سوليتير بالسوليدير
الله يعين أختي..

حبه بندول
الله يسعدك ياشيخة.. وييسر لك كل صعب.. قولي آمين (ترا من قلب والله)

خطيرة انتي مدري كيف جاتك الفكرة.. كلمتهم أمس بس الساعة 9 ونص الليل فمحد رد لكن بكره ان شاءالله بكلمهم..

بالنسبة للهيليوم .. مابقدر اشتري الاسطوانة، أنا يكفيني 9 بلونات بس.. فأفضل على العدد.. طيب والمحلات هي محلات الهدايا؟ ولا تقصدين انه ممكن محلات الغوص ينفخونلي البلونات؟؟

أما لوصلة اللاب توب اتصلت على شركة التلفزيون حقنا وقالي ماينفع لأن تلفزيونكم مو بلازما ويمشي الكلام على أي شركة بس أنا ما صدقت لأن فتحة التلفزيون اللي بالجهاز من زمان معروفة وما اعتقد انه كانت فقط مسوينها للي عندهم شاشة بلازما.. أصبت بالاحباط..

فبعدها رحت اتصلت على جرير وقالي لا عادي ممكن تشبكينها في اي تلفزيون بس السلك الخاص بنوع جهازي مهوب موجود عنهم وممكن ألقاه عند أي محل كمبيوتر،وبعد سألته إذا لازم له برنامج فقالي مثل ماقلتي مو ضروري.. فرجع لي الأمل من جديد..

أكرر شكري ودعواتي الصادقة..

عقد الماس111
امممم هدايا الأمهات خليتها كتب أولاً لأني أعرف ذوق أمي في الأواني وماعندي الميزانية اللي تجيبه وثانياً مافيني للحوسة.. بس مازلت أدور ويمكن أخليه باقات ورد!!

محلات أبو عشرة رحتلها والله ماكنت أتوقعها كذا صراحة.. منااااسبة جداً لحكاية الجوائز وهدايا الأطفال والمدارس وطلعت من عندهم بكيس ملياااااان بس للأسف أغلبها أشياء بناتية!! مالقيت شي لأخوي يملا العين..

جوزيتي خيراً على اقتراحك .. والله يعطيك العافية..

craaay
هلا أختي.. الله يوفق الجميع ..
ياليت بذي الحركة .. بس تدرين بخليه بعدين على قدام مرة ثانية .. لمن نجمع فيها بزران كثير .. بتكون رووووعة.. وبتكون أشبه بعزيمة أطفال

لأنه في ذي الحفلة عددنا قليل وغير كذا أبغى أركز على الاحتفال بصديقتي المخطوبة أكثر ثم قليل من المسابقات لنا كلنا ولأمهاتنا..
أشكرك على مرورك العسل..


والحين خلوني أقولكم اش سويت للآن..
رحت فرعين لمحلات GNC عشان أشتري الليسثين اللي وصت عليه أستاذتنا "دردشة مطابخ" في معجناتها.. وللأسف مالقيت إلا كبسولات وحجم واحد كبير بـ68ريال، سألتهم عن البودرة اللي قالت عليه دردشة وكلهم قالوا مخلصة ومابتجي إلا بعد شهر تقريبا وسعرها 33ريال..
فبضطرأسوي شغلي من غير ليسثين..

ورحت لكليرز واشتريت للبنات الصغار 3 أطقم اكسسوار ب20 رال الوحدة عبارة عن سلسلة ولها 3 تعليقات اضافية..

وبالنسبة للتورتات رحت لميرادور وفعلا محلهم راقي .. والأسعار لقيت اللي تكفي 15 شخص بـ160 ريال ، والرجال قالي بنسويلك الشكل ياللي بدك اياه والحشوات ياللي بدك اياها..

فخلاص قررت أجيب تورتتين وحدة تغليفها أبيض ووردي لصديقتي المخطوبة والثانية شوكلاتة للباقين.. وبس بقيلي أطلع شكل من النت وأعطيهم اياه.. وبكذا

خلصت من اللفلفة على محلات الكيك..

ورحت بعد لجرير واشتريت 5 كتب في شغلات الفنون والرسم والتغليف وكل كتاب أروع من الثاني وهذي اللي فعلاً بتعجب صديقاتي الثنتين..

وبعدين رجعت عالسوبرماركت واشتريت بهارات البيتزا اللي أول مرة بجربها، الطرخون والبيزل والأوريغانو، واشتريت الدقيق الكويتي اللي استخدمته "دردشة

مطابخ" في بعض وصفاتها اللي بسويها ان شاءالله..
وفيه محل في نفس المركز لأشياء أبو ريالين وعبيتلي أشياااااااااء بخليها جوائز للصغار..

الآن تكفون أبغا الأناشيد اللي تطلبتكم تقترحونها علي..

وسؤال للأخت sam320
متى وزعتي الفشار المدبس؟؟

وجزاكم الله خيراً .. ومازلت بانتظار ردودكم..

اقتراح ... بالنسبة للأناشيد ... حطي اناشيد ترحيبية ... اول مايدخلون ...
مثل :: (بالأول سلام الله عليكم) ... في شريط يا مركزي....

