باقي فرح
•
رجعت من اقسى ذكرى بحياتي لاقسى موقف اعايشه الحين...
هذاني اوافق على مشاري..بس عشان الغالية ..
اخاف تغيب عن عيني ..
وخاطرها علي...
بعدين وش انا خسراااااااااااااانة ..لو وافقت..
يعني مشاري ماراح يسويها ولو سواها وش بخسر...
مانا مطلقة مطلقة تزوجته والا لا..
رحت المطبخ بجيب عشاء امي..شفت فيصل يدخل بيشرب ماء..
هدى: هلا فيصل..عاش من شافك
فيصل: ..............."مافي رد"
هدى: ترى امي تسال عنك..
طنشني وقال : خلود دقت الصبح على البيت تبيك...دقي عليها..
وطلع..صدق ماينعطى وجه ..جدعت الملعقة على الباب ..
حسيت بقهر....كافي همي لاتزيد ناري حطب..والله مانيب ناقصتك ..
عقب مابشرني بزواج خالد ..ماكلمني ..حتى بملكة فهد..
طلع وخلاني ..جاب الله فهد ورحت معه..وبعدين معه..
شلت الصينية ..وطلعت للصالة ..شفته قاعد جنب امي ..
ويده على راسها..
هدى: يمه يالله العشاء..
فيصل: صحيح وافقتي..
طنشته زي ماتو اكلمه ويطنشني..
امي : هدى !! فيصل يكلمك وراك ماتردين..
هدى: هماه غاسل يديه مني..وشوله يسالني!!!
قمت ..ورحت لغرفتي ابدق على خلود..
امس شكلها ماعجبني ابداً..ابسالها وش قالها فهد بالمطبخ..
مكتوب علينا يابنت اخوي..
نحب وماننحب..
هدى: الوووووووووو
خلود: هلا والله ..زين فكرتي تدقين...
هدى: اصلاً تو عمك يتكرم و يقولي..وش اخبارك عقب البارح..
خلود تنتهد..بس تكفين ياخلود..ترى اللي فيني كافيني..
خلود: هدى ..ودي اكلمك ممكن...
قاطعتها: لا والله وانتي الحين تكلمين قريني...!!
خلود: صدق راااااااااايقة ..صحيح لقالوا اللي يده في الماء مو زي اللي يده بالناااااااااار...
انا بمووووت من الضيقة...امي تمووووت قدامي...
ومجبورة على مشاري وان اكون زوجة ثانية...
وطاقة من فيصل اللي فعلا غسل يدينه مني ..
تكملها خلود بالنار وبالرواقة...
صرخت بها: خلود تدرين انك انسانة فاضية وتدورين المشاكل وضيقة الصدر تدوير..وش يخلي يدك بالناار.. لاعندك ام طايحة مريضة ..
كل شوي تقولين ماتت ولاعندك اخو زعلان عليك
ومحملك مرض امك..ولاعندك حبيب تزوجك وضحك عليك
وجدعك جدعة كلاب وعزمك على زواجه..
ولا عندك خاطب يبيك زوجة ثانية ..وام تضغط عليك ..
تبي تزوجك و تمووت..حراااااااااااام عليك ياخلود..
مايحس بالجمرة الا واطيهاااا...
بدليني بقلبك وانا رااااااااضية...
وانفجرت اصيح..حطيت يديني على وجهي ..
وطاح الجوال من يدي..
سمعتها تقول: هدى هدى..
بس كافي خلالالالالالاص ارحموووووووووني...
مووتوني الف موته..
سمعت باب غرفتي يطق..
اكيد هذا فيصل الله يعيني عليك
قمت بغسل وجهي ..مابي يشوفني اصيح..
مع اني متاكدة مستحيل يخفى عليه حالي..
طلعت من الحمام..طاحت عيني على بطاقة عرس خااااااااااالد...
ذكرت يوم يجدعها فيصل بوجهي..وكم ضيقة صابتني وكم دمعة بكتني..
ااه ياخالد..كل ماحاولت انساك..تتجدد بقلبي ذكراااااااااك..
مسكتها ومزقتها بيديني..وانا اتمنى امززززق كل مشاعري وحبي لهالانسان...
حتى مافتحتها ولاقريت من هي ضحيته الجديدة..
حراااااااام عليك ياخالد اللي تسويه بي...
فتحت الباب...
هدى: نعم..
فيصل: خلود على التلفوون..
هدى : طيب..هذاي جاية..
فيصل: وش بك تصيحين!! ماتبين مشاري...تراه موب لازم..
شهقت من جديد وبديت اصيح.....فيصل بيذبحني...
امي تموووت وهو جاحد خبرها عني...يحسبها امه بلحاله..
وصديقه يبيني زوجه ثانية..وهو طول الوقت يقنعني..
ويقنع امي بهالمشاري ويوم رضيت قال موب غصب..ارحمني ..
نزلت وكلمت خلود..واعتذرت منها ..ياعمري ياخلود..
صندوق اسراري..ودايما ماانفجر الا بوجودها ..
مدري ..يمكن لاني ماارتاح الا لها..
شفت امي نايمة..وصدرها يرتفع وينزل بقوووة ..
ياقلبي هالقلب..كان عندي احساس ان امي بها مرض كاااايد..
بس فيصل جاحد عناااا..وياليته خاب ظني
فكرت وش بتصير حياتي لو ماتت امي..
وفيصل تزوج وخلاني..وجلست بهالبيت الكبير..
بلحالي..وحيدة ..لارجل ولا ولد ولااهل..
يارب خذني قبل لايجي هاليــــــــــــــــــــــــــــــــــــوم...
طبعاً عقب ماحصل فيصل موافقتي على خويه..
بدت قصايد المدح بمشاري عنتر زمانه..
ورجع يكلمني زي اول..
بس انا ماراح اسامحه ..كانه غسل يدينه مني
انا بقطع يدي قبل لاتمتد له..
لايكون على باله ..وافقت عشان خاطره..
لو يمووت ماسويتها ..
بس ..عشان خاطر الغالية ..اللي دموعها ورجاويها
تفتت الحجر ..
فمابالكم بقلب ضعيف جريح نازف..
ملته ندوب الليالي السوداء..بغدرها
باقي فرح
•
*****************
الاثنين
فارس
2.30 ظهراً
******************
يالطيف على هالحـــــــــــر بالرياض ..شئ غير طبيعي..
وقفت عند الاشارة ..وانواع حرب الاعصاب..
هذا يضرب البوري..وهذا مطلع راسه ويسب ويلعن..
وواحد باقصى اليسار ويجي لاف عليك بيلف يمين ...
الناس صايرين فضيعين..
لمحت ولد صغير بهالقايلة يركض بين السيارات..
معه قوارير ماء ..تاملته ..هالحين وانا بهاللكزس..وبهالبراد..
واعصابي تلفانة..اجل وشلون هالبزر..
وش اللي حادة على هالشموس والحر الا الفقر..
فتحت دريشتي ولفحن ذاك السموم اللي يصهر الحديد..
يالله يارب انك ترحمنا..
مديت له يدي بعشرة ريال..وجاء بيعطيني كل القوارير
اللي بيده <<<خمس قوارير..اشرت له لا..هاذي لك..
رجعها لي..وشكله متلهف عليها ..بس عزة النفس..
عييت اخذها وصكيت دريشتي وانا افكر بسر هالولد..
يعني ناااس تموت من الفقر وناااس من البطرة ماتدري وشلون تصرف دراهمها..وانا غارق بافكاري..
وقفت قدام باب بيتنا ...يووووه نسيت اشري جريدة الرياض..
ايه موب لازم هماه اليوم موب خميس ..
يعني باقي فرح ماهيب منزلة شئ هاليوم...
امي: هلا والله يافارس..وراك تاخرت اليوم مهيب عادك..
فارس: ماتاخرت بس..زحمة الرياااااااض ..يالطيف..
امي: مازهمت عليك هيفاء..مدري متى اليوم بتطلع!!!
فارس: لا ..يمكن بتجي مع خلود اليوم...
دخلت سارة وخدودها حمرا ووجهها يصب عرق...
سلمت علينا وجدعت شنطتها وعبايتها..
سارة وهي توقف تحت السبيلت: يوووووووه يهالحر...موب طبيعي...
زيااااااااد وهو منسدح يتفرج على مباراة: لا يالبطريق..
سارة:..اعوذ بالله ..من هالضب..بس يتحراني افتح اثمي عشان يعلق...
زيااد: لا يصفط موب يعلق ههههههههههههههه
سارة تتطنز: ياخف دمك ..سبحان من خلقك..
زياااد: مستغني عن شهادتك يالدافورة..
امي نادت سارة من المطبخ: سارة دقي على هيفاء شوفيها متى بتجي...
سارة : سمي يايمه
رفعت السماعة ..ودقت عليها...
سارة: السلام عليكم..
,,,,,,,,,,,,,,,,,,,,
سارة: اقول هيفاء متي بتجيين البيت...
,,,,,,,,,,,,,,,,,,,
فارس:سارة....قولي لها تجيب جريدة الرياض على طريقها..
****: يقولك فارس جيبي جريدة الرياض وانتي جايه...
,,,,,,,,,,,,,,,,,,,,,,,
ناظرتني سارة وقالت: تقول لا ..باقي فرح ..
ماتنزل شئ اليوم..هههههههههه ايه قلت له..
استغربت ..معقول هيفاء تتابع باقي فرح...!!
تصدقون..انا دايما الاحظ جريدة الخميس تكون مقصصة..
وخصوصا زاوية باقي فرح..
ااااااااها يعني صرتي انتي ياهيفاء اللي تقصقصين...
جعل يدك للقص...مالقيتي الا مقالات باقي فرح..
بس غريبة عمرها ماجابت طاري انها تقرى لها...
رغم اني دايم هاق الناس بها...
حسيت ان ورى هيفاء سر..من ورى اهتمامها بباقي فرح..
..اجل ليش تحتفظ بكل مقالاتها...؟؟
يمكن لانها معجبتها زي ماهي معجبتني..يمكن
بس مدري ليه هالشهر مقالاتها مررررررررة حزينة..كئيبة
كلها الم ودمووووووووع وغدر وبلاوي متلتلة..
احيانا ..امسك دمعتي لاتنزل..واحيانا غصب علي تنزل
والله ارحمها..وكاني اعيش معاناتها..توصف مشاعرها بطريقة
تجبرك تلبس ثوبها وتحس بنبضات قلبها...
مسكينة..الله يفرج كربتها..ويبدل حزنها فرحا يارب...
هذا اكيد عمي فيصل ..عطاها عين..
اذكره يقول : مراهقة فاضية مابعد صرقعتها الدنيا...
وهذاها الدنياااااااااا صرقعة ابوها ..من وراها ههههههههههههه
اااااااه منك ياباقي فرح..قد انجرح
بس لو ادري..من تكونين..
ومنهو حبيب قلبك اللي طعنك..وبظهرك..
والله لاشرب من دمه..وانتقم لك..
بس ترجعين تبدعين ..كما كنتي
نجما في سماء الابداع والفن..تسطعين...
وترجع الفرحة..تشرق على قلبك الحزين...
وقررت ...من الان فصاعدا..انا اللي لازم احتفظ بمقالاتها موب هيفاء...
باقي فرح
•
بعد صلاة المغرب..رحت لامي..لولوة..ياقلبي عليهااااااااا..
انا عرفت حقيقة مرضها..من سلمان..
الله يشفيها ويخليها لناااااااااا يارب...
لقيت عندها طارق وعمتي شيخة...وعمي فيصل وهدى
سلمت عليهم..
فارس: وشلونك يالغالية...شدة وتزول..لاباس عليك..
امي: الله يسلم عمرك ياوليدي..يالله شد حيلك ..هذا فهد واعرس ..
ياللي دايم تتعلث بوه..شد حيلك ..وخل ابوك يزوجكم بليلة وحدة..
خلون افرح بكم قبل لااموت ياوليدي...
فارس: تو الناس علينا يايمة..وبعدين..زوجي هالعانس اللي جالسن بجنبك..
((والتفت على فيصل))
فيصل: فرووس ..عويذ الله من شرك..
طارق: الا صدق يافيصل..انت لما متى بتجلس..
لاتفوتك..نوف اخت عزيزة..اخطبها ترى الخطاب عليها طوابيير..
فيصل: طارق!!!..
شيخة: وهو صادق وليدي..لمتى بتبتل..اللي كبرك عيالهم طولك..
امي لولوة: الله يهديك..يافيصل..تكفى وانا امك..فرحني..الله يفرح قلبك
فيصل حب راسها: الله يعطيك طولة العمر يايمه..ابشري..بس موب الحين...
امي لولوة: من عرفتك وانت تقول موب الحين..كح كح..
والتفت على عمتي شيخة وهي تقول: شيخة وانا امك...وصليني للحمام
..الله يكرمك..
قامت عمتي شيخة ومسكتها ..وطلعن من الغرفة...
طارق: هاه وش قلت يافيصل..اعزم واخطب البنت..لاتفوتك
فيصل: طارق..فكنا هالحين مشغولين بعرس هدى..
وعقبها يصير خير..ان شاء الله..
معقول عمتي هدى بتعرس!! بس من بتاخذ!! غريبة..
شكل هالخبر طازج توه صاير..زين اول مرة ادري بشئ قبل سلمانوه..
جيت بسال من بتاخذ..بس سمعت صرخة طارق وسكت
طارق: عرس هدى!!!!
حسيته عصب مرررررة والتفت على هدى..
طارق: صدق وافقتي!!! يعني مايهنا لك الا رجل معرس!!!
لا ويحب مرته..وعنده بنتين!!! من اللي فر راسك ...ترى ماراح يمديك تطلعين من هالباب الا وبترجعين..لايضحك عليك هالفيصل..زي ماضحك عليك بخالد...
فيصل: طاااااااااااااارق...ضف لسانك احسن لك؟؟؟
طارق: يعني قضوا الرجال بهالدنيا..ومالقيت الا مشاري..!!!!
التفت طارق على هدى وهو يقول: تذكري كلامي ياخالة ..بعدين ..
وقولي مانصحتك..
وشال شماغه وطلع..
رحمت عمتي هدى..كسرت خاطري ....نزلت راسها..
ودموووعها..على خدها اربع..
حسيت جلستي غلط ..ناظرت فيصل وابتسمت
فارس: يعني اضف وجهي احسن!!!
فيصل: ايه احسن..!!
فارس: ابشر ياعم..ووقفت وطمبست وحبيت راس عمتي هدى وقلت: مبرووك..
شهقت ...وانفجرت تصيح..
انا مسكت الباب ..وماتشوفون الا غباااااااااري
اصلا وش جابني اليوم!!!!
*******************************
*نهاية الحلقة التاسعة*
الصفحة الأخيرة
رقيت لغرفتي..فتحت االباب..وحطيت يدي..وشغلت اللمبة..
طاحت عيوني الدامعة على كيس كرتون سكري صغير..
منقوش بالورد الليلكي..محطوط على سريري
استغربت!!! من اللي جته الجرأة ودخل غرفتي..
تقدمت للسرير..وفتحت الكيس..
لقيت علبة صغيرة مغلفة بكل عناية وذوووق..وشرايط المخمل..
تنساب حولها بكل جماااال..
فتحت الكرت ..المنقوش بنفس نقش الكيس..
خلود..
اعذريني..مقدر اشوفك واتجاهلك..
لو تجاهلتيني..
هذا النصيب..سامحيني والله مقدر امنعه..
مو بيديني..
ارجو..اهتمامي مايضايقك..
لانك ساكنة بنبض الوريد..
وغلاك ياخلود باقي ..
رغم الظروف.. بقلبي اكيد..
المخلصة
هيفــــــــاء
فتحت العلبة المخمل السوداء..
لقيت تعليقة ناااااااعمة على شكل دمعة..
وكأن هيفاء تؤكد لي ان حياتي بقضيها دمع بدمووووع..
ضميت السلسال على صدري..وانا اصيييييييح..
صعب ..وصعب جدا..تشوف غيرك يتألم بسببك..وانت تتألم بسبب غيره..
الاحساس بالذنب والالم اكبر من انه ينوصف..
*******************
الخميس
هـــــدى
1.30 صباحا
******************
يوم نزلت للصالة وانا لابسة بروح لبيت اخوي سعود...مع خلود
تفاجات بفهد جالس..وحاط يده تحت ذقنه..وشكله يهوجس..
هدى: العريس هنا ..لولوولولوليييش..الف مبرووووووووك...
سلمت عليه..واستغربت جيته
هدى: وش عندك!! معقول مضيع من ربشة الملكة وجيت هنا بدال بيت اخوي سعود...
ضحك فهد..وقال: لا ..جاي ابشرك ان الفيزا طلعت ..مبرووووووك..ومد لي جوازي
صرخت بفررررح..والله ..وخميته وحبيته على راسه..
هدى: مشكووووووووور يافهد..قل امين الله يوفقك بزواجك..وفجأة ذكرت خلود..
وينها اللي كانت تصارخ بسرعة بسرعة..وين ذلفت..تلفت ..
بس سمعته يقول
فهد:مين!!! خلووووووود؟؟؟
استغربت وش دراه
هدى: ايه وينها كانت تصارخ ..تبيني اخلص وانزل..
فهد: طست لبيتهم..
هدى: وشلون راحت وخلتني..خابرتها تنتظرني..بعدين انت وش دراك!!!
فهد ارتبك وقال : شفتها تركب مع شاكر..
هدى بتشكيك: ووش دراك انها خلود!!! شايفها!!!
فهد بنفاد صبر:بسم الله عليّ ..لاماشفتها وبعدين هو تحقيق!!!
هالحين تبين تروحين يالله اركبي...
بالسياااااااااارة..التفت علي فهد وقال
فهد: الا وش جايب هالخلود اليوم عندكم!!!
والا ماتدري ان اليوم ملكة اختها...
هدى: واذا صارت ملكة اختها ..ممنوع تطلع!!
فهد: وش يطلعها!!! كان قعدت مع نجود....تشوف وش محتاجه..
ناقصها شئ..موب تدربي راسها بمطبخكم!!!اشهد انها مادلها السنع والذرابة...
هدى: بمطبخناااااااا؟؟ فهد...هماك تقول انك ماشفتها..وشلون صارت بمطبخنااااااا
فهد بارتباك: الا شفت شيفتها اليوم ..هبلتني ..احسبها انتي بعطيك الجواز..
هدى: صادق!!! ووش قلت لها
فهد: وش تتوقعين..انقلعي لبيتكم..وش جايبك بذااااااا
هدى: لا والله؟؟ لاتصير شغالة عندك وحنا ماندري...
بعدين هي ماجت لبيتك عشان تطردها انت ووجهك..زين اوريك يافهيدان...
فهد: انا اللي مهبلن بي..وش هالدفاع المستميت عنها..بذااا انتي وهناك هويف..
وش سالفة هالخلود..والله ولاتقول بتدخلكم الجنة..ذبحتونا عندها..
سبحان اللي خلق وفرق بينها وبين نجود..
صرخت عليه من الحمق: فهد!!!!! الا خلود..
مااسمحلك تتكلم عنها بهالطريقة..
فهد باستهزاء..يرفع يدينه للسماء
ويقول: استغفر الله استغفر الله..الا خلود يارب..خير ان شاء الله..
ومن تكون هالخلود!!!!
هدى: من تكون انت عشان تتكلم عنها..بهالطريقة!!!
فهد بكل غرور : انا فـــــهـــــد..
~~~~~~~~~~~~~~
وحنا راجعين من ملكة فهد ونجود..
طاحت يدي على ورقة بسيارة فيصل ..
اخذتها وهو نازل للصيدلية يجيب علاج لامي..فتحتها بسرعة وكاني
لمحت اسم امي..شكل هالورقة تتعلق بمرضها..رفعت راسي..
شفت فيصل مقبل وبيده كيس..بسرعة ..ثنيتها وحطيتها بشنطتي
بسرعة قبل لايشوفني...
وصلت البيت ..رحت لغرفتها..فتحت الباب بشوويش ..لقيتها نايمة..
حبيت راسها ..ورحت لغرفتي..
كنت تعبااااااااااانة وبمجرد مالامس راسي المخدة غرقت بالنوووووووووووووم..ونسيت سالفة الورقة...
~~~~~~~~~~~~~~~
قمت الصبح ..ونزلت عند امي..طول الوقت وهي تكح...
بقوووووة..
وماسكتت لما استفرغت دم((وانتم بكرامة))
ارتعت..نظفتها..
وناديت كانتي تنظف المكان..شربتها ماء..
وغمضت عيونها بكل تعب..وجدعت راسها على الوسادة...
انا قايلة لكم امي..بها شئ كايد ..مهي سالفة سكر وكحة...
فجأة ذكرت الورقة..
نقزت فوق ..دخلت غرفتي..ونسيت اصك الباب ...
كنت مستعجلة....
فتحت شنطتي..وطلعت الورقة..قريتها...
مرة ...مرتين ..لا ..مستحيل...
سكرتها ..فتحتها..قريتها من جديد..لعلها الحروف تبدلت والا الكلمات تغيرت..
صحيح انا منيب فلتة بالانجليزي بس فهمت المكتووووب
وياليتني مافهمته
هذا تقرير عن حالة امي...حطيت يدي على اثمي:..Lung Cancer
يعني امي
مصاااااااااااااااااااااابة بسرطاااااااااااااان الرئة...
ياويلي عليك يايمة..
ثنيت الورقة..وانثنت روحي بهالخبر..ضاقت بي الدنيا..
دارت بي غرفتي..مااصدق..امي مريضة وبتمووووت وتتركني..
طاحت الورقة من يدي..ارتجفت...رمشت عيوني..انا بكابوووس..لالا ..
لايكون هذا هو حلمي...!!!
وابووووووووووي!! يبيهااااااا!!!
طحت على ركبتي..كلش ولاامي..ربي ارحمني..
وصرخت باعلى صوتي..
يمــــــــــــــــــــــــه ....
واظلمت الدنيا بعيوني...
غبت عن هالكوووووون باحزانه والامه وجروووحه...
~~~~~~~~~~~~~~
فتحت عيوني..وانا احس الدنيا تدور بي..
رمشت ..مرة مرتين ..مدري ويني..بس حسيت بامان ..
يوم تلاقت عيوني بعيونها
وراسي بحضنها..ويديها تمسح على شعري..وبصوت انهكه التعب والمرض والقلق
امي: هدى .. صحيتي ..؟؟
مسكت يدها الثمها..حسيت اني بفقدها..تمسكت بها..
وصحت: يمة ..يمه لاتخليني ..
امي ترصني على صدرها:عسى ماشر ..جتني كانتي تقول انك طايحة ومغمى عليك..
مارديت عليها........
امي باصرار : وش بك ياهدى..نعنبو ابوك..ذبحتيني قبل يومي..يابنيتي
ترى اللي بي كافيني..
هدى:.............."صياح ودموووع"
حطيت يدي على راسي..وشهقاتي تتوالى..ودموووعي تسح بغزارة ..
عجزت انطق باي حرررف..لا ..وش اقووول يايمه..
اقوول ان مكتوب علي الشقاء بهالدنيا..
مكتوب علي انحرم من الناس اللي احبهم..
شهقت ..وغبت في نوباااااااات حزني ومصابي
امي: يابنيتي ..وراك..وش اللي مضايقك..ضيقتي صدري عليك؟؟
زااااااااد صياحي..يمه وش اقوووول..خليها بقلبي ..خليني امووووت قبل لااذوووووووق فراقك يايمه...
امي سكتت وسرحت تفكر..وقالت: للحين تحبينه ..ياهدى انسيه..الرجال بيعرس..
ادعي ربي انه يمحيه من خاطرك يابنيتي...
حطيت يدي على وجهي..وشهقت ..يمه انتي وين وانا وووووين..
ليته فراق خالد اللي مضايقني..هذا قطرة ببحر حزني عليك يايمة..
~~~~~~~~~~~~~~~~~
من عقب مادريت بحقيقة مرض..الغالية..
كل شئ هاااااااااان بعيني..
خلاص ..لاسفر ..ولا زوج..يعوضوني عن ريحة امي....
وامي تردد الموت على لسانها..والاعمار بيد الله ..
ماابي من هالدنيا غير رضاها..
فكرت بموضوع مشاري..خلاص..اللي تبينه يايمه بسويه
ولو على حساب سعادتي..
نزلت ..لقيتها جالسة على حيلها...وكانتي جايبة لها كاس ماء...
شربت يوم خلصت ..جدعت راسها بتعب وهي تكح بقووووة..
..جلست جنبها ..حبيت راسها...
ومسكت يدها..وحبيتها..ودقات قلبي تزيد مع كحتها اللي احسها ..
بتفكك ضلوعها ..
ياقلبي عليك يالغالية...وش دنيتي بلياااااااااااك...
ياحضني الدافي..يالبلسم الشافي..
هدى: وشلونك ..وش تحسين به يايمه..
امي ضغطت على يديني..وكاننها بتتاكد اني انا اللي اكلمها..
امي: طيبة يابنيتي..كح كح كح ..وين اخوك ..ماشفته اليوم...
هدى: من عقب صلاة الجمعة ماجاء..خابرته معزوم..
اليوم جن خواتي شيخة وفاطمة ..لانهن امس راحن للملكة وماشافن امي..
ماجابن احد من عيالهن..جاء سلمان عقب صلاة العشاء..وراحن معه..
تذكرت الموضوع اللي بقوله لامي..يالله اجدعي همه الحين..
سكت ..مدري ..عجزت انطقها ..
بس لازم..لازم اقولها واريحها وارتاااااح..
غمضت عيوني لاتنفضح مشاعري..
هدى: يمه تراني موافقة على مشاري..
امي: هاه..
ياربيه والله ماودي اقولها ثانية..كفاية عذااااااااااااااااب..
هدى: اقول..خلاص موافقة اخذ مشاري يايمه...
رفعت عيونها امي تناظرني..شفت دمعتها ..
ليه يايمه تصيحين موب هذا اللي تبينه..
خلاص انا مستعدة اضحي بروحي بس اشوفك مرتاحة..
وراضية علي...
امي: هدى ..انتي موافقة من خاطرك ..والا عشاني يابنيتي..
هدى:......................."مافي رد"
امي: يابنيتي ماودي اغصبك على شئ..
يابنيتي برايك ماتبين مشاري..انا ماودي اغصبك كفاية اللي جاك.. بس طلبتك لاتسافرين وتتركيني..تكفين يابنيتي..
وش بيجيني اكثر مماجاني...الشخص اللي حبيته ..وتزوجته ..
ضحك علي واوهمني انه يحبني و يبادلني مشاعري ..
عيشني بين السماء والارض..وبغمضة عين ..طلقني...
مدري ليه ذكرى ذاك اليوم ..زارتني..ناقصني احزان..
~~~~~~~~~~~~
خالد متلعثم: هدى..
هدى: لبيه ياقلب وروووح هدى..
خالد..عطاني ظهره وناظر الدريشة ..واخذ نفس طوويل..
خالد: ابكلمك بموضوع يهمنا حنا الاثنين...بس قراري مافيه رجعة...
انقبض قلبي..وحطيت يدي على كتفه ..
ابيه يطالعني..خالد..اعرفه من نظره..وش اللي مكدر خاطره..
ومضايقه..بس تفاجات ..يوم شال يدي عن كتفه..
ونظراته..تتفحصني..وكانه مشمئز مني..
هدى بقلق: خالد وش فيك...تراك خوفتني!! وش صاير!!
سكت مارد
عدت السؤال ..وعدته ..بلااجابه..
صرخت فيه ..وعيونه معلقه بنظراته اللي تتفحصني...
هدى: خالد تكفى قــــل وريحني...تكلم قل اي شئ!!!
بكل جمووود قالها.........
خالد: هدى ..انتي طاااااااااااااااااااااااااااااالق...
شخصت..للحظة كل شئ بهالكون سكن...
طااااااااااااالق!!!
رمشت بعيوني..
وحطيت يدي على اثمي...وقف قلبي..اكيد يمزح..اكيد..هذا مقلب ..
خالد ابدا مايسويها...
بس اللي اكد لي ..دمعة شفتها بعينه...
انا متاكدة لليوم..من ذيك الدمعة...
وش سر هالدمعة ياهدى!!!
نفسي اعرف ..يمكن لاعرفتها ..
عرفت انا باي ذنب حملت لقب مطلقة!!!
طحت على ركبي..ومسكت راسي..
انربط لساني...وانشل كياني...
حسيت بالدنيا تدور تدوووووووور من حولي...
وشو يعني طااااااااااااااااااالق...
يعني انتهينا ...كذا بكل بساطة!!
يمكن من هول الصدمة مااستوعبت اللي قاعد يصير قدامي!!
سمعت صوته ..وهو يفتح باب الشقة بيطلع
خالد: جهزي اغراضك ..بدق على فيصل يجي ياخذك...!!! مع السلامة
كانت هاذي اخر جملة انقالت بيننا ...
~~~~~~~~~~~~~~~~~~~~~~~