حيا الله من لفانا وطب محلنا
بدون مقدمات ندخل بالموضوع<<<<وش الطاري شكلتس مصخنه
المهم ياوخياتي في يوم الجمعة الموافق 19/10 وبالتحديد الساعة التاسعة والنصف صباحا عيوني فتحت إشعارا بأن النوم قد خلص لكن رجعت أغمضهن والتساؤل يدور بخاطري وش تقومين له دامتس صايمة نامي( صيام الست)
وأنا صادقة الواحد لاصار موب حاصل له ياكل شي وشوله يقوم ينام أحسن له
بس ماش عيوني عاندتن وعيت تغمض شوي وجيب شطرطون أشرطنهن مير قلت يابنت الحلال من كثر رموشتس والله إن تنتف كله
وسلمت للأمر الواقع وقمت وأنا اللي أطلع للصالة <<<طبعا عقب ماغسلت خشتي موب كله نظافة بس أرحم أهلي يشفونن وأنا ماغسلت
المهم يوم طلعت وألقى أمي وأبي( الله يحفظهم) قاعدين وقدامهم ترمس القهوة يتفنجلون
ياويح قلبتس يامعلمة وشلون بتقاومين
يمكن يجوز لو اغط لساني بالفنجال
وأنا اللي اتلص بهم
ارحمون وقالوا لي تعالي تقهوي
تتوقعون وش رديت !!!
تحسبونن قلت صايمة!!!!
لا طبعا لأن احتمال كبيييييييير إنه مايمر ساعة على صيامي إلا وهو بخبر كان
طبعا مارديت سكت
واقعد أتجاهد أنا والشيطان
هو يقولي يالخبلة قهوة الجمعة ماتتفوت مع أهلتس وأنا أقول ياخي أخاف يقضي الشهر وأنا ماصمتقال لايبنت الحلال بيمديك
قلت ماش أخاف أقحن هالترمس همن لاخلص أتحسف
قال إبليس ماعليتس أنا أصوم عنتس
مير يوم قال جملته الأخيرة وأنا اللي أتعوذ من إبليس وانفهق (وتشطر عن الترمس) موب يعني الشطارة وهي الدفارة لا يعني وخرت عنه
وتروشن فوق الكنب( التروشن هو الجلوس في مكان مرتفع بعد أن كنتي جالسة في مكان منخفض)
وبينما أنا أحوس بجوالي
إلا حدث مالم يكن بالحسبان
فبينما أمي وأبي يتماعطان أطراف الحديث سمعت كلاما لم أفهمه في بادئ الأمر
أبي: وين الشبك!!؟
أمي: مدري اسأل الشغالات<<<<الله يخلف عليتس يمه أنتي ربة البيت وماتدلينه أجل أنا ماعلي شرهة
أبي: بروح أجيب دجاج
أمي: جب همبرقر وخبز بعد
طبعا هنا أنا أحسب الدعوة البزران يبون يتغدون همبرقر بس وش قصة الدجاج!!
لم أطرح أي سؤال بعد وعدت أتلص بجوالي
أمي: عبد الله ...عبدالله(( تسالم أبوي لأنه نزل ))
أبي: ماذا تريدين يا امرأة<<<< ترى أهلي يطلبونهم بالمسلسلات التاريخية بس يعييون يقولون وين ندعي عيالنا لاجيناكم نصور المشهد
أمي: لاتنسى جب الجمس
أبي: أصلا الجمس ملـَـبََّق عند الباب (ملبق : فعل ماضي مبني للمجهول ونائب الفاعل ضمير مستتر تقديره أبي ( وزمن التلبيق أمس بالليل)
أمي: بتصلي الجمعة هنا والا بالطريق!!؟؟
أبي: لاغديكم تجهزون ونصلي بالطريق
طبعا هنا أنا قلت مابدهاش الموضوع فيه إنا<<<صح النوم
قلت وش عندكم يمه
قالت همانا قايلين لتس ترى احتمال نكشت بكرة!!!؟؟
قلت إيه صح وصرنا بنكشت!!؟؟<<<سؤال غبي كل ذاك الحوار ومافهمتي شي يالدبشة
أمي : إيه روحي قومي خواتس
أنا : أي خوات بلا خوات بلا هم أنا فاضيتن لهن (وانا اللي أحطز على الأرض وتناوط ترمس القهوة وماردن إلا الحثال))
طبعا أنتم عارفين كشته وصيام ماينفع
حلاة الكشته بكثرة البلع
وإن مارجعتي ومعدتس تعورتس ماكنتس كشتي<<<قانون الدبيات
طبعا عقب ماشفطت الترمس تذكرت خواتي
رحت وقومتهن واستعدينا للكشتة وكلن أخذ عدته اللي يحتاجه بالبر
طبعا بما إني معودتكن ماكتب موضوع إلا الصور أكثر من الكلام فأنا مطقطقة لكن كم صورة
ونبدأ بشنطة أختي
زي منتوب شايفين بالصورة هذي الأغراض اللي تحتاجه بالبر( من وجهة نظر أختي)
<<<أجل أحد ياخذ معه أحمر خدود!! تتصكتس الشمس
وتتنقلبين سودا مير خلي عنتس الدلع والتميلحوهذي صورة شنطتي
يالله حسن الخاتمة كله كم سنة وحبوب الضغط والسكر والكلسترول قالطات بشنطتس
بس أحب أعطيكم معلومة عني تراي ماوادي شي اسمه مكياج ماعطان الله حب البنات والحريم له وكثر الله خيري لاحطيت روج
المهم ركبنا الجمس ومشينا وكانت خشة الجمس متوجهة نحو شعيب حول الثمامة بس بناقف نصلي الجمعة بالمحطة اللي بالثمامة
وفعلا وقفنا بالمحطة وشفت منظر يصلح يتصور وطبعا كلكم عارفين إني ماحب التصوير
بس عشانكم صورته لكم <<<<أرنب وش كبره 
عاد تصدقون أول ماشفت ذالكرسي وش ذكرت!!؟
ذكرت بضاعة أم تأبط أو بالأصح خردة أم تأبط<<<تكفون لاتعلمونه
بغيت أرسله له تعرضه بموضوعه بس قلت يابنت الحلال لاتحرشين وخلتس على قولة المثل (( إمشي عدل يحتار عدوك فيك))
وذا كرسي ثاني
شكل المحطة اسمه أم الكراسي المعتوهة الله لايبلانا
لاتروحون الموضوع له بقية
