كوبونات الراقية تسجيل الدخول

باقي فرح
باقي فرح •
๑۩۞۩๑الحلقـــــــــة الخامسة عــــشـــــــــر ๑۩۞۩๑


*******************

نواف

*******************

"لا جيت أنا بــ سامحك..
تبكي جراحي ما ودها..
مشتاق ودي أصافحك..
عيت يدي لا مدها...
آه. .يا لجراح ..
راح اللي راح ..
وروحي .. من يا ترى بيردها" ..


صكيت الباب..ودسيت المفتاح بجيبي..وشماغي..على كتفي..
دخلت البيت..وطاحت عيوني على ابوي..جالس..
وعيونه..تترقب وتنتظر..

رفعت راسي..ومشيت ..خطوتين..
وصلني صوته..البارد....وقد نفد صبره..
و يقول: زين شرفت..كان تاخرت شوي..تو الناس!!!
ناظرت الساعة ..المعلقة على الجدار..
لقيتها تشير لاربع ونص الفجر..
ناظرته بكسل...مرررة تعبان..وبي نوم..ومالي خلق..
اسئلته..وتحقيقاته..قلت له بانهي هالمهزلة باسرع وقت
قلت: خير..تطلبني شئ!!!
شد ابوي شفايفه..وشفت لمعة غضب..
وحسيته يجاهد..يكبح جماح يده..المتعطشة لتستقر على وجهي..
ناظرني وقال: انت للحين..ماتادبت!!!
قلت: ولاعمري..اغسل يدك مني..
قرب مني وقال : الظاهر.... انت الكلام معك..ضاااااااااااااايع..

رفعت راسي بكبرياء..وقلت: ومن ضربك على يدك..عشان
تكلمني..والحين..لو تسمح..بروح..انام..ووفر كلامك لروحك..
عشان مايصير ضايع...

ولفيت برقى الدرج.. وبنظرة خاطفة ..
شفت بها يد ابوي مرتفعة..وبطريقها لتصلني..بس كنت اسرع ..

ومسكت يده وقلت:خلاص..ياسعود..وقت ضرب الحمير ولى..
مالك اي حق علي..نسيت اني مانيب ولدك..والا اذكرك؟؟

قال بكل انفعال: انطم..ياقليل الادب....

جاوبته..وانا اشد على يده..وابتسم ببرود: مايهمني رايك بي..بس يدك لاتمدها!!!

وجدعت يده..ورقيت الدرج..
وانا قلبي..
ينبض..بالم..وحسرة..وقهر!!!
اسرعت..خفت..تخوني دمعتي..
وصلت الدور الثاني..
ويوم لفيت على غرفتي..
صدمت بجسم..وصلني صوتها..
امي: نواف..هذا انت..اقول..ماشفت ابوك..
مهيب عادته يتاخر!!

حمدت ربي ان الصالة كانت غارقة بالظلام..
لان دموعي..بدت تسح بكل عنااااااد..
حبيت راسها..وقلت: الا ..تحت..بالصالة..يالله تصبحين على خير
ومشيت بس وقفتني مسكتها الحنونة ليدي..
وهي تقول: نواف..لاتنام عن صلاة الفجر..ترى مابقى الا نص ساعة..

وين انا والنوم..اااه...ليتك يمه تشوفين النار اللي بقلبي..
دخلت غرفتي..وقفلتها..وكاني خايف ان ابوي..يهاجمني باي لحظة..
جدعت نفسي على السرير..وبكيت بكااااااااااااء..طفل..
ايه..لاتشرهون علي..
ترى داخلي..طفل ضايع..
محروم..مجروح..مهموم..مظلوم..
غطيت اثمي..بيدي..خفت احد يسمع صوت صياحي..وانيني..

صورة ابوي..تروح..قدامي..وتجي..
وصوته يتكرر باذني..

" لاعمرك تطري كلمة يبه على لسانك…
لاانا ابوك..ولانت ولدي..قل امين الله يورين فيك..ويريحن منك.."

ابوي..يا كلمة صعب انطقها..
كلمة صعب افهمها..صعب احس بها..
ليه يايبه..
قدامه..البس قناع..البرود..والتطنيش..
اخفي نار الالم ..المتاججة بصدري..
واداري جروحي..النازفة..

وش اقول..وش اوصف لكم من شعور..
وانا اشوف..سليمان يعامل ولده..احمد!!!
"انتبه لنفسك ياوليدي..شيك على سيارتك..هاه يابوحميد..
محتاج شئ..عليك قصور..
افا عليك...وانا كم احمد عندي..الله يحفظك ويرعاك ياوليدي"

زادت شهقاتي..وانا ادرك باني عمري
ماسمعت كلمة زينه من ابوي!!!
تبين احترامه لي..واني صرت رجل...
حسيت بضيق..واختناق..بموووت..من هالالم..
فتحت باب غرفتي بطلع..بروح..
بركب سيارتي وبدور بالشوارع..
لعل هالاحساس..يخف..
وقبل لااطلع من غرفتي..شفت دفتر..على طاولتي ...
مغبر ..من زمااان..مافتحت دروسي ..
جدعت روحي على الكرسي..وشلت قلم..
لقيته طايح على الارض بكل اهمال..
وفتحت الدفتر..وانحنيت على اول صفحة بيضاء فاضية ..
وكتبت..اوصف مرارة احساسي..

