كلام مع نفسي
انا فعلا مريت بنفس المرحله دي
يعنى اول ما بديت ريجيم وكنت 120 كيلو التزمت واستمريت فتره كويس لغايه ما وزني وصل 88 وده كان في شهر مارس الي فات
طبعا كنت فخوره بنفسي جدا وشكلي اتغير ومعالم الانوثه بانت وبصراحه متهيالي انه صابنى الغرور
او الثقه الزياده يعنى قلت الطريقه سهله وعرفتها اعمل ريجيم ورياضه وراح انزل زي ما نزلت الي قبله وخاصه اني نزلت اكثر من 30 كيلو في فتره ثلاثه الى اربعه اشهر فقط
طبعا قلت خدي اجازه واخدت اجازه وسافرت مصر وده كان اول امتحان لي اني اسيب الريجيم واعيش طبيعي
والنتيجه اني سقطت عند اول امتحان
شفت المطاعم وخاصه مطاعم البرجر هارديز ومكدونلز وكنتاكي وجريت عليهم زي المفجوعه
قعدت في مصر اسبوعين وكنت يوميا اروح اكل من الاكل الدسم وارجع احلي بايسكريم
حسيت بفشل ذريع خاصه ان الي كانوا معايا كانوا بيقولوا لي حصل لك ايه انتى المفروض ما تعمليش كده وكلامهم زاد الطين بله
يعنى كانوا يرموا كلام عشان يصحوني بس انا كنت بحسه كلام قاسي وكنت باكل زياده عشان مش عايزه اسمع الكلام
كنت بقول انا حره وده جسمي واعمل فيه الي انا عايزه بس في الحقيقه ده كان هروب من الواقع وهروب من فشلي في مقاومه الاغراءات وهروب اكبر من نظرات الانتقاد
رجعت اليمن وانا وزني زاد شويه ورجعت 92 وقلت بس اربعه كيلو الحمدلله وانا كنت اني يمكن زايده 10 كيلو
بس رجعت وانا مش انا رجعت وعزيمتى مش زي زمان ورجعت واصراري مش زي زمان
ايوه رجعت للريجيم
ايوه رجعت للرياضه
ايوه نزلت الي زادوا
بس
الوضع غير يعنى نزلت لغايه ما وزني رجع 85 وبس
الكلام ده كان في شهر مارس واحنا الان في نهايه يوليو يعنى اربع شهور
ولو شفوتوا شريط الوزن تلاقوا اني 85
مشكلتى اني مش بطلت ريجيم ولا بطلت رياضه بس الي حصل اني تهاونت في الموضوع
اشد شويه انزل اثنين او ثلاثه كيلو وارجع الخبط يومين وازيدهم من تاني وارجع انزل وارجع ازيد
بقيت مثل الفار الي يلعب في الدائره الي بتلف يعنى بيجري بيجري بس مش بيوصل اي مكان
الناس كلها اتقدمت وانا زي ما انا
لا اني سبت الريجيم وخلاص ولا اني التزمت وانجزت حاجه
وعمري الي ضاع اربع شهور ضاعوا من عمري من غير فايده
يعنى المفروض اني خلال الاربع شهور اكون خلاص خلصت وبقيت في التثبيت بس الي حصل اني كنت اضعف من اني اتقدم خطوه
ايوه جواي خوف من اني اعرف انجز حاجه للنهايه
خوفي غلبنى واخرني عن الباقيين
وكل يوم كنت اجيب لنفسي عذر جديد
اقول النهارده ماعلش وبكره ابدأ من جديد
او اقول اليوم انا الجوع العاطفي غلبنى ومقدرتش امسك نفسي
او اقول لازم اكل عشان الجسم ما يثبتش
بس في النهايه السبب كان اني ماقدرتش اتحكم في نفسي وكنت افشل
بعدها بديت بموضوع الجوع العاطفي وبديت اعالجه حبه حبه ومن وقتها نظرتي لنفسي اتغيرت وبقيت افكر لبعيد
صحيح مازلت في طور المعالجه بس في حاجات كثيره اتغيرت
اولها اني قدرت ولاول مره اراجع شريط حياتي واعرف انا عملت ايه غلط
عرفت ان الناس مالهاش دخل في كوني انا سمينه
والناس مش حينفعها لا سمنى ولا رشاقتى
وان الي في الاخير راح يتعذب من السمنه هو انا
انا الي خسرت ثقتى في نفسي
وانا الي حملت نفسي الوزن الزايد
لا عرفت البس حلو
ولا عرفت احس اني جميله
وفي الاخر انا الي اتكويت بناري
ده خلاني اعيد النظر من جديد
خلاني ادور جواي عن السبب الحقيقي الي عشانه عايزه اتغير
دورت كويس واصبت باحباط لاني بجد ماكنتش عارفه انا عايزه اخس ليه
في الاول كنت عايزه اخس عشان ارضي شخص بحبه قوي
بس السبب ده جت عليه فتره مابقاش بيدي دافع لي عشان استمر
وبدال ما كان سبب يدفعنى للامام اصبح سبب يجرني لورا
لاني ربطت هدفي بشي متارحج وبتغير في اليوم الف مره
قريت مقالات كثير بتحث على البحث العميق عن الاسباب
ومقالات تبعث على الحماس والاستمرار
استفدت قوي وقلت اجرب اعمل زيهم
اخدت قلم ودفتر وابتديت اكتب مشاعري وابتديت اكتب يومياتي افراحي واشجاني وايه احساسي في كل موقف
ولاحظت اني مسيره بالحوادث اليوميه
اتضح ان الظروف هي الي بتسير حياتي ومش انا الي اتخد القرار
يعنى لو يومي كان جميل تلاقينى استمريت على الريجيم كويس بس لو يومي كان وحش ارجع اخرب كل حاجه
وده مربط الفرس
والدليل اني للمره الثانيه افشل في اني استمر على رجيم لان الظروف اتغيرت
جت سفره العمل ورحت جو مش مهيا لاني استمر في الريجيم
وغلطت وسبت كل شي واكلت زي المفاجيع
حوالي ثلاث اسابيع
الاسبوع الاول كنت بحاول قد ما اقدر اكل طبيعي وابتعد عن الحلويات
الاسبوع التاني بدأت اكدب على نفسي واقول عادي مايضرش
اما الاسبوع الثالث فدخلت في حاله لاوعي وسبت كل حاجه تروح هدر
في الاسبوع الاخراني زدت 5 كيلو
ورجع وزني 90 من تاني وكانك يا ابو زيد ما غزيت
طبعا في الاول مريت بحاله من الصدمه وكأن الموضوع ما يخصنيش وبعديها اصبت بحاله من تبلد المشاعر وبعدها احباط مزمن ودموع واتهام لنفسي اني فاشله وما انفعش في حاجه ابدا واني غبيه واني مش بستاهل اي حاجه جميله
ودي طرقتى في معاقبه نفسي اني انهال عليها بوابل من الكلمات القاتله واني اتهمها انها السبب في كل حاجه
وان هي الي وزتنى اكل وان هي الي عملت ده كله
يوميها بكيت من قلبي ، بكيت بمراره لاني مره بعد مره افشل في اول مطب يصادفنى
لاني لما ابعد عن جو الريجيم برجع لطباعي القديمه وارجع لكل حاجه سيئه انا عرفتها
لاني بعد المجهود الجبار الي بذلته ما زالت قطعه الشيكولاته او وجبه البرجر بتخلينى في حاله من اللا وعي
ده معناه اني عمري كله حقعد كده في ريجيمات
عمري كله حقعد ادور في حلقه مفرغه
عمري كله حكون امشي خطوه للامام وعشره لورا
فجأه حسيت كان واحد اداني كف على وشي وقالي اصحي
فوقي من الي انتى فيه
لحد امتى حتقعدي كده لا انتى طايله سما ولا انتى طايله ارض
ليه تخلي الناس يلعبوا بيكي وليه تخلي تصرفاتهم تمشيكي
انتى لازم تكوني الدافع والمحرك لنفسك وانتى الي لازم تاخدي بايدك للهدف
هم مش حينفعوكي ولا يضروكي انتى الي لازم تعرفي انتى عايزه ايه
يومها اخدت الدفتر بتاعي وكتبت كلام كثير عن نفسي وعن الناس وعن اهدافي واحلامي واهم حاجه اني قدرت لاول مره في حياتي اني اتصالح مع نفسي
نفسي مش عدوتي ولا يمكن تتمنى لي الشر ولازم ابطل اعتبرها عدوه
نفسي دي هي انا وهي احلامي وامالي وانا مش حتخلى عنها
انا دلوقتى بنحف عشان نفسي وعشان اوصل للرضى عن ذاتي
مايهمنش الناس ولا حيقولوا ايه
ولا يهمنى هم بيعملوا ايه
انا عايزه اخس عشان كاديا عايزه كده
عشان ارتاح واحس اني انثى بمعنى الكلمه
عشان احب نفسي واعشقها
عشان بعد كده الناس تحبنى وتحترمنى مش عشان شكلي حلو لا عشان انا حلوه وبحب نفسي من جوه وبره
