جـــداويـــــــــة :

السلام عليكم و رحمة الله و بركاته .. أختي سلافة2120 .. والله دعيتلك يا بنت .. حتى دعيت تتخني و زوجك يشتري سيارة :) .. الله يستجيب و تكون الدعوات من نصيبك يااارب .. و إلا غطستي يختي !! و شوفي لكي غايبة كم يوم !! و ترى بالنسبة للخاسكية .. فيه شي ينباع بالدرزن .. و شي ينباع بالكرتون .. و الدرزن 12 حبة .. بس لمن يحسبوها بالكرتون أظن يجي فيه مدري كم درزن .. يعطي تطلع بالميات .. و ما يرضى يبيعك غير بالكرتون !! ما يرضى يعطي بالدرزن .. و بالنسبة لمكواة الشعر شكلي عرفت إللي تقصديها .. كأني شوفت في إكسترا زيها .. >>>> إنتي تحبي السوبرماركتات و أنا أحب إكسترا .. ترى مليان حاجات .. هي شكلها كدة زي إللي وصفت لك هي بس حديدتين .. تحطي الشعر بينهم و تمشيها .. و تفرد الشعر .. بس يختي ما تحرق الشعر ؟؟ لأنه ماهو ناقص !! و أنا مرة زولة :23: و مافيا أدور على مواضيع !! إذا تعرفي الموضوع إللي كاتبين فيه عنها حطيلي هو الله يعافيكي .. و بالنسبة للأزواج .. شوفي يا حبيبتي .. أنا أخواني فارطين السبحة عند حريمهم .. بس لا أنا ولا أختي أزواجنا ما يهرجو هروج أهلهم عندنا !! يعني أنا عندك زوجي حتى لمن أسأله على شي .. يجاوبني جواب مختصر بالمرة .. كلمة و رد غطاها !! و بالنسبة لهداك الموضوع .. لا تسألي أمك .. أسألي أختك الكبيرة .. أسألي صاحباتك .. أو وحدة من قريباتك علاقتك بيها قوية .. لأنه لو سألتي أختك أو قريبتك حتعرفي منهم عوايد عيلتكم كيف ؟؟ و إذا عندك أي شي تعاليلي عالخاص و أنا أقولك أيش قالولي صاحباتي و إللي أعرفهم .. هو صح كلام عادي و مافيه شي .. بس يعني أخاف إنه مو مسموح ينكتب هنا .. أو تجي وحدة بنت ملقوفة و تقراه :) .. و بالنسبة للمسك يا بنتي أنا يذكرني بذكريات بطــّــالة :( .. الله لا يعيد الشر و يكفينا شر الغفلة و الفجعات يااااااارب .. و مرة نفسيتي تتعب منه .. مع إنه كتير مدحولي هو .. من المنتدى و من صاحباتي و من أهلي .. بس ما قدرت له !! و أنا شوفيني أقولك سرت أدور عالعطور الهادية .. إللي ما تنكش حساسيتي ولا تتعب صدر زوجي .. لأنه والله مسكين .. أنا كنت أحسبه يتتريق .. لكن من جد لمن مرة تعب بسبب ريحة عطر كان شوية قوي .. و أنكتم و أنخنق و بغى يموت .. و أنا كنت أحسبه جالس يمزح مزح تقيل .. و مطنشته .. و خرج زي المجنون و بغى يسوي حادث .. و مادريت عنه غير تاني يوم إنه في المستشفى :06: .. و معطينه أوكسجين و أدوية و حاجات .. هديك الساعة أنا صدقت و آمنت إنه من جد تعبان !! و شوفيني دحين أكتر شي أستعمله .. العودة .. بعض عطور الزيوت إللي ريحتها فواكه .. و عطر Life Is من بودي شوب .. و عطر ألور للخروج و السهرات .. عشان كدة بالمرة شايلة هم العطور :( .. و أهلي يا بنتي عكس الناس كلهم !! الناس لمن يسمعو خبر مفرح .. يفرحو !! أنا أهلي لمن تقولي لهم خبر مفرح .. يزعلو و يسوو مشاكل !! يتقبلو الأخبار المفرحة بطريقة عجيبة !! و مرت أخويا الكبيرة عقربة الله يرد كيدها في نحرها .. و مرت أخويا التاني مافي راسها و لا عندها ذوق .. و عموما الإتنين إحنا إللي منظفينهم و معدلينهم .. و إنتي سوي زيي .. لمن عريسك يهرج في مواضيع الفلوس .. قوليله ما أدري .. روح أسأل أهلي و شوف أيش يقولو !! و صرفيه و لا تعطيه مجال يهرج .. و روحي قولي لأهلك أيش سار بينكم .. عشان حتى لو هو راح و هرج معاهم يكونو قيدهم في الصورة .. شوفي أنا سرت أسوي زي كدة .. لأني من جد على قولك أتعفرت و بدي أنط من التليفون و أخنقه هو و أهله .. و خليه ياخد قرار .. يا يسوي زي الناس و عوايدكم .. يا سوي زيي و خلي أهلك يسوو لك الفرح على كيفك .. سواء صغير أو كبير .. هو ماله شغل !! و لا يتكلم ولا يفتح فمه !! و لا يعترض ولا على شي !! و خليه هو و أهله يجو ضيوف .. و الحق ماحد يزعل منه !! صح ولا لا ؟؟ و شوفي إنتي ظروف خطيبك كيف و أختبريه .. بس لا تحمليه فوق طاقته .. شوفي أنا بصراحة أحس إني أقل من كل إللي أعرفهم من ناحية الهدايا .. بس الحمدلله برضو .. لأني أعرف بعض العرسان لا يمكن يدخل لعروسته و يده فاضية .. يعني شوفت و سمعت عن أخواني و زوج أختي و أزواج صاحباتي .. كلهم كانو كدة .. و في كل زيارة هدية .. بس أنا إللي عندي ولالالالالالالالالا شي !! و حتى لمن يجيب .. يجيب أكل أو حلاوة :23: .. >>>> مرة مو مفكر في شي !! بس مرة جاب لي عطر غريب .. من شركة غريبة .. كأنه عطري عربي أو مخلط .. ما أدري كيف ريحته .. قال إنه مندوب الشركة جاهم في الشغـل .. و عرض عليهم المنتوجات حقت شركته .. فقام زي إللي أنحرج و أشترى لي منه عطر !! و لمن مرضت و سويت العملية جاب لي برضو عطر هدية !! يعني شوفي عموما لو تبغي تفكري في حكاية الهدايا دي مرة حتتعبي .. و حتجيبي لنفسك معاه مشاكل يا كترها .. لأني أنا كنت زيك و أفكر .. و ليش ما يجيب لي ؟؟ و كنت أتوقع في كل زيارة إنه يجيب لي شي .. و يا لييييييييييييييل ما أطووووووووووووووولك !! و كنت بس أتضارب معاه بسبب دي الحاجة .. و يقول لي إنتي ليش تقدري نفسك بالفلوس !! و إنتي ما يهمك غير الماديات !! و فهمته و قلت له .. المسألة ماهي مادية .. المسألة معنوية .. عالأقل حسسني إنك فاكرني و إني في بالك !! مو كدة تطنشني .. و لمن أقولك .. تقول لي إنتي ما يهمك غير الماديات !! >>>> الرجال ما أدري كيف يفكرو!! الله يهديهم بس !! يعني إللي عندك يا يكون جلدة و قحروطي :23: .. يا يكون غشيم و ما يعرف لدي الحاجات !! فشوفي مويته .. و شوفي ظروفه المادية .. لأنه برضو ترى وضعه المادي يؤثر .. يمكن يكون مشتهي يجيب لك شي .. بس العين بصيرة و اليد قصيرة .. فهمتي قصدي ؟؟ لكن لا تحطي في بالك أيش جاء لغيرك .. و أيش جابولهم أزواجهم .. و ليش ما جاكي زيهم ؟؟ و الله حتتعبي و إنتي إللي حتحرقي في أعصابك و هو مو داري عنك !! و بالنسبة للسجاجيد جننتيني !! خلاص سوي بكيفك .. بس أنا قلت لك عالأقل خليها 3 للحريم و 3 للرجال !! عشان كمان تكون طقم .. مو لمن تجي تشتري تاني .. تجيبي أشكال مختلفة !! و مادام إنك شايفتها تكفي .. بكيفك !! و بكم أخدتيها ؟؟ لأنه شكلي حأروح أشوفها !! >>>> عقدتيها من السوبرماركت .. أنا لفيت المعرض .. و أشتريت شوية قرنبعات .. بس ما رحت لمحلات العودة و البخور و دي الحاجات .. لأني ما أضمن أشتري من أي أحد .. أنا يا أشتري من البلد .. أو القرشي .. أو العربية .. عشان لا يخموني و يعطوني شي خربوطي !! و أيش العطر الثلجي هادا ؟؟ شوفي يا ستي .. روحي صيدلية النهدي .. أكيد عارفتها ؟؟ و قوليله أديني : Daily Formula و هي علبة كدة شوية كبيرة .. بيضاء و مكتوب عليها بالأخضر .. بس السعر مقطوع منها .. بس أظنها بشي و تلاتين .. ماهي غالية .. و Centrum علبة صغيرة و بيضاء و مكتوب عليها بالأسود .. و فيها كدة ألوان فوق الكتابة .. بعشرة ريال و 65 هللة .. >>>> جايبة العلب جنبها .. و هي فيتامينات و معادن مجمعة .. يعني مفيدة .. و ما منها ضرر .. و تتخن .. و شوفي من تجربتي و من تجربة أم الوسيم .. و زيت كبد الحوت برضو مفيد .. بس أخصائية التغذية قالت لي يتخن !! والموسيجور .. فاتح شهية .. و أفتكرت لك شي فتاك .. حتحبيني منه .. قد سمعتي بخرزة البقرة ؟؟ هادي تتخن بالمرة .. روحي للعطار .. و قوليله أبغا مربى خرزة البقرة .. أنا كنت أشتريها لصاحبتي .. و الله تخنت منها .. تجيكي قارورة فيها عسل و فيه مكسرات و حاجات و من بينها خرزة البقرة دي .. تاكلي منها يوميا .. و بشهادة الكل تتخن .. و كمان المفتقة .. حقت المصارية .. برضو تتخنننننننننن .. و يقولو تتخن بسرعة و بشكل مو طبيعي .. حتى دايما يأكلوها للنفاس .. عشان ترجع لها صحتها .. و أظن إني لقيت قبل كدة في المنتدى طريقتها .. هي يبغالها تنطبخ .. و فيه لمن بيسوو المعرض المصري .. تلاقيهم يبيعوها .. و إذا تعرفي مصارية .. أسأليهم عنها .. و بالنسبة لكريولاين .. أنا سمعت عنه كتير .. بس يقولو المكياج المائي صعب .. و مو أي أحد يعرف له و يقدر يتحكم فيه .. أنا شخصيا ما جربته .. بس أعرف إنه الكوافيرات يستعملوه لأنهم خبرة .. و أنا مرتاحة على المكياجات إللي بأستعملها .. بس بأفكر أروح اشوف كريولاين يمكن ألاقي شي حلو .. و على قولك .. لو سبتي نفسك للبياعين و طاوعتيهم .. حيخلوكي تشتري المحل كله !! و بالنسبة لحكاية الجوال .. شوفي يا قمر .. أنا زوجي وعدني بجوال جديد .. و جلست أستناه سنة كاملة !! لأني قرفت من جوالي .. قام يخرف و كل شوية يطفي ويقول لي مافي بطارية و أنا دوبي شاحنته !! و قيدني طفراااانة .. و قلت يلا أخليه هو يشتري لي .. و سرت كلحة و جلست كل شوية أذكره بيه !! آخر شي طلع مزنوق ماديا .. و أعطاني هي في وجهي !! و ماعنده إمكانية إنه يشتري الجوال .. و إنتي عارفة أسعار الجوالات كيف .. و لمن خلاص طفشت .. روحت و خربتها و أشتريت أطلق جوال في السوق .. ماشاء الله تبارك الله .. و ما كمل أسبوع و طاح من يدي و أنشطب !! >>>> أنحسد لأنه كتير قعدولي عليه !! لأني ماني من النوع إللي أغير جوالات كل شوية .. فخلاص أشتري الجوال و أجلس أستعمله فترة ألين يخرف و يقول لي أرميني !! يسير برضو شوفي لمحي له .. بس لو حسيتيه مزنوق .. لا تضغطي عليه .. لأنه راح يتنرفز و يطلع حرته فيكي .. ترى أوسخ شي لمن يكون الراجل مزنوق !! تلاقي أخلاقه زي الزفت و مو طايق نفسه .. و ماشي يضارب دبان وجهه على قولتهم .. الله لا يزنق مسلم يارب .. و يفتح على آبائنا و أزواجنا و يرزقهم من واسع فضله .. آميييييين ياااااااااااااارب .. وإنتي في الملكة رحتي أيت صالون ؟؟ سبحانك اللهم و بحمدك .. لا إله إلا أنت .. أستغفرك و أتوب إليك .. تحياتي .. جــــــــداويــــــــــــة

السلام عليكم و رحمة الله و بركاته .. أختي سلافة2120 .. والله دعيتلك يا بنت .. حتى دعيت...