حبيت ان اوضح نقطه للاخوات انه الحديث عن
المجتمع الغربي لايعني اغفال عيوبنا ابداً
ولكن لكل مقام مقال

لاحول ولا قوة الا بالله
كثرت مواضيع الفتنه ..الله يكفينا شرها
اتمنى هالموضوع يتقفل لأنه مامنه فايده وضرره اكبر بكثييير..
:(
لاحول ولا قوة الا بالله

صادقه قلتي اللي في بالي

يعني كل مافتحنا نقاش حول الجانب السيء عند الغرب يقلبوون الحوارللاشياء اللي عند العرب

اهلا اختي الكريمة مآذن


ممكن اسألك ليه اثاروا الردين الحيرة عندك؟؟؟عشان اوضح لك ...

واذا حابة تراسليني على الخاص علشان مانزعج الاخت أم 2 فماعندي مانع الله يرضى عليك...



اختي الحبيبة شذو ....


انا متأكدة انك فاهمة اش كتبت ياغالية...

وفكرته تتركز وتتمحور على قضية وحدة

اش مصلحتنا احنا يالمسلمين لما نكوّن صورة مغلوطة عن القيم الغربية...صورة مجتزأة ماهي كاملة


هل هذا بيخدمنا ؟؟؟هل هو الحقيقة أصلا؟؟؟

يعني اش ضر الغربيين احقترناهم ولا احترمناهم

ناس لاعبة بالدنيا لعب


اقتصادها اقوى الاقتصادات وسياساتها انجح السياسات




يعني احنا يالمسلمين هل بنضرهم بنظرتنا المجتزأة؟؟



لكن الحقيقة من اللي بينضر لما يجي للغرب وهو حاط في باله فكرة الشواذ والسفاح والأشياء اللي ذكرت في ردي على الاخت ام انها موجودة ومانختلف انها موجودة بل ومشرعنة ولصاحبها الحق القانوني الكامل


وهذا شيء ترفضه قيمنا المسلمة والفطر السليمة حتى عند الكفار...

لكن هل المجتمع الغربي (اللي هو مكون من أفراق كل واحد منها مختلف تمام الاختلاف عن الثاني

يعني تقولين الغرب تقصدين امريكا واوربا...

امريكا تنقسم لكندا والولايات المتحدة

اوربا تتقسم المانيا فرنسا بلجيكا بريطانيا الخ الخ

كل وحدة من ذولي تضم مقاطعات ومناطق كل وحدة مختلفة في القيم عن الاخرى


يعني اللي يجوز في ولاية مايجوز في اخرى ...واللي ينتشر في مكان يكون محرم في ثاني

امريكا مثلا (ألولايات المتحدة ) مازال في كثير من ولاياتها تعطي الحق للعائلة في تحديد مصير الابناء وديانتهم وبعضها من حق الشخص انه يتزوج ويطلق في يوم واحد ...

بعضها زي لاس فيغاس تسمح بزواج الشاذين والبعض الآخر مايسمح بتعدد الزوجات ويجرمه ...


فكوننا نقول الغرب...ونحكم من هالمعيار ...فإننا مسؤولي عن هالتعميم الكبير

ياإما اننا نقول كل الحقيقة ....والا مانقول نصفها او عشرة بالمية منها ونحكم...

واختي الحبيبة انا مادافعت...وكررت في ردي الثاني اني مادافعت عن المراة الغربية ولاهيب بحاجة للدفاع عنها

ولكني ادافع عن عقلياتنا احنا يالمسلمين اللي تسوّق لها جزء من الصورة الغربية بدون أن تكمل الصورة

وهالصورة مااختلف معاك انها مادية وفيها من البشاعة الشيء الكثير...ولكنها تحمل في طياتها الكثير من القيم مانقدر نختلف عليها

وبالمقابل احنا يالمسلمين بحاجة لمصارحة انفسنا ومحاكمة انفسنا بدلا من محاكمة الاخرين والحكم عليهم ...

لأن محاكمة الاخرين هو صفة الأمم الضعيفة وانا مايرضيني نكون أمم ضعيفة تبني وعيها على احتقار الآخرين واخطائهم بدون ماتنظر في اخطاءها...

