الواتس اب وصورة زوجي :(

السلام عليكم

كيفكم بنوتات ؟


كثر الكلام هالأيام عن الواتس اب والبيبي وغيرها من برامج المحادثة في الموبايل....

وانو تسبب مشاكل ووجع راس وانو صارت مكان للفشخره والمشاعر الكاذبة ووووووو...

وشفت كذا بنت حاطه انو هي متضايقة من لستتها ومن اللي تحط صورة ابنها او بنتها او زوجها

وانه تعبيرها عن مشاعرها هو نقص او فشخره او او او .....

كل شخص له وجهة نظر من هالموضوع واحترم كل وجهات النظر ومااستغربت ان كثير نزلو مواضيع

انو تغثهم اللي تكتب غزل او تحط صوره لقريب وانو هالشي غلط وانها ماتسويه بس تراقب وبعضهم

يقولو حذفناه من هاللي قاعد يصير ....

وانا احترم كل وجهات النظر بس بقول وجهة نظري بهالموضوع ....

أنا اعتقد ان هالثقافة جديدة علينا ثقافة شرح الحالة والتعبير عن المشاعر ... طبيعي تستنكروها بالبداية

بس تراها عادة صحية للتنفيس والتعبير الصحي وتقرب العلاقات وتقويها للي يستخدمها بإيجابية.

مجتمعنا تعود على الكبت كبت المشاعر وكبت الأفعال وربط هالتعبيرات الايجابية عن المشاعر بالعيب والجنس وانها لازم تمارس بأماكن مغلقة مثلها مثل الجنس... :icon29:

وانو الزوجه المفروض ماتعبر عن مشاعرها ابدا امام الناس لزوجها او غيره وخصوووووصا زوجها.

وانو اللي تسوي كذا هي انسانه فيها نقص او مريضة نفسيا او زوجها معقدها واهلها تاعبينها او خاليه من الحياء ... :icon30:

فتشوفي الوحدة لما تبوس زوجها او تحضنه وتسلم عليه امام الناس بعد سفر سووها مصيبه وانها ماتستحي .

وانو اللي تعبر عن مشاعرها انسانة قليلة تربية والمفروض ماتعبر عنها الا في مكان مغلق خال من الناس...

بس

انا من وجهة نظري ان الواتساب والبي بي هي برامج ايجابية جدا لمجتماعتنا...

عند الأجانب العلاقة بين الزوجين في العادة اقوى من العلاقة بين الزوجين هنا ... لاتقولو شوفي كثرة

العوائل عندنا وكثر الأبناء الغير شرعيين وقلة الزواج عندهم ... انا ماني بصدد هالموضوع :ohplease:

انا بصدد انو الأجنبي قليل يتزوج الا اذا متأكد انو راح يبذل كل مشاعره لزوجته وهي كذلك فتلقيهم

طول الوقت يعبرو لبعض عن حبهم امام الناس يقعدو مع بعض طول يومهم لأن الزوجه عندهم

تبذل كل مشاعرها لزوجها ولاتأبه لأحد ...

هنا كثر الطلاق واذا اتزوجو نادر الزوج يقعد في بيته نادر مايعبر عن مشاعره نادر مايكون رومانسي
لأن زوجته كل شي كل شي عندها عيب بعيب...

عبري عن مشاعرك لاتكترثي بأحد استغلي كل شيئ لتعبري لزوجك عن حبك سواء برامج موبايل

رجوعه من سفره ابعدي الحياء عن طريق زواجك فالحياء للبنت الغير متزوجه ولغير زوجك

اما زوجك عبري له اشبعيه بالمشاعر وبالأفعال....

أنا افرح لما اشوف وحدة تغازل في زوجها او تبين له حبها او تتقرب منه عن طريق الواتس اب او غيره ومااشوفها قلة عقل او قلة حياء ...

هي اجمل ثقافة دخلت علينا من الاجانب الى الان ثقافة شرح الحالة والتعبير عن نفسك ومشاعرك.

واستغرب جدا من اللي تتضايق بس بعد استنكر اللي تقط نغزات وتتكلم عن احد وتلمح له وتذكر عيوبه

على الملا هاذي هي اللي اعتبرها نقاصة عقل ..

استخدموا الواتساب وغيره من الماديات او المعنويات لجذب طاقة ايجابية لحياتكم ...

واللي راح تقول انتي تحطي عن زوجك بالواتس اب اقولها انا احط عن زوجي واخواني وبنتي وابوي
وامي وصورهم بعد وينبسطون ويعلقون وزوجي يتشقق من الوناسه ...


ارجو تقبل وجهة نظري :) :26: