يااااااه ماشاءالله عليكم..كلكم زي العسل
واحب ارحب بكل البناتيت الجدد
وترحيب خاص لنودي"انا قلب العصفورة"..والله نورتي انت وفتاة مسلمة حبيبتنا

بس كنت عاوزة اسألكم علي حاجة...فيه بعض الانجريهات بيتلبس تحتها برا وحاجات متنفعش طبعا..بس لازم البرا يكون طري وقطن مثلا وظهره منخفض عشان ميبانش من ضهر القميص
وانا بصراحة دخت علي حاجة زي كدة..هل حد يعرف اماكن لبيع الحاجات دي
يعني تكون خفيفة واقطان....وحمالات شفافة طبعا
ماما جابتلي واحد من السعودية وطلع هايل جدا...ومكنتش تعرف انه كويس
ومش عارفة فيه منه هنا ولا لاء
ياريت اللي تعرف تنجدني الله يخليكم..

كمان موضوع السويت دة مرعبببببببببببببب..ياربي دة انا كل مافتكره يغم علي من غير حاجة
والله هحاول كدة محاولة عارفة انها فاشلة اني اتدرب لان الاتقان ييجي من مرة فمرة
علي رأيك يابرايد الزواج للجدعان
هدهدة انت فين يابنتي...طمنينا عليكي

بس كنت عاوزة اخد رأيكم في حاجة شخصية لسة حاصلة النهاردة ومخلياني مخنوقة والله ربنا اللي عالم بي...
حصل نقاش حامي بيني وبين الاستاذ المبجل
وكنت حاسة انه بيكلمني بلامبالاة كدة واعملي اللي انتي عاوزاه وانا من هنا ورايح هبقي مسؤل عنك لما تبقي في بيتي وبس وكلام من دة....واحنا الحمد لله بناخد اراء بعض في الصغيرة والكبيرة ومحدش بياخد قراره من دماغه
المشكلة في الاخر بقي قالي...سبيني اسبوع كدة ولا عشر ايام لوحدي لاني تعبان ومش عاوز اكلم حد
ومتكلمنيش لا في شقة ولا غيره
انا ذهلت من الطلب اول مرة يطلب مني طلب زي دة....حاولت بعدها اكلمه واهون عليه لانه معزور وعليه ديون وضغوط واعصابه تعبانة لكن مردش علي بعد 7 مسجات واتصال ييجي 20 مرة
وفي الاخر قفلت الموبايل من غيظي وقررت اسيبه فعلا مع نفسه شوية كام يوم يفكر يمكن محتاج ينفرد بنفسه
هل تصرفي صح او غلط؟؟؟؟ هل الحاحي عليه مش في صالحي؟؟ وهل اسيبه فعلا لحد ماهو يكلمني ولا ابدأ انا لو طول الغياب
والله انا احترت وتعبت فعلا

السلام عليكم يا احلي بنات

انا متابعة معاكم الموضوع من زمان خالص وشاركت كمان معكم كام مرة بس مش كتير

المهم انا شدني جدا مدي التعاون القائم بينكم جميعا ربنا يبارك ليكم كلكم ان شاء الله

اولا احب ان ارحب بكل البنتوات اللي زي العسل المقبلات علي الزواج مش هاقول اسماء لانهم ما شاء الله كتير وربنا يوفقكم ان شاء الله ويتم ليكم علي خير

ثانيا اعرفكم بنفسي انا ام احمد متزوجة من 5 سنين وعندي احمد 4سنين واقيم في هولندا طبعا انا مصرية واي خدمة في اي حاجة عايزين تعرفوها ان شاء الله ربنا يقدرني واساعدكم علي قد معلوماتي لاني اقيم في هولندا من اربع سنين وطبعا مش مطلعة علي كل حاجة بتنزل جديدة في مصر بس ممكن اساعدكم علي قد ما افتكر ان شاء الله

