اهلا يا برايد

تسلمي و ربنا يخليكي و يخليلي دعواتك الحلوة

شوفي يا ستي انا اتدبست في الالمونيوم من زمان، بما ان ماما متوفية و بابا كان متسربع في حكاية اني ابدأ جهازي دي، فمن فترة كبيرة جدا خلاني جبت الالمونيوم و انا وقتها مكنتش بافهم في اي حاجة تخص البيت و لا كنت عاوزة افهم بصراحة، المهم جبته فعلا و لا فكاك منه. لكن عموما انا جبت كمان طقم استنلس عشان الطبخ، غير اني عندي طقم صاج برضه. عشان كده في التيفال انا مش محتاجة حلل كتير يعني همه مقاسين معقولين للرز و خلاص، مش كده كفاية برضه؟؟ انا مش عاوزة اكتر لاني في النهاية مش عارفة حاحط الحاجات دي فين اصلا!!! مش متخيلة ان المطبخ ممكن يبلع البلاوي دي كلها!! و انا لسه مفيش شقة اصلا عشان اعرف مقاس المطبخ حيكون ايه بس بطني مكركبة كل ما افكر الحاجات دي حتترص ازاي!!!

انا ملخومة في الشغل الايام دي لخمة ما لها اول من اخر و ده اللي بيأخرني عنكم فتحملوني و تحملوا غيابي

بنات صحيح، بالنسبة للبس البيت الشتوي، انا جبت 3 بيجامات قطيفة و اتنين ترننيج سوت لذاذ و بيجامتين شتوي و تقريبا قميصين بيت او تلاتة مش فاكرة و كمان جايلي في الطريق عباية او اتنين قطيفة، و عندي روبين، كده يبقى اللبس الشتوي للبيت كفاية و الا محتاجة تاني؟؟؟ مش عارفة فكروا معايا و قولولي. و قولولي احتاج كمان هدوم خروج اد ايه لان الموضوع ده محيرني قوي. اجيب حاجات كتير و الا اجيب كام حاجة و اكمل وقتها اللي محتاجاه و الا ايه بالظبط؟؟ انا من الحيرة احيانا مخي بيقف خالص و مش باجيب حاجة!! لا عاوزة ابالغ و لا في نفس الوقت عاوزة الاقي نفسي متجوزة و فيه حاجات ناقصاني و ارجع احتاس بعدين

برايد، لسه الحاجات التانية اللي كنت كلمتك عنها مجبتش فيها حاجة خااااااااالص، بس اللي مطمني ان الحاجات دي موجودة على طول و مالهاش مواسم!!

ياللا اسيبكم تاني

السلام عليكم
انا زعلانة منكم كل ما اسال سؤال لا القى اى اجابة ....المهم انا خلاص زعلت منكم
"نودى" انا حاقولك على مكان تلاقى فيى كل حاجة واسعارة حلوة قوى اسمة "عادل السباعى" ودة تلاقية محلين كبار خلف مسجد السيد البدوى انت ادخلىهناك وهتلاقى كل حاجة موجودة حتى الاطباق البلاستيك بتاعت الغسيل والترابيزات البلاستيك والكراسى عندة روحى وجربى
بالنسبة لموضوع الالمنيوم والتيفال انا عندى الاثنين وبفضل الالمنيوم فى كل الاكل لانة مش بيتجرح مع ان انا التيفال اللى عندى تيفال فرنساوى اصلى بابا كان جايبة من السعودية لكن بفضل انى استخدمة للمكرونة ..الرز..المحشى اما باقى الاكل ففى الالمنيوم صحيح هو تنظيفة صعب لكن هنعمل اية
بالنسبة لملابسك كدة معقول للشتوى وملابس الخروج يعنى على حسب خروجك لو بتخرجى كثير او قليل لكن المتوسط المعقول 5 اطقم
الملابس الداخلية فى محل اسمة التركى دة امام شهرزاد اللى فى احمد ماهر ودة محل صغير لكن عندة حاجات حلوة وممكن تتفرجى على كاتلوجات الاول وبعدين تختارى اللى يعجبك ..لو احتجت حاجة تانية انا تحت امرك واعتبرينى يا ستى اختك

اهلا مشمش

جزاك الله خيرا يا غالية على المعلومات القيمة دي، انتي من طنطا و الا ايه؟؟ انا حاحاول اشوف المحل اللي قلتي عليه بتاع حاجات المطبخ. و التركي ده تخيلي انا فاكرة اسمه لاني جبت منه كام ايشارب و طرحة عشان الحجاب لكن عمري ما تعاملت معاه في الحاجات الداخلية، عموما حاشوفه برضه

انتي ايه الاسئلة اللي سألتيها؟؟؟ معلش انا كل ما اجي الاقي صفحات كتير و مش بالحق اقرا كل حاجة، قولي سؤالك يمكن اعرف و ربنا يقدرني انه اجاوبك عليه، و متزعليش البنات اكيد مخدوش بالهم، لان الحمد لله كل البنات هنا جدعان و مش بيطنشوا، لكن هي ظروف الاستعجال في القراية اللي بتطير شوية حاجات

شكرا مرة تانية يا مشمش، و انا سعيدة ان ليا اخت جدعة زيك

تحياتي

بصي يا امولتي

لبس البيت شتوي معقول لكن انت جايبة بيجامات كثيرة كده ليه يا بنتي سهليها شوية ههههههه

بالنسبة للخروج انا شخصيا حسبتها على اساس شغلي يعني انا باشتغل 5 ايام في الاسبوع فجب 5 اطقم كاملة وبعدين زودت عليهم طقمين ثلاثة منوعين يعني يمشوا على كل حاجة بلوزات وجيبات يعني لو انتي بتشتغلي 6 ايام هاتي لك 6 اطقم ومعهم 2 او 3 زيادة مختلفين
على فكرة المعرض عامل خصومات حلوة في الأجهزة لكن اكتشفت انه مهما خصم اسعار شارع عبد العزيز احسن مليون مرة يعني انا لسة جايبة ديش واشر الشركة نزلتها في المعرض بتاعها من 2400 لـ، 1870 علشان عيد الأم فانا لاقيتها في عبد العزيز ب، 1670 تخيلي يعني سواء خصم ولا لأ عبد العزيز احسن كمان الكيتشن ماشين كينوود الصغيرة لاقيتها 450 جنيه وده سعر هايل لأني كنت لاقيتها في المعرض اللي فات 650 جنيه تقريبا او يمكن 750 مش فاكرة قوي في الحدود دي يعني

اهلا يا برايد يا قمر

و بعدين يعني معاكي؟؟!!!! باسقع يا ستي في الشتاء!!!! عديها بقى!!!! لما انتي بتقولي كده دلوقت، هو حيقول ايه؟؟!!!!!

كويس انتي فتحتي سيرة الاجهزة لاني كنت فعلا عاوزة اسألك تاني الكيتشن ماشين اجيبه كينوود و الا براون و الا مولينكس لاني لحد دلوقت محتااااااااااارة. و عشان كده ركنته من تفكيري لحد ما ارسى على بر

مش عارفة اذا كنت قلتلك اني جبت مفرمة لحمة ناشيونال ياباني و الا لا. جبتها من عندنا من طنطا ب 900 جنيه سرعتين. احنا عندنا اختها في البيت و مريحانا في الشغل جدا. صحيح، سؤال عبيط شوية، بس بالنسبة للمكواة فيه ناس بتصر على المكواة العادية لانها اتقل من المكواة بالبخار و استخدامها افضل و ناس تانية تقول لا اللي بالبخار احسن، تفتكروا تفرق كتير. احنا عندنا المكواة العادية في البيت لانهم ضد اللي بالبخار و انا متعودة على استخدامها، فلما اجيبها اجيبها ايه؟؟ سؤال عبيط، صح؟؟؟

بالنسبة للبس، الله يريحك يا برايد انتي كده طمنتيني، و عندك حق كده يبقى معقول قوي

ربنا يخليكي لينا و يرزقك الذرية الصالحة و تكون بنوتة امورة و زي السكر زيي >>>> واخدة في نفسي مقلب!!