يالله الحمد لله هذا كله إعجاب بشغلي ؟ كنت عارفه اني موهوبه لكني بحاجه الى تشجيع
والله ما توقعت ان الحرمه بتنبسط كذا تخيلوا يابنات وش رده فعلها ..كانت تضحك .. تضحك .. تضحك .. كما لم تضحك من قبل .. أول مرة شيء أسويه وأحس بالفخر لأني أنجزته .. أنا كوافيره .. نعم انها الموهبه الجديده .. يالله قامت الحرمه وهي تضحك وتطالع في شكلها وتضحك وانا من السعاده قلت خليني اشوف بالمرايه وشو اللي شافته في مكياجي وعجبها على أساس آخذه نقطه القوة في المرات الجايه .. الا وقعت عيني على المرايه وشفت .. شفت الشيء اللي كانت تضحك منه .. شافت شكلي بعد ماشلت النظاره وعيوني يغطيها الظل الأسود أبو النظره الحازمه .. تخيلوا انا من شده انهماكي في الشغل نسيت أنتبه على شكلي التنكري .. النظاره رفعتها وبانت العيون التي في طرفها حول تقطع القلب حمر ملخبطه بالظل الأسود
اللي ماجاه يضبط باللون الا هالمرة .. يعني كل مرة أحطه يصير لون غباري اسود فااااتح الا المرة هذه .. والحمرة ( لا أبشركم الحمد لله ثاااابته زي ما تعودت عليها ) انا كان قلبي حاس من البدايه ان البنت خافت من شيء لكن قمه الإحباط لما تعرفين انك مخيفه حتى وانتي متنكرة .. حقيقه الآدميه قامت وهي منهاره من الضحك ثم طاحت عليه .. قلت هاهاهاها هيا قومي عاد بلا استهبال قدييييييييمه من زمان أشوفها في المسلسلات الحرمه تشوف بعلها مع وحده ثانيه تضحك شويه وتدوخ ... قومي قومي بس .. واستنى بس ما قامت قلت لها خلاص بقولك نكته واذا شاطرة لاتضحكين طيب ؟ فيه واحد غبي حطوا على رأسه جهاز كشف الكذب قالوا له اذا كذبت بتولع اللمبه اللي في الجهاز فهمت ؟ قال ايه .. ولعت اللمبه هاهاهاهاهاهاها ...وهي جامده .. ياجبل مايهزك عواصف والله انك قويه.. ماضحكت .. يالله الحين دورك بس قبل ما تقولين النكته قوليلي قبلها بنص ساعه عشان امسك براطمي يادوب يمديني .. اففففف ايش هذا انكتمت وانا ماسكه على براطمي احسها بتفش .. قلت لها طيب هذه مسابقه في قص الشعور .. تتحديني تقصين شعري وانا ما انقهر ؟ واخذت المقص وانحنيت عليها باعطيها اياه الا على دخله بنت صغيره شويه الا بنت صغيره آآآآآآآآآآآآآآآآآآآآآآه الحقوا خاله هاله .. المجنونه بتذبحها الحقونييييييييي وانا اللي اطالع وانا ماسكه المقص اللي يشوفني يقول باذبحها ووجهها مو زي اللي كان من أول .. ياويلي الحين يقولون اني نكرت ملامحها عشان محد يتعرف على الجثه
.. وأصييييييح واخرج من الغرفه وانا لابسه النظاره عشان محد يعرفني وبسرررررررعه توجهت الى المخزن اللي خبركم يازينه من مخزن ما تعرفت عليه الا في المصايب لكن لقيته مقفول .. يالله وقته يعني؟ وش أسوي وش أسوي ؟ أها وجدتها .. والله فكره ممتازه .. لقيت مجموعه بنات ميبسات لهم دهر من يوم أعرف المشغل والله اني أخاف منهم تخيلي نفسك وسط حريم جايهم تشنج (يممممممه) المهم عارضين عليهن فساتين عرااااايس تهبل المهم جتني فكرة ليه ما أروح جنبهم وأكمل الرصه ؟ وما كذبت خبر .. رحت وراهم عشان لاأحد يقارن وفكرت لي في وقفه مناسبه لي فحطيت يدي على خصري ويدي الثانيه في خشمي يعني وحده تفكر بعمق .. طبعا عجبتني مره شكل حرمه تغمز بعين والثانيه لا وسويتها من تحت النظاره لكن اححححح عيوني حرقتني لي نص ساعه مفتحتها 
لزوم التنكر أخاف لو رمشت يكشفوني .. والعارضات كللللهم يطالعون جهه اليمين وانا أطالع جهه اليسار عشان اشوف الغرفه وش صاير فيها من أحداث ( والله ياهوايل تصير ورى هالفساتييييين ) المهم شوي الا وبنات صغار يجون عندي ورى الفساتين ويتقاسمون فلوس مدري من وين لاطشينها المهم الا الصغيره يوم شافتني قالت للكبيره .. مرام ايش هذه ؟ قالت مرام : هذه فزاعه عشان الصغار مايطلبون من اللي أكبر منهم فلوس .. انا هنا انقهرت لنفسي وللبنت الصغيره (يعني شتمتني و اعطتني قفاها وكذابه في نفس الوقت ) قمت بكل خفه اعطيتها ضربه على قفاها وهي تقول بسم الله من ضربني ؟ انتي يا مها ؟ قال لا قالت كذابه وضربتها والثانيه مسكينه تحك مكان الضربه وما سوت شيء برضه انا انقهرت على البنت وضربتها مرة ثانيه ونفس السؤال اللي سألته البنت والثانيه تنكر وضربتها لكنها ماصبرت ردت عليها بالمثل 