وقتها فقت من الي كنت فيه فقت من غيبوبه دامت اربع شهور
فقت من الصراع الي كان شابط في ومش مخلينى اتحرك خطوه للامام
عملت خطه لنفسي وقلت لازم اتبعها ودي فرصتى عشان اثبت لنفسي ومش للناس ان انا قد كلمتى وان انا استحق احترامي لنفسي واستحق حبها وتقديرها
الناس دلوقتى مش مهمه بالنسبه لي لان الناس عمرها ما حتحترم واحد شخصيته ضعيفه انا محتاجه اني احب نفسي عشان الناس بعد كده يحبوني
وانا بقولها باعلى صوتي انا مش حسمح للناس تهزني من تاني ومش حسمح للظروف تلعب بي زي الالعاب الي تيجي متعلقه بخيط
دلوقتى انا حاسه بقوه جباره جوايا
قوه مخليناني اشوف ان مافيش حاجه مستحيله طالما الاراده موجوده
لاول مره بعمل الريجيم لاني عايزه اعمله ومش مغصوبه عليه
لاول مره في حياتي بستنى ساعه النادي تيجي عشان اروح العب رياضه
انا بقيت بحب الرياضه جداااااااااااااااااااااااااااا وبستنى كل اليوم الوقت يعدي عشان اخد شنطتى والبوت بتاعي واروح النادي البس الترنك بتاعي واطلع على التردميل وابدا الجري
مع كل خطوه بمشيها بحس بسعاده تفوق الوصف ولما بجري بحس اني بجري في عالم لوحدي
بجري انا ونفسي الي كانت مكبوته سنين جواي ومش بسمع لها ولا بحس هي عايزه ايه
بجري كل يوم اكثر من الي قبله ومع كل دعسه رجل بحس اني حره وان محدش يقدر يرجعنى للخلف ابدا
في النهايه الحياه دي حياتي انا والوقت بيفوت منى انا
والله وحده الي عارف انا باقي لي قد ايه في الدنيا دي
وما ينفعش اخرج من الدنيا من غير ما احط بصمتى فيها
ما ينفش ان اعدي من غير ما اثبت لنفسي على الاقل اني قادره احبها
وانا اخترت اني اتصالح مع نفسي واني اوصل لهدفي بارادتي
واصراري ومساعدتي لنفسي
والمفاجأه ان الخمسه كيلو الي زدتهم طاروا بسرعه البرق وخلال عشره ايام بس
بصراحه انا فرحت جدا لاني ده عطاني دافع اني استمر على نفس الوتيره من الاصرار والحماس والانتظام
وازيدكم كمان من الشعر بيت جنب الخمسه كيلو كمان كيلو وده كله في اسبوعين
وبعدما كنت خلاص على شفير الهاويه لقيت نفسي نجوت من الضياع الي كنت فيه
وهذه المره بمساعده نفسي فقط
انا الان عرفت ان الامر كله بيدي بعد الله سبحانه وتعالى وان انا الي اقرر امشي خطوه للامام او افشل وارجع الالاف الخطوات للوراء
انا الان عرفت لما يكون الهدف عشانك انتى ومش عشان ترضي ناس ثانين يصير للتعب والجهد طعم ثاني
تطعمي طعم النجاح بكل ذره عرق تنزل من جبينك وتحس بفرحه انك قدرتي تنجزي
والاحلى انك كل يوم مع كل خطوه للامام تتفتح افاق ما كنتيش فاكره انك راح تقدري تحقيقيها
Kadia @kadia
محررة
يلزم عليك تسجيل الدخول أولًا لكتابة تعليق.
SOMONAY
•
هذا هو الهدف
والله شجعتيني اكمل رجيم لانه اليوم اصابني احباط اليوم الوزن ووزني ثابت الحين من شهر تقريبا ..
مووووووووووووووووووووووووووووووفقه
والله شجعتيني اكمل رجيم لانه اليوم اصابني احباط اليوم الوزن ووزني ثابت الحين من شهر تقريبا ..
مووووووووووووووووووووووووووووووفقه
الصفحة الأخيرة
يااارب
صدق غمضتيني =(
بس انتي قدها وترومين
ماعليج من حد وبعد حاولي تفهمين نفسج اني ما اكل اي شي حتى لو وين كنت !!
عندي اشياء معينه وبس !!!
شدي حيلج حبيبتي واباج تفرحيني لما تنقصين زود بعد ^^