السلام عليكم و رحمه الله و بركاته
ازيكم يا بنات عاملين ايه ؟ يا رب نكون كلنا إطمنا على موضوع الميه دة و الحمد لله
بس تعرفوا الإشاعه بتاعه إمبارح دى علمتنى حاجات كويسه برضه . أولا إنى ماصدقش كلام أى حد إلا لو كنت متأكدة منه حتى الناس اللى قالت قرايبهم فى وزارة الصحه و الحاجات دى ماكنتش صح سبحان الله ( رغم إنى عرفت إن فى إمبابه مثلا كان فى عربيات بميكرفونات بتحذر الناس من الميه ) بس سبحان الله كل دة طلع مش مظبوط و لله الفضل و غير كدة كمان إمبارح جربت أتوضأ من قدر متوسط فيه ماء و إكتشفت إنى عرفت أتوضأ منه يعنى كميه ميه صغيرة تقضى الوضوء مش زى ما إحنا بنعمل فاتحين الحنفيه و خلاص و الحمد لله إن كل الإشاعات دى عدت على خير و ربنا يستر و ما تطلعش حاجه جديدة
شفتم إمبارح البيت بيتك ؟ المذيعه قالت إن فى ناس بقت بتبيع كيلو اللحمه ب 70 جنيه ؟ تصدقوا ؟ أنا عن نفسى ما شفتش جزار بيبيعها كدة لأنى أساسا مش أنا اللى بشترى اللحمه بس هما قالوا كدة إمبارح فى البيت بيتك يعنى حتى فى ناس سبحان الله بتستغل الأزمه دى أسوأ إستغلال ولا حول ولا قوة إلا بالله
هروح أصلى و أرجع أكمل رغى

انا رجعت تاني
مش عارفة اقولكم ايه الحقيقة بس حاسة اننا في ابتلاء من الله وهو واحده اللي يقدر يرفعه عنا هو عالم والله المصريين حالهم عامل ازاى واللي فيهم مكفيهم ،

ربنا ارفع عنا العذاب اننا مؤمنون، اللهم لا تؤاخذنا بما فعل السفهاء منا

عاوزة اقوللكم معلومة على الماشي علشان اى ظروف من رحمة ربنا ان التيمم صحيح حتى لو كان في مية في البيت بس يدوب على قد الشرب مش بس كده ده يبقى الوضوء بمياه الشرب مكروه (خلوا بالكم مش حرام- مكروه بس)

يعني لو المية قطعت مرة وفي مياه للشرب فقط مكروه استعمالها في الوضوء ويجوز التيمم في الحالة دي

انا كمان هاصلي وارجع

رانيا تيجى بالسلامه يا حبيبتى ان شاء الله بس أهم حاجه إوعى تجيبى حد يابانى معاكى الله يكرمك كفايه اللى عندنا مش عارفه أعمل فيهم ايه و إن شاء الله تقضى أجازة سعيدة إنتى و البنات