شذى اللافندر :

بعض الحريم تحس إذا تزوجت ملكت الولد وأن أهله مالهم حق فيه تبيه مقطوع من شجرة وإذا زارتهم تعد نفسها كأنها شيخة عليهم و ياله تحكي أو تردعليهم وإلا السواليف كأنها طلابه أو بس تسمع لسوالفهم وقبل ماتطلع من عندهم وهي ناشرة أخبارهم ولا السي إن إن أو تكايد لأم رجلها من تحت لتحت تشوف اللي ماتبيه وتسويه وترفع ضغطها وسكرها ومكايد يهد الجبال وإذا خلصت من الأم استلمت الأخوات وإذا ماعنده خوات حريم أخوانه في رأسها شر وتبغى أي شيء حتى تقول ماعادني رايحة أي موقف يصير لو أنه عفوي تقعد تفسره على كيفها ومن ترسبات قصص سمعتها من خواتها أو بنات عمها أو صديقاتها نوعية اللهم ياكافي لا معروف تحفظه ولا عيب تستره إن أكرمتيها شاخت وإن تجاهلتيها قطعت بالولد عن أهله وبعض أهل الزوج إذا زوجوا ولدهم يعتقدون بأن مرة ولدهم كأنها ملك يمين لهم أو إذا تنازلوا شوي كأنها شغالة يبونها إذا زارت تكرف لهم ومن تاصل تفصخ عباتها وعلى المطبخ تقوم بهم وياليت فيه حمد وإلا شكر لا يحطون رأسهم برأسها حتى لو أنها صغيرة بكبر أصغر بناتهم لكن مايرون هالشي مادام أعرست خلاص صارت أم 80 سنة وإذا جلست معهم هاتك ياتحقيق وأسئلة عنها وعن أهلها وين رحتوا وين جيتوا وش شريتو وأختك حملت والثانية ليه ماأعرست وزوج أختك وين فاتح محله فيه و ورا فلانه ماكملت دراستها والثانية ليه أمك ماعلمتنا عنها أنها انخطبت من تدخل مرة ولدهم وهي كأنها داخلة مكتب التحقيق الفدرالي نوعية الله لا يحط من نعز عندهم إن قدرتيهم وحشمتيهم تفرعنوا وإن عاملتيهم برسميه وبحدود تحلطموا وخير الأمور الوسط .. لا تلصقين يملونك ولا تبعدين فيجفونك ولزوجة الولد أقولها أعتبري أم زوجك مثل أمك وعامليها مثل أمك صحيح هي مالها حق مثل حق أمك لكن إذا أرضيتيها يمكن دعوة منها لك في جوف الليل تسعدك أنتي وذريتك وإن سمعتي منها مايكدر خاطرك لا تروحين تكبرين قلب ولدها عليها وإلا تشيشينه على أهله أو تملين قلبه حقد لا تدفعينه لقطاعة أهله أو عق والدينه وإذا نسى زيارة أهله ذكريه و إذا شفتي أن أهله بحاجة شي نبهيه ترى الرجال يغفل عن أشياء والطيبة اللي تذكره وأعينيه على بر والديه مالك إلا الأجر وإن تضايقتي منهم عليك بالصبر تلمسي اللي يرضيهم وسويه واللي يزعلهم واتركيه وأنتي الربحانه بالأخير ولأم الزوج أقول لها اعتبريها مثل بنتك لا تنسينها من الشور والنصيحة لأنك تشوفين منها مالا تشوف الأم وإن شفتي منها خير إذكريه واشكريه وإن شفتي شيء يكدر استريه وادفنيه بناتك وهن بناتك ماجن على ماتبين فلا تنتظرين من بنت الناس أكثر وتحملي منها مثل ماتتحملين من بناتك لأن بناتك رايحات وهي اللي مقيمة بينكم وإذا الله أصلح بتصير بنتك اللي ماحملتيها و ولدتيها وتعبتي عليها وإن شفتي ولدك مكرمها ومقدرها لا تأكل قلبك الغيرة واإدعي لهم بالتوفيق لأن لو صار شي أول من يتنكد حشاشة جوفك ولا هنا أشين من خراب بيته و تشتت شملهم وإن شفتيه هاينها و صاد عنها انصحيه و وجهيه وحنني قلبه عليها وكل يقوم بالواجب اللي عليه ويطبق عامل الناس كما تحب أن يعاملوك ولا تنسوا الفضل بينكم

بعض الحريم تحس إذا تزوجت ملكت الولد وأن أهله مالهم حق فيه تبيه مقطوع من شجرة وإذا زارتهم تعد...