بناااااااااااااات لو تعرفو محلات كويسة في البلد قولولي الاسماء لاني من مكة ومااعرف غير المحمل والكورنيش..

تساعدوني مابدي اتوه

السلام عليكم و رحمة الله و بركاته ..

أختي حبة اللؤلؤ ..
صباح الخير :) ..

الله يسعدك على طول يا قمر :) ..

يحيى البشري من زمان حتى ماما و أختي الكبيرة
أيام فرحها راحو له هو و عدنان أكبر ..
و لا واحد فيهم ما عجبها ..
غير قلة الحياء حقتهم .. إنهم لازم يشوفو الزبونة شخصيا ..
عشان يشوف جسمها و شكلها و يصمم لها شي يليق عليها !!
قطيعة :09: !!
قلة حياء !!

و مادام عدنان أكبر مجرب و عارفينه روحي سوي عنده ..

و لا روحي لهدولا إللي قلت لك عليهم ..
و شوفي كيف الوضع .. يمكن يعجبك شي :) ..

قاعة ريهام هادي إللي حوستني و لا عرفت مكانها :) ..

و نسايم ليل حلوة .. و البوفيه حقهم من الدار البيضاء ..
و مرة فخمة و رايقة ..

قاعة ررمانس ما عمري سمعت بيها !!
أعرف مطعم رومانس :23: ..
لا من جد فين دي القاعة ؟؟

و قاعة نوف بلكونتها حلوة ..
بس إللي مبيخ القاعة نفسها إنها جاية زي المدرجات ..
زي طريقة قاعات مكة ..
بس ما أدري إذا غيروها دحين ولا لا ؟؟

و أيش تبغي من البلد ؟؟
حددي إللي تبغيه .. عشان ندلك ..

سبحانك اللهم و بحمدك .. لا إله إلا أنت ..
أستغفرك و أتوب إليك ..


