امس وانا جالسه في الحوش في امان الله ((( بس لا تضحكون)))

السلام عليكم يابنات



اقول لكم القصه بس لا تضحكون ((( اتحطم نفسيا)))
المهم
وانا جالسه امس في الحوش بامن الله وممده كرعاني ((( اسم سعودي لسيقان ومفردها ...كراع))) كأني رقيه اللى في طاش ماطاش
واشرب في ذا القهوه واكل من هاالتمر كأني مكنسه
ومشغلة خلف بن هذال يشعر على راسي كأني شيخه (((شيخه والسبعة انعام ....قولو امين)))

ورايقه محدن قدي

المهم والا اسمع


مييييييييييو


وان اقول وووووووشششششششووووو



والا اسمع ميييييييوووو ثانيه



وانا اقول وش مييييييوه



وترجع مييييييووووو


انا اقول وششششششوووووو
وهو يقول مييييييووووو


كأننا شاعرين انا اقصد وهو يرد


واقوم اتلفت والا ذاك القطو اللى كأنه بقره من كبره
وعيونه خضر قطو امريكي موب سعودي
قطاوت السعوديه عيونها سود
هاذا عيونه خضر
ذا القطو مهاجر من امريكى لعندي يامال الصمرقع على راسه
واقوم انظر عله يستحي ويضف وجهه
والا قام يخزني بعيونه
يمال عيونه الفقع ((( والله نفس في فقع باقول لبو الشباب يجيب لنا )))
واقوم وارميه بفنجان القهوه يلف عنه برشاقه
واقوم ارمي عليه الدله ويلف
حشا ذا موب قطو ذا راقصة باليه
المهم وانادي سمسمه ((( شغالتي مسميتها سمسمه اسمها صعب النطق مااعرف له ...فيه حرف الباء.. و القاف ..والسين,,,والصاد,,,والتاء,,,والخاء...واواو...والالف...والزاي ...واشين...والحاء...ونون...والميم )))
المهم اسمها ماعرف له وناديتها سمسمه
في بادا الامر زعلت وبعدين رضت
المهم ناديت سمسمه
وقلت لها شوفي صرف مع راقصة الباليه
المهم سمسمه قامت تحلطم وهي زعلانه
وبدت حرب البسوس والسمسمه
وتعالو شوفو سمسمه وزمجرتها على القطو تقول هولاكو عندنا
وبعد الطاخ.... والبيخ.... والطع ... والفرقع ... انتصر هولاكو ...قصدي سمسمه وهرب القطو الى غير رجعه
وبعدها كبرت سمسمه في عيني

ودمتم سالمين