تسلميلي ياجداوية بس اهلي يبغو شي محد من اهلي عمل فيه قبل كده ..
مخهم كده ولازم اجاريهم..

يقولو النظام الفندقي انظف واضمن..

طيب ايش في غنادق فيها قاعات حلوة؟؟؟

ويستن فوق ال 100 الف وانا مابدي حرام ابغاه ماكسيمم 80 الف تمانين الف

السلام عليكم و رحمة الله و بركاته ..

أختي حبةاللؤلؤ ..

دحين طيب كل القاعات إللي أنا قلتها ..
أهلك سوو فيها ؟؟

طيب حتى أماسي سوو فيها أهلك ؟؟

و الفنادق من ناحية أنظف فهي أنظف و أرتب ..

عندك الدار البيضاء فيه 4 قاعات ..
و أسعاره حسب المنيو ..
و أعتقد يبدأ من 150 ريال ..
و طبعا الإمبراطورة أفخمهم و أكبرهم ..
و سعرها يفرق عن باقي القاعات ..

و عندك قاعة الأميرة في فندق البلاد ..
النفر فيها بـ 200 ريال ..
و قلت لك .. يمكن إذا العدد كبير تقدري تتفاصلي
في السعـر شوية ..

و فيه القاعتين إللي في جدة أوركيد إللي قلت لك عنهم أول ..

و فيه كمان فنادق كتيرة ..
زي الأنتركونتينينتال .. و كراون بلازا ..
و مدري أيش دحين كمان مو جاي في بالي :) ..

و ويستن قالت لي المسؤولة إنه
يوصل النفر فيه لـ 800 ريال !!
يعني لا تشتتي نفسك و تفكري في الغالي ..
مادام إنتي ملزومة بميزانية معينة ..
يعني عالأقل شيلي / ليلتي .. هيلتون .. ويستن ..
من بالك ..
لأنه أسعارها نااار !!
حتى الميريديان إللي في التحلية قدام الدولي برضو غالي ..
و لو تبغي تروحي عشان تسألي و تتأكدي ..
روحي و شوفي .. أو حتى أتصلي بالتليفون ..

و عشان بس لاحد يقول إني أنا بأقول غالي !!
روحو و شوفو .. أو أتصلو و أسألو بنفسكم ..
عشان لا تقولو بأقطع رزقهم و أوقف حالهم ..
و الله العظيم أنا ما بأكتب غير عن شي أنا شوفته
و رحته بنفسي !!
و إللي ما أعرفه .. بأقول ما أعرفه !!
و إللي سمعت عنه .. بأقول لكم سمعت عنه !!
يعني أنا بأبريء ذمتي من دي الناحية ..
لأنها كلها قاعات حلوة و تجنن و ما يعيبها شي ..
بس من جد غالية !!

يختي البلد مليانة قاعات ..
و ماشاء الله إنتي حاطة سعر كويس ..
يعني بالراحة تلاقي شي على كيفك ..

بس إنتي أيش المواصفات إللي تبغيها ؟؟
تبغي بلكونة و درج ولا مو مهم ؟؟
الحجم ( كبيرة ولا صغيرة ) .. عدد المعازيم ..
كله مهم ..


تحياتي ..
جــــــــداويـــــــــــــة

تسلميلي ياجداوية وربي كلك زوق

انانفس مشكلتك تقريبا لالالالالالالالالالالالالالالالازم بلكونة يعني لافي شبكتي بلكونة ولافرحي اتجنن

الامبراطورة حلوة بس قديمة

قاعة البلاد مرررة عجبتني وحاطتها في بالي..
اوركيد مارحتها صراحة كيف قاعاتها كبيرة؟؟؟ فيها بلكونة؟؟؟

وشفت صورة لقاعة فرح وكنت حابكي لونها اخضرررررررررررررررررررررر

لا انا بدي الوان فاتحة وكلاسيك

انا من مكة وخطيبي جداوي وعارفة الان حج مااقدر اتزحزح وحماتي ماشالله ليل نهار برا تدور على قاعات رجتتتتتتتتتتتتتتتتتتتتتتتتني

بيقولو فندق البلاد مشهور بالفيران صح؟؟؟؟؟؟؟؟؟؟ :06:

السلام عليكم و رحمة الله و بركاته ..

أختي حبة اللؤلؤ ..
تسلمي يا قمر .. خجلتيني :) ..

شوفي أنا في ملكتي كان فيه بلكونة ..
بس ما أتهنيت فيها :06: ..
و لا عرفت حتى أرمي الورد زي الناس :06: ..
من كتر ما ربشوني .. و ربشو العريس ..
عشان كدة بأقولك عندي حسرة بلكونة :06: ..

و إن كان حتقعدي عالقاعات إللي أهلك سوو فيها ..
ما راح تلاقي قاعة ..
خصوصا إذا ماشاء الله أهلك كتار ..
و سارت عندهم مناسبات كتيرة ..

طيب يا بنت مادامك مقتنعة بأماسي ..
خلاص سوي فيها ..
و سيبيكي من الكلام إللي ماله لزمة ..
ترى حلوة و فخمة و كبيرة ..

و الإمبراطورة جددوها و غيرو فيها حاجات ..
بس المستوى و الفخامة بصراحة شي يبيض الوجه ..
و يكفي أكل الدار البيضاء معروف ..
والله أنا بالنسبة لي أكل الدار البيضاء أحسن
و ألذ بمية مرة من أكل ويستن !!
و شوفي الفرق في السعر !!

قاعة البلاد حلوة و حجمها حلو ..
و أنا بنفسي مرة عجبتني ..
بس نرجع و نقول ما رضيو يفتحوها على عدد قليل !!

جدة أوركيد فيه قاعتين ..
وحدة كبيرة .. مافيها بلكونة ..
وحدة حجمها حلو .. و شكلها غريب ..
كأنها نص دائرة .. و فيها بلكونة و درج ..
و عموما تصميم أوركيد مو زي باقي القاعات ..
تحسي فيه شي غريب ..

عاد الصورة إللي أنا شوفتها لقاعة فرح كانت حمراء :23: ..
هههههههههههههههههه
و الله من جد ..
ما أدري يمكن سووها خضراء دحين ..

حتى قاعة الفيصل خضراء ..
بس مقبولة ..

لكن إللي من جد خضراء شنيعة و مقرفة هي
ليالي الشرق .. منتهى القرف ..

طيب قولي لحماتك أصبري .. كلها 3 - 4 أيام
و الحج يخلص و مكة تفضى !!
يسير هديك الساعة أنزلي إنتي و أهلك و دورو معاهم ..
و شوفي بنفسك و أختاري ..
حتى لو تنزلي يوم بكامله للقاعات ..
من العصر للليل ..

شوفي نسايم ليل حلوة و فخمة و رايقة ..
فيها بلكونتين و درجين ..
إنتي تطلعي من اليمين .. و العريس يطلع من اليسار ..
أو العكس ..
و بعدين تنزلو الدرج .. وتتقابلو في النص ..
و تنزلو كمان كم درجة ..

بعدين لمن تجي تطلعي الكوشة ..
أول ما تطلعي الدرج .. توقفي .. تقوم القاعدة تطلع بيكي
إنتي وياه .. زي الأصنصير .. و تلاقي الدبل معلقة فوق راسكم ..
تاخدوها و تلبسو بعض .. و بعدين تنزل القاعدة تاني مرة ..
و تكملو زفتكم للكوشة ..
الحركة مرة حلوة و غريبة ..

و شوفي أمسيتي فخمة .. فيها درج .. بس مافيها بلكونة ..
و فيها عواميد في النص ..
بس عموما فخمة و كبيرة ..

قاعة إحتفالات الشرق الأوسط ..
على قد إني حاقدة على الرجال إللي هناك ..
مدري هو صاحبها ولا أيش صفته !!
بس برضو حأقولك عليها ..

القاعة كبيرة و جيدة ..
صح فيها شوية ملاحظات .. بس إجمالا حلوة ..
البلكونة فوق الكوشة ..
يعني أغلب الناس أصلا مو منتبهين لمحل لبلكونة !!
تطلع العروسة في البلكونة .. يعني تكون في وجه الناس ..
و بعدين تخرج من البلكونة و تروح للقاعة من ورا ..
يعني وراء الناس ..
فيه درجين طوووووويلة ..
تجججننننننن ..
أحلى مافيها الدرج ..
تطلعي إنتي من باب .. و هو من باب ..
و بعدين تنزلو الدرج و تتقابلو في النص ..
في النص فيه شلال موية و منظر طبيعي حلو ..
و بعدين كمان تنزلو مع بعض درج تاني ..
و تمشو للكوشة ..

و كمان فيها حركة تانية ..
إنه إنتي تنزلي من الدرج من فوق لتحت ..
و هو يطلع لك من تحت من عند الشلال ..

و القاعة إجمالا حلوة و فخمة ..
و درجها يجنن ..
و مسوين عليها عرض مرة حلو ..
بس لو رحتيها .. نفسي تسبي لي الراجل حقها :23: ..

و عندك الملكة قريبة من أماسي ..
فيها قاعتين .. و تقريبا نفس الشكل ..
بس فيه وحدة أحلى من التانية ..

و ريفان .. عند جريدة عكاظ ..
و يارا .. و نوف .. و الفيصل ..
يمدحوهم ..

و أرجعي أقري ردودي القديمة ..
تعبتيني يا بنت :) ..

روحي عالأقل شوفي هادي القاعات ..
و لو مداكي تشوفيها في يوم واحد يكون إنجاز :) ..

و إذا مرة محتارة .. أستخيري الله ..
و أنا حاستك مقتنعة بأماسي ..
أستخيري الله فيها ..
و الله يكتبلك الخير ..


و إذا تبغي أي شي تاني ..
أسألي و أنا أجاوبك ..
و كمان إن شاء الله يجو باقي البنات و يجاوبوكي ..

بس بشرط ..
أبغاكي تدعيلي مادامك في مكة و جارة الحرم :) ..
والله بأكتبلك من قلبي :) ..


تحياتي ..
جــــــــداويــــــــــــة