بنات حواء ... محتارة وأبي شوركم ...

السلام عليكم ورحمة الله وبركاته


خواتي في الله .. هذي أول مره اكتب فيها موضوع هنا ... واتمنى اشوف رايكم يمكن أطلع من الحيرة اللي انا فيها ... واللي مخليتني مش قادرة اتخذ القرار ...
السالفة وما فيها..فيه شاب متقدم لي وهو غريب عنا يعني ما نعرف اهله من قبل بس علاقه صداقه بيني وبين وحده من اهله وهي اللي شجعتهم انه يتقدمون لي ... واللي عرفته عنه انه ملتزم يعني دين واخلاق ووظيفة زينه وعمره مناسب ...
المهم أهلي رفضوا في البدايه لأنه بتفكيرهم ان اهله وعايلته ما تناسبنا .. طبعا انتو فاهمين شلون تفكير بعض العوايل خاصه في الخليج بالنسبه للنسب ..
يعني ردوا عليهم انه مافي نصيب .. وانا سكت لاني ماقدر اطلع عن شور اهلي حتى لو كان هالانسان احسن واحد ...
السالفه شنو الحين انه هذي هي المره الثانيه اللي يتقدم لي فيها هالشاب ... اللي عرفته من قريبته انه اهله وخاصه امه حابيني وايد ويبوني لولدهم .. وطبعا جات الوالده وقالت لي انهم ردوا مره ثانيه يخطبوني لولدهم وقالت لي كيفج انا ماراح ادخل في الموضوع .. بس والله يا بنات اني حاسه انها مو راضيه 100% وانا صليت مرتين استخاره والله مب عارفه احساسي شنو بالضبط مره احس اني موافقه ومرتاحه بس ارد واقول في نفسي انه اهلي مو راضيين ومابي اطلع من شورهم ...
يعني حلو لما تقبلين على هالخطوه تحسين كل اللي في البيت يشجعونج ومستانسين لج اكثر منج ..
والله لما اسالهم يقولون لي كيفج واحنا ماراح نتدخل ...

والله اني محتاره ومب عارفه شنو اقرر والا الجا لمين ... أنا طبعي خجوله واستحي حتى امي ماقدر اكلمها براحه ...

فديتكم يا بنات حواء ... ادعولي بالتوفيق والله يكتب لي اللي فيه الخير ... وان شاء الله ربي يجزيكم كل خير ...