الى كل من جابت توأم

أنا يا أختي ولدت توأم

ما بدي أحبطك لكن اول الايام راح تكون صعبة وملخبطة جدا

الوقت ما تقدري ترتبيه يعني ترضعيهم وتنامي وقت نومهم وتحممي وتغيري يعني لازم زوجك يكون حاسس انك في وقت حرج وصعب ويعذرك

انا كنت ارضعهم طبيعي وصناعي يعني ارضع وحدة طبيعي والثانية صناعي والرضعة اللي بعدها اعكس

كم رضعة صعب احدد لكن انتي وقت ما يجوعوا رضعيهم ولاتمشي بوقت او زمن معين

تنظيم النوم صعب في البداية الى عمر 6شهور تقريبا لما تبداي تاكليهم

على فكرة انا بكرية مثلك وولادتي كانت قيصري وبصراحة انو اول ماولدت ماكان في وقت اهتم بنفسي لكن انت حاولي وقت النوم مثلا وزوجك نايم اخرجي برا ورضعبهم وحطي قناع او حتى كريم مرطب وممكن خلطة السودو كريم انا حسيت انا فادتني

وجسمك لاتعملي اي رجيم حاليا لكن حاولي تبعدي عن الرز والعيش او قللي منها واشربي سوائل كثير وخاصة وانت بترضعي

وتعرفي انا كنت اعطيهم عسل رغم انو الاطباء يقولوا موكيس قبل السنة لكن انا سالت دكتور استشاري وقال اعطيهم لكن مو عسل اصلي لانو حار لكن عسل الشفاء او عسل لانجنيز كنت احطه في اللهاية اذا حسيت انهم بيدلعوا

وكنت اسوي في الرضعة الصناعية الاخيرة الحليب بموية التمر

وطبعا اذا عندهم غازات ابعدي انت عن مسبباتها واعطيهم يانسون مغلي محلى بالعسل او حطي ملعقة كمون مطحون وزيها هيل مطحون وحطي لها موية شوية مو كثير وحليها بالعسل

هذا اللي افتكره واي سؤال انا حاضرة

انت لك كم والدة؟

طبيعي والا قيصري؟

كملت 9 شهور؟

شكرا اخواتي الله يعافيكم
اختي ام التوأم انالي 20 يوم والده وولدوني في نص التاسع من غير مايجيني طلق عشان المويه قلت عن الاجنه وكانت قيصري وابغى اسألك متى سويتي رياضه وكيف شكل بطنك مع العمليه ودي احط زيوت على بطني بس اخاف على العمليه

لوحة مفاتيح
انتم السابقون ونحن اللاححقون هههههه
حرام والله شفقانة عليكي ربنا يعينك على تربيتهم بعد كم شهر الحق بيكي واخبط هون وهون
انا حامل لاول مرة بتوم يعني بكرية
بس بالنسبة لعدد الرضعات بالبداية اعطيهم كلما بكيوا او جاعوا وبعد شهرين يصير تنظمين كل ساعتين تعطيهم ...على كل اتاكدلك واكتب لك .....على عيني ...ترى انا الي عندي بنتين وحاطة عيني على اولادك.....ههههههههههههههه

يوه 20 يوم لسه بدري عليك ياجميل

الرياضة بصراحة مانتظمت عليها وندمت لكن انت تسالي طبيبتك احسن انا قالت بعد شهرين رياضة عادية والبطن لا بعد 4 او 6 شهور للبطن ما اذكر تمام

