far7_aloyoon @far7_aloyoon

عضوة جديدة

المقلوبه الفلسطينية على اصولها

صباح الخير للكل انا اليوم اول يوم الي بالمنتدي طبعا متابعته بس ما كنت مشاركه بيه قبل هيك
والي لاحظته وطبعا عصبني شوي مو كتير:16: مواضيع بتنزل كيفية عمل المقلوبه
حبيت احكي بس شوي عن المقلوبه للي بدها تعرف شو المقلوبه المقلوبه هي اكله فلسطينيه والها اصول هالاكله وللعلم الفلسطينين اكلهم صحي شوي يعني اسفه شوي بشوف بالمنتدى صور سفرات واكلات ومن ضمنها الجبنه السائله والبشاميل والمقالي نوعا ما اكلنا طبيعي شوي اكتر من غيرنا والمقلوبه طبعا الها اذواق ممكن تنعمل بالزهره وهي ازبط شي ممكن بالباذنجان , جزر , بالفول وهي اسمها مقلوبه الربيع .
المهم اعزروني عالاطاله بس حبيت وضح لانه شفت وصفات مقلوبه مش هي هي المقلوبه احكو عنها اي شي بس مو مقلوبه مره قرات كل الخضر وبعدها طبقه تونا حرام عليكم ما بتشبه المقلوبه بشي وللعلم كمان المقلوبه الفلسطيني ما بنبالغ بيها وبنعبيها مكسرات هلا نيجي للتفاصيل
اول شي بنجيب دجاجه مقطعه ومغسوله منيح بعد الغسل احنا بنحط طحين مرات وبنفركه بالطحين او الملح وبعدا بنشطفه وبنحط ليمون حامض منشان الزفره وممكن زيت زيتون ( زيت بلدي بنحكي اله ) بعد الانتهاء من الغسل ننقعها بالليمون وبنحطها على جنب
بنجيب طنجره وبنفرم بصله عاديه بيها مع شوية زيت وبنقبيها لدقيقه بعدها بنصفي الدجاج وبنحطه فوق البصله وبهار وملح لا تساله شو لبهار بهار طبيخ عادي وفي هون بفلسطين بهار اسمه بهار مقلوبه بس هو بالاخر بهار عادي الي عندك وملح وبنصير نقلي لبهار بالبصله بالدجاج بالملح وكل شوي بنحرك الطنجره لما يتقله ببعض شوي يعني خمس دقايق بس لا ينحرق شي لا دجاج ولا بصله يتحمر شوي الدجاج بعدها بنحط او بنغمرها بماي عادي وبنغطي الطنجره لتنسلق الدجاجه,وتقترب للاستواء , بنكون احنا ناقعين رز قبل بوقت يعني قبل بربع ساعه احنا بننقع الرز وبنستعمل الرز العادي للمقلوبه الي هو القصير العادي مو الي بستعمل بدول الخليج الي حبته طويله الي بستعمل للكبسه هدا ما بزبط للمقلوبه بعد النقع بنجيب لبهار العادي بنحطه عالرز وبنحط ممكن شويه قرفه مطحونه بس لا تكتري وحب الهان المطحون وكم سن تومه سنون مو مفروم بس الثومه اختياري وملح وبقلبه كله مع بعض طبعا بعد تصفيه المي الي عليه الي نقعناه قبل بيه هلا دور الخضرا طبعا هي الخضرا اختياري ممكن انت شو بتحبي مع المقلوبه ممكن زهره مقطعه ومقليه ممكن باذنجان انا واختي بنحب الباذنجان المقلي بس خواني الشباب ما بحبه ممكن جزر وللعلم الجزر بحطه متلا الجزه بنقشرها وبنقطعها اربع قطع او شي بالطول قطعتين وبالعرض قطعتين وبنحطها مع سلق الدجاج ما بنقليه صحي اكتر وممكن تقطعي الجزر عادي دوائر وتقليه انا بحكي هالخطوات هي بس للتوضيح ولابين انه كل واحد وذوقه بهالاشي .
بهالمرحله هي الدجاج مسلوق الرز متبل وجاهز الخضرا الي انت بدك تحطيها مقطعه ومقليه جاهزه بنيجي للدجاج بنصفي الماي ماء السلق الي عليه وبنحطها على جنب لانه راح نرجع الها هلا بكون قطع الدجاج المسلوق بقاع الطنجره بنرتبه بالطنجر بعدها بنفرد عليه الخذرا المقليه ممكن زهره ممكن جزر ممكن باذنجان ممكن تحطي زهره وجزر احنا اكتر شي امي بتستعمل زهره مقليه وجزر التنين مع بعض بس بالاخر بحكي انه هالاشي اختياري شو بتحبي بتحطي بعدها بنفرد الرز لمبهر والمملح الجاهز يعني بهيك بكون طبقه الدجاج اول شي فوقها طبقة الخضرا بس طبعا لا تبالغه بالخضرا ممكن زهره وسط وبعدها الرز بعدا بنجيب الماي الي صفناها عن الدجاج المسلوق الي شلناها على جنب وبنحطها فوق المقادير وبنزيد شوية ماي ساخنه ازا ما كفت هلا في طريقه قديمه امي علمتني اياها كيف ازبط الماي على الرز تماما لازم الماي تكون غامره الرز بنقيس هالاشي عند عقدة الاصبع مش عارفه كيف اشرحها هلا مش اول الاصبع بعد الضفر في حز بالاصبه او العقده الماي تكون واصله لحز الاصبع والا احكي الكم الماي غامره الرز بس لا تكتره كتير ماي هلا وبنحطها على نار الغاز العاديه لما تسير تغلي شوي ينوطي الغاز شوي وسط تسير النار بعدها بسير تتنشف الماي هون بنخلي الغاز واطي عالاخر وبنخليها تتنشف ولما تتنشف بنطفي النار ( برضه في طريقه نعرف الماي تنشفت عن الرز اي نوع رز مقلوبه غيره بنجيب معلقه وبنمسكها بالعكس يعني ايدها لتحت او سكينه وبنحطها بالرز ازا طلعت المعلقه نوعا ما متنشفه بكون جهز الرز طلعت عليها ماي كتير يعني الرز بده كمان شوي هو بنطفي الغاز وبنخليها عشر دقايق مغطيه بعدها بنجيب صدر او اي شي للتقديم بنحط الوعاء راح احكي باللغه العربيه الفصحه المسلطح على وجة الطنجر وبنقلبه بالعكس وهيك صحه وعافيه بتاكل معها سلطه لبن شو بتحبي
هلا هي المقلوبه بالتفاصيل الممل حبيت احكي مش عارفه واضح او غير واضح بس اي استفسار للكل انا حاضره وطويله روح انا وممكن الواحده تعملها اول شي كميه بسيطه مره على مره تزبط معها المقادير:cook:

