لاتروحي لهنيده نصيحه لوجه الله جربتها اختي ومانقول غير حسبي الله ونعم الوكيل

ياحبيبتي ايش اقولك عن هونيدة

اولا انا ولدت عندها عشان دكتورتي مسافره وغرتني بمعاملتها ومبين عليها انها ملتزمه والكل يقول انها تقرأ عليكي ومن دا الكلام

ووقت الولاده قررتلي طلق صناعي لأنو بدأت على كلامها اخلص شهري للعلم انو هادي ثالث ولاده وماعمرو حصلي كدا يعني حاسه انو الغلط من حسابها هيا

وبعد كدا اعطتني الطلق وشوفت الموت من الالم وسابتني وراحت للمرضى اللي في عيادتها ولمن طلعت وقولتلها بموت من الالم قالت للقابله ليش ما اعطيتيها ابره مهدئه والقابلة تقولها خليها تتعب شويه ؟؟!

وتضحك عادي وتقول لا خلاص اديها الابره .. وتسيبني مرا تانيه وتنزل وبعد كدا انا سرت انادي عليهم لمن حسيت انو الآوان آن بدون متابعتهم حسبي الله عليهم وتجي جري وهيا مربوشه يادوووووب تلحق .. وارتكبت غلط في القص ( يعني قصت زياده ) وهادا كلو عشنها ماكانت متابعتني وقت المخاض زي ماكل الدكاتره يعملو .. بالذات اني في خاص من توسيع وانتباه ليا وقت الدفع .. وغير انها معا الربشه لمن حطتلي الكمامه تبع البنج معا السرعه ماكانت مفتوحه ... يعنــــي حسيت بالآلآم لحظه بلحظه

ووقت الخياطه ماقدرت استحمل وقلتلهم الكمامه مقفوله .. ولمن شغلوها حسيت اني دماغي بينفجر من كتر ماكان البنج قوي ياااااالله دفيت الكمامه بطرف اصباعي .. وهيا مهي منتبها وسامعتها تكلم القابله تقولها لازم ننادي الدكتور وندخلها العمليات كدا محا ينفع الجرح مو زابط .. وسمعتها تقول للدكتور انو هيا متابعتني من البدايه وانو البيبي كان حجمو كبير عشان كدا .. ويشهد الله انو كل كلامها كدب .. وانا دايخه مني قادره اتكلم

وبعد كدا دخلوني عمليه بنج كامل ولما سألتهم انا وزوجي ليش قالو عشان مني قادره اتحمل الم الخياطه .. وعرضوني للبنج الكامل بس عشان الخياطه .. معا العلم اني سمعت الممرضات وهما يتكلمو لمن دخلوني غرفة العمليات انو الغلط من الدكتوره يحسبوني اني نايمه ..

وتاني يوم طالبونا بقيمة الولاده + العمليه تصوري لكن انا ناديتها وواجهتها وقولتلها انو الاغلاط الطبيه وارده نتيجة اهمالك لكن ما اسامحك على كدبك على الدكتور وكمان تغريمك لنا قيمة العمليه

وبلغنا ادارة المستشفى وتجاوبت معانا ... وقعدت اكتر من تلاته شهور اعآني من الخياطه


والآن انا حامل بالطفل الرابع ومقررين لي احتمال كبير اولد قيصري بسبب هادي الغبيه

غير المضاعافات اللي سارتلي بسبب هادي الخياطه

وازيدك من الشعر بيت كل اللي عرفت انهم راحولها من اقاربي من بينهم بكريآت والله يدعوا عليها لأنها عدمتهم ولا كأن الوحده فيهم وآلده طفل واحد

ولو استشاروني ماكنت قصرت


سآمحيني ع الاطاله .. لكن حبيت الجميع يستفيد ودعواتكم لي اني أولد طبيعي ويسخرلي الدكاترةاولاد الحلال

حسبي الله ونعم الوكيل فيها والله وانا اقرا كلامك جسمي اتقشعر الله ياجرك يا اختي على المعاناة وياخذ حقك منها عاجلا غير اجل سبحان الله ام زوجي مره معجبه فيها وتمدحها وتقولي ما شفت دكتوره زيها وتقولي روحي تابعي عندها وانا سبحان الله مو مرتاحه لها ومتردده وقلت خليني اسال اخواتي في عالم حواء ما راح يقصرو الله يسعدهم ان شاء الله
اختي مشكووووووره على ذكر التجربه وان شاء الله ربنا يسهل ولادتك وتولدي طبيعي وتكون اسهل واخف ولاده ويجيكي احلى نونو وتقومي بصحه وعافيه اختي تفائلي وما عليكي من كلام الدكاتره تراهم يبالغو وكمان عشان القيصريه فلوسها اكثر شوفي دكتوره شاطره وروحيلها ودائما ادعي الله في كل وقت انك تولدي طبيعي وتكون سهله واستغفري دائما وان شاء الله ربي ما راح يخيبك حبيبتي احسني الظن بالله وراح ادعيلك ان شاء الله دايما وطمنينا عنك