....بـــــــــــــــــــــاقي فــــــــــــــــــرح..قصة نجدية مميزة

يــاســمينه • 18 سنة

ليمونه_المزيونه :

وينن البارت الجديد وانا ماصدقت لقيت مشاركه لك قلت اكيد البارت بعدوه :( :( ننتظرك اختي

وينن البارت الجديد وانا ماصدقت لقيت مشاركه لك قلت اكيد البارت بعدوه :( :( ننتظرك اختي

القصه راااااااائعه ومشوووقه ,,

وبانتظار الجزء القام .. رجاءً لا تتأخرين علينا :)

وسلمت يمينك اختي :: باقي فرح ,, على النقل :)

باقي فرح • 18 سنة

الحلقة الثــــامنة عــــشـــــر

*****************************************

"في كل مكان….وفي كل زمان
بين الهدوء تلقى الرياح
بعض الصدور فيها الحنان
وبعض الصدور فيها الجراح
مهما اشتكيت والا بكيت
ما يصير ليلك صباح!!"

شديت يدي على كتوفها: ويلوموني فيك يالهنوف...
وخرت عني..وعيونها مليانة دموووع
الهنوف: حرام عليك..وش هالغيبات..يالدوووبا..
مشاعل: يووووووووه...وش هالزين..اقول..انا ماني متاكدة..انتي صدق الهنوف؟؟ والا..
الهنوف: الا...الا..ياكافي نسيتي اشباهي..
مشاعل: تجنين..تهبلين..وش هالزين..من اللي مسوي لك الميك اب..
الهنوف: مرت اخوي الله يخليها ..لنا..
مشاعل: عزيـــــــــــــــــــــزة...؟؟؟ ياحبيلها جت؟؟؟
هزت راسها..وهي تقول: لا...لا...عزيزة رايحة للقصيم..
مشاعل: اجل..تقولين مرت اخوي..
الهنوف: هو...انا ماقلت لك...
مشاعل: وشوووووووو
الهنوف: سلمان اخوي..خطب هيفاء...
مشاعل: يالله عاد..بلانصب...
الهنوف: والله اني صادقة..
التفت على هيفاء..وشفتها تسولف مع خلود وتضحك..اشرت باصبعي..عليها وناظرت الهنوف: هنوس ..حرام عليكم ....
مالقيتوا غير هيفاء عاد..
الهنوف: ليه وش بهاهيفاء..
مشيت ..كم خطوة لما وصلت لهيفاء..
هيفاء: هلالالالالالا..ميشو..وين الناس..
ابتسمت: بهالدنيا..متخفرة مع اختي العريسة..
هيفاء: هههههههههاي..حلوة متخفرة..
قلت: هيفاء..ممكن طلب؟؟
هيفاء: من عيوني..
مشاعل: حطي لي ميك اب..زي الهنوف..
هيفاء: جاز لك؟؟
مشاعل: يجنن صراحة..مفروض تصيرين كوفيرة..
ليش جايبين روز وعندهم هيفاء..
حطيت يدها على اثمها وهي تضحك: وااااااااااو...والله ياعليك مبالغات ياميشو ....ومسكت يدي..جرتني لما التسريحة..
هيفاء: اجلسي..تبين خفيف..والا..ثقيل..
هزيت راسي: زي الهنوف بالزبط..ابي اللي يشوفنا يحسبنا توام؟؟
رجعت هيفاء راسها على ورى من الضحك: ههههههههههاي..توام بالمكياج؟؟ بس ولايهمك..ابخليك احلى..ماشاء الله عيونك..تصلح للظل..اقول ميشو..بترفعين شعرك؟؟
هزيت راسي يعني..لا..لا..
هيفاء: ايه ..كذا احلى..
قربت مني ..وبدت توزع كريم الاساس بوجههي..حسيت ببرودته..وبدت..تحط الشدو..
هيفاء: فتحي اشوف؟؟
فتحت عيوني..
هيفاء: لا..هذي غير هذي..غمضي..
غمضت..والافكااااار..تتصارع بداخلي..
اسمع صجتها..ولجتها...
مشاعل: اقول هيفاء..
هيفاء: قولي..
مشاعل:صدق انخطبتي؟؟
فتحت عيوني..بقرا تعابير وجهها..
شفتها ترجع الماسكرا..لعلبتها..
وترطب شفايفها..وشكلها مرتبكة..
عرفت انها صدق السالفة
مشاعل: هيفاء..تكفين..الا سلمان..والله انك حسافة
فتحت هيفاء..عيونها باستغراب: هاااااااه؟؟
مشاعل: انصحك..والله..الا سلمان..تراه مايستاهلك..
سكتت ونزلت عيونها..وهي تقول: انا..انا..
كملت: خبل..ثور..نذل..متخلف..ماعنده بالدنيا غير الضحك..والتطنز بالخلق..هيفاء..انا ماصدق وشلون عمي بيجدعك عليه..
ترى بتندمين ..وقولي مشاعل..مانصحتني..
حطيت يدي بيدها النحيلة الباردة: هيفاء..تراك بحسبة خلود..والف من يتمناك..لاتستعجلين وتاخذين..هالحقير..ترى..