26K

يلزم عليك تسجيل الدخول أولًا لكتابة تعليق.

تسجيل دخول

alrahmh • 15 سنة

تسلمي يا بنت بلدي
واتحفينا بالمزيد

far7_aloyoon • 15 سنة

انا كل مافي الموضوع حبيت احكي شوي عن طبخه كتير ناس بساله عنها الي هي المقلوبه الفلسطينيه
يعني كتبتها للمعنى يعرف شي هي
والي مو حاب يعرف عادي يقراء ويطلع مش شرط يعملها

شــــ الورد ــــذى • 15 سنة

ربنا يسلم دياااتك..والف شكر على الشرح الكاافي..فعلا هذه المقلوبه الفلسطينيه..
عزيزتي هل من الممكن الاستغناء عن الرز قصير الحبه بالرز طويل الحبه.
لأنه المفضل بالعائله..
الف شكر على الشرح الجميل...تسلم دياااتك وديااات الماما..

وجودعبود • 15 سنة

شــــ الورد ــــذى :

ربنا يسلم دياااتك..والف شكر على الشرح الكاافي..فعلا هذه المقلوبه الفلسطينيه.. عزيزتي هل من الممكن الاستغناء عن الرز قصير الحبه بالرز طويل الحبه. لأنه المفضل بالعائله.. الف شكر على الشرح الجميل...تسلم دياااتك وديااات الماما..

ربنا يسلم دياااتك..والف شكر على الشرح الكاافي..فعلا هذه المقلوبه الفلسطينيه.. عزيزتي هل من الممكن...

تسلم ايدينك
أنا تعلمت هالطريقة قبل فترة قصيرة
من مديرتي بالعمل
وكانت فعلا لذيذة جدا
مع الباذنجان روووعة
فعلا هذي هي القلوبة الاصلية

bulbula • 15 سنة

تسلم الإيد اللي كتبت و الله يعطيكي العافيه..

احنا ما بنحط فيها جزر بس بتنجان وزهره و بطاطا و احيانا بندوره من باب التغيير