الناس كرهتني بفقر زوجي وبقولكم كيف عايشه انا وزوجي>>استوفي الردود

اخواتي انا احب زوجي واشوف انه يحبني لأنه يعاملني زين ويسمعني الكلام الحلو واذا تعبت يهتم فيني ويخاف علي واذا زعلت منه يتنكد ويحاول يرضيني وماينام الا موسدني يده واشوف اني معجبته واشوفه يصبر على اخطاء كثيره مني ؛ صح تصير بيننا مشاكل حالنا حال اي اثنين بس مايغير بمعاملته معي ؛ زوجي ملتزم يذكرني كثير بالله حتى اذكارنا نجلس مع بعض نقولها صبح ومساء زوجي يشتكي من كثرة الديون وانا عارفه اسباب دينه
البنك ياخذ القسط ويبقى من راتبه 500 ريال 
500 وش تسوي هل يوفر منها للايجار والا يصرفها على اكلنا والا اذا احتجنا صيدليه والا بقاله والا بنزين سيارته والا شحن جوال والاشياء الكثيره الثانيه
نصرفها ويتسلف وبعد6 شهور جاء وقت الايجار مامعنا ريال واحد يجلس يرسل لأخوياه واخوانه وخواته وعيال خالته ويحبس نفسه بالبيت عشان راعي البيت مايشوفه يقول محرج وش اقوله ويجلس يصلي ويدعي ويقرا البقرة ويستغفر طول الليل ويجمع من هذا خمسه ومن ذاك ألف وعلى هالحال ؛ وترى حتى الاكل ياالله نشري دجاجتين كل شهر وباقي الايام ناكل رز ابيض واذا ماشتهيته اجلس على غداي لين غدى اليوم الثاني
دايم ادخل قسم الطبخ واشوف الأكلات الرئيسيه والمعجنات والساندوتشات والعصييييرات والصووواني واحفظها عندي واقول متى تتوفر مقاديرها متى بسسس؛حتى بوحامي اشتهيت كبده موووت بس اتخيلها ماحصلت عليها اشتهيت وجبة من هرفي ماحصلت عليها بس اناظر بصور وجباتهم
إلين تراكمت عليه الديون وماقدرنا ندفع ايجار شقتنا وطلعنا منها
وجلست عند اهلي 9شهور
اهلي لوأطلب 50ريال قالوا ترى سلف ومتى ترجعينها مع ان الله منعم عليهم واذا طلبت غير الخمسين قالوا ترى  عليك قبل خمسين ريال متى ترجعينها هاه حددي والخمسين الثانيه متى ترجعينها ترى ترجعينهم مع بعض
اختي ماتشري الا ماركات وتقطهم في الدولاب تلبسهم بس مره ولاتعيد لبسها وحتى الشناط تشري غاليات وتنطلهم والجزمات نفس الحكايه شرت وحده بي300 ريال وطلع فيها مثل الحديده تجرح رجلها وقطتها 
وانا ماعندي جزمات واخذتهم ألبسهم واحط كيس بيني وبين الجزمه عشان ماتجرح رجلي ولبستها يمكن شهر وفجأه ادورها مالقيتها 
وشفتها مطلعه شناطها برا الغرفه قلت لها ماتبينهم قالت لا
قلت باخذهم اغير فيهم وعطيني من بلايزك اللي ماتبين
قالت خير ان شاءالله انا ادفع وانتي تلبسين بلاش وقالت حتى الجزمه رميتها بالزباله 
والحين زوجي استاجر شقه في السطح وواحد يقرب له شرى لنا غرفة نوم ومطبخ صغير لأن القديم متكسر 
ورحت معه شرينا لمجلس الحريم ارخص شي
واهلي طول الوقت يتطنزون تأثثون قصركم وكيف ماقدر يأثث باقي الشقه 
يعني حنا بنسكن بس بغرفة نوم ومجلس حريم يعني مجلس الرجال والصاله فاضي مافرشناه مامعه شي والثلاجه خربانه 
ويقولون بعد بتصبرين على ثلاجه كل شوي تخرب ماقدر يشري لك ثلاجه
وبديت اكرهه مع انه شاد حيله وحتى والله  عطر واحد ماعندي ولاكحل واستشواري خربان ونفسي اشري لي لوشن وعطر قبل ارجع له ونفسي بجامه شتويه وبلوزة والا فستان اقابل فيه الناس ودي بالصيدليه حتى جلال الصلاة شاريته من ايام اتقضى لزواجنا ومتنتف ومتقطع وعبايتي اقسم بالله فيها قطع من فوق انا يااخواتي ماطلبت منه شي غالي ماطلبت عطر ابو300 او500 ولا ابي بلايز كثيره بس بلوزة وحده وفستان واحد رخيص او قماش افصله وجلال صلاة مع سجادته لوتجي امه او اخته بيصلون وش اقولهم حتى طوفريات وطقم ترامس قدام الضيوف ماعندي ولوجوني اهله او اهلي او الجارات وش اسوي حتى سفرة القهوة ماعندي 
وهويقول يابنت الناس اهم شي نجتمع كرهت ظروفه وفقره استغفرالله
حتى تعليقات اهلي كرهتها؛ على فكره انا ماعمري قهويت وحده ولااهديت لانفاس ولاعروس والناس تلومني وهم مايقبلون الهديه البسيطه
النفاس عندنا اذا عطيتيها اقل من200 ريال فضيحه طيب200 ريال مع حلا وفطاير سواء جاهزة او مقادير كم تكلف ؛صعبه على زوجي
يعني ايش اسوي اتطلق واحرم نفسي من زوجي عشان الفقر واغتني عند اهلي ؛ لان ابوي قال دامك بذمته مالي دخل فيك بس لوتطلقتي لك مثل خواتك
او اصبر على الجوع والفقر
وترى دورت وظيفه بشهادتي الثانويه مالقيت وانا باقي لي سنه ونص تقريبا واخلص جامعة
واسوني اخواتي وانصحوني اصبر او اتطلق واريح نفسي من هالعيشه