تحياتي ..
جــــــــداويـــــــــــــة

اهلين ياحلوين انا رجعتلكم

شوفي ياجداويه انا العدسات ماانصح فيها العروس تدرين ليش؟

عشان تكون متوتره هذيك الليله وخايفه المكياج يخرب وتفكر في الفستان والا

التسريحه والا التصوير كيف يكون فمو ناقصها قلق ثاني وتوتر بسبب العدسات

وكمان عشان لو تجي ان شاء الله بعد عشر سنوات وتشوفي صورتك وتوريها

اطفالك تحسي انو هذا انتي مو تحسي بغرابه

بالنسبه لاغراضك الخاصه انا اشوف انو ماله داعي تروح مع العفش

انا وديت العفش حقي كله للبيت بس خليت قميص اول ليله والاشياء الخاصه زي

الشامبو والمعجون والفرشاه وماكينه براون وامواس نسائيه والكوتكس ومناديل كير

فري وزي هاذي الاشياء في شنطه صغيره مره ولما رحت لبيتي اخذتها معاي لانو

احسها صعبه وانتي لسه عروسه تطلبي منه هالاشياء

اهلين سلافه

شوفي ياعيوني انا من العرايس اللي اتجهزوا في المقينه

بس هذا الكلام له 4 سنوات ونص

شغلهم حلو وراقي انا كنت ابغى وحده اسمها عواطف شغلها خيال .......وحده من

صاحباتي بنت خالتها سوت لها عواطف يوم زواجها مكياج اورنج انا لما قالت لي

البنت انصدمت وقلت اكيد معفن بس لما جابت الصور بصراااااااحه خياااااااال

اول مره اشوف عروس مكياجها اورنج وفخم

وعلى طول قررت اسوي عنهم بس انقهرت لانو عواطف يوم زواجي كانت مسافره

وحجزت عند وحده فلبينيه اسمها افلين شغلها قريب لشغل عواطف وسوت لي بروفه

ويوم الزواج نفس اللي صار في البروفه ماغيرته لي لانو انا اسمع من بعض البنات

انو بعض الكوافيرات يسووا في البروفه شئ وفي يوم الفرح شئ ثاني

والكوافيره لبنانيه عندهم بس والله ناسيه اسمها بس شغلها غريب يعني تحب تسوي

اشياء غريبه ومو تقليديه بس اذا ما عجبك شغلها عادي قوليلها لاتستحين لانها

شوي شايفه نفسها انو هي لبنانيه وانو فاهمه شغلها بس انتي ماعليك اذا ماعجبك

قوليلها وانا افضل انو يكون عندك صوره للتسريحه عشان ترتاحين

على فكره يابنات نصيحه مني لاتكثروا من شراء الملابس والعطور

لانو انا انقهرت اشتريت اشياء كثيرررررررره وملابس وقمصان نوم واطقم عطورات

بالهبل وبس شهر وعلى طول حملت وكرهت العطور والملابس ماتهنيت فيها وكبيت

العطور في الزباله اكرمكم الله وحتى بعد الولاده جلست كارهه لعطوري حقت الزواج

مع انها فخمه والملابس بعد الولاده مع ان جسمي رجع زي اول بس خلاص راحت

موضتها وكرهتها بالمره

بالنسبه للانجري والاشياء اللي ماتبغوا احد يشوفها ليه ماتجيبوا كراتين الهدايا

الفخمه تلاقوها في المكتبات او في محلات الكوش على شكل قلوب ومربعات ودواير

خذي كذا لون وشكل وحطوا فيها ورد مجفف من تحت ورصوا اللانجري فيها وبعدين

رشوا عليه شويه ورد مجفف وغطوا بالغطا واربطوا عليها بالشرايط او سلوفان او

تل من حق الهدايا مو القماش.......وبعد الزواج ممكن تستفيدي منها تحطي فيها

هديه لوحده صاحبتك او زوجك

بالنسبه للجزم بصراحه ماينفع تنحط في الدولاب وحرام تنحط عن الباب وهي جديده

ومو حلو تنحط في دولاب الملابس

انا في بيتي حطيت دولاب للجزم عند باب الشقه

ممكن تحطي سبت زي اللي في ايكيا اللي له غطا هو زي الصندوق مربع كبير

بس مخرم وله غطا تحطي فيه الجزم انا شفت زيه عند يابلاش

على فكره جداويه العدسات البنفسجي حلوه انا كنت اقول زيك حيطلع شكلي زي

الغوريلا الين شفت وحده سمراء ولابسه موف مره حلوه وغريبه

وانا حنطيه وطلع اللون كيوت

بالنسبه ياحبة اللولو للشوفنيره انا اشوف انك تخليها للشراريب والاندروير حقتك وحقت زوجك والمناشف الصغيره

اما الكوميدينو فأنا حاطه فيها كتب عشان احيانا مايجيني نوم في الليل فاخذ كتاب

واقرأ لين انام وكمان حاطه فيها دفتر وقلم عشان كمان اذا ماجاني النوم اكتب او

اسجل اغراض فيه....شكلك تقولي هذي ماتنام

وكمان حاطه فيها اذكار الصباح والليل وقران

علة فكره بنات انا ابغى تدلوني على نوادي رياضيه بس تكون اسعارها معقوله ومرتبه

هههههههههههههه
تسلمو بنات ما نتبهت المشكلة كلامكم طوووووووووووووووووووووويل الله يعينكم ويسهل عليكم وعلى جميع المسلمين أنا اعرف في جدة العرايس مبسوطات كل شي عندكم من اسواق صاولين يعني ما تتعبو كثير زي اهل المدينة ومكة بس كثرة الصالونات تشتت المهم بقولكم لية ماتروحو صالون ريما تعرفو انو لخبير لبناني اسمو سمير اسمر ومعاة سعودية مشتركة فتحتوبإسمها عملو معاة لقاء في قناة هي وقال انو جداً متطور يهتم بكل شي للمرأه حتى في نادي رياضي بس ما أدري انو لو اكثر من فرع وهل هو نفسو الي تكلم عنو؟اتمنى يكون هوا انا مقريت موضوعكم من اول بس الله يسعدكم ويتمم افراحكم على خير ونسمع عنكم احلى الأخبار
وشكراً سلاف وجداوية وحبة لؤلؤ
طولت عليكم
عديـــــــــــــــــــــــــــــــتوني!!!!!!!!!!!!!!!!!!!!!!!!!