انا طريقتي سهله ومافيها شغل كثير

اقطع صدور دجاج بشكل طولي احركها ع النار مع شويه زيت لماتتحمر واحط بهارات دجاج من ماركة فرشلي وفلفل اسود وملح واطفي النار
اكون مجهزه من قبل صوص الثوم عباره عن فص ثوم مهروس وملعقتين مايونيز وعصير ليمون لماتتجانس مع بعض ويصير صوص
بطاطس مقلي مخلل بقدونس شطه تباسكو
اجيب خبز ادهنه بصوص الثوم واحط عليه دجاج وبقدونس وبطاطس ومخلل وشطه والفه
لذيذ وماينشبع منه 😋😋😋

جربوها

للاسف مالقيت الرابط
ابي اكتب لك كيف اسويها انا
باكتب لك الطريقه وان شاء الله ماتزعل علينا صاحبة الوصفه

ابدا بالخبز مو جاهز انتي تسوينه
اي عجينة فطاير انتي معتمدتها بعد ماتتخمر ترقينها رقيقه جدا وتخبزينها على الصاج واذا استوت الجهه السفليه تقلبينها على الجهه الثانيه ولاتطول على الصاج عشان ماتصير يابسه
انا عن نفسي اسويها بالليل واحط الخبز بعد مايستوي ويبرد بالثلاجه واذا بغيت اسوي اطلع الخبز واسخنه بس
وبكذا يسهل على واذا كنت الي احتفظ فيه لمده طويله اكثر من يوم احطه بالفريزر واطلعه اذا بغيته ساعه وحده يفك عن الثلج وبعدها اسخنه واحشيه

ثانيا : الصوص
بالخلاط بطاطس مسلوقه وزبادي وفص ثوم وعصير نصف ليمونه وفلفل اسود وشوي ملح

ثالثا : الحشوه
صدور دجاج مقطعه مثل اصابع البطاطس طويله وتكون الدجاجه غير مسلوقه لانها بعد السلق نفقد نكهتها بالمويه
بس طلعيها من الفريزر وخليها تذوب لحالها وبعدين قطعيها او نقعيها بماء بدون غلي ويكون ماء بارد
بعد التقطيع نحمسها على النار مثل حشوة الفطاير
مع بصل وشوي زيت وبهارات وجزر مبشور وطماطم مقطعه واذا حبيتي تضيفين فلفل بارد
او بقدونس براحتك اللي حابه ضيفيه حتى لو دجاج لحاله بدون اضافات روعه
وقلبيه لين يستوي

وبعدين ندهن الخبزه بالصوص ونحط بالوسط من حشوة الدجاج ونزينها بخس مقطع وبطاطس محمر ونجمع اذرفها فوق ونثبتهاباعواد اسنان صغيره
وبالعافيه

آسفه لو صار فيه اخطاء او كلامي مو واضح لاني مشغوله واكتب بالجوال بسرعه ماحبيت اطلع من غير مااساعد باللي اعرفه
وان شاء الله ياربي تضبط معاك وتعجب من ياكلها

والله يجازي صاحبة الوصفه الاساسيه خير الجزاء

تقطعين العجينه بعد ماترقينها دوائر الحجم اللي يعجبك وتخبزينها

واسأل الله تعالى ان يعتق رقابنا ووالدينا جميعا من النار

نسيت تبخير الدجاج بالفحم
بعد مايستوي تحطين فحمه بالوسط وتحطين عليها نقاط زيت وتغطين عليها
عشان يصير دجاج على الفحم😉