الى ان صارت هوشه كبيييييره ( وتستاهل مرام ) راحوا ويالله يالله بألتقط انفاسي الا وثنتين حرمه وبنتها تقول يالله .. الحمدلله شكلها ماشافتنا قالت لها الأم انتي متأكده ؟ قالت البنت ايه قالت الأم .. أنا عارفه والله انها ماجت هنا الا وهي عارفه اننا حاجزين عندها أكيد عماتك مثلث برمودا قالوا لها تراقبني ( انا هنا جلست اسمي عماتها جنيات اللهم ياكافي ) قالت والله مدري قالت بس والله انها فرصه نشوف فستانها اللي ماتبي أحد يشوفه وخرجت الجوال و.. ألو ام سلمان لايفووووووتك تدرين أنا وين ؟ ( انا : عند مثلث برمودا ) الحرمه انا في مشغل ام جود تدرين منو شفت ؟ ( انا: بسم الله علينا ) الحرمه :شفت ام صايع مدري صايل .. ايه والله اني شفتها تراها مفصله فستانها عندهم ب... أظن ب300 ( أكبر كذاااابه وش دراها وهي دوبها شافتها وهربت على طوووول ؟) أيه والله انا شايفتها بعيوني اللي بياكلها الدود ( انا : والله لو فكرتي زييين في الدود ما حشيتي في مثلث برمودا ) قالت : والله يا انه يلووووووع ألوانه .. أحمر على أصفر على أخضر على برتقالي على مدري ايش .. قلت : هذه ألوان تطريش( الله يكرمك) .. قالت ايه والله انها ألوان تطريش( الله يكرمك) بعدين قالت من قال هالكلمه ؟ تسأل في بنتها .. قالت البنت مو أنا الا والحرمه قفلت السماعه بدون ما تودع ام سلمان وهي تبلع ريقها قالت : الظاهر ان هنا فيه شيء .. قالت البنت شيء زي ايش ؟ قالت الأم شيء شفاف يشوفنا ومانشوفه قالت البنت : مويه صح ؟ قالت لا يالخبله شيء ممكن يدخل بس لايمكن يخرج قالت البنت : الهوا يوم يدخلنا بعد الترويش وتدهنينا بالفكس ومايروح صح ؟(انا : الله كني حنيت للفكس ) وما أسمع الا وطراااخ حسيت اني اسمع صوت صفقه أمي الله يحفظها الا واشوف البنت تحك في رقبتها أخذت لها مخمس يهببببببل والله لو تدري أمي عنه كانت طلبتها المقادير والطريقه .. قالت لها شيء يبدأ بحرف السين قالت البنت سمك ( حليلها تحسب انها تلعب لعبه انسان حيوان نبات ) قمت قلت لها بصوت مرعب سكني يالغبيه يعني جني .. والا وااااااااا وااااااااااااا وااااااااااااااااا صيااااح وهربوا الثنتين وانا ميته ضحك ... بس ... هاه ؟ .... ليش هم هربوا وانا لا ؟ يمكن عندهم خبره في الـ..
؟ وتوني بغيت أخرج الا وتجي وحده ومعاها بنت صغييييره قالت لها ماما بسرعه أعطيني منديل 
قالت استني ... يالله هالحين ما لقيتي تزكمين الا واحنا برا البيت ؟ ( انا : ياويلها من الله يعني هي اللي قالت للزكمه والله ان تتعشين عندي ؟) قالت لها خليني أشوف لك واحد من هالفساتين تمسحين فيه وتريحيني ماعندي مناديل .. واشوي الا وفررررررررررررر .. أطالع الا آآآآآآآآآآآآآآآآآآآآآآآآآه لا والله البنت ماخذه لبسي وتصرف نفسها ( تمسح خشمها عساه ينقطع مالقيت الا هالحين تزكم ؟).. انا يالله وش هذه الورطه من بين الفساتين كلها مالقيت الا بالطو أبويه ؟ هذا البالطو له ذكريات عزيزه عند أبوي هذا البالطو راح به أبويه حرب الخليج وحارب به الأعداء وراح به مصر يوم راح يشجع فريقه المفضل وراح يخطب به أمي يوم بغى يتزوجها (قراره اللي ندم عليه طول حياته ) .. و أهم هذه الذكريات انه الوحيد اللي صبر على أبويه ..طيب انا هالحين وش أسوي ؟ هربانه ...مطارده .. مطلوبه أمنيا .. وأخس شيء اني أخذت بالطو أبويه من دون علمه وها انا ذا أرجعه له بأحلى تذكار .. هديه ولا كل الهدايا .. انا اليوم منحوره منحوره والا مسحورة ؟ والله اظن هذا اللي فيني انسحرت من يوم وانا صغيره على جمالي بس وش يقول الواحد ..
عاد حسيت اني قرفت من هالحركه اللي قبل شوي ورحت تصرفت حطيت كل اللي على البالطو على واحد من الفساتين ما عجبني شكله كان مشخلع بزياده وهذا رح يصرف الأنظار عنه ( ما قلت لكم ذكيه ؟) المهم لما حسيت ان الجو برا هدي قررت اني أرجع البيت .. ورحت أدور على أختي وأدور وأدور وأدور الا لقيتها في زاويه مظلمه من المشغل وانا أقول لها بسم الله علينا الرحمن الرحيم .. طالعت فيني قالت الا بسم الله عليه انا من انتي ؟ قلت لها انا رجل من الدوله العباسيه .. هل سمعت بالمارد الذي خرج على سندباد في الحلقه رقم 1 ؟ قالت ايه قلت انا هو .. قالت والله من جهه مارد فأنت مارد لكن من جهه سندباد فأنت من جنبها .. يالله كفشتني .. خير ليش جالسه هنا ؟ قالت .. شفت شيء ما ينشاف .. انا : مو أكثر من اللي شفته .. قالت الا أكثر .. قلت : لا والله مو أكثر .. قالت الا وبغينا نتضارب قلت لها خلاص انتي شفتي أكثر وانا شفت بعد آخر واحد أكثر ( كلام هنووووود) رضيت الخبله .. قلت لها ها وش شفتي ؟ قالت شيء ما ينشاف .. انا ياااااالله بنعيد نقس الكلام ؟ اخلصي عليه لأوريك شيء تندمين عمرك كله عليه (عيوني).. قالت تعالي .. وأخذتني وودتني الى غرفه .. تدرون وش هالغرفه ؟ هالغرفه أخطر من غرفه الإنعاش ... أخطر من غرف العمليات .. أخطر من غرفه أبويه اللي محد يقدر يدخلها تدرون وش هي ؟
هذه غرفه مكياج العروسه
اهئ اهئ اهئ اهئ اهئ يمه يمه يمه يمه الحقيني يمه بيغمى عليه يمه ..جلست اختي بحسرتها على ركبها عند باب الغرفه وانا من فوقها أطالع بنص عين (يعني عين جوا النظاره والثانيه خارج التغطيه كلش ) والكوفيره تزين في البنت والبنت تضحك ومبسووووطه ولا كأن الزواج لها .. يوه يابنات هاليومين والله مافيه أمل تشوفينها خايفه والا منحرجه .. اما انا والله اني على عادات زمان حتى جربوا عشان تصدقون خخخخ .. المهم جلسنا نكمل بكى أنا وأختي على باب الغرفه وهذه تحط الأحمر والأصفر والأزرق على عيونها واحنا نبكي .. نبكي .. نبكي
.الا وحده شافت هالمنظر ورحمتنا شفتها تقلب في شنطتها وشويه وطلعت منها 5 ريال واعطتني اياها ومثلها لأختي قلت لها : بصوت باكي ..وش تبغين أجيب لك ..مويه والا عصير .. قالت لا هذه لك حبيبتي .. قلت لها وش المناسبه ؟ اتذكر ان ابويه الله يحفظه اعطاني عيديتي قبل سنه لا يكون جاء العيد الثاني وانا ما أدري .. قالت : لا يابنتي .. انتي من أي مستشفى هربانه ؟ انا : نعم ؟ قالت : يابنتي المستشفى مكان للراحه والإسترخاء وتقضي فيه وقت مع صاحباتك .. انا : الظاهر انك فاهمه الموضوع غلط .. الا وفي عيونها نظره حسرة تقول الحمدلله الذي عافانا مما ابتلاهم .. كذا في وجهي بكل وقاحه .. أولها تتصدق عليه ثم تقولي هربانه من مستشفى مجانين والحين تحمد الله اللي عافاها مما ابتلاني .. صدق قويه عين .. انا هنا ما قدرت أصبر على هذه الإهانه الشنيعه .. قمت ورفعت النظارة ووريتها العين الحمرا مثل مايقولون(دفاع عن النفس عشان تتأدب ) .. الا والحرمه لفت وجهها بكل هدووووووء وانسحبت انا هنا حسيت بنشوة الإنتصار لفيت على أختي الا وهي باقي تبكي .. وآخذها من أذونها .. قلت لها : افتخري بس اني اختك ولايهمك أي شيء آخر شوفيني بنظرة واحده فقط الناس تسمع كلامي قالت : ياشيخه حلي عن سمايه بس .. كنها أهانتني ؟ وأسوي معها نفس اللي سويته مع الحرمه والحمدلله جاب النتيجه المرجوه ورجعنا على البيت ولله الحمد ..... ولقيت أبويه
يستناني عند الباب وأخويه بصلعته واقف مع أبويه والباقي مشفففففففففر تعرض الى مقص الرقيب أول منسيه ... لاااااااااااااااااتنسون الردود الحلوه ..