امانه بنات بنتهي ساعدوني الله يسعدكم دنيا واخر..تنمر وقباحه..

سلام لجميع الجميلات..انا عضوه جديده بالموقع بدخل على طول بالموضوع..انا بنت بالثانويه حديثة بالسن..اعاني من اكتئاب وتنمر جميع زميلاتي بالمدرسه بسبب شئ يتطلبه المجتمع هذه الايام..الجمال..استنوا استنوا قبل ما تحكمون علي اقراو للاخير رجاء.. انا من يوم كنت صف سابع واعاني من تنمر الكل القاب بشعه اطلقوها علي سخرية قدام الملأ سواء من شعري او بشرتي او حتى..جسمي.. انا اؤمن انه ما فيه بنت بشعه(قبيحه) بس فيه اللي ما تعرف تهتم وانا وحده من هذا النوع بالابتدائي كنت بيضا على وردي زي السوريات صافيه نضره..كان شعري اسود طويل وناعم ولامع واهم شي كنت نحيفه وبشرتي كلها لون واحد من راسي لاصبع رجلي -الله يعزكم- دخلت المتوسط وشفت البنات كيف قصات وحركات وقصيت شعري بالاول عجبني بعدين تورطت ما اعرف اسرمك ولا استشور كنت وقتها 11 سنه بعدين شوي بدات المسام تطلع ووزني زاد شوي وبشرتي مااعادت موحده وكل النعم اللي عندي اختفت وعانيت من التنمر من جميع الاطراف كانوا يسخروا مني قدامي ويقولولي ليش ما تهتمي صابني اكتئاب لانه زي اي بنت في سن المراهقه والبلوغ كان يهمني اكون مثاليه بعدين قلت مو مشكله يا بنت ركزي بدراستك وبالعطله نلقى حل تخرجت من المتوسط بنسبة ممتازه جدا وطالعت بنفسي وقلت اربع شهور بتحل كل مشاكلي وصرت من خلطه لخلطه ومن زيت زيت ومن صابونيه لكريم لكل شي النتيجه صفر!! انتهت العطله الصيفيه بالاول من سبتمبر وانا ما تحسنت الا نتفه..وصرت بالثانويه السنه هذه ولسه المشكله ما انحلت ولا شي انحل شعري باهت ولكتفي ومو ناعم لدرجة اني علقت على تسريحه وحده بشرتي انواااع الدمار جسمي ترهل والوان عديده وندبات فرق لون وجهي عن جسمي فررق فظيع حتى شفايفي اللي كنت مشهوره فيها انها ورديه منفوخه ورطبه صارت متشققه ولون اللي فوق غير اللي تحت..طبعا ما وقفت وخسرت ثلاثه كيلو من وزني بس باقيلي 2 او 3 كيلو واوصل الوزن اللي ابغاه.. والله يوم اشوف بنات شعبتي اتحسر كلهم جميلات ومهتمات شعر وجسم وبشره انا لا..الكل يقولي المهم جمال الروح بس سامحوني هذا مو صحيح حاليا مهما كانت اخلاقك -الحمدلله اخلاقي بشهادة الجميع رائعه الحمدلله- ما حد بيقول يااه شوفوا طيبة قلبها بيقولوا بالطابور ياه شوفو شكلها كيف وكمان عندنا وحده من الابلات دايما تتكلم عن الجمال وانه مهم وانه لو ما كنتي جميلة المظهر ماحد بيصاحبك وهي صادقه وعن تجربه...ابغى اقولكم اني بس ابغى اصير حلوه ما ابغى اطول شعري لانه لو طولته راح اقصه بس ابغاه ينفرد ينعم ويصير لامع ابغى بشرتي تصير لون واحد -جسمي نفس وجهي قصدي- ابغى التشقق والجفاف يختفي وبشرتي ابغاها تصير جميله حلوه لبنت بعمر 14 سنه الله يسعدكم لا تردوني والله لو انكم معي وتشوفوا كيف البنات يتريقوا علي جد بتنقهروا امانه لا تنطشوني واوعدكم لو وصلت للي ابيه لاعلمكم كل اللي سويته وما بكون نحيسه واخبي والله لادعيلكم باللي تبون بس ساعدوني متاكده بنات حوا ما بيخيبوني واثقه فيكم كل الثقه بعد الله سبحانه وتعالى ورجاء اللي عندها كلمه فيها تجريح لا تذكرها لانها ما بتعرف قد ايش بتجرحني..والسلام ختام..