الله يجزاك خير tvhs123الصراحه حمستيني انتي والاخوات الي معاك اني استغني عن الشغاله والحمد لله اني استغنيت عنها وانا الحين احس اني مرتاحه وحتى احس ان وقتي تنظم مو مثل اول وحتى زوجي مبسوط مني اني صايره اشتغل في بيتي لان بيتي عباره عن شقة صغيره وماعندي غير ولد واحد والله اني ادعي لك انتي والبنات ان الله يوفقكم ويسعدكم ......

مشكورين

عزيزتي
مبرووووووووووك على القرار الشجاع.. والله يوفقك..

خذي هالمبادئ الرئيسية اللي لازم تعتمدين عليها:

1-دائما كرري هالدعاء: اللهم اسخر لي ملائكة السماء وسكان الارض.

2- اجعلي نيتك عندما استغنيتي عن الخادمة هي ارضاء الله ثم الزوج وخدمة ابنائك.

3- أتت يوماً فاطمة رضي الله عنها النبي صلى الله عليه وسلم تشكو إليه ما تلقى في يديها من الرحى وتسأله خادماً فلم تجده فذكرت ذلك لعائشة رضي الله عنها ثم انصرفت فلما جاء الرسول صلى الله عليه وسلم أخبرته عائشة ، قال علي رضي الله عنه فجاءنا وقد أخذنا مضاجعنا فذهبنا نقوم فقال : " مكانكما " فجاء فقعد بيننا حتى وجدت برد قدميه على صدري فقال : " ألا أدلكما على ما هو خير من خادم ؟ إذا أويتما إلى فراشكما ، أو أخذتما مضاجعكما فكبرا أربعاً وثلاثين ، وسبحا ثلاثاً وثلاثين ، واحمدا ثلاثاً وثلاثين ، فهذا خير لكما من خادم " )) البخاري .
والله ياعزيزتي تحسين فيك نشاط زااااااايد اذا التزمتي فيها.

4-وقت التنظيف شغلي عندك شريط عن الدين او عن تربية الابناء او ماشابه. وبتلاقين انك مستمتعه. احياينا اكون مشغله شريط بالمطبخ واذا خلصت شغلي والشريط ماخلص اجلس امسح الثلاجه او اسوي اي شغل زياده عشان اسمع الشريط لآخره.

5-نظفي بيتك يوم الجمعه اذا هاليوم يناسبك وباقي الاسبوع فضي نفسك ساعه بس للبيت بحيث تشيلين معاك ساعه صغيره وتفردين لكل غرفه 10 دقايق بس.. ولازم تطلعين من الغرفه قبل انتهاؤها..
يعني مثلا شبي على الاكل الساعه 1 واطلعي من المطبخ ومعاك ساعة يد وسله التنظيف تحتوي(بخاخ فيه خليط ديتول وماء، فوطه)ومكنسه:

غرفة النوم في 10 دقايق:
رتبي السرير
علقي اي ملابس لزوجك
امسحي الكمدينات والتسريحه والشوفونيره.
اكنسي الارض
(طبعا انتي منظفه يوم الجمعه زين.. هذا مجرد تنظيف سطحي)

غرفة الاطفال 10 دقايق:
نفس غرفة النوم

الصالة 10 دقايق:
امسحي المكتبه والتليفزيون.
اكنسي الارضيه
اكنسي الكنب على السريع بمكنسة الكهرب
اعيدي ترتيب اي غرض طايح

الحمام 10 دقايق:
رشيه بمويه بعدين بخي من البخاخ وامسحي.
رشي كذلك الارضية وامسحي بمساحة الارضيات.
جيبي منشفه وامسحي فيها الارضية ونشفيها تمام.. لأن مايحوس الدنيا الا نقعة المويه الباقيه بعد الغسل.. لا تقولين بتجف من نفسها.. خلال هالوقت ماتدرين من يدخل للحمام ويطلع.. فلا تطلعين الا وهو نااااااااشف.

المجلسين وحمامهم ما اعتقد له داعي تجينهم اذا هم مقفولين!! مجرد تنظيفهم يوم الجمعه كافي.

المطبخ 10 دقايق:
بما انك ماتطبخين وسط الاسبوع:
اغسلي المتراكم من اطباق او كاسات
بخي الطاوله وامسحيها على السريع
اكنسي الارضية على السريع.

وخذي هالافكار اللي بتختصر عليك الشغل:

افكار غرفة النوم:
لا تخلين على الكمدينه او التسريحه تحف.. اسرع في التنظيف :)
حطي سله للملابس اللي تحتاج لغسيل في غرفة النوم.

افكار المطبخ:
1-حطي طشت ماء ساخن في المغسلة مع شوي منظف (فيري مثلا) وكل صحن او كاس تستخدمينه حطيه فيه.
وبكذا اسرع في غسيلهم.. ماتحتاجين دعك وحك وفرك كثير.. ومنظر المطبخ بشكل عام بيكون مرتب.
2-لا تحطين المواعين المغسوله في الشبك الخاص فيهم.
جيبي فوطه كبيره نوعا ما من افضل انواع الفوط اللي تنشف زيييين.. وافرشيها على الطاوله.. واذا غسلتي المواعين حطيها عليه.. وبكذا بتنشف المواعين اسسسسسسرع وبدون ما تضطرين لتنشيفها العادي بالفوطه.. وخاصة الكاسات. (من افضل انواع الفوط هي الموجوده في باخشوين او احرامات الحج.. ولاحظي ان الفوط تغسل بمنظف فقط وبدون لينور او اي منعم.. لأنه يترك عليها طبقه خفيفه تقلل من قدرتها على الامتصاص)
3-بوقت الطبخ حطي مفرش سفره البلاستيك (اللي يستخدم مره وحده) على الطاولة اللي جنب الفرن ولا تستخدمين غير هالطاوله.. قشري عليها الخضار وقطعيهم والدجاج وغيره، وبدون ما ترمين القشور او اي شي.. واذا انتهيتي من الطبخ.. اجمعي السفره وارميها وبس.
4- اغسلي فرنك وغلفي سطحه بقصدير.. وكل يوم نظفيه اي بقعه تنكب على القصدير بشكل سريع.. ويوم الجمعه اذا جاء وقت التنظيف العميق شيلي القصدير وبدليه.. وبكذا بيعيش فرنك جديييييد. واسواء شي بالعالم هو دعك الفرن.. اووووووف اكرهه :) بس بعد استخدامي للقصدير ارتحت مره.
5-اطبعي عندك مجموعه من الاكلات السهله اللي ماتاخذ وقت في الاعداد لكن مو مشكله لو تاخذ وقت بالطبخ.. زي السليق والجريش.. جهزيهم في عشر دقايق وخليهم على النار وروحي اشتغلي بالبيت الى ان يستووا.
وبحط لك مجموعه اكلات من هالنوع.


افكار للحمام:
1-حطي بالحمام بخاخ ماء ومطهر(ديتول). عشان بعد استخدامك تبخين على السريع.
2-حطي بالسيفون (عزك الله) الكوره الزرقاء عشان النظافه والتعقيم والريحه الحلوه.
3-ركبي على الجدار 4 علاقات للمناشف.. لكل شخص منشفته اليومية اللي مسؤول عنها.. وهالمناشف ماراح تغسل الا مره بالاسبوع.
4-زبالة الحمام (عزك الله) حطي فيها 10 اكياس زباله مطبقه في قاعدتها بعدين فكي واحد فوقهم. واذا شلتي الكيس المليان بتلاقين تحته عشره مطبقين.. اسحبي واحد منهم وركبيه على الزباله. ما ادري اذا شرحي واضح ولا لا.

طبخه سهله:
جيبي دجاجه مقطعه (خذي صحون مقطعه اسرع) تبليها من الليل او على الاقل لمدة ساعه ب:
2فص ثوم. (ممكن تستخدمين بودرة الثوم)
ليمونه معصوره.
ملح وفلفل وكاري بودره.

حطي الدجاج بصينية فرن.
جيبي خضار مجمده وحطيها بباقي التتبيله مع كاس ماء وقلبيهم وحطيهم جنب الدجاجه.. غلفيها بقصدير ودخليها الفرن.. اطلعي خلصي شغلك بالبيت لمدة نصف ساعه وبتلاقينه جاهز.
ممكن تحمرينه من فوق.
وممكن تستبدلين الكاري بصلصه او طماطه معصوره.
ممكن تضيفين لها بصله مقطعه ارباع :)
وبالهناء والعافية.

ممكن اذا طبختي يوم الخميس.. مثلا سليق.. تجهزين تتبيلة الدجاج وتتبلينه وتحطينه بالثلاجه لبكره.