عزيزتي الغالية كهرمانة12

معلش اسمح لي ان اتطفل عليكي وارد عليك في الموضوع بتاعك

بصي يا ستي اكيد طبعا الفترة اللي بتبقي قبل الجواز دي بتكون صعبة جدا ليكي ولعريسك لان بناء حياة جدية مش سهل وبيتطلب وقت وجهد وطبعا مال

فمعلش اكيد خطيبك بيمر بظروف صعبة زي ما فهمت من كلامك فانت حاولي تخففي عنه و انت سيبيه يرتاح شوية من التفكير في الشقة والجهاز والمصاريف والديون وخلافه وهتبصي تلقيه هو بنفسه راجع يتكلم في حاجة تاني زي الاول وان شاء الله بمجرد ان يريح اعصابه شوية هيرجع علي طول تاني ولو يعني حسيتي انه اتاخر شوية جربي مرة كمان بس ما تلحيش اوي في السؤال لان الراجل ساعات كتير بيكون محتاج يقعد مع نفسه عشان يراجع حسباته شوية وخصوصا ان الضغط عليه بيكون كبير فمعلش انتي حاولي تكبري دماغك علي الاخر وطنشي حاجات كتير

واحنا كلنا مرينا بنفس الظروف دي وكلها بتعدي وما تقلقيش ان شاء الله كله يبقي تمام واحتمال تصحي الصبح علي اتصال منه

وربنا يتمم ليكي علي خير ان شاء الله

اخبرا ظهرت يا ام احمد فينك ياريت كل الاعضاء المؤسسين لتجمع الخير يرجعوا يشاركوا لانى ارطبت بكم جميعا
عطرالشموع
مشكوره يا حبيبتى على اهتمامك وردك جزاك الله كل خيرومنتظره مشاركتك هنا
كهرمانه
اتقلى عليه شويه صغيره لان كلهم مش بيحبوا اى كلام بينتهى باداه استفهام
ولما يكلمك كلميه حلو اوى من غير اى سؤال او عتاب
وهتلاقىالنتيجه هايله

السلام عليكم و رحمة الله و بركاته

انا جييييييييييييييييييت

اسمحولي بس الاول ارد على حبيبتي كهرمانه (قلب العصفورة السكرة)

شوفي يا ستي، اول هام افتحي الموبايل لو سمحتي!!!! شوفي انا حاقولك حاجة فيه رجالة لما بيقعوا تحت ضغوط كتير و يبداوا يشعروا بالضعف مش بيحبوا اللي حواليهم و خصوصا الزوجات او الخطيبات يشعروا بضعفهم ده و بتبقى اسهل كلمة على لسانهم :سيبيني لوحدي انا عاوز ابقى لوحدي، و كأنهم حينسحبوا للكهف و يقفلوا وراهم. صدقيني الحالة دي ممكن تطول و ممكن تقصر لكن اهم حاجة فيها انك متضغطيش عليه بالكلام يعني سيبيه لحد ما هو يتصل، و في نفس الوقت متغضبيش و تقفلي الموبايل لانه ممكن في عز ازمته دي يبقى عاوز يتصل بيكي و يكلمك انتي بالذات دونا عن بقية البشر و لو لقى الموبايل مقفول و انتي غضبانة منه ده حيخلق مشكلة ملهاش لزوم. انتي بتقولي انه تحت ضغوط كتيرة و انتي حاسة بيه، كملي جميلك و اتحملي معاه الفترة دي و حتى لو قعد اسبوع او عشر ايام زي ما بيقول، و لو اني اشك انه حيطول اوي كده، المهم لما يروق او يحتاج انه يفضفض لازم يلاقيكي انتي جنبه و معاه، فهمتيني يا غالية؟؟

معلش يمكن كلامي ملخبط و مش مرتب بس اتمنى الفكرة تكون وصلتك. و ادعيله دايما و اطلبي من ربنا انه يفرج كربه و همه و يقدره

و ربنا يسعدك يا غالية و يوفقك و يتمم لكم بخير