أهلا يا لوليا الغالية

الله لا يقدر ويطلع عندي مشاغبين .....

بس لو طلع عندي وأكيد ما بيخلى الامر رح جرب نصيحتك

الله يجزيك الخير يا رب ويباركلك بوقتك وصيامك

وكل عام وانتي بخير

اه يا شام خليها على الله .....رح ارجع اكتب الي كنت كاتبته بس متل ما بتعرفي الواحد لما بعيد الكلام ما بيطلع متل اول مرة ....ستي رح حاول والله بعين

انا اول شي تجربتي مع اطفال صغار يعني من 3 سنين الى 6
وكان العدد قليييييل جدا لدرجة ان احيانا ما حدا بيجي غير انا وولادي ....المهم طريقة تدريسي للقران كانت بان اول شي اقرا لهم السورة كاملة وبعدين اول اية واشرحها لهم وبعدين اكررها ثلاث مرات وهنن يرددوا وراي جماعي وبعدين اكررها مرة لكل واحد لوحده وهو يررد وراي وقتها بنتبه على اللفظ والنطق لان متل ما بتعرفي احيانا بيسمعوها غلط وبرددوها غلط او لان في منهم مو عرب ما بيعرفوا ينطقوها صح وهالشي ما بتلاحظيه الا اذا قرأها الطفل لوحده ...وبعدين بخلي كل واحد يقولها لوحده لشوف حفظوها ولا لا

اما بالنسبة للعربي

بالمدرسة كنت اطبع لهم الحرف على ورقة يكون فيها الحرف كبير مشان يلونوه وتحتها فراغ مشان يكتبوه

فكنت انا اول شي اورجيهم الحرف وهو مفصول وهو موصول و اقوله وبعدين اقول لهم صوته واخليهم يقولوا معي وبعدين نجيب امثلة على كلمات اولها تبدا بهذا الحرف " بس طبعا ما حدا كان يجيب غير ولادي لانهم العرب ....يعني ممكن انتي لان في من كل الجنسيات تقولي لهم يعطوكي امثلة كلمات من السور الي حافظينها " وبعدين اعطيهم الورق يلونوا الحرف وهنن عم يقولوه
بعدين اعلمهم طريقة كتابته باغنية او نغمة ...يعني مثلا حرف الباء
بقول لهم

staaaart up
down down
left left left
up up
aaaaaaaaand
النقطة نسيت اسمها بالانجليزي هاهاهاها"
وبعد ما بخلصوا بفتح القران على السورة الي درسناها هذاك اليوم وبخليهم يطلعوا منها الحرف الي اتعلموه

وبعدين بكون محضرة الحرف وكاتبته بخط كبير على ورقة لكل واحد ورقة وبجيب معي لصق ومعكرونة او حيوط مقصقصة او ورق ملون مقصقص مربعات ودوائر وبخليهم يلصقوها على الحرف وكل مرة باخذ ورقة واحد بعلقها على الحيط لتضل قدامهم "وبحس ان هاي والسناك احب الاوقات للطفل"

هذا في المدرسة لكن لما رجعت من السعودية عدت لهم الاحرف كلها من اول وجديد وصرت علمهم ياها مع الحركات


اول شي قلت اخترعت لهم اغنية الحركات وهي

فتحة أأ "وبحطو ايدهم على راسهم يعني فوق الحرف"

كسرة إي "وبحطوا ايدهم على بطنهم يعني تحت الحرف"

ضمة أو "وبمدوا ايدهم وبعدين بيثنوها بحيث تصير مع الجسم مثل شكل الضمة"

مشان تسهل عليهم القراءة

صاروا كل ما اخذوا حرف جديد وعرفوا صوته "طبعا قلت لهم كمان ان لما بكون الحرف بصوته مو متغير فيه شي فهذا حركته اسمها سكووووون " اقول لهم مين الشاطر الي بيحزر اغنية هذا الحرف وهنن بقولوا

مثلا حرف الباء
فتحة با كسرة بي ضمة بو

بالنسبة للكتابة

قلت لهم ان كل الاحرف لما بيجوا ينكتبوا بياخذو ايد الحرفالي قبله الممدودة لهم لكن في احرف بتعطي ايدها وبعضها لا ...مثلا

الالف بتاخذ ايد الحرف الي قبلها لكن ما بتعطي ايدها لاحد

اما الباء فبتعطي ايدها للي بعدها ...بكون شكلها هيك ب مسكرة ايدها لكن اذا اجى حرف بعدها بتمد له ايدها لتمسكه فبتصير هيك بـــ

والجيم نفس الشي اذا مافي حرف بعدها بتنزل ايدها ج اما اذا في بعدها حرف بتمد له ايدها فبتصير هيك جــ

مثال كلمة كتاب

بقول لهم اجت الكاف مدت ايدها للي بعدها.......بعدين اجت التاء اخذت يد الكاف و مدت ايدها للي بعدها ......بعدين اجا الالف اخذ يد التاء بس ما مد ايده لان ما بحب يعطي ايده لحدا فاجت الباء ما لاقت يد ممدودة لها فوقفت جنب الالف بدون ما تمسك فيه وسكرت ايدها ايدها لان مافي حدا بعدها

طبعا انا من السعودية جبت معي كتب فيها صور وصرت ورجيهم الحرف وصور عليه باول ونصف واخر الكلام وصور وامثلة للحرف بالفتحة والكسرة والضمة

وصرت احيانا اورجيهم الصورة وانطق اسمها واخليهم يحزروا شو حركة هالحرف او اقول لهم طلعوا لي حرف الجيم مثلا من الكلمة وقولوا لي شكله "باول او نص او اخر الكلام" وحركته" فتحة او كسرة او ضمة"

وبين كل يوم ويوم بعطيهم كلمات فيها الاحرف الي اخذوها بس وبخليهم يقرؤها وجبت لهم دفاتر صغيرة وصرت اقول لهم كلمة فيها الاحرف الي اخذوها واقول لهم يكتبوها

في البداية عذبوني شوي بس بعدين مشي حالهم ...بس لما رجعوا للمدارس مو بس عذبوني طلعوا روحي وصاروا يكتبوا الحرف من اليسار لليمين ونسيوا وصاروا يلخبطوا فوقفت لهم وما كملت ....وصلوا لحرف الظاء فقلت خليهم يمكنوا الاحرف الماضية وبعدين بكمل لهم

هذا الي عندي ان شاء الله تكوني استفدتي

شغلة اخيرة انا بعد ما بحطهم بتخوتهم للنوم بقرا لهم القران بصوت عالي الفاتحة والكرسي والمعوذات كل وحدة 3 مرات وصرت كل ما بلشوا ياخذوا سورة اقراها لهم بعد المعوذات 3 مرات ولما يحفظوها تمام اصير اقراها بعد المعوذات مرة وحدة واقرا السورة الجديدة الي عم يخفظوها 3 مرات

لاحظت هيك ان بصيروا لما بياخذوا ايه بالسورة الجديدة ما كتير بيستصعبوها لان سامعينها قبل النوم كذا مرة "بعرف هاي ما رح تنفع بالمدرسة بس ملاحظة صغيرة مشان الاخوات وولادهم "

نسيت اقول لك الاطفال خيالهم وااااااسع وبحبوا التمثيل كتير لذلك كل الاداب الاسلامية كنت انا والي معي الله يذكرها بالخير نعلمهم ياها بالتمثيل

يعني مثال ان من اخلاق المسلم الاستئذان عند الدخول
نمثل ان نحن جالسين وواحد يطلع ويدق الباب ويستاذن في الدخول على اساس انه هلا اجا
والايثار مثلا نفس الشي كله بالتمثيل

وصحيح علمتهم انشودة ALLAH is one
ليوسف اسلام ولهلا ما شاء الله حافظينها وقالوها بالسعودية "الحمد لله رفعوا راسي بشغلة هاهاها"

يعني قصدي اذا في وقت ممكن تعلميهم اناشيد عن الاسلام لان الاطفال كتير بحبوا الاناشيد وبيحفظوها بسرعة ... حتى لو معانيها شوي صعبة ومافهموها تماما بكرة بس يكبروا بيتذكروها وبيفهموا معانيها

لله يجزيك الخير غاليتي فتاة سورية .....

والله يعجز القلم عن شكرك وتحملك واعادة الكتابة ....

ردك وكتابتك تشرح الصدر

فجزاك المولى خيرا وأنا ممنونة إلك وللأخوات على نصائحهم

بكرة إإن شاء الله ستكون تجربتي الثانية .. وساحدثكم عما فعلته ... وخصوصا أنني استفدت كثيرا من مشاركاتكم

لا حرمني الله منكم

للرفع