&& ورد البحرين&& :

اهلين بنات شخباركم؟؟ ان شاءالله كلكم تكونون طيبين.. برد عليكم رد مختصر وعام للجميع لأنه مخي مجيم اليوم ماادري من ويش.. مثل ما قلت وقالت لكم الاخت هديل ما في على نقط الغازات للبيبيات من الصيدلية او من المركز ((اللي في المركز اسمه الينال)) واجد يريحون الاطفال ومامنهم ضرر بأذن الله.. المرقدوش حار على الجهال.. والرضاعة الطبيعية احسن للجاهل من اي شي بس رضاعة والنقط والبيبيات بيكونون تمام.. ثياب مذركير الصراحة ما عليهم كلام, بس يمكن من الغسالة او لأنهم صغار.. احسن شي اذا تبون تغسلونهم تحطونهم في كيس الغسيل سعره خمس ربيات لكن يحافظ على الثياب.. وغسلوا ثياب الجهال بروحهم وبصابون الاطفال.. ولما ينشفون اكووهم وحطوهم في الكبت وشوفوا شلون كأنهم ما انغسلوا من قبل.. وماكس تابع لمذركير وثيابهم نفس الخامة.. التيوب اشتراه لي زوجي من الصيدلية ومافي عليه مريح في القعدة.. واشتراه لي ب عشرة دينار.. شكلهم نصبوا عليه او يمكن لأنه الماني.. ام علاوي : اني ما بشتري سرير للبيبي لأنه اساسا عندي سرير ولدي وكلش نظيف وجديد, وعندي سلة موسى مع الستاند وكنت مشترتنها من مذركير لونها خوخي واخضر وتناسب للاثنين بنت او ولد.. وبعد ما استخدمتها إلا ثلاث شهور واستخدام قليل وحرام اخذ غيرها.. صبرك يا قلبي: مشكورة على صور الفراشات واجد حلوين عليش بالعافية ((شكلش بعد فيش صبي ماادري)).. ماادري من وين اشترى زوجي التيوب لأنه دور كذا صيدلي وما حصل في الاخير ماادري راح لمن.. انتظري اول تولدين طبيعي بالسلامة وانتين في المستشفى طرشيه يشتري لش.. والملحة لا تفكرين ابدا تحطينها داخل لا تسوين لروحش بلاوي.. اني آخر الايام لما حسيت الخيوط بيطيحون كنت اسوي ماي دافي واحط في ملح وبعدين اتوضا فيه يعني من بره لبرة.. وساعات سافلون مخفف بالماي.. وبعدين اجفف نفسي واحط على الجرح كريم مطهر ومخدر عن الالم من المستشفى الحين مو جاي على بالي اسمه.. وواجد ريحني.. ومافي على كوتكس السلمانية مريح للخياط.. كريم ميبو ريحته تقلع الجبد لو الموت ما احط منه.. هو مسوينه من السمسم لكن مااقدر اتحمله لو دوائي فيه ما اشتريه.. اللي سألوا عن التشققات.. يا طويلات العمر هي تعتمد على جسم الوحدة اذا عندش قابلية او لاء.. الترطيب مهم عشان ما يصير عند الوحدة تشقق والترطيب من برى وداخل.. من برى كريمات او زيت زيتون ومن داخل شرب الماء والسوائل.. اني للاسف كنت متحملة بروحي وطول الحمل ما طلع ليي ولا خط.. اخرتها جاتني حساسية فظيعة لما كملت التاسع.. وصادتني بسببها التشققات حتى انهم رقدوني في السلمانية خايفين من التحسس اللي صادني ان الجنين يتوفى ويموت.. والحمدلله ما صاده اي شي.. ضريبة الامومة لازم اتحملها.. الحمدلله على سلامة كل اللي ولدوا.. ويالله انتظر وحدة تبشرني انها جابت بنت.. لا تحبطوني وتقولون محد يجيب بنات..

اهلين بنات شخباركم؟؟ ان شاءالله كلكم تكونون طيبين.. برد عليكم رد مختصر وعام للجميع لأنه مخي...