انواع السلطات لرجيم الدكتور يوسف خضر

هذي طريقتي في عمل انواع السلطات لرجيم الدكتور يوسف خضر ..


اولا سلطة السيزر:

قطعي خس الامريكي او العادي + خس البنفسجي (اسمه كابيج) ماعرفه بالعربي شنو بس انتو اكيد فاهمين علي ..

و بعدين سوي صلصة السيزر و هذي الصلصه تتكون من

2 ملعقه مايونيز
1 ملعقة خل ابيض
1 ملعقة جبن البارميزون
تخلط جميع المقادير و تصب فوق السلطه

بعدين نحط الخبز الخاص للسيزر و نرش فوقه مره ثانيه جبن البارميزون

لاحظو انه اول مره نخلط الجبن مع الصلصه و هذا سر طعم السيزر في مطعم جيليز


ثانيا سلطتي المفضله سموها سلطة رزان <-- مستانسه :

تقطعين الخس
و الصلصه مكونه من ليمون و ملعقة زيت زيتون و صماغ شوي و تخلطينهم و تصبينه فوق السلطه

ملاحظه هذي السلطه حلوه مع الباستا (في رجيم من الرجيمات يكون في مكرونا و طبعا المكرونا تكون مع اي صلصه او اي مكونات حتى لو باشاميل لكن لازم القياس يكون كثر كاس الروب) لو كليتو هالسلطه راح تكون حلوه مع المكرونا و حتى المشاوي


ثالثا سلطة جبن كرافت الاصفر:

انواع الخس
جزر مبشور
طماط <-- انا ما احطه لكن ادري بعضكم يحب طمام
مكعبات جبن كرافت الاصفر

الصلصه تتكون من:

2 ملعقة مايونيز
وليمون حسب الرغبه

اخلطيهم و حطي فوق السلطه والله على الرغم من بساطتها بس روعه وتشبع



رابعا سلطة الجبن الابيض:

خس
طماط
خيار
جزر
نعناع طبيعي
اي نوع خضار ورقيه تحبونها للسلطه ممكن تحطونها

مكعبات جبن ابيض

و الصلصه زيت زيتون فقط رشي فوق السلطه بعد ماتقطعينها مع رشة نعناع ناشف و شوي خبز محمص


خامسا سلطه لعشاق الخس:


انواع الخس اللي عندج حطيها
و شوي من التوست المحمص بالثوم

و الصلصه :

2 ملعقة مايونيز
علبة روب
ملعقة ليمون
2 فص ثوم مطحون <-- هذا السر

حطي الصلصه فوق الخسات و شوفي الطعم العجيب


السلطه السادسه جبن حلوم:

قطعي طماط
خس
خيار
مكعبات جبن حلوم (غسليها و حطيها على النار تتحمر شوي بس بدون زيت)
ملعقة زيت زيتون
رشة زعتر

وخلطو كلشي مع بعض و ذوقو الطعم جد روعه

سابعا الفتوش:

طبعا الكل عارفها بس ذكرتها عشان ازيد من اختياراتكم


بنات الطرق وايد سهله بس وايد لذيذه و انا مجربتهم و احس انه مافي ملل ابد لانه غيرت
انواع السلطه مو كله نوع واحد التقليدي اللي نعرفه..

جربوهم و قولولي رايكم