لأن الاخرين بكل اختصار مادروا عنا ولاجابوا خبرنا ...


اقوياء ومتجبرين ومسيطرين وهذا مانختلف عليه بكل اسف...

لكن احنا يالأمم الضعيفة ليه مانحاول نكون اقوياء ونبني مجتمعاتنا وسلوكياتنا المسلمة من جديد بدون مانشغل انفسنا بالآخرين سواء بمدح او بذم؟؟؟

شوفي تكفين صورتنا بكل أسف في جرايدهم ينقلونها بحرفنة ومكر وسياسة اعلامية خبيثة ...شوفي قضية رانيا باز كيف جعلوها بقعة ضوء وكيف صنعوا منها قضية عالمية ...وهي قضية فردية ...

وبدل مانحاول نصلح ونستحدث قوانين تحد من العنف الاسري او تعالج الاوضاع السيئة في بعض طبقات المجتمع نشغل انفسنا بتلميع صورتنا قدام انفسنا ...موب قدام الاخر...

ليه لأننا عارفين ان الآخر ماراح ينخدع بأشياء زائفة...

يعني احنا يالمسلمين نقدر نحط صورة عالمة او مفكرة او أو ونقول يامسلمين هذانا انتجنا هالنموذج الحلو...


ونقدر نلعب على الناس بكم قصة عن الانحدار الاخلاقي في الغرب وكم احصائية اغتصاب وكم احصائية اطفال حرام ...واشياء هي موجودة وحقيقية ...ونقول للناس ترا مامثلكم احد احمدوا ربكم انتم مو غربيين ...

بينما توجد قصص مشابهة وافظع تجري في بلاد المسلمين والتعامل معها يتم بحساسية وكتمان وعدم حكمة....ليه لأننا باختصار مايهمنا نحسن اوضاعنا ولكن يهمنا تبقى الصورة اللامعة عنا...

والصورة اللامعة بكل اسف قاعد الاعلام يفضحها...

والصورة الحلوة اللي اجتهدنا نرسمها عن انفسنا ماتمثل الحقيقة الكاملة...ولاتعني اننا مانحتاج للإصلاح والصيانة..

خلينا نروح انا وانتي ونقدم نموذج لمرأة سعودية ناجحة وياكثرهن ياااكثرهن لو مايكفينا الا انموذج حياة سندي ولبنى العتيبي وفاتن خورشيد وسلوى الهزاع وريم الطويرقي وغيرهن من الرائدات والناجحات اللي ماردهن الالتزام بالدين الاسلامي عن الابداع والتفوق (ولعلمك فاتن خورشيد منقبة مو بس محجبة) لو قدمناهم وقلنا يالله ياغرب هذولي بناتنا...


يبي يقولون ايه على العين والراس...لكن ماذا عن النماذج الاخرى؟؟؟

لما نقدم للآخر الغربي المحترف اعلاميا هالصورة ماراح تقنعه ....

لأنه باختصار ماراح ينخدع بنموذج او نموذجين او حتى عشرة في داخل مئات النماذج اللي تعاني واللي تتألم ...واللي بدل مانوجد لها حل رحنا نخبيها ونحاول نخدع انفسنا انها ماهي موجودة...

وهي ماهي دليل على العالم الاسلامي او العربي ...او صورة للتعميم او غيره...

ولكنها نماذج موجودة...وكل مالها تزيد وتكثر....والشمس ماتنحجب بغربال...


وحنا ماسوينا ولا واحد بالمية لتحسين صورتنا ...وبدل ذلك مشغلين انفسنا بسب الغرب والغربيات والعالم الغربي بدل مانحاول اصلاح انفسنا...

ماذا عن احصائيات العنف الاسري اللي اكتشفت مؤخرا وبسبب ان الله سخر هيئة حقوق الانسان لكشف هالجرائم اللي تجري داخل الاسر ؟؟؟

ماذا عن القصص اللي يصعب عليك تصدقين انها تحصل في بلد اسلامي..؟؟؟

نسيتي قصة رهف؟؟؟وصورها في الجرايد والتعذيب اللي تعرضت له من ابوها ومرة ابوها؟؟؟

ولعلمك ترا الهيئة اللي ترأسها جوهرة العنقري جاتها مطالبات من افراد وهيئات عليا بعدم نشر القصص اللي ترد لها على سبيل الستر ....

ولقد كشفت لي هالهيئة عن وجود قصص ورب العالمين لايمكن تصدقينها...يعني اشياء فوق العقل ...

وكلها تجري داخل ديارنا...وفي طبقات محددة من المجتمع ...

وكثير من هالقصص تتم معالجتها بدون قانون...وبعضها لسه مااقفل...

اذكر الشيخ ابراهيم الدويش ذكر في احدى اشرطته عن امراة ارسلت له انها بتنتحر وانها خلاص بس تبي تدري هل يجوز لها الانتحار ولالا...وذكر قصتها اللي تشيب الراس وقام يبكي بشدة وهو يرويها ويقول وولاادري هل المراة هذه على قيد الحياة ام انتحرت فعلا؟؟

وروحي لأي مشرفة تربوية في اي مدرسة ثانوية او متوسط وشوفي اش عندها من القصص الغريبة واللي تستغربين كيف تصدر من اسر مسلمة

طالبات ينضربون ويهانون في بيوتهم وطالبات يعانون من اشياء اشنع من كذه ...بس احنا مجتمع مانبغى نعترف باخطاءنا ليه ؟؟؟

يقولون عشان ماننشر الغسيل...وعشان مانشوه صورتنا..

طب اذا كان فيه عندنا خطأ فإننا المفروض نعالجه مو نستره...

لأنه لو تعالج خلاص اش المشكلة ؟؟؟

لكن التغطية عمرها ماتفيد وهذا كل اللي قصدته من ردي على الاخت ام 2...

اننا ننشغل بانفسنا واصلاح مجتمعاتنا عن نقد المجتمعات الاخرى اللي مادرت عنا ...

لو مايكفينا في ديارنا يااختي شذو الا قتل الابداع وعدم تساوي الفرص حتى امام الاولاد مو بس قدام البنات ...كان كتبنا عن هذا مجلدات...

كذلك عدم وجود فرص متساوية ومتكافئة للعمل ...وهذي مشكلة في البنات والاولاد على حد سواء...


المشاكل ماتخلص ...ولايعني كون اسرنا المسلمة محافظة على الحجاب والقيم والعلاقة الفاضلة بين الجنسين انها ماتحتاج اصلاح او ماتحتاج تطوير او انها مافي مثلها او ان بقية النساء في العالم الآخر منحطات وحقيرات..

اكيد انا وكل وحدة مسلمة عايشة في وسط نظيف ومحافظ على القيم الاسلامية بتفتخر وترفع راسها فوق فوق على هالشي...

لكن ماذا لو نظرنا للطبقات الاخرى والأسر الأخرى اللي ماانعم عليها بنعمة الاستقرار الاسري ومالقت حل لمشاكلها اللي ماتنتهي...لو على الاقل الضرب داخل البيت ....

فهل نقدر نتخبى من هالناس اللي يطالبونا بحل؟؟؟

هذا اللي قصدته اختي شذو وانا اعرف تماما انك فاهمة قصدي زين زييييييين


بيني وبينك اختي شذو وانتي ياام 2 سويت تحرير لردي وكان تحرير رائع مرة واضفت عليه قصص وافكار ولكن مسحه الموقع كان متعطل ....فللأسف هذا اللي قدرت المه من ذيك الافكار :)



سامحيني اختي ام 2 لو كنت آذيت مشاعرك بأي كلمة والحق يقال اني احارب التعميم والأفكار الخاطئة أو الناقصة اللي تروج بين الناس المثقفين ....

لأنه هالأفكار تكوّن تصورات ومشاعر خاطئة يكون من الصعب جدا جدا تجاوزها بعدين ...

اكرر اسفي اخواتي وانتظر ردك اختي الكريمة مآذن ...وان حبيتي عالخاص فكما تحبين ....

خلااااااااااص اتمنى من المشرفات حذف الموضوع انا طلبت قصص معينه مو تدخل كل وحده تقول رأيها في الموضوع عندك شي يخص الموضوع اكتبيه ماعندك رأيك احتفضي به لنفسك بس هاذا طبعنا احنا العرب نموت على الكلام