هذه الفترة اهتمي بالمشي امشي كثير وحاولي تشفطي بطنك للداخل

شكل بطني كيف؟ مافهمت سؤالك

الزيوت مدري بس انا كنت احط كريمات قبل منطقة العملية وطبعا ما اقرب العملية ابدا

مرحبا..الحمد لله على السلامة و مبروك النونوات..و الله يعينك و يسهل عليك في تربيتهم..
أنا عندي توأم بنات و بكرية..عمرهم سنة و شهر و ما شاء الله عليهم..و كنت أول خمس شهور من ولادتهم بدون شغالة..لوحدي يعني..ساعدتني الوالدة أول شهرين وبعدها خلاااااااص!!!!!!!!!
أنا ولدتهم طبيعي ولله الحمد..و ما رضعتهم صناعي بشكل منتظم إلا بعد 4 شهور..شوفي صراحة أنا جربت كل شي..ما في أحسن من تنظيم الوقت معهم..و خذيها نصيحة مني...أول أيامهم كنت مركزة على الطبيعي عشان أفيد لي و لهم..و راح ألخص لك أهم القواعد اللي لازم تراعينها بالترتيب عشان صحة أكثر و ازعاج أقل و نوم هانئ و فضاوة لك أكثر!!
1- الغيار أولا و ترطيب بشرتهم و تمريخها على الخفيف بزيت زيتون صباحاً و زيت سمسم مساءاً
2- احكام لفهم بالكوفال أو الشرشف اللفة و ربطهم بربطة خاصة فيه عشان تلم أطرافهم تفادياً لحركتها المفاجأة اللي تصحيهم
3- الرضاعة، 6-7 رضعات حليب + رضعة أعشاب..رضعات مشبعات كل ساعتين و نصف-3 ساعات..
4- التجشؤ (افراغ الهواء من المعدة بالتربيت على ظهروهم أثناء وضعهم على الكتف و هو الوضع الآمن و الأفضل أو تنويمهم على بطنهم) و ذلك مرتين في منتصف الرضعة و في آخرها
5- تعويدهم على ترنيمة خاصة بالنوم.. أغنية، هز، تربيت... لخلق أجواء عاطفية للنونو ولتفادي صحواتهم المفاجأة و التنكيد!!!!
6- وضعهم بعد الانتهاء من النقاط الخمسة السابقة في هزازة أو جلاسة أو سرير وعدم حملهم إذا كانوا صاحيين أو السير بهم أو هزهم طول الوقت..و انما التكلم معهم و المناغاة و يجي دور النونو الثاني!!
7- دورك انتي..في النهار حاولي تخلصين أشغالك..خذمي حمام في الصباح..و اهتمي ببشرتك..و في الليل ناااااااامي

هذي النقاط بالترتيب تعودي تسوينها بسرعة للنونو الأول و بعدين للثاني و في الأخير انتي...

الحذر، الحذر من الرضاعة العشوائية المتقطعة و غير المشبعة..و مراعاة وضعهم بشكل مائل سواء في حضنك خلال الرضاعة الطبيعية أو على الجلاسة أو السرير خلال الرضاعة الصناعية تفاديا لرجوع الحليب خلال المجرى التنفسي و التسبب بإلتهاب. وكان كل نونو لها صدر مخصص للجنب اللي ترتاح له و كمان للحلمة اللي تناسبها!! (تصدقين دلع البنوتات كيف)!!!!!!! و بالمرة عشان يتصرف الحليب من كل جهة و يدر بشكل متساوي..مو تركزين على واحد و تتركين واحد..قبل ساعتين و نص لا ترضعين أبدا طالما هم شبعانين..انتبهي لو جننوك من البكاء..لان لو رضعتي قبل ما يهضمون الرضعة الأخيرة بيجيهم مغص و بيغثونك أكثر و يجننونك أكثر..فرضعيهم رضعة مشبعة و ارتاحي..اذا بكوا لهيم بلهاية..هزيهم...كلميهم..نغي لهم...
---إذا كانت رضاعتهم صناعية فخليهم في جلاساتهم الهزازة أو أسرتهم، لا تشيلينهم و ترضعينهم في حضنك عشان ما يتعودون و يبلشونك مع بعض، ضبطي لهم الرضّاعات (حطي تحتها حاجة تسندها) بشكل مائل على جنب شوية عشان ما يشرقون..و انتبهي تروحين عنهم أو تنشغلين بعيد لأن البيبي في هالعمر يشرق بالسوائل كثير و يضيع نفسه في الشرقة و يتوفي لا سمح الله..و لا تنامين عنهم..انتظري لين يخلصون و سوي لهم النقطة 4!
---رضعة الأعشاب..يانسون و كراوية مخففة بسكر نبات..أفضل شي، يوميا..بعد ما يخلصون شهر..رضعيهم حلبة + يانسون + كراوية و ذوبي فيها رطب أو تمر مع سكر نبات مرة مفيدة لهم..و أخر رضعة في الليل رضعيهم حليب رضعة مشبعة عشان ينامون و تنامين مرتاحة....إذا صحوا علي الثنتين مع بعض كنت أغير لهم بسرعة مع بعض و أرضعهم طبيعي مع بعض!!!!!!!!! أحطهم بوضع X ..أدري ممكن مقرف الوضع و صعب بس كان يريحهم و يريحني...بعد ما كبروا و صعب علي أرضعهم مع بعض..صرت أحط وحدة في الجلاسة و أضبط لها الرضاعة و الثانية في حضني ترضع طبيعي..و المرة الجاية أعكسهم..
..