وصلني صوتها..يابغضي لها..
منيرة بزعااااااق: نعـــــــــــــــم؟؟؟؟ما حقير الا وجهك يالحقيرة..
اسمعوا وش تقول هالبرميل عن سلمان؟؟
قسم بالله لو بيدي سكين غرزته بصدرها....
حسيت الغضب..يتسلق رجليني بسرعة..لما وصل طباقة راسي..اللي دخنت من الحمق..رديت بصوت اعلى من صوتها: نعامة ترفسك..اكرهك.. والله العظيم اكرهك..واكره اخوووووووووك..الله ياخذكم ويفكني منكم امين..

ومدري ليه..امتلئت عيوني دموع...
وانفجرت اصيـــــــــــــــــــــــح
اقبلت خلود..وهي تقلب نظراتها بيني وبين منيرة..
وبين هيفاء..اللي نزلت راسها..
خلود: مشاعل..وش صاير؟؟
منيرة: اختك..البقرة..قاعدة توزع نصايح لهيفاء..لاتتزوجين سلمان؟؟ قال ايش.. قالت حقير ونذل..اذا سلمان حقير اجل انتي وش تصيرين ؟؟ انتي اصلا ماتربيتي..قليلة ادب..قليلة حياء..
نفسي القى بك..صفة وحدة زينة..

بغمضة عين..التفت على التسريحة وراي..وشلت علبة كريم الاساس..ورميتها على وجهها..
بس للاسف..وخرت هالحيوانة عنها..
وضربت بالجدار وانكسرت..
منيرة بصراخ: يامجنووووووووونة....
فتحت باب الغرفة..وركضت ..للحمام..
دخلته..
وقفلته..ويديني ترتجف..
اسندت راسي..وجلست اصيح..
وازااااااعق..يارب موتني..يارب موتني..وريحني..يارب..
جلست على الارض..وانا اشاهق..ودموعي..تصب..
شديت على شعري..احس بشئ..يحربقلبي..
احس بنار..ويديني تتنافض..من الغضب..
كلامها سكاكين..وتطعن بقلبي...
صرخت..اااااااااااي..اااااااااااااي..وحطيت يدي على صدري
ابكي الم..ابكي هم..ابكي..عذاب..ووهم..
ابكي على حالك ..يامشاعل..يالبرميل
طيب..
وليه..وليه..
ليه..ادعي على نفسي..واعذبها..عشان مين..؟؟؟
منيروه واخوها الحقير؟؟

تخسى ..الموت لهم ولاشكالهم..
وقفت وناظرت وجهي بالمراية..
ووانفجرت اضحك..اكركر..احمر وجهي من الضحك..
شكلي يضحك..عين مكحولة والدموع حايستها وعين لالالالا..
زاد انا ماصبرت لما تخلص هيفاء واسئلها؟؟
كركركر..كركركر..كركركر..
جلست على الارض من الضحك..
وتحول ضحكي لصيااااااااح..
دخلت اصابعي بشعري..وشديته بقوة..
وضربت راسي على حد المغسلة....
ياربي..احس بضيق..احس بضيق..
بختنق..شكلي بموت بهالمكان..
بموت بحسرتي وحرتي..
فتحت الباب..
وطاحت عيني على عيون الهنوف..
اللي خربها الصياح..
طاحت بحضني..تصيح..
هنوف: مشااااااااااااعل...سامحيني..
دفتيها..وناظرتها من طرف عيني: على ايش؟؟؟
هنوف: سامحيني على الكلام اللي قالته.. منيرة..انتي تعرفينها..
متبري لسانها منها..
ابتسمت..اشوى..احسبها تقول سامحيني على سالفة سلمان..

مشاعل: لا..ماعليك..بس اويلاه..ليت العلبة جايتن بجبهتها..
هنوف: تكفين..لاتاخذين بخاطرك..
مشاعل: هنوس..روحي تكفين شوفي وجهك بالمراية..صار بيتزا..
ضحكت هنوف ودموعها على خدها: شوفي وجهك اول..هههههههههههاي..
خميتها..وضحكنا..ودموعي اختلطت بدموعها..

باقي فرح • 18 سنة

******************

ام سديـــــــــــم

*****************

يا رفيق القلب ما أصدق نسـيت
خابرك مهما تعذبني .. حنــون
لا تذكرت أيامك الحلوة بـكيـت
ما تهون أيام ودك .. ما تهــون
راحتي وياك .. لا منك صفيــت
في ثواني كلها بــوح و شجون
لا قريت أبيات القصيدةوانتهيت
ودي أعرف حنا الحين وش نكون؟

انا ادري..انكم ماتوقعتوني اجي..بهاليوم!!!
ادري اليوم الكل فرحان لهدى....الا انا...
اليوم..يقام فرح..لهدى..وتوارى سعادتي ثرى النسيان ...
ادري بتقولون..
طيب موب انتي تكرهينه!!!
مستحيل..مستحيل..عشرة عمر..وابو بناتي..ورفيق روحي..
بس..ااااااااااه..مشاري..كان غالي,,
واقسى الطعون..لاجتك..من اغلى الناس..تذبحك..

