مشاء الله موضوعك وطريقة سردك أكتر من رائع استمتعت جدا بقرأته عيشتينا باجواء الماضي الجميل تستلم اديك توته :)
الصفحة الأخيرة
لا لا هو مش تعذيب, انما اذا ما اكلوا بعد الصلح في منهم يمكن يتراجع بكلمته, يعني صار بينهم خبز و ملح و صاروا اخوة, امي ذكرت لي قصة ناس اصلح بينهم المختار (اللي جاء بعد سيدي رحمه الله) و كان حكم بيناتهم بالدية و بلقمة هنية, لكن الطرف اللي طلع عليه الدية و الطبخ ما طبخ ساعتها و لا كان مجهز اكل على اساس انه متأكد من الصلح, فتبقت العداوة ما بينهم ليومنا, لهيك الاكل بعد الصلح مهم جدا, في ناس بعده بيصيروا عيلة وحدة و بيتناسبوا كمان.
اللي بعرفه انه راس الخروف ما بينطبخ عنا بالمنسف نهائيا, و بيحطوا الراس مع المصارين و الكرشات و بيطبخوهن سوى, و بعيلتنا لما تنذبح الذبيحة الراس و الكرشات بيروحوا صدقة لناس معروف انه بيقدروا لطبخ هالطبخة, يمكن في حياتي كلها ما شفت ستي طبخت كرشات نهائيا و امي طبختهم يمكن 3 مرات بس, يمكن هالعادة اكثر عند البدو... (في معلومة جديدة اليوم عرفتها من والدي استنوا بحطها برد لحالها).
بامريكا طبخوا اهلي الروس مرتين, مرة قبل ما حضروا اهلي من البلاد و قام اخوي بالاشراف على الطبخ و كان طالب انه الروس ينطبخوا بطنجرة لحالهم بماء و بهار و لما صارلهم اكثر من 3 ساعات ضاف الهم شوية لبن من شوربة المنسف لياخذوا الطعم و بيقولوا انه طعمهم كان تمام التمام (ما ذقت الروس بنفسي). و المرة الثانية كانت بعد ما حضروا اهلي و امي اشرفت على الطبخة و كانت طالبة يحطوا الروس مع اللحم باللبن من اولها و انطبخ باللبن, بس من اول لقمة ذقتها من منسفهم يومها قرفت حياتي كلها الطعم كان :09: الله يكرم النعمة.. لهيك اذا حابة تطبخي روس خليهم بطنجرة لحالهم لحتى ما يغيروا بطعمية المنسف كله.
شوفي عنا الاكل بينبعث لاهل الميت من ايام اجداد اجدادي, و السبب انه بيبقى عندهم منه يتعشوا عليه خصوصا اذا كان عندهم اطفال, يعني اللي اترملت من فين تعشي اولادها و هي نفسيتها في الحضيض؟؟؟
اما عني, مش نباتية بالكامل, الدجاج بدون عظم مشوي و الكفتة كباب و كل شي مشوي ما عندي مانع اكله, اما ايا شي بعظم و دخل بطبخة خصوصا طبخة طبختها بايدي مستحيل احط اللحم بتمي.. هي شغلة نفسية اكثر بالنسبة لي, مرة كنت يمكن سنتين او 3 ما بعرف, كان عنا عمي بزيارة من امريكا و عنا هالخروف و كان والدي عازم رجال البلد على عشاء منسف على شرف عمي, فقام عمي بذبح الخروف قدام عيوني, الراس كان بجهة و الجسد كان بجهة و انا اتفرج فيه و واقفة عند رجليه مش خايفة, بس اخوي الله يسامحة قام سأل عمي: ليه بيتحرك الخروف؟؟؟ عمي جاوبه: لانه الروح بتطلع.. انا سمعت روح و عينك ما تشوف الا النور و هاتك يا صراح و ركض للبيت, ترى كل هالحكي انا فاكرته بعد هيك ما بعرف و بتقول امي انه اخذتهم شي نص ساعة يفكوا ايديني من حديد شباك الصالون اللي بيطل على الخروف المذبوح و شربوني طاسة الرعبة و ساعة لسكتوني و انا مصدومة.. و مرة اكلت خروف و انا كبيرة قبل ما اتزوجت بالغلط طلعت معي طلعت مصاريني و انا بستفرغ غصبا عني مش برضاي... فهي شغلة نفسة حتى لو حاولت آكل لحوم جسمي ما بيقبلها.
باللبن قصدك اللبن الرائب الyogurt? ما بعرف اذا بيضبط, شوفي عند العربي بيبع جميد سائل, جربيه بخلطه بشوية ماء لتحصلي على سائل الthickness فيه مثل السحلب بيكون طعمه اوكي على حسب نوع الجميد السائل.. من رأيي افضل الجميد بيكون الاكثر حموضه و مالح نوعا ما, و في ناس بتستعمل اللبن المخيض و بتضيف عليه علبة لبنة, لكن بصراحة ما بعرف كيف طعمه.