انا وجدّتـــي..وياليل ما اطولك...!!

السلام عليكم و رحمة الله

وبعد:
هذي قصه فتــــــــــــــــــــــــاااه أسمها أندومــــــــــــــــــــــــي >>>> موأندومـي بالشطه ذي وحده ثانيه بس تشابه اسماء 0

وأخليكم مع القصه:

اشرقت شمس صباح يوم جديد..حافل بالحب والوئام..في ذلك البيت الهادئ..بيت ابو شلاخ ..
لم يبق سوى القليل حتى تصحو اندومي البريئه النائمه..على صوت زقزقت العصافير..ولكن...

انها وجه فقر..فلم تستطع ان تنعم بهذه اللحظه..فقد حدث مالم يكن بالحسبان..فبينما هي تغط بسبات
عميق وتحلم باحلام ورديه ابطالها كل من توم كروز وبراد بت وتاركان..
وكانو يتقاتلون للفوز بها..

اذ دوّت صرخه مجلجلة عظيمه في البيت الذي كان قبل قليل عشاً هادئاً..نعم..انه صوت ابو شلاخ الجهور
ومن الفجعه..التصقت اندومي بالسقف..كالضاطور ..
مسكينة انتي يا اندومي..فذيل الكلب عمره مايتعدل على قولت اهل مصر
..فلم ..ولن تنعمي بالهدوء قط البته بتاتاً...

فقد كان والدها المصون يصرخ مُـعلماً ومـُعلناً عن وصول والدتـــــــــــــــــــه...


التي هي جدتس يا اندومي..يالهذا الحظ المنسدح..اسودّت الدنيا في عين اندومي..نعم فهذه الجده لم تكن
جدةً عاديه بل كانت توماتيكيه

نترك الآن المايك لاندومي لتعبر بصراحه وعفويه عن مشاعرها.....
الوو..الوووو..احم..
ياجماعة الخير..انا حالتي حاله..جدتي مب صاحيه..شي مب طبيعي..
انها تبلغ من الطول 200 سنتيمتر..اي مايعادل مترين..وهي ذات جسم نحيف جداً جداً..
وكانت كالمطازيز..كثيرة العرافيط..تحتاج الى الرش بمريتو ومن ثم الكي ..
ومنذ القدم..كانت تلبس سروال خط البلده وقميص عنابي تتخلله نقوش خضراء تميل الى الصفره..
وتتمسك تمسكاً شديداً بصنفتها..فلم تخلعها ابداً حتى انها كانت تستحم وهي على راسها..حسبي الله عليتس
يالطمله..
اما شعرها .. فكان احمر فااااقع..وتظهر لنا الفرقه من الامام..وكانت ذات انحناء شديد في ظهرها..
يااه كم كان شكلها مرعباً..كان يبث الرعب في اوصالي وكبابي ..

وكان اكثر ما يجيب لي ام الركب فيها..انها كانت عرجاء..وبالرغم من انها عرجاء..فقد كانت سريعه
جداً جداً جداً ..يعني اذا شاشت عليك انسى تهج لانها ماسكتك ماسكتك..
تخيلو شكلها عرجاء وتركض والمصيبه انها سريعه..
اللهم لااعتراض..ان منظرها مرعب..فقد كانت تظهر للاطفال في الكوابيس
كان الناس اذا بغو عيالهم يسمعون الكلام يقولون لهم اعقلو ولا ترا بنجيبها لكم..ماهذا العذاب..؟؟

اما صوتها..فكان حاداً مبحوحاً ..وكانت تكن لي من الكره.. مايعادل عدد بوفيـّـات الرياض..
لااعلم لماذا..اذكر انه عندما ولدتني امي لم تزرها بالمستشفى..مسكينة امي..عندها خاله تجيب البلا
وحتى عندما عدنا الى المنزل..لم تزرنا الابعد مرور 40 يوماً ..وياليتها لم تزرنا..ماهذه الزياره
البغيضه..فعندما دخلت الى المنزل صرخت قائله..

وووووووووه ريحة البيت " ****** " ..
وش هالبنت اعوذ بالله شمينا ريحة عفنه قبل نشوفه..الله يعين بس..
ماهذه الكلمات النابيه يا جدتي..صحيح انني كنت طفله لكن الاطفال لهم مشاعر..
ايتها الشمطاء..
لقد تلفع وجه امي من هذه الكلمات فلم تستطع ان ترد عليها لانها تعلم انها لو تفوهت بكلمه واحد سوف
تــٌـمحط بنعاااال ماشي 200..(( شاطره علينا اميمتي لو فيتس خير ردي على هالتريله ولا
خايفتن منها يالذرووق ))..

وعندما نوخت جدتي بالكنبه..قالت لامي..
هاتي البصوه ام ريحه نشوفه..بس انتبهي تراه ان طرشت علي بصكـّـه بالجدار..
فحملتني امي وي تتراجف خوفا من هذا السعلو..وسلمتني اياهاا..ياالهي..كيف استقبلتني..
فلقد بصقت بوجهي ذيك البصقه اللتي استقرت بين عيني وخشمي..والى الان هناك حفره صغيره بذلك المكان
فقالت..
تفوووووووو عليتس..هذا اللي انا متعنيتن عشانه وطالعتن من بيتي عشان ذا
الوجه..؟؟


فحاولت امي تلطيف الجو..فقالت وهي تاخذني منها..
ماعليتس بس منه ياخاله .. اتركيه بزر..الا ماقلتي لي من تشبه..؟؟
يا ربيه يا امي انك عنز تدوّر على مذبحها .. لو انك تعلمين ماذا سيكون جواب جدتي..
لما كنتي سألتي..
فقالت الجده .. بكل عنجهيه واستبداد..

مهب تشبه ولدي..هي ووجهه اللي تقل مقشع " ** " ............
نعم انها تدافع عن ولدها..وتذب على امي الضعيفه..

لااعلم لماذا قالت ماقالت..مع انني كنت بقدر من الجمال..فقد كنت بيضاء...ناعمة البشره..
ذات عيون عسليه واسعه..وخدين ورديين..وفم احمر صغير كخاتم سليمان...

لكن لااعلم مالذي قلب سحنـتي الى الملامح البقريه..امي قالت ان كل هذا لانني بمرحله حساسه.. وساعود جميله كما كنت عندما اكبر واتعدى ال19...
لايهمني..فالجمال جمال الروح.. << ذي تصريفة الشيون ياقلبي انتي..

ومقابل هذا..فقد كانت تحب اخي شلاخ حباً جماُ..مع انه كان واطياً داشراً حقيراً وليست هناك شتيمه
بقاموس الشتائم..لاتتوفر به..(( الله يذكرتس بالخير يا استاذة الفيزيا كانت اذا عصبت تقول بس
خلاص مابأتش شتيييمه فقااامووس الشتااايم ما أولتهااااااش..اشوف فيكو يووووم.. ))

أتصدقون انها كانت تلفز لاخي شلاخ الدراهم ليشتري له و((((((لها)))))) التــتــــن..؟؟
نعم..كانت تدخن معه وتقبع من القواطي معه..وكان هو اذا احس بالخطر قادم اليه من والدي..هرع اليها
لتفزع له..وكانت هي الخبيثه تدافع عنه امام والدي...باختصار انه شعرة قلبها..اما انا فكانت ساحبه
علي السيفون من زمان..

دعونا نعود الى تفاصيل ذلك اليوم التعيس ونترككم مع الاحداث..
توقفناعندما التصقت اندومي الضعيفه بالسقف..من الفجعه..فرجف والدها الباب برجله الكريمه..
اللي يبي لها كسر.. قائلاً..اندوووووومي وينتس..؟؟
ياملا الجدري والحصبه الفوشيه...
امتس الــشــقـــحــا بذاا..انهجي لاتثــوّر بنااا وين انتي به..؟؟

بهذه اللحظه سقطت الفتاة الحزينه من السقف على سريرها مره اخرى..واسرعت الى النافذه..تريد القفز
نعم..لقد قررت الانتحاااار..
فالحياة مع جدتها تلك..كحياة مدمن يعيش في غرفة من الزجاج ..
وكل مايحيط به عباره عن ابر..وحبوب..<<<< يلعن ام التشبييه ياعنز..


فاسرع والدها وتلــّــها مع كشتها..وهو يقووول ..هيه ناويه تموتين وتتركيننا نبلش..
ابلشي معنا..
انزلي يللا سلمي عليه..ماعايز علينا فضايح..يكفي انه جايه لمنا على ظهر البعير..لا..
ومركبه فيه ذاك البخاخ حق المبارياات ابو صوت..يقال انه بوري ومعلقه على اذان البعير شرايط..على باله سيكل
الله لايبلانا..انزلي يلللا...وخرج وتركها تصارع الاحزان وحدها..

فذهبت لتغسل وجهها فهو كما تعلمون مليئ بالفطريات والغمص..ولكنها لم تغسله..
عناداً بتلك العجوز اللعينه..فنزلت اليها بغمصها وريحتها المخيسه..
وعندما رأتها جدتها..قالت..
اوووهووووو جتنا ام النخارير..كل ذا نووووم ..؟؟

فمشــّتها لها اندومي لكيلا تدخل في المشاكل..وانحنت لتقبل راسها الاشعث..ذو القمل والصيبان..
فقالت جدتها الشقحا بكل وقاحه..
روحي جيبي لي ماء تراي عطشانه..
قالت اندومي..طيب يما الشقحا خليني اسلم همن اجيب لتس..
قالت جدتها الشقحا..من زينتس تسلمين علي..انقلعي بس جيبي لي ماء همن سلمي منب طايره
انهجي اهوه
فقالت اندومي طيب..وذهبت وسرعان ماوصلت الى المطبخ ليس لانها ذربه..
بل لانها تلقت شلوت من جدتها الشقحا ذات السيقال الخشبيه...ما اروعك ياجدتي..
اتت بكأس الماء لها وقالت سمــّــي...
فقالت لها جدتها الشقحا..سمن يسمتس..وجع..بارد..ماتعرفينن منب احب البارد..
قالت اندومي..يما بس الحين حر..مايصير تشربين حار..
قالت جدتها الشقحا..ماعليتس من ماسألتتس..انقلعي جيبي لي غيره..
فذهبت اندومي ولكن من غير شلوت هذ المره..
وعادت بكأس الماء وقالت..سمــّـي
فقالت جدتها الشقحا..سمن يسمتس..قلنا مانبي بارد بس ماقلنا نبي حار..
قالت اندومي..ايه بس يمه انتي قلتي لي ما ابي بارد..
قالت جدتها الشقحا..ياملا الموت ابي نص ونص...حبيبي أرّب بص وبص بص زعلان ازعل
ازعل نص نص..بعد نانسي عجرم مب ازين مني..جيبي لي نص ونص..
انهجي..
ذهبت اندومي وهي تقول في نفسها ..امحق جده انتي ام الدشاره..

واتت بما طلبت جدتها..ولكن..كانت جدتها خبيثة بما فيه الكفايه..فبعد كل تلك الخنبقه..قالت..
خلاص هونت ما ابي ماء امشي معي بس نغسل الحوش..
والله ياهو معفن..امتس ذي مدري متى يتصير مره سنعه..امشي معي يللا نغسله..
قالت اندومي..ايه بس يما الشقحا تو النااااس الحين حرررر موووت
تدرين ان الساعه 2 القايله..؟؟
قالت جدتها الشقحا..طيب واذا..الشمس زينه تلين الركب..
قالت اندومي..يما الشقحا مايحتاج لتس تليين ماشالله عليتس نشيطه..وحيلتس بتس.. :

قالت جدتها الشقحا..لعنة الله عليتس يالطنجره..تبي تنحتينن بعد..لابوتس لابو من رباتس حيث انه
امتس السنعه..امشي بس ..اخلصي علي..

قالت اندومي..طيب ما افطرت..اخاف تحوم كبدي واطرش من الشمس..خليني افطر يرحم والديتس
يما الشقحا..بس خمس دقايق..تكفييييييين
قالت جدتها الشقحا..ايه يعني..ايه يعني غرااامك ودعني..احم..متى تخلصين..؟؟
قالت اندومي خمس دقايق بس اكل شي يعبي بطني واجيتس طيران على الحوش..طيب..؟؟
قالت جدتها الشقحا..خمس دقايق .. وتراها بدت من الحين..

شخطت انا على المطبخ فتحت الثلاجه لقيت باقي بيتزا البارح..اكلتها وانا ما اشوف الدرب..
وشربت كاس موووويه بااارد..خبركم الاوضاع برا تصيح..
ورحت اركض على الحوش لاتعصب علينا الحنشا قصدي امي الشقحاا

تدرون وش لقيتها تسوي..؟؟
لقيتها حاجره شغالتنا السيلانيه القعره مسكينه وتقول لها ورا ضروستس بيض..؟؟
اقسم بالله يا منظرالشغاله يجيب الشلل الربااااعي..حرام مسكينه شكلها يصيح..
طلعت وهديت الوضع مع ام العكروت ذي..وقالت لي يللا روحي افتحي الما وجيبي المكانس بسرعه
رحت وانا ما اقول ثلث الثلاثه كم..تروح فيها ارواح لو اقول شي..

المهم فتحت لها المويه..وجبت المكانس..وبدينا هي ماغير ترش الما وانا اللي رايحه فيها كنس وتمسيح..
لا ومن زود النذاله بعد تقول لي نظفي الفراغات اللي بين كل بلاطه والثانيه
يايمه الشقحا مايرووووح..
يرووح راحت روحتس انتي وامتس وابوتس بيوم واحد..
قلت..ايييييييييه وشلاخ الملعون ماجبتي طاريه..
انا قلتها ولا ماقلتها..رفستني ذيك الرفسه اللي طحت فيها على خشتي شر طيحه ..
قالت لي..لاتجيبين طاري شعرة قلبي شلاخ..هذا سيدكم كلكم..
قلت..شعرة قلبتس ولا شعرة ابطتس وانا وش علي مب تحبينه خليه هو يجي
يغسل الحوش معتس
قالت..لاااااااا شعرة ابطي اجل انا اوريتس يابنت النعله<<<تقصد اميمتي..

وجابت لي المويه وتفتحه على ااااااخر شي وتمسكني من شعري وتفتح فمي وتحط اللي فيه..واقعد اقبع بذا
الما لما احس اني صرت اسفنجه...والمشكله حااار ومار تشيل اللي وترجع تقول
لي يللا كملي تنظيف..
المهم..الله لايوريكم كيف مشت الامور خلصنا والارض مب شايلتني من الوناسه..

قامت جدتي الشقحا..وترشني بالماااا على بالها تلعب معي مسويه الام الحنووونه..
واصرخ علييها
لاااااااااا يمه الشقحاااا المويه حااااره تكفيييين خلينا نلعب كنكان اصرف..
قالت وانتي على بالتس العب معتس يا خنزيره..؟؟
قاعدتن انظفتس من هالطحااااالب يالوصخه...
قلت لااااا يمه والله امس قبل ما انام متروشه اي طحالب واي فطرياااات..
قالت لاااا اعرفتس انتي طمله طمله مثل امتس
((تروح وتجي على امي وشوله تخطبها لابووي اجل ))
سلمت نفسي للامر الواقع وخليتها تحوقني بذا الما الحاااااااار لين قالت امين..
ويوم خلصت دخلت داخل البيت وصكت علي الباب تقول احسن خلي الشمس
تحرقتس وتقتل الجراثيم..
يمه الشقحااا وش شايفتني اناااا...؟؟؟
بيااره قدامتس.. ؟؟ تكفين افتحي البااااب.. تكفييييين
قامت قالت عدّي لي كم شعره بارستس وافتح لتس الباب ..
يممممه الشقحاااا جعلي ما اذوق يومتس افتحي حرقتني الشمس...
وبعد ترجي واذلال فتحت الباب..
دخلت ابنجطل بالبراد وارتاح..غفيت لي شوي والغريب اني
مدري وين اختفت هي الله يستر بس عسى ماتطلع لي بالحلم..وتنكد علي..
المهم انا انتبهت على صوت نفس عند اذني توي فاتحه عيني ابلتفت
ولا ذيك الصرخه اللي تقوم الميت بقبره
اقسم بالله ياهي صرخه بنت كلب
اثرها جدتي الشقحا حاطه فمها عند اذني وتصصصصصصصصصصصرخ...

انا تعلقت بالمروحه من الروعه قلت..
خير يمه الشقحااا وش صاير وراتس تصارخين..؟؟
قالت وراي اصاااارخ..وشوله تنامين ياعنز النوم..مالي احترام تنامين وتتركينن..مافي نووووم
والله لو تموتين ما اخليتس تنامين..
قلت ليش يمه الشقحا بغيتي شي .. اسويه لتس...
قالت لا ماا بي شي بس مافي نوم..كيفي مزاجي..ابنكد عليتس..
انا هنا فقدت اعصااابي وقلت كلام ماله داعي ينقال لذا المخلوق بالذات..

قلت..الله يلعن ذا البيت ويلعن اللي فيييييه كل ابووووهم واولهم اناااا
يمه الشقحا ذبحتييييينا..ماصارت ترى مب حاله ذي تجين وتحوسين ام البيت علينا ولله حررررااااام
انتي ليش كذا ماعندتس قلب..؟؟
بس شاطره تمدحين بشلاخ وتلفزين لشلاخ
عمرتس يوم ماذكرتين بالخير..عمرتس يوووم ماعطيتين علك ولا حلاو مصاص..
صرت كبر الحمااار ولا اذكر انتس بيوم قلتي لي يابنيتي ولا ناديتيني باسمي
دايم تناديني ياعنز ولا يابقره ولا الخ الخ من السب والذب..

ليش..؟؟ ليش تكرهيني انتي...قولي امين جعلتس تطيحين من الدرج وتنكسر رجلتس
ولانشوفتس 4 شهووور نرتااح منتس ومن غثاتس..
انتي اصلا منتب ام..ولا لو انتي ام كان مافرقتي بين عيالتس..
نعنبو دارتس ترا اابوي ولدتس الوحيد وحنا احفادتس الوحيدين ماهنا غيري انا والزفت شلاخ..
دايم اسمعهم بالتلفزيون..بالبرامج..يقولون ان الام ماتفرق بين عياله..تحبهم زي بعض..
طيب انتس تحبينن مثل شلاخ صعبه شوي..
طيب الكره..اكرهي شلاخ مثلي..مب بس انا ..انا احس انا عندي احسااس...
بس تدرين..احسن شي انتس عجوووووز كلها فتره وتفطسين نقلعتس
بمقبرة النسييييم مع رجلتس
يالعجوز..يالمعرفطه..
وبذا الحظه بالذات زلقت يدي من المروحه وطحت....لاااااااااا
واشخط وهي اللي تلحقي وطردي بذا البيت والمشكله انها سررررييييعه بنت الإيييه..

والله وهي تلحقني كنها فلم مرعب والله شكلها يخوووف والمشكله ما اقدر اسحب فيها يدينها طواااال
تحجر لي حسبي الله عليها...
وتلحقني وهي تقول والله لاوريتس يا ام النخااارررررييييييييييييير..
خليني امسكتس بس لامحط فيه بكل جدار بذا البيت جعله ينهد عليتس..
انا من التعب طحت من طولي ولا ادري الا وانا بالمستشفى...
*************************************************
*******************
*************************************************
*******************
*************************************************
*******************
كانت هذه نهاية الشابه اللطيفه..الرقيقه..اندومي بنت ابو شلاخ..نعم..
كانت نهايتها في المستشفى فقد عانت من كسور في الرجلين
الثنتين(يلعن شكلها تكسر بالجمله كسرت لي كل الثنتين
ورض في الرقبه جعلتها تعيش كالضبعه
لاتستطيع ان تحركها..!!!
وضربه في مؤخرة الراس سببت لها الحول..
اما يديها فقد كسرت اصبع يدها اليسرى الصغير..
وكسرت كتف الاخرى...
وعضتها من اذنها عضةً كادت تقطعها..ان هذه الجده اللئيمه متأثره بما تشاهده على شاشة التلفاز
واضطرت لإجراء عمليه زرع اسنان وذلك لانها فقدتها كلها من جراء الضرب العنيف..!!

كم انك قاسيه..ايتها الجده..انظري ماذا فعلت بابنتك..اين قلبك..؟؟
انها تقبع في المستشفى بسببك...
لقد فقدت كل احاسيس الامومه .. حتى انك لم تفكري بزيارتها
والاطمئنان عليها......!!

في هذه اللحظه..ســُــمع صوت من آآآآخر المستشفى يقووول..
وووووووه وينهي فيه ام النخااااارييييير الرخمه..كنت امزح معه..وين فيه بسلم عليه...
عندها لم تتمالك اندومي الضعيفه نفسها .. فصرخت باعلى صوتها...
لااااااااااااااااااااااا....
ماابيها الجنيه ذي لاتجيبون لي ذا السعلووووو ما ابيهااااا...
ولكن العجوز..الشقحــــــــــــــا كانت اسرع فوقفت عند الباب قائله ولكموووووو ام النخاريرررر
يامصختس..وراتس صدقتي كنت العب معتس..
(والله قايله لكم انها داشره..اجل ولكمووو
وقبلها اه ونص ومدري وشو..مارجه اقسم بالله)...
فقفزت اندومي الى النافذه مرةً اخرى محاولةًالانتحار..ولكن .. :

في هذه المره لم يسمك بها احد..اذ انها كانت وحدها في الغرفه..
فسقطت من اعلــــــــــــــــــى..ولكن...
كانت جدتها في استقبااااالهااااااا فأمسكت بها وذلك لسرعتها الشديده في الركض...
فضكت في وجه اندومي وهي تقوووول ...
هاااااااه اجحديييييييييييها انقذتتس من الموووووووت..
فصرخت اندومي..
يااااااااااااااااااجعلي مت يوم ولاااااااااادي ولاشفتتس...
فانتهى بها الامر الى ....
شهــــــــــــــــــــــــار في الطائـــف..
وهي الآن ماغير تهذري .. ونناشدكم يالاجاويد...ساعدوها باللي تقدرون عليه..
وادعــــــــو لها..ان الله ياخذهـــــــــا وترتاح..ولا ياخذ جدتها الشقحا..وبترتاح بعد...


منقول و أتمنى يعجبكم