بنات انا عندي مشكله وااايد متعبتني نفسيا وابيكم تساعدوني فيها

السلام عليكم

بنات انا عندي مشكله وااايد متعبتني نفسيا وابيكم تساعدوني فيها

انا صار لي 5 شهور من تزوجت والحمدلله وااايد مرتاحه من زووجي .. وزوجي هو

ولد خالتي .. بس سبب معاناتي هم اهله ..

المهم

نحن ساكنين عندهم في البيت وعندنا ملحق خاص بنا فوق..المهم انا قبل لا اتزوج ..

كنت اعرف بأن خالتي ام زووجي وااايد عصبيه وتتكلم واااااايد (يعني تحب القيل

والقال بدرجه فظيعه)..واعرف بان محد من حريم عيالها استحملها وكلهم طلعو من

البيت .. بس انا قلت لزووجي قبل الزواج .. حراام أخلي خالتي وأطلع عنها .. لانها

حرمه كبيره في السن واذا انا بنت اختها ما بدير بالي عليها وبقعد عندها منو بيقعد

عندها .. المهم زوجي كان داايما يقولي بان انا ما بستحمل بس انا كنت اعارضه في

الراي واقووله باني بكسبها بطيبتي .. وخالتي عندها بنت كبيره متزوجه .. وانا آ سفه

لاني بقول هالكلام عنها بس غصب عني .. الصراحه بنت خالتي واايد متسلطه

وحقووده وما شفت لين احيين حد يحبها الكل يكرها حتى اخوانها ..

بدايت مشكلتي .. مع حميتي ( اخت زووجي) من اول شهر من رجعنا من شهر العسل

باسبوع قامت تتحرش فيني سواءا بكلامها ولا بحركاتها .. بس انا كنت اسكت لاني

من النوع الكتوم وما احب اسوي المشاكل .. وكنت اصبر واسوي عمري لا كأني

اسمع ولا اشوف .. والمشكله كانت ترووح لامها وتحرضها علي وتقول لها كلام لا

صار ولا استوا .. وتنقلب علي خالتي وما تكلمني وكله تتنازع معي .. واذا كنت ابي

ادافع عن نفسي ما تعطيني فرصه .. وطبعا انا اسكت وما اقوول اي شي.. وانا ما

احب اقوول اي شي لامي المسكينه لاني انا اخافها تضايق و

مابي اعور قلبها ومابيها تحاتيني وماأبي اخبر اي وحده من خواتي باللي فيني

علشان مااحب احد يشفق علي..المهم..المشكله ما اقتصرت على خالتي وحميتي

بس .. بعد عمي الي كنت احبه واعزه .. كان يتكلم عني .. انا كنت دايم اقول كله من

مرته الي تحرضه علي .. بس عرفت بانه هذي اصلا طبيعتهم.. المهم .. مره كان فيه

مشكله بين عمي وبين عياله و انا كنت يالسه في مكاني قام يعصب عليهم كلهم وانا

كنت خايفه اقووم من مكاني عشان ما يقولي شي .. فيوم هدا الوضع شويه انا قلت

بقووم بخليهم برووحهم .. تخيلو شو قالي .. تعالي وين راايحه .. وين زوجك.. قلت له

في الدوام .. قالي بانه قال لزووجي يسويله شي وهو ما سواها وقالي يوم يرجع من

الدوام قومو اطلعو من البيت ورووحو خذوولكم شقه .. تخيلوطردنا من

البيت..تخيلو شو بيكون ردي عليه .. ما قدرت اقووله اي شي ..ورحت فووق اصيح

وانا على فكره حامل في الشهر الرابع والي اعرفه بانه ممب زيين العصبيه حق

الحامل .. المهم قعدت اصيح وقلت في خاطري .. حالت زووجي الماديه صعبه

شوي ..وما بقوله عن الموضووع وبدوس على قلبي لاني بستحمل كل شي علشانه ..

صح اني عمي طردني من البيت بس انا ما بقوول لزووجي اي شي لاني انا الي

اجبرت زووجي بان نعيش في البيت.. المهم..خالتي دايم تتكلم عني عند كل حد عند

عيالها وعند صديقاتها وعند حريم عيالها عني .. مع اني حريم عيالها يعرفونها

عدل .. المهم تقوول عني باني انا ما انزل من فووق .. ولا اشتغل ولا اسوي اي شي

في البيت مع اني والله مرات اكوون تعبانه بس حدي اخر شي الساعه عشر ولا عشر

ونص .. وما اصعد فوق الا بعد ما يرجع زوجي من الدوام الساعه اربع العصر .. اتم

ساعه فوق تقريبا لين ما يرقد وانزل تحت .وبعدين ما اصعد بالليل لين الساعه 12

تقريبا .. وبعد كل هذا الي اسويه ويتكلمون عني ..مع اني والله كنت يالسه في بيت

اهلي معززه مكرمه ..بس ما عليه كل هذا عشان عيوني زوجي.. المهم انا من النوع

الحساس .. مع كل هذا انا حطيت حجر على قلبي واسوي نفسي ما اسمع شي ..

المهم احين صار لي خمس شهور من سكنت عندهم وانا على هالحال..واخر موقف ا

لي صار لي واللي معور قلبي .. مـــــــــن اسبوع تقريبا قومت زووجي حق الدوام

الساعه سبع .. تريق وطلع .. ورقدت انا للساعه عشر .. تخيلو بان عمي ابو

زووجي جاني فوق يدق علي باب الغرفه بكل وحشيه ويصرخ والحمدلله ما كسر

الباب علي وانا راقده ..المهم انا قمت وانا خايفه مب عارفه شو الموضوع ..المهم

نزلت تحت وقام يهزأني لاني راقده لها الوقت ويسمعني كلام اعوذ بالله منه.. والله

كرهت حياتي .. شو تبووني اقوول عقب كل هذا .. تبووني اصبر ولا شووو.. المهم

انا رحت فووق وقلبي واااايد يعورني لين احين .. ومن هذاك اليوم لين احين وانا كله

اصيح .. وزوجي رجع من الدوام وشافني ميته من الصياح بس ما رديت عليه باي

شي بس وخالتي ام زوجي ما خلت حد ما قالت له السالفه.. وزوجي عرف

الموضوع من امه .. وما ادري شو قالت له الصدق ولا كذب .. المهم انا ما قلت

لزووجي غير انه يدبر نفسه ويطلعني من البيت .. وهو يقوول لي بياخذ لي شقه بس

انا رفضت ما ابي شقه .. ابي بيت صغير..المهم هذا كله صار لي واهلي ما

يدروون .. بس انا من 4 ايام وانا في بيت اهلي .. وانا ابوي يبني ويبيع البيوت ..وانا

قلت لزووجي اذا ما يقدر يدور بيت يقوول لابوي .. بس هو مب رااضي يكلمه لين

احين .. بس انا قلت لامي تكلم ابوي بالموضوع .. وقلت لها باني ابا استقر في بيت

بروحي .. وامي مب رااضيه تكلم ابووي ..وانا في خاطري اكلم ابوي واقووله باني ابا

بيت .. بس اخافه يسألني عن السبب .. واخاف انا اقووله كل شي .. .. ارجووكم

انصحوني قولولي شو اسوي .. والله اني وااااااااايد تعبانه نفسيا ..لاني مب قادره

اكلم امي ولا خواتي ولا اخواني ولا صديقتي فقلت مالي غيركم .. والحين انا قاعده

اكتب لكم وانا اصيح .. ارجوكم ابي الرد سريع على موضوعي واسفه باني طولت

عليكم وايد..