" ابي الغالي.......
....................
...........................
ابنك..المحروم..

نواف"

شقيت الورقة..وتاملتها..
..قريتها وقريتها ومع كل مرة..تنزل دمعة..
ثنيتها..ورميتها باقرب درج..
ووقفت وطلعت..من غرفتي..وانا خايف اقابله..

وصلت الحوش..وانا احس..
ضلوعي تضغط على صدري..لما سمعت صوت تحطم قلبي..
لفيت ورى الخيمة..وطلعت ..سيجارتي..
خالط الدخان ..همومي..والامي..بصدري..
ونفثته..ادري اني اخدع نفسي..
بس على الاقل..تريحني ..من هم اثقل كاهلي...

رميت السيجارة..وفركتها بجزمتي..
ونشرت رمادها..على البلاط
عشان اتاكد ان اللهب طفى زي ماطفت الامي..
لكني كنت مخطئ..همومي ماطفت وعمرها ماراح تطفى..
بمجرد مارفعت عيوني..
طاحت على عيون ابوي..واكمامه مثنية..
شكله متوضي وبيطلع للمسجد..
لكن منظر سيجارتي تنتقل بين اصابعي وشفايفي..
خلاه يوقف!!!

نظراته..تنقلت بكل عنف..بيني وبين سيجارتي..
للحظة حسيت ان الهواء ..اختفى من الكون..
وتسارعت خفقات قلبي ..بشكل مجنون...
خفت من ردة فعله..خوف..عمري ماحسيته..
رغم اني امثل انه ماعاد يهمني
بس للاسف..العكس هو الصحيح...

تعلقت عيوننا..
كلن يحمل..بعيونه معنى غريب...
مر الوقت..وحنا على هالحال..
حتى انهى ابوي الموقف..
بهزة لراسه..وكمل طريقه..
وطلع..وصك الباب بكل هدوء..

ياليته..ضربني..
ياليته..هاوشني..
ياليته..طردني..
ياليته..ذبحني..

كان اهون عندي الف مرة..
من هالنظرة اللي شفتها بعيونه!!!

جلست..وتسندت بجسمي على حد الخيمة..
حطيت راسي بين يديني..
وانا اتمنى لو اموووت..وارتااااااااااااااااااح!!!!
من هالالم..والعذاااااااااااااااب

مكتوب لي اسهر بليلي ولاابات
اجمع بقايا انسان تاه وتحطم
انا قتيل الهم عايش ولا مات
الروح ماتت مابقى غير هالجسم
مرات انا اشكي الهم وابكيه مرات
ومرات اقـرر انتحر لـكـن اندم
باقي فرح
باقي فرح •
****************

هـــدى

*****************


قدرت أنساك في وهمي
وفي الواقع تعبت أنساك
قدرت أنساك في بوحي
وفي صدري ألم ناداك
أنا اللي كنت لك وحدك
وضعت اليوم من بعدك

هزيت راسي..بياس
وانا اقول: طيب وليه..ليـــــــــــــــــه..يايمه
امي: لان..الموت حق..وانا بموت هنا والا هناك..
بس..طلبتك ياهدى..طلبتك يابنيتي..
حطيت يدي على اثمي..اكتم عبرتي: يمه..تكفين خليني اروح معك..يمه مقدر على فراقك..
جرتني امي لحضنها وهي تقول: والله ماودي يروح معي غيرك..انتي الغالية ياهدى..
بس انتي وراك عرس..
والله ياهدى اني ابي سعادتك..صدقيني ..
مابي من هالدنيا غير اني اشوفك مبسوطة
ببيتك ومع رجلك..تكفين ياهدى!!

غمضت عيوني..ليه كل مشاعر رفضي لمشاري تتبخر..
بلهيب ...رجاوي امي!!!

هدى: بروح معك..واذا رجعنا..اتزوج!!
امي: واذا ماارجعت.. ادري ماراح تعرسين...لا ..
انا ابيك تعرسين اول..وعقبها يحلها حلال....
يوم شافت دموعي بعيوني..
قالت لي: هدى..حنا عطينا مشاري كلمة..
واتفقنا موعد عرسك هالخميس..وسفرتي الاثنين اللي عقبه..
وشلون..تغيرين رايك..وش نقول للرجل..
كانك تبين رضاي..اعرسي ..وفرحيني الله يفرح قلبك ياهدى..

~~~~~~~~~~~~~~~

مرت الايام..ورفضي لمشاري..
كان حلم يراودني ...
بس للاسف..شكل الحبل انلف زين حول رقبتي
ومابقى الا ..اني اتعلق..
على منصة الاعدام

وهذاي اجهز نفسي..لهالعرس!!!

احس بالضياع..والالم..وانا اقارن مشاعري بهالعرس..
وبعرسي الاول..
ااااه.. كنت مستانسة وطايرة من الفرحة..
والان!!!!

تنهدت..وانا اقلب ملابسي
واشوف..وش ناقصني!!
رميت بلوزة..مالقيت لها تنورة تناسبها..
وكلمت روحي بصوت عالي..

" وانتي مصدقة عمرك..ان هذا عرس!!!!.. "..

دقيت على اختي فاطمة.. مواعدتني تمرني اليوم..
ونطلع للسوق..
وانا مالي خلق..ابي احط راسي على هالوسادة واناااااااااااااااام
لعلي اصحى والقى كل هذا كابوس..مرعب!!!

هدى: السلام عليكم..
ياسر: وعليكم السلام..ميــــــــــــن العريسة!!!
هدى: عريسة بعينك..وين امك...

سمعت صراخه ينادي امه..وصوت اريج..تساله من اللي مكلم!!!
اريج: هلا..خالتي..العروس..اقول..كم الساعة بتجيك مدام روز..الخميس
هدى: اول شئ سلمي..همين انشدي..وبعدين..لا روز..ولا قطن..
اريج: هو..مشاعل..تقول ان خلود..مكلمة روز اللبنانية عشان تجيك يوم العرس..عاد..قولي للبنات ترى بجي تصلحني..يحطوني باللست..
هدى: لا والله..اوريه هالخلود....وبعدين..
من قال لكم اني ابي كوفيرة..بكنسلها..
اريج: هو وراه...بوه عريسة ماتبي كوفيرة!!!!!
هدى: اقول بــــــــــس..وين امك..
اريج: لاصدق...من جد تتكلمين والا تضحكين عليّ..
هدى: اريجوه نادي امك وفكيني..
اريج : اول قولي لي..
هدى: تدرين..قولي..لامك..اني مانيب رايحة اليوم للسوق..
وصكيت السماعة بوجهها...

وعلى طول دقيت على خلود..
على طول ردت..
خلود: هلا والله باحلى عروووووووووس...
هاه كيف الاستعدادات..
ناقصك شئ..هذاني مع نجود..يوميا بالسوق صباحا ومساءا..
انتي بس ..قولي وش ناقصك..ومن عيوني..
قلت بعصبية: خلصتي!!!!
خلود بابتسامة: تقدرين تقولين ايه..
هدى: انا ماناقصني الا انك تفكيني من لقافتك..
ولعبك..من ورى ظهري..فاهمة!!!
خلود: وش السالفة!!
هدى: روزك..ترى ياخلود..هالحركات ماتعجبني..وابدا ماتوقعتها منك..اللي بي كافيني..خلوني..بحااااااااااااااااالي..
وصكيت السماعة بوجهها..

وتاملت يديني المرتجفة اللي مازالت على السماعة..
حسيت اني اركض..بصحراااااااااء..وشمسها تحرقني..
ومدري..وين اروح..
رفعت راسي..امنع دمعتي ..لاتنزل..
كسر رنين التلفون حاجز سكوني.... اكيد هاذي خلود....
عارفتها ماتخلي الموضوع يمر بسلام..
لازم..انا ماقصدت..انا اسفة..وتقعد للصبح..تشرح..وتتعذر..
وهي تكرر تصرفاتها الغبية!!!!

خليته يرن ويرن..بس شكلها مصرة؟؟؟

رفعتها بقوووووة..وانا اضغط عليها..بيديني
هدى بصرخة: خلالالالاص...تراك اذيتني..قلت فكيني من شرك
فاطمة: بسم الله الرحمن الرحيم..عسى مهيب انا..والا اريج..
هدى: هلا فاطمة..
فاطمة: بالله منهي اللي اذتك..
هدى: موب شغلك..وش تبين..وبعدين قولي لبنتك..ترانا الغينا الكوفيرة..
فاطمة: تعالي انتي..وش سالفتك..وش الغيتي الكوفيرة..ومانيب رايحة للسوق..تدرين كم باقي على العرس..وانتي قاعدة تاجلين اشغالك..
قلت بعدم اهتمام: بقريح..جعلهن ماخلصن..
فاطمة: هدى..بس اعقلي..ترى ذي تصرفات بزران..يالله البسي عباتك..وتجهزي..بمرك عقب نص ساعة..
هدى: تفهمين قلت..ماااااااااااااااااااااابي!!!
فاطمة: موب على كيفك..مابقى على العرس..الا ثلاثة ايام..ونص اشغالك ماخلصتيهن..يالله بلادلع..
هدى: الظاهر اني اتكلم عربي..قلت لك مانيب رايحة..
خلاص فكيني واللي يرحم والدينك..
فاطمة: خلاص..بشتري على ذوقي..وياويلك تقولين زين والا شين..كبير صغير ..
تنهدت..واخيرا فهمت ذي: لا ابدا مانيب قايلة شئ..
فاطمة : يالله اجل..مع السلامة..
هدى: مع السلامة..

رجعت السماعة..ورجع التلفون يرن..اكيد هذي باقي فرح..

طلعت وخليته ..يرن..
لما يشبع..
باقي فرح
باقي فرح •
*******************

نجــــــــــــــود

*****************

قلبت الجوال بيدي....
وانا اضحك بصوت عاااااااالي..

ياحبيله ..الله يستر لاتصك فاتورته المليون!!
من هالرسايل..والاتصالات..
اخر اتصال كان بيننا..يوم دقيت عليه ابشره بنجاحي..
ولاطولت..لاني كنت بالجامعة..والبنات قاطات..حولي..

وعقبها..بتل يدق..ويدق..ويرسل مسجات..وانا مارديت عليه!!!
عاد اخرها هالمسج...

" مهما تصد! أعشقك وأهواك وأغليك
ماهمني رفضك ولا أبغى ردودك
كيفك اذا بتحن في حال هاويك..!
وكيفك اذا تبغاني أعاني صدودك!
تصد تبعد تبيع شاريك شاريك..
أصلا حياتي
"بس مجرد وجودك"
مبروك.. ياحبيبتي نجاحك....
وعقبال ماابارك لك بطريقتي الخاصة قريباً..فهد"


وقفت قدام المراية..شفت حمرة الخجل..
تلون وجههي..
ااااااااه..هالانسان تملك قلبي..وروحي..
وكل خلية بجسمي..
بمجرد..مانطق اسمه..احس بفرحة..
عامرة..تغطي روحي..
غمضت عيوني..وانا اسمع دقات قلبي..
على قد ماني خايفة..وشايلة هم..لهالعرس والغربة..
على قد ماالدنيا موب سايعتني من الفرحة..

سمعت نغمة رسالة ثانية..وفتحتها بسرعة..
وانا عارفة منين!!!

" كابر..قد ماتكابر
انا معك متحمل وصابر
واعرفك اكثر من احساسك تجاهي....وانت خابر
ان حبك لي كبير....وقد ماتخفيه ظاهر"


اتسعت ابتسامتي..
هالانسان ..بيهبل بي..كانه يقرا..افكاري هاللحظة..

على المغرب..طلعت انا وخلود..للسوق..
نسيت اقول لكم..
علاقتي مع خلود صارت احسن من اول..الف مرة
لقيتها فعلا... الاخت الحبيبة والصديقة الوفية..

~~~~~~~~~~~~~~~~~~~~

قلبت الصندل بيدي..مدري مااحسه يمشي مع الفستان..
التفت على خلود..وسالتها: وش رايك؟؟ يناسب؟؟
خلود: لا..احسه موب راكب..احس فستانك يحتاج شئ..
برباط على الساق..عشان يبين الحركة اللي قدام...
حطيته على الرف..باحباط..وقلت: ياربيه...تكسرت رجليني
مالقيت شئ يناسب هالفستان!!
خلود: يابنت الحلال..وسعي صدرك..
نجود: وش اوسع صدري مابقي شئ..
وانا ماخلصت اغراضي..
وباقي شنطة للفستان التركواز..ياربيه.

مسكت يدي خلود..وقالت: نجود..نصيحتي لاتكثرين
الجزم والشنط..لانك بتروحين هناك..وماراح تلبسينها..اشتري..اشياء عملية وانيقة..
واذا رجعتي زيارة للرياض..ابدا لااجهزك من اول وجديد..

ضغطت على يدها..وغورقت عيوني..
عجزت القى كلمات توصف احساسي تجاه خلود..يوم بيوم..معروفهاعلي يزيد..وخيرها..يغرقني..

نجود: قولي امين..الله يرزقك وييسر امرك..
ويفرج لك كل كربة..خلود..والله مدري وشلون اشكرك..
قاطعتني: هو..ومتى بين الخوات شكر!!!
يالله امشي نلحق قبل لايسكر نعومي..

تقريبا خلصت الاغراض اللي ابيها من هالطلعة..
بس باقي اهم شئ..
وقفت عند باب محل ساعات ..وقعدت اتامل الفاترين..
وسألت خلود: اقول...وش تقترحين اشري هدية لفهد!!
خلود: مممممم...مدري..شوفي هو وش..يحب!!
نجود: يحبني انا..هههههههههه...خلاص يكفي انا هدية...
خلود: واحلى هدية بعد....
نجود: الله يسلمك..قال من مداحتها ..قال امها وخالتها..
لا..صدق..وش رايك بساعة!!
خلود: حلوة فكرة الساعة..طيب..مافكرتي..مثلاً..دهن عود..والا عطر..
نجود: لا..اهديته قبل عطر..وقال لي..وش قصدك..ريحتي شينة!!
خلود: خخخخخخخخ..اجل مدري..
نجود: تعالي..خلينا نشوف هالساعة السوداء..شكلها حلو..

خلصنا ودخلنا قسم المطاعم..وطلبنا..
وجلسنا على طاولة بزاوية بعيدة عن الزحمة ..
حطيت الاكياس على الكرسي..
وانسلح بعضها على الارض..
طمبست بشيلها..سمعت جوالي يرن..
فز قلبي..لاني عارفة زين..من المتصل........
رن..وخليته يرن..

خلود: نجود...ورى ماتردين..موب جوالك اللي يرن..
قلت وانا افتح علبة البيبسي: الا..بس خليه..يرن..هذا ماييأس ابدا!!!
اقول له..لاتتصل..ويعاند..يتصل اكثر من اول..
تصدقين..امس سبع مرات دق..وارسل عشر
مسجات.."ورفعت علبة البيبسي اشرب"..
وانا معطيته الخامس..
خلود: بس..ماحسها زينه منك..انك تسفهينه
بهالشكل..على الاقل ارسلي مسج اعتذري
قولي كان على الصامت..او انك ناسيته بغرفتك..
بعدين يمكن يبي منك شئ
نجود: وليه النصب..بعدين مايبي شئ ..بس بيكرر اسطوانته....زي كل مرة ااه ياحبيبتي..
ذبحني الوله والشوق..نجود.. ذبحتني احلامي بك ..
تكفين متى نعرس..متى تصيرين عندي....
اااه..الايام عيت تمشي..وكذا كل مكالمة لازم هالموال ينعاد..

نظرة غريبة بعيون خلود...خلتني اوقف عن كلامي..
وكانها انتبهت لنفسها..ونزلت عيونها بسرعة..
ياربيه اكيد ..جرحتها..لانها ماجربت..

حطيت يدي ..على يدها: معليش خلود..انا اسفة..يالله بكرى اذا انخطبتي..وابلشك رجلك..وسمعك زي هالكلام واكثر..
ماراح تلوميني...راح تذكرين كلامي..زين...


ابتسمت خلود..وحسيت نظراتها تايهة..
وقالت: الله يوفقك..صدقيني فرحانة لفرحتك يانجود..
ومحد ياخذ الا نصيبه..

نجود: ادري..وادري انك انسانة كلك احساس وتضحية..
وان هالموضوع جرحك..لكن.."وضغطت على يدها..
وانا اقول"..والله لو الود ودي..ماصارت الامور بهالشكل..
والله العظيم.. منى عمرى انك تتزوجين قبلي..بس..بس..

قاطعتني دمعة شفتها تنزل بكل انكسار..
من عينها..وخشمها اللي احمّر..
غمضت عيونها ..وكانها تجاهد..شئ..اقوى منها بكثير..
خلود: نجود..لا..عمري اسمعك تقولين هالكلام..ترى ازعل عليك..
فرحتك هي فرحتي..

انا اسمع كلامها..واقرى عيونها..واشوف تناقض ..غريب!!!

رجعنا البيت..والصمت يلفنا..
مدري ليه دمعتها حركت بنفسي اشياء..واشياء..
تمنيت املك الجرأة واتصل بفهد..
واقول..ابأجل..العرس..حتى تتزوج خلود!!!
بس للاسف..اعرف زين وش بتكون ردة فعله!!!

وصلنا البيت..وخلود..على طول مسكت الدرج حتى من غير ماتشيل نقابها..
تاملتها..حتى غابت عن عيني..وضميري..يؤنبني بشكل غير طبيعي..
ليه..كل هاللي تسويه لي..
وانا ماسويت ولاشئ لها!!!

سحبت مشاعل الاكياس من يدي..
وقامت تنشرمحتوياتها على الكنب..
وصلتني صرختها: واااااااااااو..ما هزا يابت..انتي ماتختشي!!!
وهي فاتحة كيس نعومي..ومطلعة لانجري..
شلته بسرعة من يدها..ودسيته بالكيس..ووجهي نار..من الفشيلة..
نجود: ياملقوفة..ياويلك تفتشين باغراضي..
مشاعل ناظرتني نظرة وهي تقول: يقالنا نستحي..نعنبو ابليسك..هيفاء وهبي لو يعطونها مليون..
ويقولون لها تلبسه..عييت وقالت استحي..
وانتي..شاريته..بالله..من جد بتلبسينه..قدام فهد..
"وحطت يديها على خدودها وهي تقول"..وخزيااااااااااااه..وخزياااااااااااااااااه..ياسفاب التربية !!

مسكت الكيس..وصبخته فوق راسها: ياقليلة الادب..موب شغلك..
بشاير: اقول نجود..وش هذا..وشلون ينلبس!!!
والتفت..لقيت كيس لاسنزا مع الاخت الثانية..
سحبتها منها وانا اقول: يابنات قريح..خلوا عفشي..ياربيه منكن..

مشاعل: لاوالله ..يعني حنا بس اللي ننتمي لقريح...وانتي لا!!!

شوفي بشاير..هالكيس الاحمر ذاك..شكله..مريب..عطيني اياه..
ركضت بسرعة وضفيته..قبل لاتوصله بشاير..
ضفيت كل اغراضي..ورقيت

وصلني صوت هالملسونة: اقول نجود..ماتبين مساعدة..يعني..
قاطعتها: الا ساعديني وضفي لسانك..
قابلتني امي على الدرج: هلا يمه..
امي: هلا نجود..هاه عساج خلصتي اغراضج..
نجود: تقريبا خلصت شئ..وباقي اشياء..
امي: الله يوفقج...خلاص بكرى..الصبح بروح عندي موعد..
اذا خلصته بدري..رحت وياج..الا ..وين خلود..
التفت وشفت غرفتها..غارقة بالظلام..
نجود: مدري يمكن بغرفتها..

وحطيت الاكياس بغرفتي..
وطلعت وقفلتها..لاتجي ام لسان وتتفتش..
طقيت باب غرفة خلود..بس ماسمع اي صوت..
حطيت اذني على الباب..
وهدوووووووووووووء
نجود: خلود..خلود انتي هنا!!!...
خلود ممكن تفتحين الباب..وكررت كلامي..خلود..افتحي..خلود..

وصلني صوتها: تكفين نجود..خليني بروحي..
نجود: تكفين افتحي الباب..خلود..ابقول لك شئ..تكفين..
خلود: بعدين يانجود..راسي يوجعني..وبنام..

عرفت انها تصيح..من صوتها..
غمضت عيوني..والالم..غطى على كل احاسيسي..
ياربيه..وش اسوي..بعمري..
وضربت راسي على الباب..
وانا اقول


((خلود..تكفين..سااااااااااااااااااامحيني))
باقي فرح
باقي فرح •
*******************

فارس

**********************

((كل المشاعر .. في غيابك .. تحراك
.. تصرخ عليك من الوله حيل .. " وينك"
يكفي .. دخيلك " حس " باللي ترجاك
لا عاش منهو ... يا حبيبي ... يهينك))



مسكت الماوس..وحركتها بشكل فوضوي
على شاشة الكومبيوتر..
لامستحيل!!!
هالحين وشلون.. صرت اختي الغالية!!!!!!!!!
كل هذا ....واخرتها اختي!!!

ناظرت الايميل..
وقريته مرة ومرتين..
لعل الكلام يتغير!!
لعلها ارسلته بالخطأ لي..وهي قصدها وحدة ثانية
بس معقول فيه غيري اسمه..
بلسم جروحك..

((اختي الغالية ..بلسم جروحك..
وانتي فعلا بلسم جروحي..

لاادري..اي سعد اتى بك قارئتي الحبيبة ..
لسلة بريدي الالكتروني
ولكنه بلاشك..حظي الرائع!!

هل اصف نفسي حينما قرات كلماتك...
ام اتركها..لخيالك الرحب..
ليرى كلماتك..طوق نجاة..امتد لغريق..اوشك ان يلفظ اخر انفاسه..
وبلغ به الياس..من الحياة....كل مبلغ..

اختي الغالية..بلسم جروحي...

لاادري..باي الحروف ارسم لك اعتذاري..
عما سببته لكم حروفي الباكية..
ولكنها الاحزان والخيانة..غمرت مشاعري..
وماعدت ارى امامي الا سواداً!!
واجبرتني..اعزف مقطوعة الالامي..عبر سطوري..
لم اعلم..اني بذلك اجرح احساس ..كاحساسك..
ولم ادرك..اني ابث احزاني في نفوس غيري..

لكن رسالتك..جعلتني..افيق..
اجل غاليتي بلسم..فبك..وبحروفك..
ساعبر بحر الماضي الاليم..
لارسو على شطان التفاؤل..
وازرع اول بذور الامل..على جزيرة..المستقبل..

بلسم جروحي..
صدقيني تخونني الكلمات..واجدها..
ترتعد خوفا..الا توازي عباراتك..
ولكن حسبي منها انها خرجت من قلبي
واتمنى ان تصل لقلبك الرائع..

اختك المحبة
باقي فرح..))

سكرت الايميل..وانا حاس بضيق..
وشلون تحسبني بنت!!!
انا ماكتبت اي شئ يدل على اني انثى!!!

ياربيه وش اسوي..ارسل لها اقول اني ولد!!!
والا اخليها على عماها!!!

حطيت ربلاي..وحطيت اصابعي على الكيبورد..
وبديت اضغط..ونبضات قلبي تزداد..

(( كاتبتي القديرة...باقي فـــــــــــرح..

طال انتظاري لردك على ايميلي..
حتى ظننت انه لن يأتي..
وكم فرحت به!!!!

لاتسعني الفرحة..ولاتسعفني التعابير..
لاعبر لك..عن شكري وامتناني..

ولكن..

بدون مقدماااات....

عندي طلب صغير..ويعتريني الخجل..منه
لكني ..سامتطي خيل شجاعتي..وثقتي بك..
واطلب منك..

نتقابل على الماسنجر..
ادري بتقولين..بدري..تونا تعارفنا..
وعلى طول ماسنجر..لكن صدقيني..انا اتابعك..
من زمااااااان..و..عرفت اي انسانة راقية انتِ...
واذا كان هالشئ يضايقك..
عادي..قولي..ولاتستحين..وصدقيني باحترم رغبتك..كل احترام

انتظرك..وسابقى دوما انتظرك..



" وترددت ياربيه..وش اكتب اخوك..والا..اختك..
اخاف لاكتبت اخوك..ماترد..علي..
وبنفس الوقت..ماحس اقبلها على نفسي..اني اكذب عليها..
ياربيه..بس انا ابي اكلمها على الماسنجر..واوصل لهدفي..بس..
ماتوقع لادرت اني ولد بتضيفيني..ولو سوتها..بتطيح من عيني..يعني اي ولد..تكلمه!!!
ياسلام ..هذاها تحب ..وتنادي ياحبيبي....

وعاشقة.... تناجي عشيقها على صفحات الجرايد..وهالحين..
بتستحي لاتكلم..ولد على الماسنجر..
بس ولو..ماتوقع انها بتضيفيني لو درت اني ولد..
خليها على عماها..واقول اختك..
واكلمها على اني بنت..وبعدين دواها عندي!!!"


وكتبت بسرعة قبل لااغير رايّ..
اختك المحبة
بلسم جروحك..))

وارسلتها بسرعة ..قبل لاتخونني شجاعتي..

التفت على الجريدة..وقريت مقالها اللي نزل اليوم..
حسيتها تتكلم عن الامل..والمستقبل..والتفاؤل..
وانه..قد يتعلق المرء..
بانسان ماشافه الا مرة..ولكن يكون هاللقاء ..فاتحة خير..
وبوابة لمستقبل..سعيد..بعد ليل..الاحزان الطويل..

عقدت حواجبي..انا ماذكر..قابلتها..
قريب
اخر اتصال بينا كان..يوم يطلع..نواف من بيت امي لولوة..
وهي تدوره بالمستشفيات..لا..وصكت السماعة بوجههي..
وشلون..تقول..قابلته..وبوابة السعادة!!!
لا اكيد..هي تقصد ايميلي..
ايه..مليون بالمية هي تقصدني!!!
اااه ياخلود..لو يكون مفتاح سعادتك بيدي...
بس موب قبل لااعرف..منهو حبيبك الغادر!!!


دفيت الكرسي ووقفت..
ايه ياخبر اليوم بقروش بكرى ببلاش..
لبست غترتي..وتعطرت..تاملت روحي بالمراية..

"وش نهاية هالطريق يافارس!!!!"

تنهدت وفتحت الباب..
وطلعت..

فارس: هلا ..سلوم..وشلونك..
سلمان: هلا والله... حيا الله النسيب..
فارس: على طول..ترى مابعد وافقت..وينك..
سلمان: بالاستراحة..الحق بسرعة..
لاتفوتك..المبارة..تعال شف..سلطان..شوي ويصيح..هههههههههههاي..سلطان..دوك..
هالمنديل..قبل لاينقط خشمك...
فارس: ليه كم النتيجة..
سلمان: اخاف اقولها..ويصكني سلطان بالقارورة اللي بيده..هههههههههههههاي..
وش بلاك..ياخوي ماقلت شئ..عادي..خذ الخسارة بروح رياضية..
وقم..عشنا عشاء يسوى هالخسارة..
فارس: الووووو..انت معي..
سلمان: هلا فروس..تعال لايفوتك..هذا سلطان مولم البوك..
بيروح يجيب لنا العشاء..هههههههههه
فارس: طيب..يالله مع السلامة..
سلمان: اقول..فارس..سلم لي على هيفاء..

طوط ..طوط..طوط

ناظرت جوالي..
موب صاحي هالسلمان..
خخخخخخخخخخخخخ ودك اروح اقول لها..
عشان القى روحي باقرب زبالة..

طلعت..وانا افكر..متى اقول لنواف..
سلم لي على خلود..
وش له نواف..الا اقول لهيفاء..
وابتزها عند هالسلمان..
اااااااااااااه..
ياليت خلود..بلاماضي..
ياليتها ماصارت باقي فرح!!!
كان خطبتها..وانا مرتاااااااااح..
بس!!!

طااااااااااااااااااااااااااااااااااااااااااط

صوت بوري السيارة اللي وراي..نبهتني..
اني سارح بافكاري عن الاشارة اللي من زمان صارت خضرااااااااااء..
رفعت يدي اعتذر..ومشيت..وانا اهز راسي..ابي اخلص افكاري منها..

دق جوالي..رديت
فارس: هلا..حيا الله المعرس..
فهد: هلا بك..وشلونك فارس..عساكم طيبين
فارس: حنا بخير..اخبارك انت..وشلون التجهيزات ..عساك جاهز..
فهد: اسكت ياشيخ..صدق من قال..لاهم زي هم العرس..ولا وجع زي وجع الضرس..
فارس: هههههههههههههههه وراك!!!
فهد: يخوي..كلما قلت قضيت..طلعت شغلة جديدة..
اسمع..ابيك تمر بيت عمي سعود..وتاخذ جواز نجود..وتصوره..
وترسل لي نسخة على الفاكس..ضروري بكرى تصير عندي ..
بس ياويلك تشوف صورتها فاهم!!!
فارس: اجل..امسح خشتك..دور غيري..يااشوف صورتها..
والا ماراح توصلك النسخة..
فهد: فارس تراي اتكلم جد..والا اقول خلاص...
انسى الموضوع..يالله مع السلامة..
فارس: تعااااااال..صدقت انت ووجهك..محد يمزح معك..
فهد: امزح معي بكل شئ..الا بنجود..بعدين خلاص..
اقولها هي ترسل لي..بس مشكله هي ماترد..على اتصالاتي..
فارس: خلاص يابن الحلال بكرى ارسلها لك..لاتشيل هم!!!
فهد: مشكور ابو الفوارس..وعقبال مااردها لك..
واشوف صورة حرمك المصون..
فارس: يعني تسمح لي اشوف صورة نجود..
فهد: ياويلك..والله لاافقع عيونك..
فارس: ههههههههههه الله يخليها لك..
يالله وصلت الاستراحة تبي شئ ثاني..
فهد: ابد سلم لي على الشباب..الا عمي فيصل وين ارضه...ماله حس..
فارس: تصدق حتى انا من زمان ماشفته..
مشغول بعرس عمتي هدى هالخميس..
يالله عقبالك ..والله يوفقك مع السلامة..
باقي فرح
باقي فرح •
**********************

ام سديـــــــــــــم


*********************

((الا ياعيني لاتبكين...خسارة دمعتك تنزل على من لايراعيها))

:zf09:

قفلت الشنطة..ونزلتها من السرير..
بناتي لابسات وتقريبا كل شئ جاهز...
واخوي عبدالله بالصالة يلعب البنات..
لحد ماخلص شغلي ونمشي..

تلفت بغرفتي..يمكن اكون نسيت شئ..
ماحبيت اترك لي اي اثر..حبيت انسحب بكل هدوء..
واحافظ..على ذكرى حلوة..صارت اليوم تبكيني..

دارت انظاري ..سريري..دولابي..كنبي..طاولتي..تسريحتي
كل شئ..اشوفه يعزيني..
مسحت بيدي على السرير..وانا اتذكر..ليلة زواجنا..
واتذكر زين كلامه..و حبه..وغرامه..
مرتني هالذكرى..وكاني اشوفها الحين..
واسمع صوته..باذني..

مشيت خطوتين..وفتحت الدولاب..
اخذت صور زواجي..وسفرتنا لماليزيا..ومصر..
وصور بناتي..من يوم انولدوا..وكثير..
من اللحظات..اللي صورتها مع مشاري..
وكاني حاسة انه بيجي اليوم..
اللي ماراح يبقى منه غير ذكراه..

المتني ذكراه ..طعنتني..
مشاري جرحني اكبر جرح بحياتي..
مشاري..قص جنحاني..مستحيل..يلتئم جرحي..
مستحيل انسى هالالم..
مستحيل..ابدى صفحة جديدة معه..
انفجرت اصيح..

طحت على الارض..ويديني تتشبث بالمفرش..
ياليتني ..ماصدقته..ياليتني..ماحبيته..
ياسفاب عمري اللي قضيتيه معه..
اااااااااااه..وزاد صياحي..
مع كل صورة تمر ببالي..
قضيتها مع مشاري..


غمضت عيوني..باصرار..
ومسحت وجهي بيديني المرتجفة..
خلاص ياعفراء..بس يكفي!!!
كافي اللي بكيتيه طوال الايام اللي راحت..
وما شفت دموعي غيرت من مرارة واقعي شئ..
بل زادت همومي هم بسؤال بناتي عن بكائي الدائم..

اصبحهن دموووع..وقبل لاينامن..
اقص لهن الامي وهمومي ..
خلاص
خلاص ياعفراء
مشاري مايستاهل دمعتك..
دمعتك غالية..واغلى من انها تطيح عشانه..

لكني للاسف..
انفجرت من جديد اصيح..واصيح
هزيت راسي وانا اقول...
"ومن قال اني اصيح عليه...
انا اصيح على نفسي
على بناتي
على مستقبلي ...بدون..الانسان اللي حبيته"

حطيت يدي على راسي..
وعبراتي تزيد كلما حاولت اكتمها...
بصعوبة شلت نفسي وجلست على السرير..
واطياف الذكرى..
تموج بي..لاول لحظة طرق فيها حب مشاري باب قلبي..
ودخله بلااسئذان..
حبيته..ورسمته بداخلي اغلى انسان..
بنينا ايامنا طوبة سعادة وطوبة محبة..
وتوجناها باحلى وردتين بهالعالم..

مدري وش اللي تغير!!!
مدري..ليه الغيوم..السوداء مسرع..
ما تلبدت بسماءنا..
وحجبت شمس سعادتنا..عن محيانا..
مدري ليه مشاري..باعني!!!

ياربيه ماذكر اني قصرت معه..
ماذكر اني غلطت عليه..
صحيح تصير خلافات بسيطة..
بس هاذي تصير بكل بيت!!!
ليش بس بيتي انا اللي ينهاااااااار!!

طوال هالايام اللي مرت..
عشت بجسدي بس معه
وكاني فصلت احاسيسي عن جسدي..
وصرت الة..
تتحرك ..بدون ادني شعور..

عرفت وشلون تنحرم عينك النوم...
وتشق دمعتك طريقها بدون اي مقدمات..
عرفت وشلون تبتسم بوجه اطفالك..
وقلبك يرقص من الالم والجرح..والعذاب..
اسبوعين قضيتها..بين دموعي وصمتي..والالامي..

من يدخل..البيت..احط غداه..
واطلع لغرفة بناتي..ولاانزل الا اذا اذن العصر..
وتاكدت انه طلع..ولاهو براجع الا اذا صرت بغرفة بناتي..
انام واقوم..ودموعي تواسيني..
حتى كلمة ..تخفف عن خاطري المجروح ماسمعتها منه..
حتى كلمة..اعتذار..ماواسني فيها..
وليش انتظر..من قاتلي انه يبكيني
والا بيوم يجي اهلي ..يعزيهم بي!!

جدعت روحي على سريري..
وحشني سريري..وحشتني الايام الخوالي مع مشاري..
واوحشتني حياتي بدونه..
دسيت خشمي بوسادته..شميت ريحته..
وكانها سوط..على جرحي القاتل..
ليه
ليه يامشاااااااااااااااااري..

صرخت من الالم..والاه..
وتمنيت ملك الموت يقبض روحي..
ويريحني من هالاحساس القاتل..
احس بجمرة تلتهب وتزيد اشتعالا..
مع كل دمعة..مع كل طعنة..مع كل لحظة تذكرني به..

سمعت الباب..ينفتح..
نقزت بسرعة..اكيد هاذي رسيل....تدورني
التفت بسرعة..وانا ارسم ابتسامة كاذبة..
لاطمئن بها صغيرتي..
وامسح دمعي..المنهمر بكل غزارة..

عفراء: انا هنا...تعالي ..ماما..

وقفت..ووقف قلبي من الالم..والعذاب..
وتعلقت عيوني بعيون مشاري..
فتح اثمه..بيتكلم..وغمضت عيوني

**************

نهاية الحلقة الخامسة عشر...

محبتكم

بااااااااااااااااااقي فررررررح