مافي نوم غير بعد الفجر ..
أصلا ألين نرجع من الزواج ..
و ألين الواحد يغير ملابسه و لازم ياخد دش و يتوضى و يصلي ..
هادا كله حياخد وقت ..
يعني كويس إنتي بتقولي نمتي بعد الفجر ..
أنا صاحباتي يقولولي ما نمنا غير 9 - 10 الصبح
أو 1 الظهر و زي كدة ..
لأنهم أصلا يقولو ألين خرجو من القاعة على 6 - 7 الصباح ..
و الشمس قيدها طلعت :41: ..
و فيه بعض الناس زي ما يقولو سهرتهم صبــّـاحي ..
فتجلس العروسة و العريس و الناس ألين ما يطلع الصباح !!
بس الحمدلله إحنا مو كدة ..
إحنا لازم قبل الفجر يكون كل شي مخلص ..
كمان حرام عشان الآذان و الصلاة ..

و طبعا على قولك على حسب الظروف ..
و ما تضمني يسير شي ولا لا ..
و ترى غريبة ..
أنا أسمع إنه كل الناس يسألو بناتهم !!
حتى بعض الأمهات و الآباء يسألو أولادهم !!
حتى الأمهات يعلمو بناتهم قبل الفرح
أيش تسوي و أيش تفعـل ..
و إذا سار الموضوع .. كيف تسوي !!
يعني إنتي فاهمة قصدي ..
حتى أنا صاحباتي فهموني كدة ..
و هم سوو كدة ..

و أنا أصلا عشان أمي مطلقة ..
و على قولتهم رامية طوبتي !!
عشان كدة متوقعة حيجي الشي هادا من أبويا ..
لأنه أيام ما أختي أتزوجت ..
أمي إللي قامت بالمهمة هادي .. و وصلت الكلام لبابا ..
و طمنته إنه كله تمام و عال العال ..
فعشان كدة .. أنا بأقولك ( متوقعة ) ..
لأنه مافي أحد يطمن أبويا و يقول له كل شي تمام !!
لأنه حتى صاحباتي لمن حكوني ..
قالولي كانت الأم عادي مو هاممها ..
بس الأب يبغا يموووت و يعرف أيش سار و أيش طلع !!
>>>> يعتبروها حاجة في وجههم و لازم و مهم إنهم يعرفو أيش
حصل و أيش النتيجة !!
( ترى ما تقولي ناس متخلفين و زي كدة ..
بالعكس كلهم مناصب و شهادات و رجال أعمال
و ناس محترمين .. بس يقولك كل شي فيه لعب و تطنيش
إلا هادا الشي مافيه لعب !! )
و ماهو شك في بنته أو شي ..
بس هو يعتبر هادا الشي من حقه ..
و أظن إنه شي يفرحهم :) ..
مدري عنهم !!

و بالنسبة للطقوس حقت الزيارة ..
و الله كتير قالولي لازم تروحي لأهله و لأهلك تاني يوم ..

>>>> و للحديث والأسئلة بقية ..
بس خليني أشوف سلافة أيش عندها :) ..


تحياتي ..
جــــــــداويــــــــــــة

السلام عليكم و رحمة الله و بركاته ..

ســلافــــــة يا بنت جايتلك :) ..
بس أصبري شوية عندي شغلة كدة :) ..
أخلصها و أرجعلك عشان أقرأ كلامك برواقة ..

إنتزريني يا سولافة :) ..
>>>> قلبت فيلم كرتون :) ..


تحياتي ..
جــــــــداويــــــــــــة