امي ترفض زواجي في زمن الفتن! (رجل)

السلام عليكم
في البداية حاب اقول ان هذي المرة الاولى والوحيدة اللي بستخدم فيها هذا الموقع, واحتاج استشارة من الجانب النسائي لأني ما اعرف شيء في هذي الامور الله يوفقكم
انا عمري 19 سنة ورجال ناضج عاقل اتحمل مسؤوليات
كنت موظف من اولى ثاوي الى الآن، واشتغلت في محلات كثيرة والآن مستقر في وظيفتي الى فترة طويلة في المستقبل ان شاء الله
وبما اني مستقر وظيفيا ووضعي المادي ممتاز جدا الحمدلله ومستقل ماديا كذلك شفت ان الزواج بيكون مهم جدا لي وما فيه اي داعي لتأخيره
بل العكس فيه دواعي لتبكيره, اهمها الزمن هذا والفتن اللي فيه, ما ابالغ اذا قلت ان اكثر من 80% من الشباب في عمري واصغر داخلين في علاقات وكثير منهم بدون نية زواج !
وحتى انا وانا بحالي تعرضت لي نوعيات من البنات استحي اقول وش كانت تعرض علي
والواحد ما يضمن نفسه الله يكفينا الشر, عموما فيه كثير اسباب تخلي الزواج ضرورة خاصة لواحد مثلي يتحمل مسؤولية بيت
واستشرت مستشارين تربويين ولما كلموني اشارو علي بالزواج بشدة
لكن المشكلة عندي امي... ما عرفت لها
لما كلمتها اول مرة قبل لما كنت متردد اكتشفت انها ماخذة صورة سيئة عن الزواج كله حتى وانها تشوف بعض اللي حولها تطلقو فتحسب اني بتزوج لعب بس واطلق بعدها... وانا هدفي العفة ورضاالله وتكوين اسرة
وقالت لي بالبداية انه الفلوس والبنت تبغى من يصرف عليها وممكن بعدها تبغى سيارة و و.. ولما بينت لها وضعي المادي والمبلغ الي مجمعه قفلت هذا الباب ثم رجعت تقول ما فيه زواج قبل 24 ومسكرة راسها مرة!
والمشكلة هي وابوي اكثر ما يخافون منه ويتأثرون منه كلام الناس فمرات ما يسوون اشياء مخافة ان الناس مممكن يقولون عنها شيء, وكذا كانوا لما توظفت يحسبو الناس بيستغربون انه كيف واحد طالب مدرسة ويتوظف وهو اهله حالتهم المادية ممتازة.. وبعدين لما جادلتهم ورضو شوي وتوظفت وعرفو الناس صارو الناس هم اكثر من يشيد بي ويثني ويقولون ما شاء الله محمد معتمد على نفسه وفاهم وصرت الافضل بين اقراني وصارو هم (ابوي وامي)فخورين بي بعد كلام الناس خاصة ابوي كان هو اكثر من يخاف كلامهم وبعدها ما خلى احد ما قال له من الفخر
فالمهم انا اساسا ارى الزواج شيء شخصي مثله مثل الوظيفة وغيرها المجتمع ما له علاقة, لكن ما ادري كيف افهم امي اللي ترفض انها تدرك الفتن اللي تصير برا, وحتى اللي تصير داخل بالجوال
والزواج في هذا العمر اذا كان الطرفين راضين وفاهمين بيكون افضل من تأخيره وهذا كلام الاستشاريين فشخصيتي بتكون متطابقة على شخصية زوجتي وقابلة للتغيير ومرنة بحيث نتناسب وهي كذلك عكس المتأخرين 25 وفوق يكونون خلاص تكونت شخصياتهم وافكارهم ثابتة ففعلا هذا اللي يرفع نسبة الطلاق
وانا الآن جازم على الزواج ولا شيء بيردني باذن الله لكن ابغى امي الحبيبة توقف معي ومو ضدي خاصة اني كلمت احد من اسبوعين ونسقت معه لخطبة.. الله ييسر
ساعدوني كتب الله اجركم