اكيد تتسائلون..وش صار
من طلعت من بيتي ..!!!!

ابدا..ليومكم..ماسمعت صوته...
ولاحتى فكر يسأل عن بناته...لاهي..بعروسه..
هذا قبل العرس..اجل..بعدين..وش بيصير!!!
ذاك اليوم..ركبت السيارة..وانا دمعة ورى دمعة..
اخوي عبدالله ...شغل الشريم..اول مامسكنا خط القصيم..
غمضت عيوني..وانا استغفر..
استغفر الله... استغفر الله... استغفر الله
ياربي..ارحمني..وجلست طول الطريق...
ادعي بقلب ملهوف انه يربط على قلبي..اللي طار..
من دريت بهالمصيبة..
عبدالله احترم صمتي..
وصلنا بيت اهلي..
ورغم اني هديت..اخر الطريق..الا شوفة بيت اهلي..جددت شئ..من احزاني..ذكرت يوم اطلع من هالبيت عروس..

دخلت البيت..كان الهدوء..يعم المكان..
وقفت وشفت امي تصلي المغرب..
سلمت امي..والتفت عليّ..
ركضت..وطحت بحضنها..
وانفجرت اصيــــــــــــــــح..
عفراء: ااااااه..يايمة..اااااااااه...يمه..الحقيني بمووووووووت..
بمووووت...مشاري..سواها وذبحني..
وانا اجمع عباتي على مكان صدري..وارص..عليه..وكاني خايفة على قلبي يطير..من حر مايحس...
مدري ليه..من شفتها..تفجرت..احزاني..
نظراتها..الهبت بي الالم..والاه..والمعاناة..
دمعتها ..ابكتني..اكثر..من بكااااااااءي..
لاضاقت بي الدنيا..مابوه صدر يريحني غير صدرها..
دفنت راسي بصدرها..
وتابعت صياحي....وامي..تقرا علي قران..
وتمسح على راسي..
امي: يابنيتي تعوذي بالله من الشيطان الرجيم..ياعفراء..لايلعب عليك ابليس...يابنيتي..اذكري الله..الا بذكر الله تطمن القلوب..
غمضت عيوني..وانا احس الدموع تحرقني...
قلت: يمه...اااااه..تعبت يايمه..والله موب بيدي..احس اني بموووت..بمووووت يايمه...
رصتني على صدرها وهي تقول: تعوذي بالله..هذاي قدامك..لامت ولاشئ..والحمد لله..هذا مقدر ومكتوب يابنيتي..والرجال..لاعرس..الشكوى لله..ماباليد حيلة..غير الصبر..
صرخت باستنكار: الصبر؟؟..ليه تبيني ارجع له؟؟ ارجع..للي باعني..
امي: يابنيتي..لاتخربين بيتك..بيدك..
هزيت راسي: والله لو يموت مارجعت..خلاص..اللي بيننا انتهى..
امي: لو هذا هو الحل...كان ماعشت مع ابوك ولا لحظة..وكان تشتتو من عشرين سنة..يابنيتي المرة لاراح رجلها..تصبر وتضحي عشان عيالها..هذاني صبرت..ويارب لك الحمد..
الله عوضني بعيالي..وبكن..الله يخليكن لي..قومي غسلي وجهك..وتوضي وصلي..واقري لك قران..

ساعدتني اوقف..صدقوني..حتى رجليني خارت..
وطاحت عيوني على سديم ..ورسيل..اللي قاعدات يراقبن المشهد..
حطيت يدي على اثمي..يااااااااااااربي..ساعدني..
تعابير وجه سديم...ذكرتني بيوم اعرس ابوي..على امي..
يوم تصككت البيبان بوجههي انا وعزيزة..وعبدالله
..ليه التاريخ..يعيد نفسه مع بناااااااااتي..

ثنيت ركبتي..وطحت على الارض..وامي..تحاول..تمسكني..بس ماقدرت..فتحت ذراعي..وقلت: سديم..رسيل..تعالن..تعالن
ورسمت ابتسامة..على وجههي..
بس الطفل..يدرك..صدق..الابتسامات من خداعها...
لانهن ..بتلن..واقفات..ولاتحركن..وعيونهن عليّ..
رسيل..حضنت سديم..وانفجرت تصيح..
اما سديم..ياليتها تصيح..وتخفف عن اللي بها...
لميت يديني..الخاوية..وبنااااااااااتي..
حطب تزيد نار قلبي اشتعالاً...

نزلت اختي الصغيرة نوف..19سنة..
وشافت البنات..ومانتبهت لوجهي
نوف: هلا...والله وغلا..لولولولوليييييييش...
عفراء؟؟؟؟؟؟ متى جيتوا؟؟؟؟
ونزلت تخم رسيل..اللي تشبثت..بسديم..وزاد صياحي..
رفعت نوف راسهاوناظرتني..وشكلها ادركت المي..وحزني..ولانها تشوفنا كلنا قدامها قالت: عفراء..وش بك؟؟ مشاري..بوه شئ؟؟

شهقت..انا ناقصة يانوف..ناقصة؟؟؟
حطيت يديني على وجههي..وانفجرت..
حسيت بيدين..امي..تحضني..وتسمّي..علي..
انسدحت..وسط الصالة..حتى ماشلت عبايتي..وبناتي للحين واقفات بالباب..حاولت نوف بهن..بس عيونهن علي..

خلالالالالاص..
انتهى مخزون الصبر بقلبي..
انا انتهيـــــــــــــــــــت...

مرت الايام..بصعوبة..واناانام واصحو على كوابيس..
كنت دايم اشوفه..يجيني..ويحب يدي..ويقول: عفراء..سامحيني..
عفراء..ترى انا ماسويت هالشئ الا عشانك..
واقوم..من نومي..من الحرة اللي بقلبي..
وشلون يعرس عشاني؟؟؟؟؟؟؟

اااااااه..شكلي..من كثر...مااهوجس بوه..صرت احلم ..
ماصار شئ..يستحق الذكر..بناتي..بدن يتاقلمن..ونوف ياحبيلها ماقصرت..صارت لهن ام بدالي..
انا مالي خلق نفسي...صارت تلبسهن..وتنومهن عندها..واذا جت من الكلية..تجيب لهن الحلاو...وتلعبهن باللاب توب حقها..
يعني خففت عني الحمل الله يخفف عنها يارب...

جابت امي صينية..القهوة..وجلست جنبي..
عفراء: الله يجزاك الجنة..وراك ماقلتي..للشغالة تجيبها...
امي وهي ممدة رجلها..اللي متعبتها..وتصب فنجال..وتمده لي: موب ضارن..اذا جبتها..سمي..
اخذت منها الفنجال..وانا اتاملها..وشلون صبرت على ابوي..وعرسه..وشلون تحملت كل هالسنين..
وربتنا...اااااااخ...ليت لي قلبك يايمه...بس انا مقدر..والله مقدر..
امي: الا..عزيزة..ماتصلت..من زمان عنها..
عفراء: الا ..اتصلت امس..تقول..انها بتجي..الاربعاء..هذا..
لاطلع طارق من الدوام..عشان يمديه..يرجع..

وسكتت..يرجع عشان عرس مشاري!!!!
تنهدت..وتجمعت..الدموع بعيني..
عرفتلي امي..اللي حطت يدها على يدي: يابنيتي..تعوذي من الشيطان...والله لو هو ميت..
قلت بدون شعور: ليته ميت كان اهون علي..اهون علي يايمه..
حطت امي يدها على راسها: اعوذ بالله..وش هالكلام يابنيتي..لا ..الله يخليه لبنياته..والعرس..كلن يعرس..يابنيتي..

خلالالالالالالالالالاص..
قمت..وركضت..فووووق..ضرب كتفي بكتف اخوي عبدالله..
بعتذر..عجزت..انطق..بحرف..
كملت طريقي..ودخلت غرفتي..الاولية..حقتي قبل لااعرس..
وصكيت الباب...وانسدحت على السرير..
^
^
^
انفتح الباب...وانتشر..نور الصالة بغرفتي الظلماء..
انحنى جانب السرير..
حطيت يدها..على يدي..تجرني اجلس..
عزيزة: عفراء..يالله..قومي..ماشفناك من الصبح..
عفراء: خليني ياعزيزة..خليني..تكفين..
عزيزة: وش اخليك..ولمتى..طيب..
لفيت وجهي على الجههة الثانية..وعيوني طفحت بالدمع..
وقلت..والعبرة تخنقني: اليوم..عرسه....اليوم..بيكون معها..
شدت عزيزة على يدي: طيب..هو يعرس..وانتي تذبحين عمرك..
عفراء: غصبن عني..غصبن عني..عساك ماتجربين هالناااااااار..
عزيزة: امين..والله يهونها عليك..بعدين فكري بعقلك ياعفراء...
عفراء: ماعاد لي عقل..وشديت مقدمة شعري..بيدي..
ليه..ليه..يسويها..انا وش سويت له؟..والله ماقصرت معه بشئ..
عزيزة: ادري..والله ادري..بس تذكري ان هذا الشرع.. احمدي ربك..اخذ وحدة مطلقة..مااخذ بنت..وصغيرة..يعني..اخذ وحدة بعمرك..وهدى..تنحط على الجرح ويبرى..
موب جايك منها شر..ان شاء الله

كل حزني..كل ضيقتي..كل..المي..تحولت لصرخه..بوجه عزيزة..
جاية..تكلمني عنها..وتنحط على الجرح ويبرى!!!!!
الا هي اللي جرحتني الله يجرحها..الله لايتمم فرحتها..
صرخت باقوى المي: انطــــــــمي..لاتجيبين طاريها..الله لايوفقها...
عزيزة: استغفر الله..تذكري ان رجلك هو الي طق بابها..
صرخت بها..وانا اصيح: بس..بس ياعزيزة..هذا وانتي اختي..تقولين,,هالكلام..اجل الناس وش بتقول..
عزيزة..اطلعي برااااااااااا...تكفين اطلعي برااااااااااااااا...
عزيزة: عفراء..ياحبيبتي...انتي اغلى الناس عندي وتدرين..
والله ..موب هانيني..اجلس..وانتي حابستن روحك..ولااضحك..وانتي تصيحين..عفراء..لااعرس مشاري..مانتهت الدنيا..ترانا نحبك..ونبيك..قومي..شوفي بناتك..والله حالتهن تحزن..
قلت بضعف..وكل كلمة من عزيزة..
تضرب..وتر حساس بقلبي..
عفراء: وين نوف عنهن!!!
عزيزة: نوف ماقصرت..بس مابوه زيك..لهن..يالله قومي..
وهي تجر يدي..
سحبت يدي..وانا ارتجف..
وقلت: عزيزة..اطلعي..وارسلي..لي سديم..
وغمضت عيوني...وصوت الطق..والزغاريد باذني..
وريحة البخور والعطور بخشمي..وصورة ابو سديم..لابس البشت الاسود..ويبتسم..من الفرحة..

تجي قدام عيني وتروح..بس الشئ اللي عجزت اتخيله..
شكله وهو جالس جنبها..عجزت اتخيل شكلها...
حطيت يدي على اثمي..
اكتم صرخة الم وليدة....

أبي أعرف بتفهمني
لو
حكيـت؟؟
لو
بكيـت؟
لو مشيت بدرب وتعثرت
و
شكيت؟؟
لو رضيت الظلم لو رضخت للهم
وعلى أنغام الحزن
غنيت؟؟
أبي اعرف بتفهمني ؟؟ بتعذرني؟؟
لو
جنيـــت؟
لو
جيتك وقلت لك
حنيـــت؟
بتعذرني لو قلت
مليت من الجفا من القسى
من الكذب ... وقل الوفا!!
وعلى إحساس البشر
صليـــت؟؟

باقي فرح • 18 سنة

**********************
نجــــــــــــــــــــود

*********************

يقولون الغلا ينقص
لو طــــال الغياب ...

وربي

لو تروح آخر الدنيا
ما ينقص غلاك..

شديت فستاني على تحت..والتفت على خلود..
نجود: خلود..وش رايك..ضيق مرررة عليّ؟؟
تاملتني خلود: لا..مو مرة..
سمعت جوالي..يرن..وقفز قلبي من مكانه...
"روحي تحبك..يتصل بك"

رديت بسرعة..بصوت واطي..الغرفة مليانة..
نجود: هلا..
فهد: هلا..بس؟؟ ياهلا والله وغلا..بروحي..بقلبي..هلا بالاحساس..هلا بالزين..هلابالدلع..
قاطعته: طيب..الى اخره..وشلونك..
فهد: انتي بخير؟؟ اجل انا بالف خير..
ابتسمت: الحمد لله..
فهد: نجودي..وينك الحين؟؟
نجود: بغرفة عمتي ..هدى..ليش.؟؟
فهد: يالله هذاي جاااااااااااي..
صرخت فيه: يامجنـــــــون..لا
سمعت ضحكته..واللي سكتني..عيون
سارة..واريج..اللي بدت تراقبني..والابتسامات ذات المغزى..
انحرجت ..ولفيت على الجدار..عطيتهن ظهري..وقلت: فهد بعدين ..ادق عليك..
فهد: لحظة..لحظة..تعالي انزلي..لازم اشوفك..
نجود..بهمس: ماباقي الا اسبوع...اصبر..
فهد: اموت..لو ماشفتك اليوم حرام عليك..

وصلني صوت اريج قريب مني..: بنحط مرايه
على الجدار..عشان نشوف تعابير الخجل
هههههههههاي ياجولييت..
عصبت من فهد..وقلت: فهد ..بسكر..واذا رحت للبيت دقيت عليك..بامان الله..
وسكرتها..والتفت على اريج: نشوفك بكرى..لانخطبتي!!!
اريج..جمعت يدينها على صدرها وهي تقول: متى ؟؟ بس متى يجي هاليوم..

تبون الصراحة..كسر خاطري فهد..
من زمان ..ماشفته..حتى اتصالاته..ماارد عليها..
بس هذا..لمصلحتنا..خلينا نشتاق لبعض..
شلت جوالي..ومشيت للباب..بروح اي مكان فاضي..وبدق عليه..
فتحت الباب..

الا شئ احمرررررررر بوجهي..
بسم الله..
رجعت على ورى..
والا ريحة الورد الجوري الاحمر..تملئ خشمي...
حضنتها..وخيالي ..يقول..فهد..ايه...فهد..مرسلها لي..

"احبك..مووووووت يافهد..."

سحبها..ياسر مني وهو يقول: خير؟؟ من قال انها لك..
نجود: لمين.؟؟
ياسر: لخالتي هدى...

هدى؟؟؟؟؟؟
من بيرسل لها...
طبعا..تجمعنا كلنا يالبنات حول..هدى والباقة اللي استقرت بين يديها..
اريج: وااااااااو...تجنن..
خلود: من الذوق االلي مرسلها لك..ياهدى...
اريج: اكيد امي لولوة..عشانها ماقدرت تحضر العرس..
سارة نغزتها..لان تعابير وجه عمتي هدى تغيرت..
سارة: وش امي لولوة..لا..الحمد لله..هي بخير..وهي بتدعي لها بدال هالورد بالف دعوة والله يقبلها...

راقبت ...يدين عمتي هدى المرتجفة..وهي تفتح الكرت..
صراحة باقة ورد تجنن ..كبيرة..وفخمة..وملفوفة بكل ذووووق..
اكيد وحدة غالية عليها هدى بالحيل..ومرسلتها..
بس الدموع اللي تجمعت بعيونها..
والعبرة اللي على شفايفها..
صدمتني..
حضنت الباقة..وانفجرت تصيييييييييح...
وحنا نناظر بعض..بذهول واستغراب...
سالت خلود..
نجود: منين هالباقة..وش به تصيح ؟؟؟
مفروض تفرح....
سحبت خلود الكرت من يد هدى..
وقرتها

"سامحيــــــــــــني..وتوقيع؟؟؟"

وش السالفة؟؟؟؟؟

راحت اريج..تسال اخوها ..عن اللي مرسل الباقة..
ورجعت ..تقول: يقول ماندري..موظف المحل..جابها..وماقال منين؟؟
غريبة..صراحة..
خلود: منين ..هالباقة ..ياهدى..
هدى بضعف: من صديقتي..امل..
خلود: طيب وليه ...سامحيني..
هدى: لانها ماقدرت تجي..اليوم..
خلود: حلو..يعني انتي عازمة صديقاتك؟؟
هدى: امل..بس؟؟

تنهدت..مدري..وين مشاعل ..والهنوف..مالهن حس
التفت على البنات وقلت: الا وين مشاعل والهنوف..
منيرة: تكفين..الا هالبرميل..لاتجيبين طاريها..
نجود: وليش ان شاء الله..
منيرة: صراحة..الله يعينك على هالاخت..وقحة بشكل..
نجود: لا..والله..زي ماسلمان اخوك..مشاعل اختي..
منيرة: هذي تسمينه اخت..تخلخلت ضلوعها يارب..
نجود: منيرة عاد طولتيها..وانا ماسمح لك..تدعين عليها..
منيرة: ماطلبت رايك..

وقامت..تعدل مكياجها..قدام المرايه..
انفتح الباب..ودخلت عمتي شيخة..حاطة يدها على خصرها
عمتي شيخة: ماشاء الله...انتن منطقات هنا..والناس..جو..
خلود: والله ..وصلوا؟؟ يالله بنات..خلونا ننزل...
عمتي هدى..من درت انهم وصلوا..
حطت يدها على صدرها..
وغمضت عيونها..

نزلنا..واستقبلنا اهل مشاري..
جت امه..وخواته ثنتين..شكلهن كبار بالعمر..كبر امي..واكبر..
وجت مرت اخوه..
شكلها مغصوبة على الجية..والا..خايفة رجلها يعرس عليها زي ماعرس..مشاري..
جبنا العصير..وبعده القهوة والحلى..
وعلى الساعة 11 ونص..
نزلت خالتي هدى..ماسكينها عمتي فاطمة..وعمتي شيخة..
طبعا..عيونها حمراء..والدموووع...ماغابت..
حاولنا نخفف..بس..هدى..مهيب معنا...

ام مشاري: ماشاء الله..تبارك الله..الله يوفقك يابنيتي...ويسخركم لبعض..مبرووووك..الف مبرووووك..والله وعرف وليدي يختار..
الله يحفظكم..
ام ثامر(صديق اخوي نواف..تذكرونه..قالت عنه اميرة اول القصة)..اخت مشاري..قامت تزغرد..
ام ثامر: الف الف مبرووووووووك..ياهدى..
وجت اختها الثانية مدري..وش اسمها..وباركت لهدى..
مرت الاخو..قامت على استحياء..وقالت بصوت واطي: مبروك.
ورجعت تجلس بسرعة..وكانها متضايقة..

الدموع اللي انسابت ..من عيون هدى..يوم قالت ام مشاري: ليت امك معنا هالليلة..مير الشكوى لله...سبحان اللي ماتضعف قوته...والا ام علي..يالله من فضلك..مابالحريم مثلها..
الله يعافيها..ويختار لها الخيرة المباركة اللي تريحها يارب..من اللي هي بوه..
قهرتني هالعجوز...صدق ..انها تدعي لامي لولوة..بس موب..ذا وقته...عمتي هدى..انفجرت تصيح..
وخلود..وعمتي فاطمة..مسكوها وطلعوها للغرفة الثانية..

مدري ليه..غيمة حزن ..غطت مشاعري..
بعد اسبوع زواجي؟؟
ليه عندي احساس..اني بصيح زي ماصاحت هدى
بتعذب ..زيها..والفرح..باسمعه لكن مااحس بوه..
ياربيه ظروفي تختلف عنها..
بس احساس..قووووي..عصر قلبي..
تنهدت ....الله يوفقنا يارب..

طلعت..وشفت الهنوف ومشاعل..يسولفن..بالصالة..
وبينهن صينية الحلى ..ودله القهوة...
لا..شكل مشاعل..الحمد لله ماتاثرت من كلام منيرة..
صراحة..منيرة الله يهديها..ماتراعي..قدام الناس..
ولمراهقة تقول هالكلام!!!
بس عااااااد..وش نسوي..مشاعل مفروض ماقالت هالكلام بعد لهيفاء..وش عليها منهم؟؟
على طاري هيفاء..
يوم قلطوا الناس على العشاء..طبعا بوفيه بالحوش..
وماشاء الله ياحوش امي لولوة الله يرجعها له بالسلامة..
تتطارد بوه الخيول من كبره..وكله ثيل..وهواء يرد الروح..
جلست على طاولة انا وخلود..وسارة..
الا هيفاء..جت ومسكت يدي..
هيفاء: نجود..تعالي ابيك..بحاجة..
ناظرتها..وقلت: وش بها...مشاعل؟؟
لاتصير منيرة قالت لها شئ بعد؟؟
هيفاء بنفاد صبر: تعالي..الحين وتعرفين..
قمت..والشرر يتطاير..من عيوني
منيرة تبي اللي يوقفها عند حدها
ذي ماتستحي!!
شايفتنا سكتنا...لها ..تحسبنا راضين..
ركضت..مع هيفاء..
ورقينا الدرج...
فتحت باب غرفة امي لولوة..
ودفتني ودخلت وراي..
التفت عليها..وقلت: هيفاء...تكلمي..مشاعل وش بها..
ناظرتني وابتسمت: الصراحة..الصراحة..
نجود: وشوووووووو...
هيفاء: مدري..وش اقول..
نجود: وينها الحين..ومنيرة..تو كانت بالحوش..؟؟
انفتح الباب..اكيد هذي مشاعل..
بس تقعشر..جلدي..
التفت ..بسرعة..
وطاحت عيوني على عيون

فهـــــــــــــــــــــــد...
***64***

ياسعد عيني يوم جابتك الأقدار
صدفه وفيها داخل القلب حليت
دنياي قبلك مظلمه مابها أنوار
وزال الظلام بجيتك يوم هليت
مثل القمر تنجذب لك كل الأنظار
غصبن علي لاحكوا فيك فزيت
وعمي فيصل ماسك يده..
فيصل: هاه..والحين انتهت المهمة؟؟ ونجود بين يدينك..يالله ياهيفاء..خلينا نطلع..الربع يبون ياخذون راحتهم..
انا انربط لساني..وتسارعت دقات قلبي..المجنون..
ياربيه..انخطفت انفاسي...
ماني قادرة انطق..

حطت هيفاء يدينها على خصرها وهي تقول: نعم؟؟ لا..ياعمي موب قبل..لاينق لي الخمسمية اللي وعدني بها...وقربت لفهد وهي تقول..يالله ياشيخ فهد..نجود..وجبتها لك..وين الاجرة؟؟
دفها فهد للباب..وهو يقول: اجرتك..اني اجيب لك الحين سلمان..يالله..برا من غير مطرود..
سمعت احتجاجها..وصوت عمي فيصل يضحك..

سكر فهد الباب..وقفله..
التفت..وابتسم..وبعيونه..نظرة ذات معنى للقلوب الملتهبة حباً..
فتح ذراعه..بانبساط وهو يقول..بنشوة النصر..
فهد: انا فهد..لا..بغيت شئ..اجيبه..وانا بغيت اليوم اشوف القمر..
والحين هو بين يديني..

رجعت لاشعوريا مع كل خطوة..يخطوها باتجاهي..
وقلت: لالالالالالالا...فهد..تكفى لا...
قال: للاسف..تاخرتي كثير ياحبيبتي.

