اليكم تجربتي في انقاص وزني من 120 كلغ الى 76

السلام عليكم
كيفكم بنات ان شاء الله تكونو على خير مايرام المهم راح ادخل في الموضوع على طول
انا في يوم من الايام رحت للمستشفى عشان المدرسة طالبين فحوصات وزي كدة وسويت تحليل والطامو ان طلع فيني سكر لا ومرتفع عندي كمان وانا وقتها لم اتجاوز الثامنة عشر من عمري شفتو الكارثة
المهم قست وزني عند الدكتور وطلع 115 كلغ وقالي لازم تنحفي وتوصلي على الاقل للتسعين عشان السكر يتعدل معي واعطاني ادوية وصرت اراجعه كل شهر تقريبا مرة وخففت من اكلي ورجعت بعد شهر وقست وزني لقيته 112 فرحت بعدها جات الاختبارات مع العلم ان نظامي ماتغير هو نفسه ورحت عنده ولقيت وزني 120 كلغ اتفاجأت قلت في نفسي ايش هذا بدال ما ينقص بسبب الاختبارات والمذاكرة يقوم يزيد وقتها انقهرت مررة وصممت اني انقص وزني وقتها جات الاجازة الصيفية وكان في الرابح الاكبر الجزء الاول وقلت في نفسي والله جاء في وقته وسويت تخفيف شديد مرررررة وقاسي يعني مثلا الصبح اشرب كوب شاهي حليب بعدين الساعة وحدة الظهر اكل برتقال وتفاح وفي الليل اهلي يغصبوني اكل من الاكل اللي ياكلوه وانا ما اخذ منه الا ربع سندويش
ورياضة في البداية كنت اسوي نص ساعة جري ونص ساعة مشي يعني ساعة كاملة
وقست بعد اسبوع ولقيت نفسي نزلت كيلو واحد بعد كل هذا التعب وبعدين غيرت رجيمي وخليته اول ما اصحى من النوم اكل زبادي مع ربع خبز بس واذا جعت مررررة اشرب لبن او اكل كريم كراميل ماكنت اعرف عن الرجيمات اي شي واحيانا اخرى اخبص وزودت وقت رياضة خليته ساعتين جري لاحظو معي جري وليس مشي ونص ساعة تمارين لكل الجسم ونقصت في 3 اشهر 15 كلغ وصار وزني 105 وخلصت الاجازة الصيفية ورجعت المدارس والبنات لما شافوني انبهرو قالولي اني مررة نحفانة وطبعا ماقدر استمر على رياضة والرجيم بسبب انشغالي مع المدرسة صرت اكل من اكل البيت بس تخفيف كتير عشان على الاقل احافظ على وزني ومايزيد والحمد لله نقصت 10 كيلو لمدة السنة الدراسية واحيانا اذا فضيت اسوي رياضة وصار وزني 95
على فكرة انا وزني مرررررررررة عنيييد بشكل ماتتصوروه عشان انقص 5 كلغ في شهر لازم رجيم قاااااسي ورياضة قااسية عشان انحفهم
نرجع لموضوعنا خلصت السنة الدراسية وجات الاجازة مرة تانية وسويت نفس اللي سويته في الاجازة اللي راحت ونقصت وزني الى 83 ورجعت المدارس مرة تانية وخلال السنة الدراسية نقصت الى 76 وبعدها اتخرجت من الثانوية وصديقتي عزمتني على زواج اختها على فكرة صديقتي ما شفتها من ايام المتوسط يعني 3 سنين ماشافتني ولمن رحت للفرح طبعا كنت في كامل اناقتي والله يا بنات ماعرفتني تقو اتغيرت 360 درجة تقول حتى ملامحي اتغيرت وصرت مررة حلوة وكنت وبدون مبالغة ولا مدح في نفسي نجمة العرس كل الانظار موجهة اليكلهم يبتسمولي وكل وحدة تبى تجي وتتعرف علي كنت مرررة حلوة هو في الاصل ملامحي الحمد لله حلوة على كلام الناس حتى اخوها طالع كدا في الصالة النسائية لانه يبغى ينادي اخته اللي هي صديقتي وطالع بدون مايقصد وصديقتي قالتلي ان قالها هذه هي صديقتك اللي تتكلمي عنها ردة عليه وقالتله ايوة هذه هي وبعدين قالها ماشاء الله مرررة حلوة ماتوقعتها حلوة كدا قامت ردت عليه وقالتله يا قليل الادب ههههههههههه ياحليلهم
كانت عزيمتي ماشاء الله اقوى من الحديد وكل اللي يشوفوني من اقاربي يقولو معقولة هذه انتي
وبعضهم ماعرفوني احلفلهم انه انا وماصدقو يمكن يابنات تقولون في انفسكم 76 ملغ مو نحيف بس ارد عليكم واقولكم اني بالنسبة لجسمي نحيف لان عظامي ماشاء الله مررة عريضة حتى وانا دبة باينة
وطولي 159 سم
ويافرحة ماتمت بعد تخرجي من الثانوية اصبت بكابة شديدة وصرت اكل كتييير ونفسيتي مررة تعبانة الين ماصار وزني 95 كلغ ودحين لي شهور اسوي تخفيف وقدرت انقص 6 كيلو وصار وزني دحين 89 كلغ
والسبت الماضي بدأت برجيم اللقيمات اللي في الفطور تاكلي سبع لقم والغدا والعشا نفس الشي والحمدلله احس وزني قاعد ينقص ادعولي بنات اني انحف واوصل 60 على الاقل
ترى صارلي سنتين من بعد مازاد وزني احاول انقصه ومو راضي ينقص ابدا وماخليت شي ماسويته حتى رجيم التمر واللبن لمدة اسبوعين مع رياضة مشي ساعة ونص ومانزلت ولا كيلو واستخدمت خلطة محد مثلي انا لمدة شهرين ولا في اي نتيجة وحت للحج ومشيت كتيييييييييييير في الحج مع اكل الفواكه وعلى بالي اني لمن ارجع من الحج الاقي نفسي ناقصة على الاقل كيلو واحد بس المفاجأةمانقصت ولا ربع كيلو تقول عين واصابتني ومع ذلك ماراح استسلم ابدا وراح احاول واحاول الين ما اوصل لهدفي
اسفة بنات ادري اني طولت عليكم بس حبيت اقولكم ان اللي تبى تنحف راح تنحف لو تبغى هذا الشي بيدكم انتم لازم تحاولو وماتيأسو ابدا
الله ينحفنا من غير شر قولو يابنات اميييييين
ملاحظة السكر خف كتير عندي والحمدلله وهذا بفضل ربي:27: