باقي فرح :

๑۩۞۩๑ الحلــــقة الـــرابــــــــــعــــــــــة ๑۩۞۩๑ ناظرت الجوال ..ياربيه ..اول هدى وهالحين فهد..والله ماثور غيرك يافصول دقيت على فهد فيصل: هلا فهد سامحني والله اني كنت معصب من هدى وحظك جابك لي فهد: يعني اتكلم والا بتعصب علي فيصل: افا عليك يالغالي..سم ..تفضل فهد: عمي ..انا قررت اتزووووووووووج وخرت السماعة عن اذني وجلست اناظر الاسم !! انا متاكد اني دااق على فهد ولد اخوي علي ..طيب وشلون ذي تصير!! ********************** الاربعاء نواف 6.00 مســـاء ********************* انا صدق متحسف على اللي صار الاربعاء اللي فات..بس كبريائي يمنعني من الاعتذار ..خصوصا لهالمشاااااااااااعل... دائما... ماعمري مديت يدي عليها ..الا احس بالذنب ..خصوصا اني احسها خبلة واللي بقلبها على لسانها..بس هي تستفزني ...الحين.. ابوي زعل علي ..وهاوشني لما قال امين..انت مانتب رجال..ثاني مرة تمد يدك على خواتك اقصها لك.. ومن هالكلالالالام ..واخذ مفتاح سيارتي مني كعقاب..اصلاً ماهمني والله بقد ماهمني ابوي اللي اذا زعل وش يرضيه ..عااد من حينها شعرتي حمراء عنده..حسبي الله عليك يالبرميل !! المصيبة انها للحين زعلانه وحابسة روحها بغرفتها...ضربني وبكى سبقني واشتكى سمعت جرس الباب..طلعت ابفتح نواف: هلا والله ..حيا الله من جانا..اقلطوووووووو فيصل: وانت على طول تفتح الباب ..ماتقول مين ..ترى الحرامية كاثرين هاليومين ويدورون على الشباب الوسيمين نواف: ههههههههههههاي..توك طمنتني بس ....انتبه لروحك !! هدى:يا هلا نواف ..وشلونك ..وينك ماتنشاااف!! ياكافي ماتقول عندي عمة ...لازم الواحد يعنَي عشان يسلم عليك!! نواف: اوووف اووف ...حشى بالعة رادو ياعمتي... هدى شالت نقابها..وغزت اصابعها على عيوني: بسم الله علي ..قل ماشاء الله..لاتنحتوني ..مابقالي غير هاللسان ..بعد خلوني طرمااااء.. فيصل: لا...مالك حق يانواف..عاد ..اذا انطرمت هدى ..من يهاوشني..ويقومني من عز نومي .. قاطعته هدى: منّه عليك.,.وكشت بيدها على فيصل..ودخلت البيت وخلتنااااااا.. ضحكت على حركتها..لف علي فيصل وقال: شفت بعينك..هذي اذا انطرمت ..بتشتغل بيدينها..فخلينا على اللسان ابرك.. نواف: ههههههههههههههههاي اجل السلامة مهنا سلالالالالامة .. فيصل ..وهو يشر بلا..: ابدا ..معي حتى يوسدووني بقبري هههههههههههه رحت انا وعمي للمجلس ..شغلت المكيف.. فيصل: ياكافي وش هالحّر..كم لكم ماشغلتوا المكيف...!! نواف: من يجلس بهالمجلس..خلود والا نجود..متى يتكرم فيصل ويسير علينا... فيصل: والله كان ماتبيني الا عشان تشغل المكيف عمره ماشتغل ... نواف: هههههههههههههههه... سواليف وضحك وتعليق ...توي اكتشف اني من زماااااااااان ماشفت عمومتي واهلي حسيت اني مقصر والله ..لازم امر امي لولوة ..وعماتي دخلنا البيت ..عشان خواتي بيسلمن على عمي فيصل.. امي وهي تصلح الجلال على وجهها: هلا والله بفيصل حياك الله.. فيصل : هلا بك ام نواف وشلونك ووشلون الاهل!! امي: بخير يامن الخير ..يسرك حالهم بشاير: عمي فيصل ...ليه ماجبتوا امي لولوة خلود: صدق عمي ليتكم جبتوها ....والله ما نسوى شئ بلاها فيصل: لاحوووووول يعني حنا ولاشئ ..بعدين قلنا هالطلعة ممنوع اصطحاب العجايز..وراهن علاج ونوم بدري ..امي يالله يالله تقاوم النوم بالاستراحة والا غيره لا مستحيل تتاخر عن موعدها... نواف: لا ياشيخ ...لاتقول انك ناوي تسهر عندنا اليوم.....الله يعدي هالليلة على خير بس !! انفجروا البنات بالضحك.... هدى: انا ماعلي ...جاية ومو بسهر وبس وبنام بعد...!!جايبة بجامتي معي..!! نقزت خلود وتعلقت برقبة عمتي هدى وتبوسها على راسها خلود: قولي والله .........من جدك هدى...ياسلالالالام وش صاير اليوم... مر الوقت ..والكل يسولف ويضحك وتعليق وطبعا لابد من مد الايدي المازحة بشاير: نجود ..صبي لي شاهي!! نجود: لا..البزران مايشربون شاهي.. بشاير: انا منب بزر..انا عمري تسع.. نجود: اذا صار عمرك تسع طعش ...صبيت لك شاهي.. بشاير: وانا بقعد لك لاصار عمري تسع طعش.. نجود باستغراب: ليش ووين بتطسين بعد..!! بشرينا من هالحين نفرح.. بشاير..ترز روحها وتقول: قدني اعرســــــــــــــــــت .. دخل ابوي وهو يقول: ياسعدي ذاك اليوم بعرسك يابشاير..لاسوي لك عرس لاصار ولااستوى.. نجود: ياسلام ..وحنا يعني بتسوي لنا عروس صارت واستوت... ابوي وهو يحضن بشاير اللي نطت بحجره: اكيد...بشاير غير..هاذي القعدة.. بشاير: يبه مايخالف اجي اسكن عندكم انا ورجلي...ماودي افارقكم... نجود: كل ذا عشان بيالة شاهي..يبه اقوم ازين لك بريق شاهي بس فكينا من دلعك... ضحكنا على هالبشاير..وعرسها ..مستعجلة على الفكة من البيت..لا وتبي رجلها يجي يسكن معها بالبيت ..ياحليلهم هالبزران...احلامهم على قدهم... ناظرني ابوي وحسيت وش بيقولي من نظراته..تكفى موب قدام الناس..خلينا نتكلم بعدين..بس ابوي مصر يتكلم ..مايرتاح الا اذا فشلني..يحس بنشوة غريبة... ابوي: الا مشاعل وينها !! جاك الموت ياتارك الصلاة ...الله يعينك يانواااااااااف امي:توني جاية من عندها... مصدعة وجالسة في غرفتها... ابوي عصب وناظرني : حسبي الله عليك من ولد..يالله قم قدامي واعتذر لها... نجود: يبه ترى هي غلطت على نواف بعد.. ابوي معصب: حتى ولو ..اخوك يحط راسه براس اخته اللي اصغر منه باربع سنين..حنا كلما قلنا كبر هالولد..نلقاه صغرعشر سنين.. قم يالله وش تحتري ..اختك لها اسبوع حابسة روحها بغرفتها..وانت تطلع و تضحك ولا كانك مسوي شئ !! نجود: يبه تراها والله تدلع ...تنزل تاخذ لها اكل وتروح غرفتها وتبلع...على بالها زعلانة خلود عصبت: لا والله ..تبينها تموت جوووع بعد!! بعدين موب بس نواف اللي لازم يعتذر لمشاعل حتى انتِ.. نجود بغرور: هههههههههاي احلمي لما اعتذر لها استحيت من عمي فيصل وعمتي هدى ..حسيتهم منحرجين من اللي قاعد يصير..قمنا ننشرغسيلنا قدامهم ..صح هم اهل ...بس ماودي يدرون اني مديت ايدي عليها ...قمت وقلت: عن اذنكم.. صعدت فوووق ..دقيت باب غرفة مشاعل ...بس محد يرد نواف: مشاعل !!! ..................."مافي رد" نواف: مشاعل !! ممكن تفتحين الباب!! ........................"مافي رد" فتحت الباب بهدوء..لقيتها ..منسدحة على سريرها ومعطية الباب ظهرها..حسبتها نايمة ..قربت منها .. قربت وقلت بهمس: مشاااااااااااااعل مشاعل: اطلع برااااااااا..... بلعت ريقي ..صار لنا اسبوع ماتكلمنا ..اصلا ماشفتها عقب ذاك الطرااق ياربيه ياقوي زعلها هالبنت ...اسبوع كامل !!! طالعة على ابوووي جلست على طرف السرير..وقلت: يالله قومي ..تحت فيه عمي فيصل وعمتي هدى..يسألون عنكِ؟؟ مشاعل: مابي اشوف احد.... نواف: مشاعل يالله عاااد بلا دلع ..مصختيها عااااد فزيت يوم نقزت مشاعل ..وصرخت علي: اطلع براااااااااا ...... نواف: طيب ..ابوي...قايلي ...قاطعتني..ودموعها تنزل ..: اقلب وجهك ..انت اخر من يتكلم ...مابي اشوف احد .. ياربيه شكلها..هالتكرونية ..زعلانة بجد..عاااد وش يرضيها ..من يوم هي بزر وهي لازعلت مارضت..صحيح انا غلطت بس بعد هي غلطت .. نواف : طيب واذا قلت اسف !! مشاعل تحط يدينها على وجهها ..وتصيــــــــــــــــح مشاعل: اذا ...اذا ...يعني حتى مافكرت تعتذر يالنذل..وهي تشاهق: اقلب وجهك اطلع اطلع ...وصرخت ....اطلــــــــــــــــــــــــــــــع مشاعل:الله ياخذك ويريحني منك ...او .,.ياخذني ويريحكم مني...... قلت بالسر..."اميـــــــــــــــــــــــــــــــــــــن يامشاعل" قمت بطلع..خلاص شكل مافي فايدة معها..للحين شايلة بخاطرها علي ..شفت جوالها على الطاولة يرن..شلته ..قريت ..الخبلة اريج ..يتصل بك.. ضحكت..خبلة وتصادق خبلات زيها... مديت لها الجوال..نزيت يوم سحبته من يدي..وصكته بالجدار..وانفك قسمين.. وتصرخ: اطلع براااااااا..اطلع برااااااااااااا... فتحت الباب وطلعت..قبل لااصكه التفت عليها..شفتها تجدع روحها على السرير... تنهدت..الله يعني عليك وعلى ابوووووووووي... *********************** الاربعاء فهـــــــــد 9.00 مساء *********************** من كلمت عمي فيصل..وانا مكتم ومتضاااااايق حدي..ليش يقولي كذا..!! انا ماسويت شئ غلط ياناس..حرام اني افكر اعرس واستقر زي خلق الله..يقول اصبر!! وليه اصبر ولمتى... انا ابيها ..ابيها ياناااااس ..بالعربي احبها وبس ..من يوم هي صغيرة وهي ببالي ..وهي بنت عمي وانا اقرب الناس لها ..الله يهديك يافيصل ..زين انها مهيب بنتك على هالرد!! طيب ..وشلون بفتح الموضوع مع ابوي وعمي سعود تنهدت ...الله يسهل امري يارب وقفت سيارتي قدام بيت اهلي..نزلت وانا شايل همّ ...مدري وشلون افاتحهم بهالموضوع.. بس لازم اواجههم ... دخلت الصالة لقيت زياد جالس ويشرب بيبسي ..وهو يتفرج على مباراة بالتلفزيون ..وهيفاء وسارة يتفرجن على مجلة ..شكلهن يتناقشن على مكياج والا مدري عن خرابيطهن فهد: السلام عليكم يااهل الدار الكل: وعليكم السلالالالالالالالالالام زياد: عسى ماشر ..متاخر هالمرة !!! جدعت روحي جنبه ..حسيت اني تعبااان وهم هالخطبة بقلبي ودي اجدعه...حطيت راسي على فخذه ..قلت: تعبااااااااان ..!! شف علي حرارة؟؟ زياد مستغرب..حط يده الباردة من البيبسي على جبهتي.. صرخت: اااااااااح..يدك ثلج... رفع زياد راسي وهو يقول: قم مابك الا العافية ..انشط من الحمااااااااااار... فهد: هههههههههههههه حرام عليك ..لاتنضلني ترى وراي عرس... انا حسيت ان اربع عيون بدت تحدق بي ...لا الحين صارن ست عيون... ابتسمت: وش فيكم ...اول مرة تشوفون واحد بيعرس!! هيفاء تناظر زيااد: ..انت متاكد انه ماعليه حرارة... سارة بفرح: والله يافهد ....من جدك تتكلم ..قامت تصرخ ..يمه تعالي لحقي ولدك فهد: هيه هيه ..وش فيكم انتي واياها زياااد..تعدل بجلسته ..وقعد يحك شوشته اللي طالت وماحلقها ..بس بجد معطيته لووك رهيب : هالحين فهد ..بديت اشك يمكن فيك حرارة داخلية... زهقت ...ياربيه هذا وانتم بس دريتوا بنيتي بالعرس ...اجل لو قلت لكم عن العروس ..وش بيكون موقفكم ...زي عمي فيصل!!! الله يستر... امي وهي تنزل الدرج : هلا والله ..فهد متى وصلت ياوليدي..الحمد لله على السلامة نقزت سارة وخمتها: يمـــــــــــــه لحقي على ولدك ...بيعرس امي والضحكة حول تشق حلقها : والله..!! بالمباااااااااارك ياوليدي الله يتمم لك بخير هيفاء: اي مبااارك واي جاسم يمه ...اول افهموا السالفة منه ناظرتهم وقلت: خلصتوا !!!!!!!!! التفت على امي وقلت : وشلونك يالغالية ...سامحين نسيت الاغراض الاسبوع اللي فات امي: لاماعليه ياوليدي مسموح ..اتصلت ببدرية واعتذرت منها ..وهي ماقصرت بنت الحلال ..قالت اهم شئ سلامتك متى ماوصلن ااااااااخ جاء طاري بدرية وابي عمي سعود وابوي عشان افاتحهم بالموضوع ****************** الخميس اريج 1.30 ظهراً ****************** اليوم مستانسة مررررة حنا اول ناس وصلنا الاستراحة .. نزلت من السيارة بسرعة وشلت عبايتي..وقعدت اركض واناقز..تخيلت الاستراحة فضااااااااااء وااااااسع..تخيلت نفسي هايدي..بين عنزاتها وكلبها بس وين بيتر.. اااااااااااه قعدت ادور حول نفسي..الجو..والثيل البارد تحت رجليني العارية .. حسسني بانتعاااش..يوووه يانا محروومة..من الانطلاق..والتحليق.. فوووووووووق..فوووووووق...السمااااااااااااء سمعت صوت سيارة جاي من وراي ...التفت ..شفتها سيارة خالي سعود... ..ركضت صوب السيارة وشوي بتصدمني..مانتبهت لنظرات السواق.. شاكرووه خلي يولي..شبع من كثر مايشوفني....ابشوف مشاعل جت والا لا,,,لاتكون ماجت والله لاوريها... واول ماوقفت السيارة ..على طول فتحت الباب... اريج: هلو افري بدي..... الناس ساكتيييييييييييين .... اريج وانا الهث: شوفوا عاااد...... ياويلكم تقولون مشاعل ماجت ..ترى والله لادف هالسيارة واطلعها برى الاستراحة ..والتفت على المرتبة اللي ورى لانها المكان المفضل لمشاعل ..وينك...مشاعل قلبي..!! ماعرفتها لانهم كلهم متغطيات ..ماعدى بشاير..اللي تناظرني بذهوووول وبالاخير قالت: اريج ..ترى هذا مو شاكر ..هذا اخوي نوااف اللي يسوق ..ليش ماتغطيتي!! قلت بدون شعور: وووجع .... وصبخت الباب بكل قوتي ..قمت اركض واصارخ ..وشعري طاير وراي دخلت الخيمة ..قمت اناقز واضرب وجهي كفوف... ياويلي ..ياويلي ياناس...قمت اناقز من الفشيلة ..ياربيه ليش انا خبلة ومطفوقة دخلت علي خلود ... وجهها احمرمن الضحك .. خلود: هههههههههه رهيبة انتي يااريج..ههههههههههههاي اريج: ياحمارة ليش ساكتة ..ليش ماتكلمتوا من الاول ..بعدين من متى ونواف اللي يجيبكم ..وين طس شاكرووه خلود: وانتي عطيتنا فرصة ..شفناك تدورين حول روحك وتناقزين من مكان لمكااااااان بلاغطاء ولاشئ..وكملتيها بدفة السيارة بتطلعينها برى....هههههههههههههههاي تعالي شوفي نواااااااف مات من الضحك..وانتي تدورين على روحك تقل مهبولة..بالله وش قاعدة تتخيلين نفسك ... قبصتها بكل قوتي ..وصرخت : اااااااااااااااااي دخلت مشاعل وهي تقول: يعلني فدى اللي بيطلعون السيارة عشاني...يافراشة زمانك..بالله وش هالفن السيريالي..كانك ترقصين باليه ههههههههههههه خميتها ولاشعوريا صحت..والله مدري ليه صحت..مدري فشيلة والا شوووق لمشاعل وخرتتني مشاعل: هو اريج وش فيييييييييكِ....علميني وشلون ارقص زيك ههههههههههههههه ..ابداع..لاوتنزل شوي على الارض ..بعدين تنقز... ياويلي ..كل هذا صار ونواف يتفرج..هالحماار ليش ماضرب بوري ينبهني.. مسكت يدها وطلعت ..تمشينا ..بعدين وصلت الهنوف ..ومعها غلا مشاعل: فاتك ياهنوس..رقص البالية!! والله فاتك.. الهنوف: اي بالية..ووين شفتوه.. مشاعل: على الهواء مباشرة..ياسلام ولاتقولين فراشة وتطير من زهرة لزهرة..لا قولي زينة ونحووول ..ههههههههههه وهم يجمعون الرحيق.. اريج: مشاعل..ترى والله هالقوطي بيدخل باثمك هالحين اما انطميتي... انفجرت مشاعل تضحك هههههههههههههههه..والهنوف تسال..وش فيكم ..وش السالفة.. حبيت اضيع السالفة ..وناديت غلا.. اريج: تعالي سلمي ياغلا غلا تطلع لسانها وتقول: لالالالالالالالالالالالا... اريج: اشهد ان عمتك منيرة جاذبتك..انقلعي ..بكرى اعرس واجيب بنت احلى منك غلا بدلع: لالالا انا احلى... اليوم الاستراحة غير ..صحيح موقف خطير اللي صار لي..بس اذا تذكرت شكلي انفجرت اضحك لو انا بلحالي..قال هايدي قال..ومشاعل تقول زينة ونحول ههههههه مابقى الا سالي وليدي ههههههههههههه مشاعل اذا جت كل شئ يطلع حلوووو ووناسة ..حسيتها مسوية جو..ضحك وتعليق..كل العالم تضحك ومبسووووطة الا شخص واحد!!!! لا موهدى ...هالمرة هيفاء بنت خالي .. مدري حسيتها متضايقة وكان هموم الدنيا فووق راسها... حتى اني سمعت خلود تسالها: هيفاء .. عسى ماشر هيفاء ناظرت خلود ..تنهدت وسكتت خلود: هيفاء ....ترى اشغلتيني عليك ..وش بك!! تنهدت هيفاء بضيق..: لا ابدا بس تدرين قربت امتحانات الترم وانا زملة لهن... خلود: علينا ياهيفاااااااااااااااء..امتحانات!! قامت هيفاء ..وطلعت ..شكلها بتصيح ..جت خلود بتلحقها الا ان عمتي هدى منعتها وش صاير!! مدري ياخبر اليوم بقروووووش بكرى ببلالالالاش ****************** خيمة الرجـــــــال فارس 7.30 مساء ***************** والله اخوي فهد قلب علينا المجلس فووق تحت...هو وسالفة العرس الله يهديه بس .. صدر امر ابتعاثه لبريطانيا ..وخلاص يعني بيصير هناك بعد اربع شهور تقريبا ..والرجال اختب بيعرس!! فجأة فتح الموضوع مع عمي سعود فهد: والله ياعمي انك بحسبه ابوي ..وانا جاي اطلب القرب منك ويشرفني اني اناسبك..وكمل خطبته العصماء ..ويوم خلص ناظره ابوي معصب:خلصت !!... وانت ماعندك ابو!! يوم تروح تخطب بنفسك.. عمي سعود: الله يهديك ياعلي ..فهد ولدي زي ماهو ولدك..والبنت بنتك زي ماهي بنتي... ابوي: لا ..مهيب المسالة كذا .. فهد: اجل وش بك معصب يبه ...مفرووض انت اكثر واحد تفرح لي..موب انت اللي دايم صاجني تبيني اعرس!! فهد..حطنا امام الامر الواقع.... قال ..عمي سعود بحسبة ابوي!! طيب مااختلفنا بس بعد تراه ابو البنت!! عمي فيصل ..من انفتح الموضوع ..شال شماغه وطلع.. فارس: على وين ياعم!! لاتصير غيرااان وتبي تعرس!! فيصل يناظر فهد ...ذيك النظرة اللي تذبح: لا يافارس ..انا لاجيت اعرس ..ابعرف الاصول زين......... فارس: طيب ومتى بتعرفها هالاصول وتخطب فيصل طنشني وطلع ..والمجلس اصبح هادي فجأة.. اخيرا تكلم عمي سعود: لاشك انك يافهد رجال والنعم فيك وشهادتي فيك مجرووحة ..بس ..تدري هالامور تاخذ وقت ..عطني وقت اشاور البنت واهلها...وحنا ماحنا بلاقين ازين منك...ولدنا ..وحنا اللي مربينك.. فهد: خير البر عاجله..وراي سفره ودراسة وانا ودي نتمم هالامر باسرع وقت ياعمي.. نواف شكله عصّب من فهد: خير..ان شاء الله ..الدنيا مهيب طايرة!! بتسافر الله يحفظك ..اما .. قاطعه عمي سعود: نواف..انطم ولاكلمة ..وشلون تتكلم وانا موجود..البنت بنتي..انا ...بس نواف شال عمره ومشى وقبل لايطلع التفت على ابوه وقال: زين دام البنت بنتك ..مبرووك مقدماً... سليمان : صلوا على النبي ياجمااااااااااااااعة .. الله يصلحك يافهد ..هذا اولها ..فيصل واخوها نواف ..زعلوووا وطلعوووا ... وعمي وابوي معصبين !! طيب ..وانا وش دخلني !! ليش حارق رزي ناظرت سلمان اللي شبة منسدح على المركى ويتفرج على هالمسرحية التراجيدية مستمتعاً ..شكله كان ينتظر اكشن ..يعني ..كف ..بوكس.. هذا سلمانوه فارس: سلمان .... سلمان:................."مافي رد" صرخت : سلمان وصمخ ..ماتسمعني ..وين رااايح!! انتبه لي ...سلمان وحك راسه: والله طرالي اعررررررررررس يافارس ضحكنا على هالسلماااااااان الناس وين وهو وين...ياحظها اللي بتاخذك..بتفك كشرتها اربع وعشرين ساااعة ..من خف دمك وفرفشتك... ********************* هـــــــدى الاستراحة ********************** حسيت ان نفسيتي احسن من الاول...خلاص ..تعودت على البكاء والدموع..بس شفتها ماغيرت حالي..مارجعّت لي خالد.. مدري ليه ..عندي احساس ان خالد بيرجع لي..لا مو احساس وبس ...انا متاكدة من هالشئ..متاكدة ان خالد يحبني..مستحيل الانسان يكذب بمشاعره..شفت الحب والمودة بعيوونه..وعمرها العيون ماكذبت ..ولو كذب اللسان ... ثلاث شهور عشتها كاسعد عاشقة بعشيقها..مدري وش اللي تغير بدنيتي..وصحيت من هالحلم...الجميل... ااااااااااااااه رحلت بي الذكرى لخالد ..حبيب القلب..اللي علمني لغة الحب.. كان افضل معلم بهالكوون..دروسه بقلبي مانسيتها ومانيب ناسيتها..غمضت عيوني يوم وصلني صوت ذكراه.... "هدى: اقول خالد... خالد: ياعيونه وقلبه وروحه..سمي..امري تدللي..!! هدى والفرح يتراقص بعيونها:حبيبي.... نفسي اروح لماليزيا... خالد: ماكفاك شهر العسل بفرنسا.. هدى بدلع: لا ابي شهر عسل ثاني بماليزيا....نفسي اروح كوالالمبور وببيينق ..دايما اسمع انها ديرة العرسان.. خالد وعيونه تبعث الحب :عرسان.. !! بالمستقبل اذا الله اراد.. هدى: ومتى يجي هالمستقبل ياخلودي....بعدين اذا جانا عيال ماراح نصير عرسان.. ناظرني خالد نظرة مبهمة..وشال عيونه عني..حسيت به شئ..سألته: خالد ..وش بك؟؟ من غير مايناظرني: مابي شئ ياعيوني.. هدى: اجل متى نرووووح...ياروح روحي..ابي استمتع بكل لحظة معك.. خالد بابتسامة ماوصلت خدوده: باقرب فرصة...باقرب فرصة...ياحبيبتي" وعرفت زين وش كان يقصد خالد باقرب فرصة....ااااااااااااه.... عرفت ان هالفرصة عمرها ماجت ولاراح تجي..خالد..وش كان يقصد بها!!! فكرت..متى قرر يطلقني..قبل لايتزوجني..والا عقب..بفرنسا والا بالرياض..!! والسبب..كان ولازال مجهول..!! الكل يسألني : ليه وش صاير!! ومالقى غير كلمة خالد يوم قالها لي:" مالنا نصيب ببعض" وانا نفسي ..مدري ليه هالنصيب عقب ماجمعنا رجع وفرقنااااااااااااااا...وصرت مطلقة..تنهدت ..شكلك ياهدى بتعجزين وانتي ماتعودتي على وضعك...كمطلقة... وش فيها لما تكونين مطلقة..!! صحيح..مؤلم..قاسي ..شعور الرفض..خصوصا لما يكون من عزيز على قلبك.. صحيح ..المجتمع مايرحم..يعطيك شهادة سوء سيرة وسلوك..ولو كنتي الضحية.. صحيح..نظرات النااس..وكلامهم كالاسياط على قلبك.. لكن..هو قضاء ربي وقدره ..ولازم ترضين فيه.. فمن رضى فله الرضى ومن سخط فعليه السخط... رجعت لعالم الواقع ...بصوت امي .. امي: هدى وصمخ لي ساعة اهرجك وماتردين ..قومي سلمي على اخوانك ..ينشدون عنك !! هدى: زين يمه .. ...هذاني راااااااايحة.. طلعت وشفت هيفاء..جالسة على الكرسي عند المسبح ..ويديها تلعب بخصلات شعرها وشكلها مساااااااااااااااافرة بعيد.. ياحليلها اكيد فهد قال لهم عن موضوع الخطبة... خلوه ياخذها دام له خاطرن فيهاااا..لاتجبرونه على غيرها ..بكرى تتكرر تكثر حالات الطلاق..تكفون بس كفاية .. سلمت على اخواني وعيالهم ..فهد وطارق وفارس وسلمان وزياد..لكن نواف واحمد ..من المستحيلات انهم ينشافون هالايام لازم الواحد يعني عشان يسلم عليهم... الله عليك يازمن كل شئ فيك انقلب... **************** الجمعة خلــــــــــــــــــــــود 4.30 عصراً ******************** عجزت انام زين البارحة ..بالي مشغووول بهيفاء..انامتاكدة ان فيها شئ هيفاء ..وجهها شفاف ..احس بها بدون ماتتكلم ..افهم نظرات عيونها ..افهمها من غير ماتعبر..وهيفاء امس متضاااااااااااايقة ..ومتضاااااااايقة حيل بس رفضت تفتح فمها بحرف اكيد وراك مصيبة ياهويف..بس اعترفي ازين لك؟؟ ..زهقت من كثر مادق عليها ولاترد.. قعدت ادور بجوالي مسج برسله لعلها ترد عليه ...مدري ليه ..يوم قريت هالمسج...حسيت برغبة قوووية اني ارسله لها صحيح هو عاجبني بس مدري ليه الان بالذات ارسلته لها.... أقضي ايامي غريق بوحدتي.. مركبي ذكرى وأحلامي شراع.. وفي بحر شوقي بواصل رحلتي.. لين اواجه من ترك قلبي ولاع.. وان كتب ربي في بحره موتتي.. لي رجا لا تدفنوني وسط قاع.. لكن ارموا عند بابه جثتي.. واكتبوا مشتاااق حاول ما استطاع.. اذن المغرب والبنت لااتصلت ولاردت ...لا ..انا متاكدة هيفاء وراها بلى عمرها ماسوتها فيني ّ!!..من كثر مانا مشغولة بهيفاء..نسيت ادق على عبير عشان اعلمها اني برسل شاكر لهم ..يودي لها ملازم المعادلات التفاضلية..دقيت على جوال عبير..رن لما شبع والبنت ماردت..انا مدري ليه مطلعة جوال..دايم ماترد..صحيح هي ماتكلم كثير ..بس تخليه جنبها..حولها..دقيت على البيت ..رن مرتين ..بعدين ارتعت ..من الصوت الرجولي اللي رد.. مساعد: الوووووووووو خلود: ...................... مساعد بعصبية: الووووووووووو ماسلمت ولاشئ..لاني خفت منه..قلت بسرعة: عبير موجودة!! مساعد: من نقول لهاااااااا...؟؟ ياربيه ترى والله مانيب ناقصتك..قلت: خلود السعود.. كلمتني عبير..وهزئتها..ليش ماترد على جوالها..فقالت: ومن بيكلمني اصلا..!! مغير مساعد لاصرت بالجامعة يقولي اطلعي...وشوله انقله معي وانا بالبيت..!! المهم ..قلت لها اني برسل الملزمة مع شاكر..وطلبت تعطيني محاضرة الحضارة الاسلامية..وسلمت على امها وسكرتها... ناظرت جوالي..لعل هيفاء دقت والا ارسلت مسج ...بس لاحياة لمن تنادي...دقيت عليها ولاردت..ارسلت لها مسج ثاني... نزلت نجود ..وهي تناقز على الدرج..راحت المطبخ ورجعت بالقهوة والفناجيل...وش عندها شكلها مبسووووطة على الاخر..الله يديمها من بسطة يارب نجود: خلوود ..تعالي تقهوي معي ..تبين جالكسي والا كتكات!! ابتسمت لها: من صدقك ...جالكسي طبعاً... نجود: هههههههههاي تدرين اني اموووت بالكتكات..تصدقين ذاك اليوم بالجامعة تهاوشت انا ومي على كتكات ..وتسحبه مني وانا اسحبه لماذاب بين يدينا ..عاد انفعص ..وساح بيدينا وقمنا ننلحس اصابعنا ,,تقل بزران خلود: خخخخخخخخخخ ..اتخيل اشكالكن..الا مي مااختارت لغة عربية معك كمادة اختيارية.. نجود: لاالله يهديها ...تقول حنا ندرس ادب انجليزي يعني مفروض ننسى حاقة اسمها عربي.. خلود: ياحليلها مي مصدقة عمرها ....يالله يوفقكن يارب.. نجود: الا خلود..ماقلتي لي ..وش سويتي انتي ودكتورة فدوى..ماعادت لك الامتحان خلود: لا حسبي الله عليها...عييت .. نجود: طيب ماخذتي العذر الطبي اللي جابوه لك ابوي.. خلود: الا ..بس..براسها حب مانطحن..تقول لوتجبين لي شهادة الوفاة ماعدت الامتحان نجود: ماشاء الله عليها ...عسى شهادتها قبل شهادتك يارب خلود: يالله ....ان شاء الله اعوض في النهائي.. نجود: طيب وعبيركم جابت؟؟ خلود: ماشاء الله عليها ...جابتها كاملة.. نجود: لاه ..اثرها دافوووورة... خلود: قولي ماشاء الله ...ذاكرت وتعبت ومن حصل شئ يستاهله... نجود : مدري ليه ارحمها...احس اخوها مساعد ظالمها و حابسها بسجن..الله يعينها عليه...مافي اي تطور ...مابدت تطلع وتجي وتروح... خلود: ماشاء الله عليها عاقلة ومرتاحة...واخوها يبي مصلحتها .. نجود: وش يبي مصلحتها...الا قولي مافي ثقة باخته..ماشاء الله عليها اللي ساكته له للحين.. نزل ابوي ..وامي وراه..وجلسوا قبالنا...حسيت من نظراتهم وتوترهم...كان ماء حار انكب علي..توترت من نظراتهم ..وقلبي يدق..عسى امي لولوة مابها شئ...والا احد.... نجود: اصب لك فنجال يبه!! قهوة من يد نجود ...طعمها غير؟؟ ابوي: لا يابنيتي مابي ..تسهرني القهوة...دام مافيه مشاعل وبشاير ..ودي اكلمكن بموضوع..وانا عارف انكن عاقلات وفاهمات ..يابنياتي امي ناظرتني نظراااات غريبة ..كانها نظرات شفقة..حيرة ..شئ غريب احسه يصير مدري ليه ..احس قلبي انعصر بقوووووووووة من جواااا هدوووووووووووووء نجود: خير يبه وش فيكم ..وش صاير... ابوي يناظر امي ويبتسم :كل خير يانجوووووود كل خير..... امي شالت عيونها عني ..وحطت يديها على خدها ..اعرفها..امي ماتسوي كذا الا اذا صارت متضايقة والا مترددة ومرتبكة ..وش السالفة..صراحة انحرقت اعصابي... ابوي..وكانه وده يجدع هم الكلام: انتن كبرتن وصرتن حريم والواحد اغلى مايتمناه بهالدنيا هو انه يشوف بناته متزوجات ومتوفقات ومستقرات بحياتهن..وصدقنن هذي سنة الله والا مافي اغلى منكن على قلبي.... تنهدت بارتيااااااااح...اها الدعوة فيها عرس ... ابوي: اليوم جاااني خطيب لك يا...وسكت ..مرتبك .. امي كملت عن ابوي: نجود ...فهد ولد عمج خطبج من ابوووج ..هاه وش قلتي!!!!!!!!!! ******************** نهاية الحلقة الرابعة

๑۩۞۩๑ الحلــــقة الـــرابــــــــــعــــــــــة ๑۩۞۩๑ ناظرت الجوال ..ياربيه ..اول هدى...

Renad:81 :

بنات لا تفوتكم القصة خطيرة من جد وأحداثها غير متوقعه كل شوي تطلع لك مفاجآآآآآآآآآآآآت وأحداث جديدة أنا قاريتها في منتداها الأصلي بصراحة كلمة رووووووووووووووعة قليلة في حقها مشكوووووووووووووووورة باقي فرح على النقل وصدقت القصة مميزة بنات لا تفشلون باقي فرح وأقروا القصة وردوا عليها

بنات لا تفوتكم القصة خطيرة من جد وأحداثها غير متوقعه كل شوي تطلع لك مفاجآآآآآآآآآآآآت...