و مثل (اطرب الأنس) و يا (طيور الأنس) و (ضاءت ليالي الأنس)

و اوفر عليك بدال ما كم شريط عشان انشودة ترحيبية وحدة نزليها على طول من النت ....و بما انك بتجيبين لوب توب ... شغليها على طول من اللوب توب أو نزليها بطريقة السلك على كاسيت فاضي ....
المهم ... الاناشيد هذي تلقينها في موقع المعالي و مواقع الاناشيد ... اسألي عنها و على طول بيطونك اياها لأنها معروفة ....

و في اناشيد ترحيبية كثيرة مثل : (تجمعنا ) و (تراحيب) و (شوفوا شوفوا) و (مرحبا اهلا و سهلا) و(للحاضرين)
بس اللي قلت لك اول شئ هي الاخلى و كلها حلوة .......


تحياااااتي و لا تنسين تبشرينا بالحفلة .....

و اثناء ما تتعشون ....حطي بعد اناشيد هاادية يطلع جو روووووعة :26:

الغالية فوق الخيال..
امووووووه اموووووووووه امووووووووه.. انتي مافيه منك... تسلمين والله يجزيك الخير..

الحفلة تأجلت ليوم الثلوث الجاي حتى الآن..

ولي عودة لمناقشة أفكارك الخيالية الرووووووووعة.. لأني بتهزأ لو أهلي شافوني عالنت ومارحت أنام..

لك الشكر من أعمااااااق قلبي:26: ..

الأخت فوق الخيال:
المسابقات جداً رائعة..وبإذن الله بسويها كلها..

ومن الان كلمت أمي وقلتلها .. إذا قمنا نلعب لا تروحون لحالكم المجلس تسولفون خلوكم معانا وكل وحدة فيكم تشجعلها فريق..

وحتى شغالتهم بخليها تلعب معنا الألعاب اللي ممكن تفهمها .. حليلها صغنطوووطة .. بس المشكلة توها جات والعربي ميح..

والأناشيد بدورها ان شاءالله وأنزلها وأشوف الفضل..
وان شاءالله بس انتهي أبكتبلك ولجميع الأخوات أحداث الحفلة بالصور وبالتفصيييل وان شاءالله غيري يستفيد لحفلاته..

أثابكِ الله وبارك فيك "فوق الخيال".. :26:

بالنسبة للمستجدات حتى الآن ..
* جبت لصديقتي المخطوبة تعليقة ذهب في وسطها فيروز وحولينها فصوص..
+++
* اشتريت علبة هدايا حلوة للكتب اللي اشتريتها لهم وفكرت في فكرة حلوة
للشريطة اللي بلفها على العلبة..
+++
* اشتريت الجهاز اللي يسوي الفقاقيع وبشغله في زفة صديقتي ولقيته
بـ65 ريال بس مهوب من التعليم المبكر، بس ماأدري إذا يختلف عن اللي
قالت عليه الأختsam 320!!
+++
* اشتريت لأخوي لعبة ذكاء وساعة..بصراحة احترت اش اجيبله لأن الهدية
الكبيرة أبوي بياخذه ويروحون يشترونها وما يحب أبداً ألعاب الريموت كنترول
واذا اشتراها ثاني يوم وهي مركنة في الغرفة، يحب اكثر شي ألعاب الذكاء
أو الألعاب اللي لشخصين.. ودخت أنا مرة وخلاص معد بجيبله غير اللي اشتريتها..
+++
* اشتريت جميع الجوائز اللي بتنعطى للفايز في المسابقات بالإضافة للأكياس
اللي بحط فيها هداياهم واللي تنحط فيها الجوائز وهذي كلها من محلات أبو ريالين
وفيه أشكال خيااااال..
+++
* اشتريت كيسين بلونات من ظريف وكل كيس فيه 100 حبة والكيس بـ19 ريال،
بس أحس كأنها قديمة شوي لأن بعض الحبات تنفقع على طول إذا نفختها.
وفيها يمكن7الوان بلونات وللأسف مافيها أبيض فاخترت 3ألوان :
أصفر،برتقالي ،أحمرلأنه يناسب الأثاث ... وهذي ان شاءالله مابتنرمى، بعد الحفلة
بنسمها وأخليها للعيد أو لو فيه مناسبة تنفع أحط فيها البلونات..
+++
لقيت طريقة توصيل الكمبيوتر للتلفزيون بس ماطبقتها للآن لأن السلك اللي اشتريته
طلع موب هو المطلوب، فبرجع أبدله وان شاءالله يظبط..

والآن مازلت اطلبكم..

1- طريقة عمل البلونات الملفوفة جلست انا وأمي نجرب ومافلحنا..
+++
2- نشيد مناسب لزفة صديقتي المخطوبة.. وآخر للبنت اللي ولدت أقصد لمن نزفها وبنتها النونو؟؟
+++
3- من يون اجيب منفاخ زي الناس للبلونات، لأني اشتريت منفاخ مالي داعي أول ماينفخ البلونة،
إذا جيت سحبته عشان انفخ مرة ثانية سحب الهواء اللي تعبأ في البلونة حتى لو سديت البلونة بيدي..
+++
أحد يعرف من وين أجيب قرن الفانيليا الطبيعية اللي في موضوع الأستاذة دردشة؟؟
سألت هناكومحد رد ورجعت سألت الآن مرة ثانية وانتظر الرد.. :09: