أهلين حبيباتي ..
كيفكم وش أخباركم ..
عسى ماعندكم خلاف وش أخبار الأهل والأصدقاء على طاري الأهل والأصدقاء .. تراني بستغل الفرصة وأهني جميع الأهل والأصدقاء بمناسبة قرب حلول النصف الثاني وكل عام وأنتم ناجحين دنيا وآخره والله يعيننا عليه بخير وأعاده الله علينا وعلى الامة الطلابية باليمن((والسعودية والكويت وجميع دول العالم خخخخخخخ)) أمزح إنتبهوا تراه اليُمنِ والمسرات .. والنجاح والأفراح ..((صدق ياشيخة
)) والأن ندخل في صلب الموضوع ..
أخواتي وصديقاتي .. وبنات جيراننا وخالاتي .. ولايهونن بعدعماتي ..
تحية طيبة وبعد ..
في ليلة ليلاء تتلألأ فيها النجوم ... نظمت قصيدة عصماء .. أعزي فيها قلبي المهموم .. الذي أعجزته الأحزان .. وأزعجنَّة زوجات الثيران ..:44:((يعني البقر))
(( أحس إني لابديت أهرج عربي تجين حكة بلساني ومغص براسي .. ما أعرف خلونا بالعامي أحس إنه أسلم لي من الوقوع بالأخطاء التي تخدش جمال لغتنا العربية ))
أقول إني في ليلتن من الليالي قعدت أفكر بلحالي .. وأنا ضايقن صدري بالحيل ..((جايتكم بالهرج واقولكم وراه ضيقة الصدر)) وكتبت قصيدتن ببقرتن بمزرعة جيران صديق ولد عم بنت خالتي هذا مرتـ(ن) رحنا لمزرعته يوم حنا صغيرين .. وكانت المرة الاولى والأخيره الي أشوف به بقره عاد أنا يامحاتسيتكم ما عمري طبيت حديقة حيوانات إلى مرة و لا شفت به بقر بعد وإلى الأن مدري وراه ماشفت بقره بذيك الحديقه ؟؟؟!!!
وعن الحلف دايم أشوف بقر الدنماركيين بدعايات زبدة لورباك .. ولا شفتهن إنغثيت مدري وراه يدللن ودلعن وحنا لا .. خضرة وطبيعة وقصور تهبل ومسابح تاخذ العقل ..عاد تصدقون مرتن حسيت إني أمي سافهتن ولا تهتم بي تعرفون الواحد لاصار بالوسط لاهب الكبير الي يوخذ رايه ولا هب القعده الي يدلل (( ياناس هالبنت حساسة بالحيل )) ومن شد ضيقة الصدر الي بي عاد قعدت أصيح عند امي
وقلت ياليتي بقرة دنماركية أصرف لي .. علشان أشوف الدلال والعز .. بس بنفس الوقت أقول بقلبي ((أستغفر الله ياربي بس أبستدر عواطف أمي )) المهم مالكم بالطواله ((وش عقبه))قبل لا أقولكم العصيده إحم أقصد القصيده .. أفضل إني أقولكم المناسبه و وراه بالذات كتبت عن البقره ووش دخل البقره بضيقة صدري ..
((كل ذلك ماستعرفونه في الحلقة القادمه ... تابعوانا )) <== متأثرة بأفلام الكرتون :02:..
...
7
7
7
7
7
7
7
7
أمزح بكمل لكم ..
أقول بذيك الليله كنت مخزنه بصدري قهرات كثيرات ((أبو هنّود يتكلم)) وراي منقهره من زمان ؟؟!
من البقر الي أبلشننا ودي أدري وراه كل شيء نبيه مربوط بحج البقر ولا بعد حجهن على قرونهن ..ماقالوا رجليهن يمكن تصير أقرب .. والله مذله .. نبي نروح للسوق ..((لاحجت البقر)) .. نبي نسافر ..((لاحجت البقر)) .. نبي نكشت ((لاحجت البقر)) ... نبي نخيــِّم ((لاحجت البقر)).. حتى مرة تحطمت حيل قلت لأمي متى أعرس قالت وبكل معنى الكلمة ((إيه لا جت الساعة التي تحج به البقر على قرونه))بقر بقر بقر ماصارن بقر ذولي صارن بشر يحكمنا ويسيطر على تصرفاتنا ويدوس على آرانا غير آبه بنا وبمشاعرنا:30: ((صارت صدزية البنت)) ..
ودي أدري من هالي مطلعن هالجمله .. علشان أروح لمه وأطق عليه الباب والشرر يتطاير من عيني .. والدخان يتصاعد من رأسي .. وبكل قوه
...أقول له (( لاعمرك تعيده تراك أقلقتنا:06:)) وبالمناسبة ...
لو تناولنا الجمله من منظور نفسي .. فلو الأم أو الأب أو أي أحد إن شاء الله الشغالة .. إذا سألهم أي طفل عن شيء وقالوا له لا حجة البقر .. فأنا أتوقع تتولد عقدة نفسية تجعل الطفل يشعر بأنه شخصية مهمشه لا يهتم بها أحد فقول ((لاحجت البقر)) للطفل.. معناها إننا نسكته هو فعلا بيسكت وماراح يقول شيء بس تتولد لديه سيالات من القهر في صدره.. نتيجة تراكمها ينتج لديه تيار لمايسمى بـ((الإستهانه بالشخصية )) فيستهين بشخصيته ويحط بباله إن الأهل ما أهتموا بشخصيته وهم أقرب الناس له فكيف الناس يهتمون بشخصيته .. وبكذا تنعدم ثقته بنفسه فيتولد جيل إتكالي غير واثق من نفسه بتاتا وكل هذا ناتج فقط من جمله ((لاحجت البقر))..!!
ماقلت لكم إن البقر صارت تأثر .. وتقدر إنه تهدم مجتماعات وأجيال ..
البقر نعمة من الله .. بس من سوء إستخدام الناس للبقر خلاه نقمة ..!!
... الجدير بالذكر إن تاثير البقر على الأطفال ماوصل لهالحد .. بل تجاوزه .. بتقولون لي وشلون تجاوز هالحد أنا أقولكم ..
أكيد أغلبكم يذكر لعبة كنا نلعبه يوم حنا صغار وحنا فرحين به ... يوم كبرت كل ماتذكرته إنقهرت قلت وشلون أصير من أنصار إستبدادية البقر (مصطلح خطير صح ) اللعبة ذي كان يظهر من أنشودته إن البقر تسبب بزعل بنت وسالفة طويلة لمين نوصل للحليب والبقره عيَّت تعطينا حليب .. فبقره ماراحت ولا جت تقول مانب معطيتكم حليب إلا إذا جبتوا لي برسيم .. طيب ماعندنا برسيم وش نسوي لتس أنتي وخشتس .. هالحين البنت ضايقن صدره وزعله وأم عوف تقول أبي برسيم
.. المهم تذكرون اللعبة الي كنا نقول به ..
بسمه اليوم زعلانه
تبي قطعة تفاحه
والتفاحه بالثلاجة
والثلاجة مقفوله
والمفتاح مع الفلاح
والفلاح يبي مره
والمره تبي ولد
والولد يبي حليب ,,
والحليب مع البقر
والبقر يبي برسيم ,,
والبرسيم يبي مطر ..
يامطره هلي هلي
على قريعة بنت أختي
بنت أختي جابت ولد سمته عبد الصمد ..
بنت أختي جابت ولد سمته عبد الصمد ..
المهم من هذا المنطلق أنا نظمت قصيده للتعبير عن مشاعري المقهوره من البقر .. وأقول فيها ..
أقول يا الشينه يا أم الخلاقيــــــــــــن .. ... .. ضفي وجهتس تراتس غثيتين
الله ياخذتس قولي آميـــــــــــــــــــن .. .. .. أبلشتينا وأنتِ ماتدريـــــــــــــن
متى تفكينن وتحجيـــــــــــــــــــــــن .. .. .. تكفين حجـــــــــــــي لو بريالين
الحين تعرفين تطوفين بأربع رجليـن.. ... .. ولا تعرفين بالمسعى تسعيــــن
تخليتس بالجـــــــــــمرات ترميـــــن .. ... .. الله يقطعتس ((تسيف)) ضحكتيــــن ..
والله العظيم يا أم اكبر عينيـــــــــــن .. ... .. لو ما عقلتي أذبحتس بالسكــــــــين..
وطعم لحمتس شيــــــــــــــــــــــــن.. ... .. ولا كان أكلته بملعقـــــــــــــتين
الله يغثتس وأشوفتس تبكيـــــــــــن .. ... .. وتطلبيـــن ثور بس ماتلقيــــــن ..
ياعلتس ببيت أبوتس تعنســـــــــين .. ... .. يا الغثه يا أم عيــــــــــن وعين ..
أقول ويلاه تكفين علميــــــــــــ(ن) .. ... .. متى تفكيـــنن وتحجيــــــــــن ؟؟؟
وسلامتـــــــــــــــــــــــــــــــــــــكم
ملاحظة لغير الناطقين بالقصيمية ::::
* تسيف = كيف .. تقلب الكاف تس .. وتدغم التاء بالسين .. فتصبح تسيف .. ،،
قولوا صح لسانتس تكفوووووون ...
وفي الختام ،،
أقول لكل بقره ... لاتستانسين لا شفتي إنتس مأثرتن على الخلق .. لأنتس وإن كنتي مأثره .. فأنتي الي يقولن عنتس .. ((يا شين السرج على البقر )) وهذي مسبه لتس لأنه مايزهى عليتس شيء .. ياحّووووووووول .. ويسعدني أن أقول لتس .. تراتس شينه و أزين ما بتس عيونتس يا أم عيون .. (( تحسون إن به ثأر بيني وبين البقر ...صح ؟؟))
ملاحــــــــــــــــــــــــــــــظة ::: مهمـــــــــمة ::: بعض الأمور مبالغه به والسالفة مكبره.. وهذا فن الكاركاتير وهو تضخيم الامور .. ((الله يعيين بدت تفلسف)) .. بس الموضوع ترى سعة صدر ووناسه ((خافت يزعلن عليه البقر
))الشيء الثاني ::::
ترى الموضوع كاتبته بمنتدى ثاني بإسم غير .. يعني لاتقولون ناقلته .. مع إني ما أحب أكتب نفس الموضوع بمنتدين .. بس تحسفت بالقرق :41:..
هذا ...
وسبحانك الله وبحمدك أشهد أن لا إله إلا أنت أسغفرك وأتوب إليـــــــــــــــــك ،،
خويتكم :: حوريـــــــة القصيـــــــــــــــم ،،:27:
