امثال شعبيه

السلام لكل الاحباب * اقلطوا وسكرو ا الباب

هلا والله ومرحبتين انا بقول لكم الليله عن امثال وحكم شعبيه كانت تقال في قديم الزمان وبعضها الى الان وهو دارج قولها
هذا المثل الاول بصراحه هذا المثل اطلق على بنتي قبل اسبوعين :35: وكانت اول مره اسمع فيها هالمثل وهو ينقال للبنت الي مدلعتها امها ويا حرام مالقوا الا بنتي يقولون اني مدلعتها
والمثل الله يسلمكم هو
البنت برمه ان ما هبطت جاشت
ولا تسألوني وشلون برمه لاني سألت عنها قبلكم وماعرفت معناتها بس المقصود من المثل ان البنت لازم تهبط يعني تهاوشونها مهوب تتركونها على كيفها

اما المثل الثاني فهو
يدربيها السيل وتقول ديمه

هذا يقال للي ما تستوعب الا متأخره يعني المثل يقول يدربيها السيل بمعنى ان السيل يمشي لدرجة انها تدربت منه وهي مااستوعبت وتقول ديمه يعني رشة مطر

وفيه ثاني بعد بس للبنات ياحرام البنات دايم ماخذين نصيب كبير من الامثال والدعاء عليهم :( والمثل يقول
البنت مالها الا الستر ولا القبر

وفيه مثل يقال لأخذ الحذر والتوقي ( حلوه التوقي هذي توني لاقطتها من الوقايه هي الغايه :42: )
المثل يقول
ولم العصابه قبل الفلقه
العصابه مهوب قصدهم الحرميه الحين تروحون تجمعون لنا حرميه قبل الفلقه :29: لا العصابه يعني الي تلف على الراس اسمها عصابه

وفيه مثل يقال للي لا يمكن يغير طبعه وان الطبع متأصل في الواحد المثل هو
حدر جبل ولا تحدر طبع
ومعناته ان تغيير الجبل اسهل من تغيير الطبع

وللي على باله بسوي حركات بس ما يعرف يقال له المثل التالي
بغاها طبه وصارت طيحه
هذا يعني على باله يبي يطب وطالح وبلشنا به

وفيه مثل يقال للعين الله يكفينا شره والمثل هو
حدجة بدجة تلحق الخاطف في الدرجه
هذي والله ماعرفت مفرداتها انا عشان اشرحها :D بس الزبده انها تقال للعين

ووهذا المثل يقال للي يحقر اشياء صغيره
جحور الفيران تطيح فيها الثيران

وعندي هنا امثال سريعه بقولها بدون شرح لانها سهله بس لا تهملونها يمكن تجيكم في الاختبار
:05:
الامثال هذي هي
حرك تبلش
جد البقره ثور
حركة بلا بركه
بشر العيال بجوعة امهم

هذي الامثال تراها متعوب عليها لا تحسبونها جاهزه تراني من الساعه 8 وانا اسأل لكم عن امثال شعبيه وارسلت تعميم لكل الفروع عشان يسعفونا :05: