ياشيخه بعد مارديت قريت باقي الردود انتي تبين طالب جاهز مجهز مفتح مخه يبي يتلقف العلم
وين عايشه انتي في عالم الاحلام والا منتي تربويه انا ادرس طالبات جامعيات وادري انهم حريم والمفروض يحرصون على نفسهم بس ادري ان كل وحده عندها ظروف هذي امها تطقها وهذي ابوها بخيل وهذي عندهم مشكله ماديه وادري موشغلي بس اصب العلم الي عندي في كيس معهم يشيلونه ويروحون البيت دوري تربوي اكثر مما هو تعليمي
ممكن اجلس شوي اتكلم معهم اذا ابدواء الملل احمسهم اذا قالوا مافيه مستقبل اقول حنا مانعيش دنيا وبس فكروا بشئ ثاني احتسبوا اجركم واذا همكم الدنيا مابين غمضه عين والتفاتتها يبدل الله من حال الى حال

مشكلتك الصراع الازلي مابين البيت والمدرسة الكل يبغى يتخلى عن مسئوليته ويرميها على الثاني
الاهل يقولون عيالنا خربتهم المدارس والعلمين يقولون الطلاب مايستهلون التدريس والتعب
انا ماراح اتكلم عن الاهل لان الناس اشكال واهداف كلاسره تختلف عن الثانيه اكيد ان النشال وده ولده يصير مختلس لانه يربح اكثر ويحصل وجاهه اكثر بس هل هذا صح
لكن انتي يامعلمه تشتغلين مقابل راتب وظيفتك تعليميه تربويه تخدمين اهداف المؤسسه الي تشتغلين فيها وهي التربيه والتعليم حسب نظام الدوله ولتحقيق اهدافها
اذا كنتي تحسين انك تتصرفين بحريتك ولتحقيق اهدافك تراك غلطانه
يعني كل معلم المفروض يصيؤ عنده سياسه التعليم في دولته واهدافها العامه والخاصه ثم اهداف الماده الي يدرسها
والا وش الفايده اجل صب معلومات وبس نطلع عالم مايحب دينه ولابلده ويروح يهاجر وينفع غيره
المعلم مربي ومعلم وقدوة والا يجلس في بيته

انا لما كتبت الموضوع ماأقصد اني أجد المبررات لبعض المعلمات المقصرات لكن أوجه الخطاب للامهات الغافلات اللي الدنيا تغيرت وهم يحسبون المدارس على خبرهم واللي تقول ليش صوت المعلمة مايرتفع اذا جت الموجهة وانا ماأحب سياسة رفع الصوت بس لأن البنات يصيرون منتهى الأدب أذا جت الموجهة ولو انهم من تالي ماعاد يهمهم أحد مرة دخلت عندي المساعدة وكنت في فصل من أربعين طالبة وفي مدرسة ادارتها الله بالخير مافيها حزم ونقدتنني ان البنات مو حاسبين لي حساب وانهم اذا درت ظهري للسبورة خذوا راحتهم بالسوالف والضحك قلت لها ابسالك سؤال أنا مالي شخصية !!لكن ليش ماحسبوا حساب لوجودك أنت !!! انا كتبت الموضوع هذا أقصد فيه فئة معينة من الأمهات اللي ماتبي أحد يقول لبنتها ثلث الثلاثة كم ؟ولاأقصد كل الامهات فيه امهات محترمات ومايلعبون عليهم بناتهم ويعرفون شلون يوجهونهم صح و تعالج اي مشكلة بدون تصعيد وبدون ماتهز صورة المعلمة والادارة أمام ابنتهاوهدفي تخفيف حملة الهجوم على فئة المعلمات وفيهم معلمات قديرات ويعانون من اللامبالاة وعدم الاحترام من طالباتهم

والله حاله البنات مانعرف صدقهم من كذبهم بنتي من أول إبتدائي وهي تشتكي من معلماتها لأنها أبوها مدلعها مايحب أحد يغلط عليها وأنا أشوف من حق المعلمه تقسي عليها إذا فيها مصلحتها ودايم أقولها المعلمه مثلي يعني مثل الماما غصب عنها تزعل منكم وتعاقبكم مثلي أنا أحيانا تزعلوني وأعاقبكم بس لحد الأن ماهي مقتنعه أن أحد لازم يعاقبها أنا أكن للمعلمات كل إحترام لأني كنت يوم من الأيام مكانهم وعايشت تجربتهم أخر مره بنتي وصفت معلمتها أنها قاسيه جدا وتضرب أنا ماصدقتها وكل يوم تصيح تخاف تروح للمدرسه أكيد ذهبت لأأستفسر عن تعامل المعلمه ,الاحظ شخصيتها تفاجاءت بالمعلمه الحبوبه الرقيقه في تعاملها من شكلها طيبه جدا بس يمكن في الفصل يزعلونها البنات وتقلب عليهم أو حساسية بنتي زياده عن اللزوم أنا طمنت بنتي إن المعلمه تحبهم وتبي مصلحتهم ولازم تجتهدون علشان تحبكم وماتزعل منكم .

الله يكثر أمثالك يالقلب الصادق هذه اللي أقصده ان الأم تكون متفهمة وواعية وغير مندفعة عاطفيا ونتحد ونصير جبهة واحدة للتربية والتعليم وليس جبهتين متناحرتين يضيعون بينا الأبناء يعني المعلمة أو الاداراة تعطي الطالبة تعليمات تجي الأم تقول ليش تقولكم كذا مو من حقها والمفروض ماتقولكم هالكلام او لاتصدقونها مابيدها شئ..... وغيره من أنواع التحريض والتسفيه للمعلمة ................ ويكون هدفنا واحد وهو تربية الأجيال و صدقوني خوفنا الزايد من انه عيالنا يتعقدون نفسيا أدى الى نتائج عكسية

انا توني جديده في التدريس وبصراحه انصدمت بشكل لاتتصورونه صارت المعلمه لاتعني شي للبنات في البدايه عصبت وصرخت وقفت و طلعت من الحصه بدون نتيجه مافيه شي اسمه احترام للمعلمه والمشكله ان الاداره الي في مدرستي لاتعني للطالبات شي يعني تقولين لهم اوديك المديره تموت البنت من الضحك 0 بعدين قلت خليني احتويهم واحاول افهمهم صار يابنات شي غريب الاستهتار الغير طبيعي من ضحك وتطاول الين قلت خلاص مابي اتكلم بعد كذا معهم بعطي درسي واطلع 0 ولا تقولون من شخصية المعلمه لان الكل يشهد بشخصيتي الي تفرض على الطالبه الاحترام وفي النهايه المقصود مصلحة الطالبه
اقول موقف صار وانا قاعده اشرح وحده حاطه راسها على الطاوله ولما قلت خليكي معانا في الدرس قالت انا مابغا افهم معك اجيبلي مدرس خصوصي بالف ريال طبعا انا ولا كأنها قالت شي لاني جربت قبل موقف زي كذا ولا نفع معاهم لا اداره ولا طرد من الحصه ولا توقيع مخالفه وبعد الحصه رحت الاداره ولا سوت شي طبعا
ما اقول غير الله يعينا على هالجيل الي صاير مستهتر وانا ماقول كلهم كذا لا بس الغالبيه العظمى كذا وصارو يتحدون بعض مين الي تنرفز المعلمه وهذا غير التغزل في المعلمه الله المستعان يازينك وانتي معصبه يازين اليدين الي مسكت القلم وغيره وغيره
طولت بس من قهري ودي باسلوب اقدر افهمهم واقوم بمهمتي على اكمل وجه بس ماني لاقيه