باقي فرح • 18 سنة

*******************

فارس

*******************
طول ..العرس..وانا افكر..بباقي فرح..
ودي يخلص هالعرس بسرعة..عشان ارجع للبيت..
واقرا..ردها علي..
الغريب..اني يوم كنت اكتب لها...
قريت تحت .. is typing a message باقي فرح
يعني ..كانت موجودة..
وتقرا كلامي..
بس الغريب..ليه..ليه ماردت؟؟

معقول..كل هذا زعل..؟؟
ياربيه..والله نفسي..اقولها ..من الاخير..من هالحبيب..
وارتاح واريحها بدال اللف والدوران؟؟

صحيح..فرحت انها اضافتني..
بس دائما كنت انا اللي ابدا..المحادثات معها..
وكانت محادثاتنا عبارة...عن اسئلة مني واجوبه منها..
بلسم جروحك:..متى قررت تكتبين؟؟
قالت: من ايام المتوسط..
بلسم جروحك:..وليش قررتي تنشرين بالجريدة؟
قالت: صديقتي عبير اقنعتني..
بلسم جروحك:..وش نوع علاقتك بعبير؟
صديقة..
بلسم جروحك:..صديقة..وبس..؟؟
صديقة غالية..
بلسم جروحك:طيب..متى تكتبين..متى يجيك الالهام..وتكتبين؟
متى ماحتجت اني اكتب..
بلسم جروحك:وش اكثر..مقالة قريبة لروحك..وقلبك؟؟
كل مقالاتي..كذا
"اصريت عليها..لعلي اطلع بنتيجة"
بلسم جروحك:لا..ابي اكثرها..اللي لما تقرينها تحسين مشاعرك تهيج معها؟
قالت: يمكن ..طعنة غدر
"تنهدت بارتياح..حلو مسكنا اول الخيط"
قلت: ليش هاذي بالذات..؟؟
قالت: لاسباب بنفسي..
"بغيت اموت من القهر..ابي اعرف هالاسباب"
بلسم جروحك: يعني للحين تحسين بيننا حواجز؟؟ للحين ماوثقتي ببلسم جروحك؟؟
قالت: مو المسالة مسالة حواجز..بس مسالة اني ابي انسى
بلسم جروحك: تنسين ايش؟؟
قالت: انسى الماضي واعيش اليوم
بلسم جروحك:بس شكلك للحين مانسيتي..شكل الجرح عميق..بعمق مشاعرك..و..اثاره للحين تنزف..ودموعك للحين تذرف؟؟

سكتت..طولت ماردت..

بلسم جروحك : الوووووووو..باقي انتي معي؟؟
قالت :ايه..
بعدين قالت: معليش انا مضطرة اطلع القاك وقت ثاني..مع السلامة"

ومن بعدها ..ماشفتها..الا وجها لوجه..
طالعة من غرفة اختي هيفااااااااااء..
اااااااه..
لو اقول لكم عن احساسي..بها
نفسي افهم انا بالنسبة لك وش اكون...

أنا السعادة في حياتك..
ولا الجراح؟؟!
والا الطعون؟؟!
أنا حبيب ودايم وفي..؟
ولا غريب ودايم يخون..؟
أنا العقل بدنيتك..؟
ولا الهبال .؟
والا الجنون؟؟
بسألك وردي علي..
في دنيتك منهو أكون؟؟

ما علموك ؟
إنه في غيابك
يلف دنياي السكون
وفي وجودك
تضحك أحزاني وتهون..!!

بغى لساني يفلت
" باقي فرح..تكفين سامحيني..انا اسف..ماقصدت اجرحك"
بس شكلها المصدوم..
شتت حروفي..ضيع..المعاني بقلبي..
ااااااااااه منك ياخلود..واااااااه عليك..

واخيراً..خلص هالعرس..
ومشاري..اخذ هدى..وراحوا..والناس..بدوا يتفرقون..
على الساعة 3..الفجر..كنت انا ونواف..اخر من طلع..
لان الاخت هيفاء..كلما دقيت عليها قالت: فارس اصبر شوي..لما تروح خلود؟؟
عاد انا..دام الدعوة بها خلود..اصبر..واصبر لما يمل الصبر مني..
نواف دق على خلود:يالله خمس دقايق ..اذا ماركبتي..والله لااروح..
وبالاخير طلعن جميع ..هيفاء وخلود
وكانن اخر من طلع..من البيت
اللي طفت انواره..

قلت بقلبي..ليتهن يتلخبطن وكل وحدة تروح لسيارة اخو الثانية..
بس..تاتي الرياح بمالايشتهي فارس
هيفاء: السلام عليكم..
فارس: وعليكم السلام..خير...وش عندكن؟؟
هيفاء: خلود..اصرت..ترتب اغراض..عمتي هدى..وغرفتها..لانها كانت مرة محيوسة..وانت عارف..كانتي عند عمتي فاطمة..
فمن بيرتب البيت؟؟

قلت بخاطري..دايم راعية معروف..ياخلود
وسالتها وكاني عفوي: الا ..من متى جايات انتي وخلود لعمتي هدى؟
هيفاء: خلود جايتن قبلي..يمكن الساعة ثنتين الظهر..
فتحت عيوووووووووووني؟؟
ثنتين الظهر؟؟؟

وانا يوم اكلمها..على الساعة خمس؟؟؟
وشلوووووووووون