حاجة مهمة..مع الوقت انتي بتعرفين كيف يشبعون من الرضعة..لما يدفعون الحلمة بلسانهم لبرا..و بتعرفين الوقت اللازم..و لازم تنتبهين إذا صدرك يدر حليب كثير..أهم شي في الإدرار إن كثرة الرضاعة هي اللي تحرض على الإدرار مهما تنوعت طرق الإدرار من شرب سوائل و مرق و حلاوة طحينية و غيرها..أفضل شي رضعي كثير..يدر حليبك كثير!!! ..الأهم في رضاعة النونوات..انه في نص الرضاعة تشيلينهم على كتفك و هيئهم للتجشؤ و راح تسمعينهم يطلعون صوت!! و كملي رضاعة عشان يشبعون..ولما يشبعون مرة ثانية سوي لهم تجشؤ..عشان ما تعورهم الغازات..و ينامون و هم مرتاحين و شبعانين و نظيفين..و ما في أحسن من نومتهم كذا!!!
لما يصير عمرهم شهرين زيدي كمية الحليب و الأعشاب..120 ملل..و لاحظي دائما الكمية اللي تشبعهم..بعد أربعة شهور ابدي حطي الحليب الصناعي نص الكمية في الرضاعة + النص الباقي كمية سيريلاك بالقمح..مرتين في اليوم (و بعدين زيدي المرات إذا لاحظتي انهم حبوه)..مرة في النهار و مرة قبل النوم عشان تشبعهم..و اذا لاحظتي انهم يعانون من امساك أو مغص..خففي كمية الحليب الصناعي..يعني لا تعبين الملعقة تماما + كمية الماء المعتادة و بتلاحظين طوالي انهم ارتاحوا..

أنا وقتي كان بعد رضاعتهم..تعودت أسوي كل شي بسرعة...اهتمي بغذائك الحين هالفترة و بالرضاعة لانها أفيد شي لك..و الأقنعة و الزيوت خليها وقت ما تخلصين من رضاعتهم..و حاولي في الليل تنامين معهم و في النهار تسوين اللي تبغين وقت نومهم..كنت كذا و كانوا ماشين معي تقريبا مثل الساعة..تعبت و انجنيت في البداية بس استقريت على التوقيت بالساعتين و النص و 3 ساعات و ارتحت..بتتعبين الله يعينك في البداية بس ريحي نفسك من الآن و سوي اللي قلت لك عليه..

بالنسبة لنومهم..ترى كل بيبي و طبيعته..عادة ينامون كثير أول ما ينولدون..و ينامون مرتاحين إذا كانوا نظيفين و شبعانين و بطونهم مافيها غازات أو مغص..و إذا لاحظتي إن البيبي له وقت في اليوم ما ينامه بالرغم من إنك سويتي النقاط اللي قلت لك عليها و ما يعاني من شي..حاولي توقتين لهالصحوة في النهار..أو في المغرب..عشان بعدها يريحك و ينام كثير في الليل و ما يسهرك..و صحيهم مع بعض و نوميهم بعض..لا تخلين كل واحد له وقت..بناتي جننوني في البداية إذا نامت وحدة، صحت الثانية و أنا حارس طول اليوم!!.. لما يجون على ثلاثة-اربعة شهور يا حليلهم بينامون 4-6 ساعات متواصلة و ترتاحين أكثر...بس ادرسي نومهم زين...و بالنسبة لك انتي بتلاقين بعد شهرين تقدرين تلحقين على نفسك..لأنك تعودتي على الوضع و صرتي أسرع ..أما قبل كذا بيكون خفيف اهتمامك بنفسك..
لما تجين تحممينهم..خلي حمامهم في الليل عشان ينامون أكثر و ترتاحين...

و عذرا على الكلام الكثير..بس حاولت أعطيك خلاصة العذاب اللي شفته بعد تجارب كثيرة معهم عشان تريحين راسك من البداية!!!!!!!