انتبهوا يابنات لاتغلطون غلطتي

السلام عليكم ورحمة الله وبركاته
اليوم صار لي شي الله لايوريكم وقلت لازم اكتبها هنا عشان الكل يستفيد
بنتي صار لها ثلاث ايام عليها حراره مو طبيعية تصل لـ40,6
رحنا بها للدكتور اول يوم قال مافيها ولاشي صدرها تمام واذنها تمام واللوز تمام والحمدلله اعطوها جونفين حق الحرارة واذا تغير شي تعالوا ..
المهم استفرغت البنت والحرارة مستمرة رجعنا ودينها بالليل في نفس اليوم
قال نفس الكلام جيت قلت له انا ممكن يادكتور بطنها فيه شي قال ممكن بس ماتوصل الحرارة لهدرجة المهم قال ماقدر اعطيها الا مطهر معوي يمكن عندها تلوث وكتب لها الوصفه ..
نزل زوجي واخذ العلاج من الصيدلية وقال كل 12 ساعه اعطيها 5 مل لمدة ست ايام
يوم وصلت البيت قريت الروشته ومالقيت اي شي عن تطهير الامعاء واستغربت بس وااااااااااااااااثقة ..ومأمنه لهم ..
استعملته يومين اليوم الاول ماشفت تحسن بس صرت اعطي بنتي نعناع وكانها
اليوم الحمدلله خفت الحرارة بس من يوم صحيت الصباح وعيونهامنفخه بشكل مو طبيعي انتظرت لحد الليل وقلت لزوجي الله يستر لايصير بالبنت شي اذا استمرت عيونهامنفخه نوديها بكره يسون لها تحليل .. وبعدين قلت له لايصير من الدواء وش رايك تتصل على الدكتور وتسأله المهم اتصل زوجي بالدكتور وقاله ايش هو الدواء
قاله اسمه استغرب الدكتور وقال مو هذا الدوا الي انا واصفه الصيدلي معطيكم دوا غير :(
ماتتخيلون وشلون صرت انا :icon33: متوصيه فيها واعطيها بنفس الوقت تخيلوا لو انا معطيتها الدوا ست ايام كان وش صار الله يستر
طرنا بها على الدكتور وقال هذا غلط من الصيدلي ولازم نعطيها ابرة حساسية فورا
وعلاج لها جا زوجي وعصب عليهم واتصل على صاحب المستوصف وقال ابشتكي لو بنتي صار لها شي خطير :( لاسمح الله من المسؤول لهدرجه ارواح الناس ولاطفال رخيصه الله لايوفق الصيدلي
وراعي المستوصف خاف وقال خذ الابرة والعلاج ببلاش واي شيء يصير لك دق علي
ونزل زوجي للصيدلي وعطاه المقسوم وانا صراحه تعلمت انه الصيدليه ماينوثق فيها
وانه اي دواء يوصفه لنا الدكتور نخلي الدكتور يشوفه قبل مانروح البيت ونعطي هالمسكينه .. والله اني رجعت البيت وانا بس اتابع بنتي وخايفه يصير لها شي
وحاطه ايدي على قلبي ..
اتمنى تستفيدون من تجربتي زي انا مااستفدت
والله يحمينا واولادنا من معدومي الضمير