اولا : كل سنة وانتم طيبين ورمضان كريم
هذي البسبوسة يا اخوات اقدر اقول عنها ادمان
والله اللي يذوقوها عندي يقولو هذي طريقة بسبوسة الطازج؟؟
واضافة على كذا لا زبدة وزيتها قلييييل
الصراحة هي اخذتها من زميلة لي بالطايف الله يذكرها بالخير يمكن من سبع سنوات
وانا ما شاء الله اسويها
معليش طولت عليكم
ندخل على المقادير
طبعا المعيار كوب الجبنة الكاسات الكبير
علبة قشطة
كوبين سميد
كوب جوز هند ( نارجيل)
كوب حليب بودرة
ثلاث ارباع كوب سكر مطجون ( او سكر الاسرة الناعم )
ملعقة كبيرة بيكنج باودر
ملعقتين كبيرة زيت
وبسسس
لاحظي انه ما فيه سوائل ولا بيض
الطريقة:
توضع جميع المقادير في زبدية وتعجن باليد!!!
اييييييه باليد لا تستخدمي مضرب ولا ملعقة
اول ما تعجني تحسي ان الخلطة ناشفة
لا لا تستعجلي ابد
استمري بالعجن راح تلاحظي ان العجينة بدأت تضبط معك وتتكور
مثل الصورة
وجيبي صينيتك وابسطي العجينة فيها بيدك اول
وبعد كذا استخدمي الملعقة حتى تساوي السطح
وبسسسس
على الفرن من تحت ثم من فوق حتى تحممممر
وتسقى بالشيرة او حليب نستله( انا استخدم الشيرة الوسط )
بس بشكل خفيف
وتمتعي بأحلى رااائحة وأحلى طعم
وهذي قطعة للحلوين
يمكن اللي تقرأ الطريقة تحسها صعبة وهي والله سهلة بس حبيت اكتب كل شيء بالتفصيل !!
يا اخوات ما اطلب منكم غير دعوة طيبة في ظهر الغيب في هذا الشهر الفضيل:)